NEB wʋsg miime tɩ pĩnd wẽndẽ wã, Ezɩpt nebã sẽn da gʋlsd bũmb ning zug n tɩ yɩɩdã ra maana ne papiris. Gɛrk-rãmbã ne Rom nebã me ra gʋlsda bũmb sẽn maan ne papiris zugu. * Nebã sẽn mi n yɩɩd yaa tɩ b tõe n talla papirisã n maan bũmb tɩ b tõe n gʋls a zugu, la b pa mi tɩ b tõe n talla papirisã n maan koom-koglg me ye.

Sẽn yɩɩd yʋʋm 2 500 woto, no-rɛɛs a Ezayi ra pĩnd n togsame tɩ “tẽng ning sẽn be Kuus kʋɩlgã rʋʋnd” neb tʋma “neb tɩ b kẽnd ne koom kogend sẽn maan ne tãnwĩis [bɩ “papiris”] n pɩʋʋgd ko-kãsengã.” Kaoosg zugẽ, no-rɛɛs a Zeremi togsame tɩ Meed la Pɛrs nebã sã n wa na n sãam Babilonne, b na n yõoga Babilon nebã “koom-kogend nins sẽn maan ne rudmã [bɩ “papiris],” tɩ b ra tõog n zoe n põs ye.—Eza. 18:1, 2; Zer. 51:32, MN.

Biiblã yaa Wẽnnaam n vẽneg tɩ b gʋlse. Woto yĩnga, tẽn-vaeesdbã sẽn wilg tɩ pĩnd wẽndẽ wã, b ra tara papirisã n maand koom-kogendã pa lingd neb nins sẽn zãmsd Biiblã ye. Yaa bõe la tẽn-vaeesdbã vaees n yã? B yãame tɩ pĩnd wẽndẽ wã, b ra tara papirisã n maand koom-kogend Ezɩpti.

Ezɩpt nebã yaadã lalsã zutu, b maana desẽ-rãmb sẽn wilgd neb sẽn kɛ papirisã raad n maand koom-kogendo. Nebã ra keeda raadã n loe kil-kila. Rẽ poore, b wʋkda kilã b sẽn loe wã n naag fãa taab n sẽbe. Papirisã raad tara magd a tã bɩ kogs a tãabo. Rẽ n so tɩ b sã n sẽbg-b kãn-kãe n naag taaba, tara pãng hal wʋsgo. Sebr a ye sẽn gomd Ezɩpt nebã kʋdemdã yɛl yell pʋgẽ, b yeelame tɩ koom-kogend sẽn maan ne papiris woglem tõe n taa metr 17, tɩ b tõe n ning raad 10 bɩ 12 a kɩreng fãa tɩ b tar n gaad koomã.

Ezɩpt tẽngã, papiris wʋsg ra yita Nill kʋɩlgã bãoogẽ. Sẽn paase, koom-kogendã maaneg ne papirIsã ra yaa nana n yɩɩda. Baa sẽn wa n lebg raad la b tar n maand koom-kogend-bɛdã, zĩm-yõgdbã la tãoos-rãmbã ra ket n kẽeda koom-kogend-bõones sẽn maan ne papiris.

Nebã ra ket n kẽeda koom-kogend sẽn maan ne papirisi, n kaoos hal yʋʋm wʋsgo. Gɛrk seb-gʋlsd a ye yʋʋr sẽn boond t’a Plitark sẽn vɩɩmd pipi kiris-nebã wakatẽ wã yeelame tɩ wakat kãnga, nebã ra ket n kẽeda koom-kogend sẽn maan ne papiris.