1. Bõe la a Zeova maan n kõ tõnd ned kam fãa?

A ZEOVA taka tõnd ned kam fãa n wa a nengẽ. (Zã 6:44) Tags-y n ges-y rẽ sẽn dat n yɛɛlga. A Zeova sẽn maag a yĩng n fees neb milyaar-dãmbã fãa sẽn be dũniyã zugã sũyã, a yãa bũmb sẽn tar yõod wʋsg yãmb nengẽ. A yãame tɩ y yaa pʋ-peelem soaba, la tɩ y tõe n wa nong-a lame. (1 Kib. 28:9) A Zeova mii yãmba, n wʋmd y yɛlã võore, la a nong yãmba. Woto sɩd kengda raoodo!

2. A Zeezi rɩka makr ne bõe, n na n wilg tɩ tõnd ned kam fãa yell paka a Zeova?

² Yãmb yell sɩd paka a Zeova hal sõma. Y tẽed-n-taasã me yell pak-a lame. Sẽn na yɩl n wʋm rẽ võore, a Zeezi rɩka a Zeova n mak ne pe-kɩɩma. Piis koabg sʋk tɩ pesg a ye sã n meneme, bõe la pe-kɩɩmã na n maane? A na n “basa pis-wɛ la a wɛ wã tãensã zutu, la a kẽng n tɩ gẽes sẽn menem-a wã.” Pe-kɩɩmã sã n wa yãnd pesgã sẽn da menemã, a pa yikd a sũur ne-a ye. A na n kɩdma sũ-noogo. Woto wilgda tõnd bõe? Tigingã ned fãa tara yõod a Zeova nifẽ. A Zeezi yeelame: “M Ba sẽn be saasẽ wã pa rat tɩ baa kom-bõon-kãensã nin-yend sãam ye.”—Mat. 18:12-14.

3. Bõe yell la d na n gom sõs-kãngã pʋgẽ?

³ D pa tol n dat n maan bũmb sẽn na n koms d saam-biig bɩ d saam-bi-poak raood ye. Bõe la d tõe n maan n da wa kɩt tɩ d to lak n lʋɩ? La ned sã n wa maan tɩ d sũur sãame, bõe la d tõe n maane? D na n leoka sogs-kãensã sõs-kãngã pʋgẽ. Bɩ d reng n bao n bãng “kom-bõon-kãensã” yell b sẽn gomd Matiye sak 18 pʋgẽ wã sẽn yaa b rãmba.

4. “Kom-bõon-kãensã” yaa ãnd dãmba?

⁴ “Kom-bõon-kãensã” yaa a Zeezi karen-biisã fãa, baa b yʋʋmã sẽn yaa to-to. B sẽn sak t’a Zeezi zãmsd-bã yĩnga, b yaa “kom-bõonego,” baa b yʋʋmã sẽn yaa to-to. (Mat. 18:3) Baa b sẽn yit tẽns toor-toor la b yaa buud toɛy-toɛy nebã, tɩ b tagsa wã ne b zʋgã me pa yembrã, b fãa tẽeda a Zeezi, t’a Zeezi me nong-b wʋsgo.—Mat. 18:6; Zã 1:12.

5. Ned sã n maan t’a tẽed-n-taag lak n lʋɩ wall a sãam a sũuri, a Zeova manesem yaa wãn to?

⁵ “Kom-bõon-kãensã” fãa tara yõod wʋsg a Zeova nifẽ. Sẽn na yɩl n wʋm rẽ võor sõma, bɩ d ges tõnd mengã tagsg sẽn yaa a soab ne kambã. B tara yõod wʋsg d nifẽ. Tõnd dat n kogl-b lame, bala b pa tar pãnga, minim la yam wa kãsembã ye. Yaa vẽeneg tɩ d sã n neẽ tɩ b namsd neda, sãamda d sũuri. La sã n yaa biig la b namsda, sãamda d sũur n yɩɩda. Woto me, a Zeova rat n kogl-d lame. Ned sã n maan t’a tẽed-n-taag lak n lʋɩ wall a sãam a sũuri, sãamda a Zeova sũuri, la pʋd n yikd a sũur menga.—Eza. 63:9; Mark 9:42.

6. Sẽn zems ne 1 Korẽnt rãmb 1:26-29 wã, wãn to la dũniyã nebã get a Zeezi karen-biisã?

⁶ Wãn to me la a Zeezi karen-biisã yaa wa ‘kom-bõonego’? Ãnd rãmb la dũniyã rãmb get wa neb sẽn tar yõodo? Yaa ra-kãag-rãmbã, neb nins yʋy sẽn yi, la dũniyã nin-kãsemsã. La b geta a Zeezi karen-biisã yẽ wa neb sẽn pa tar yõodo, wa ‘kom-bõones’ sẽn ka võore. (Karm-y 1 Korẽnt rãmb 1:26-29.) La a Zeova yẽ tagsg pa woto ye.

7. A Zeova ratame tɩ d tagsg yɩ wãn ne d tẽed-n-taasã?

⁷ A Zeova nonga neb nins fãa sẽn tũud-a wã, b tũud-a-la na maan yʋʋm wʋsgo, wall b nan sɩnga a tũubu. D tẽed-n-taasã fãa tara yõod a Zeova nifẽ. Rẽnd b segd n talla yõod tõnd me nifẽ. D segd n ‘nonga saam-biisã fãa,’ la pa b sʋkã neb kẽer bal ye. (1 Pɩy. 2:17) D segd n tʋll n maana d sẽn tõe fãa n kogl-ba, la d ges b yelle. D sã n wa bãng tɩ d sãama d tẽed-n-taag sũuri, bɩ tɩ d beeg-a lame, d pa segd bal n yeel tɩ saam-biigã sũur yikda tao-tao, t’a segd n kõ-d-la sugri, n kell n bas yellã woto n pa welg-a ye. Bõe n tõe n wa kɩt tɩ ned getẽ tɩ b beeg-a lame? B sẽn wub kẽer to-to wã kɩtame tɩ b tagsdẽ tɩ b ka võor ye. Kẽer nan sɩnga a Zeova tũubu. B pa mi tɩ ned sã n beeg-ba, b segd n kõo sugr ye. Sẽn yaa to-to fãa, d segd n maana d sẽn tõe fãa tɩ laafɩ leb n zĩnd d sʋka. Sẽn paase, ned sũur sã n yikd tao-tao a taabã manesem yĩnga, rẽnd a sak n deeg t’a segd n modg n toeemame. A sã n maan woto, a na n paama sũ-noogo, la zems-n-taar na n zĩnda yẽ ne a tẽed-n-taasã sʋka.

8. A Zeezi wakatẽ nebã tags-bʋg la a karen-biisã me ra tara?

⁸ Bõe yĩng t’a Zeezi gom “kom-bõon-kãensã” yelle? Daar a ye a karen-biisã sok-a-lame yaa: “Sɩd-sɩda, ãnda soab n yaa kãseng n yɩɩd saasẽ Rĩungã pʋgẽ?” (Mat. 18:1) Wakat kãnga, zʋɩf-rãmbã wʋsg ra nonga naamã la yʋʋrã. Ad bãngd a ye sẽn yeele: “B ra getame tɩ bũmb sẽn tar yõod n tɩ yɩɩd b vɩɩmã pʋgẽ, yaa yʋʋre, waoogre, la nebã pẽgre.”

9. Bõe la a Zeezi karen-biisã ra segd n maane?

⁹ A Zeezi ra miime t’a karen-biisã segd n modga wʋsgo, n tõog n zãag b mens ne wags-taabã sẽn da yaa minung sẽn tar  pãng zʋɩf-rãmbã nengẽ wã. A yeel-b lame yaa: “Bɩ ned ning sẽn yaa kãseng yãmb sʋkã yɩ wa yãmb yao-zʋʋga, tɩ ned ning sẽn lʋɩt yãmb taoorã yɩ wa yãmb tʋm-tʋmda.” (Luk 22:26) D sã n ‘tagsdẽ tɩ neb a taabã yɩɩda tõndo,’ d wilgdame tɩ d yaa “yao-zʋʋga.” (Fili. 2:3) D sã n nong n tagsd woto, na n yɩɩ nana tɩ d ra maan tɩ neb a taabã wa lak n lʋɩ ye.

10. Sagl-bʋg la a Poll kõ tɩ d segd n tũ ne d sũur fãa?

¹⁰ Bũmb kẽer wɛɛngẽ, d saam-biisã fãa yɩɩda tõndo. D sã n nong n tagsd b zʋg-sõma wã yell n yɩɩda, na n yɩɩ nana tɩ d sak n deeg rẽ. D segd n tũu saglg ning tʋm-tʋmd a Poll sẽn kõ Korẽnt kiris-nebã ne d sũur fãa. A yeelame yaa: “Ãnda n kɩt tɩ fo yaa toor ne f taabã? Sɩd-sɩda, bõe la fo tar tɩ pa b sẽn kõ-fo? Sã n mikame tɩ b kõo foo bõn-kãnga, bõe yĩng tɩ fo pẽgd f meng wa b pa kõ foom?” (1 Kor. 4:7) D segd n gũusame n da wa rat tɩ d taabã pẽgd tõndo, wall d wa tagsdẽ tɩ d yɩɩda d taabã ye. Wala makre, saam-biig sã n tõe n wɛgs sõsg tɩ kẽ nebã sõma, bɩ saam-bi-poak sã n tar minim n tõe n sɩng Biibl zãmsg ne nebã nana-nana, b yiibã fãa segd n wilgame tɩ yaa a Zeova n segd ne pẽgrã.

11. Yam-bʋg la d tõe n dɩk a Zeezi sẽn dɩk makr n gom rĩm ne a yamb yellã pʋgẽ?

¹¹ A Zeezi sẽn sagl a karen-biisã tɩ b gũus n da wa kɩt tɩ ned lak n lʋɩ wã poor bala, a rɩka makr n gom rĩm ne a yamb yelle. Yambã ra tara rĩmã sam-kãseng a sẽn da pa tol n tõe n yao, tɩ rĩmã bas samdã taale. Rẽ poore, yambã yemb-taag n da tar a samd sẽn pa zem baa fʋɩ, t’a zãgs t’a kõn bas samdã taal ye. Rĩmã wa n kɩtame tɩ b kẽes yemb-kãngã sẽn pa tar nin-bãan-zoeerã bãens roogo. Yam-bʋg la d tõe n dɩk rẽ pʋgẽ? Ad a Zeezi sẽn yeele: “Yaa woto la m Ba sẽn be saasẽ wã me na n maan yãmba, y sã n pa kõ y saam-biig sugr ne y sũur fãa.”—Mat. 18:21-35.

12. D sã n zãgs tɩ d kõn kõ d taabã sugri, wãn to la rẽ tõe n nams-ba?

¹² Yambã manesem pa nams yẽ bal ye. Namsa a taabã me. Pipi, yambã namsa a yemb-taagã, a sẽn tall-a n “tɩ kɩt tɩ b pag bãens roogo, n gũud a sẽn na n wa tõog n yao a samdã.” Yiibu, yembs a taabã “sẽn yã rẽ wã, b sũy sãama wʋsgo.” Woto me, tõnd yel-manesem tõe n namsa d taabã. Ned sã n sãam d sũur tɩ d zãgs tɩ d kõn kõ-a sugri, tõe n baasa wãna? Pipi, d sãamda a soabã sũuri, d sẽn zãgs tɩ d kõn kõ-a sugri, n gind-a la d pa le rat n wilg-a d nonglmã yĩnga. Yiibu, tigingã neb sã n neẽ tɩ laafɩ pa le be tõnd ne nin-kãng sʋka, sãamda b sũuri.

13. Yam-bʋg la d tõe n dɩk so-pakd a ye kibar pʋgẽ?

¹³ D sã n kõt d saam-biisã sugri, nafda tõnd mengã, la nafd d taabã me. Saam-bi-poak a ye sẽn yaa so-pakd t’a yʋʋr boondẽ t’a Kiristɛll bãnga rẽ vẽenega. Tigingã pʋgẽ, saam-bi-poak n sãam a sũuri. Ad a Kiristɛll sẽn yeele: “Wakat ninga, saam-bi-poakã gom-kãsã ra yaa wa sʋʋg sẽn kõsd maam. M da pa rat meng n tũ-a n moon koɛɛgã ye. M yẽesmã la m sũ-noogã sɩnga boogre.” A Kiristɛll da getame t’a sũurã sẽn sãam woto wã, a bee bʋʋm. La a pa kell n tall sũ-kẽk ne saam-bi-poakã, bɩ n kisg-a ye. A sika a meng n tũ saglg ning sẽn be yʋʋmd 1999 zĩ-likr kiuug rasem 15 Gũusg Gasgã pʋgẽ, sõsg ning gom-zug  sẽn yaa: ‘Kõt-y sugr ne y sũur fãa.’ A kõo a saam-bi-poakã sugri. A yeelame: “Masã m bãngame tɩ d fãa modgdame n na n yeelg nin-paalgã wa fuugu, la t’a Zeova kõta d fãa sugr beoog sẽn vẽeg fãa. Yaa wa b sẽn dok zɩɩb-kãseng m bãgdã zugu. M le paama m sũ-noogã.”

14. Sẽn zems ne Matiye 18:21, 22, wõnda zu-loe-bʋg la tʋm-tʋmd a Pɩyɛɛr ra tara, la a Zeezi sẽn leok-a to-to wã wilgdame tɩ bõe la y segd n maane?

¹⁴ D segd n kõta sugri. Woto pʋd n yaa bũmb sẽn segde. La rẽ tõeeme n pa yɩ nana ye. Tõe tɩ tʋm-tʋmd a Pɩyɛɛr me ra mi n getame tɩ woto maaneg pa nana ye. (Karm-y Matiye 18:21, 22.) Bõe n tõe n sõng-do? Pipi, tags-y n ges-y a Zeova sẽn kõ yãmb sugr wʋsg to-to wã. (Mat. 18:32, 33) D pa segd ne a sugrã ye. La baasgo, a kõta tõnd sugr ne yamleoogo. (Yɩɩn. 103:8-10) Woto wã, “tõnd me segd n nonga taaba.” Dẽnd sugrã kũun yaa bũmb sẽn yaa tɩlɛ. D segd n kõta d tẽed-n-taasã sugri. (1 Zã 4:11) Yiibu, maag-y y yĩng n tags sugrã kũun sẽn nafd to-to wã yelle. Woto tõe n sõnga sẽn beeg-a tõndã, n paas tigingã zems-n-taare, n kɩt tɩ d zoodã ne a Zeova pãng paase, la kɩt me tɩ d yam gãand bãane. (2 Kor. 2:7; Kol. 3:14) Sẽn na n baase, pʋʋs-y-yã a Zeova, soab ning sẽn dat tɩ d kõt taab sugrã. Ra bas-y t’a Sʋɩtãan sãam laafɩ ning sẽn be yãmb ne y tẽed-n-taasã sʋkã ye. (Efɛ. 4:26, 27) D sã n pa rat n lʋɩ a Sʋɩtãan bẽdgã pʋgẽ, yaa tɩlɛ tɩ d bao a Zeova sõngre.

15. Wa Kolos rãmb 3:13 sẽn yetã, d saam-biig sã n maan bũmb tɩ sãam d sũur wʋsgo, bõe la d tõe n maane?

¹⁵ La y tẽed-n-taag sã n maan bũmb tɩ namsd yãmb wʋsgo, bõe la y segd n maane? Maan-y y sẽn tõe fãa tɩ laafɩ  kell n zĩnd y sʋka. Pʋʋs-y-yã a Zeova n togs-a sẽn be y sũurẽ. Kos-y-yã-a t’a sõng sẽn beeg-a yãmbã, la a sõng-y tɩ y ges a soabã zʋg-sõma wã n yɩɩda, zʋg-sõma nins sẽn kɩt t’a Zeova nong-a wã. (Luk 6:28) Y sã n pa tõe n bas taale, tags-y y sẽn na n maan to-to n tɩ gom ne-a n welg yellã. Yaa sõma tɩ wakat fãa bɩ y ning y yamẽ tɩ saam-biigã sẽn sãam y sũurã pa ne pʋ-toog ye. (Mat. 5:23, 24; 1 Kor. 13:7) Y sã n wa gomd ne y saam-biigã, bɩ y ra tol n dɩk yam-wẽng n dogl-a ye. La a sã n pa rat n bao laafɩ? Bɩ y “ket n maand sũ-mar” ne-a, la y ra koms raood n bas ye. (Karm-y Kolos rãmb 3:13.) Sẽn yɩɩd fãa, ra tall-y sũ-kẽk ne-a ye. Bala woto tõe n sãama yãmb ne a Zeova zoodã. Ra tol-y n bas-y tɩ baa fʋɩ kɩt tɩ y lak n lʋɩ ye. Woto, y wilgdame tɩ y nonga a Zeova n yɩɩd bũmb fãa.—Yɩɩn. 119:165.

16. Bõe la tõnd ned kam fãa segd n maane?

¹⁶ D sũur nooma d sẽn paam n naag d tẽed-n-taasã n tũud a Zeova, n yaa “yãgr a yembre,” n tar “pe-kɩɩm-yɛngã.” (Zã 10:16) Organisés pour faire la volonté de Jéhovah sebrã neng 165 yetame: “Zems-n-taar sẽn be yãmb ne y tẽed-n-taasã sʋkã sẽn nafd yãmbã, y segd n modgame tɩ baa fʋɩ ra sãam-a ye.” Rẽ n so tɩ d segd n “modg n get d saam-biisã wa a Zeova sẽn get-b to-to wã.” Tõnd fãa yaa ‘kom-bõones’ sẽn tar yõod wʋsg a Zeova nifẽ. Yaa woto la yãmb me get y tẽed-n-taasã bɩ? A Zeova nee bũmb nins fãa y sẽn maand n na n sõng-b la y ges b yellã, t’a sũur noom ne rẽ.—Mat. 10:42.

17. Bõe la d segd n yãk yam n maane?

¹⁷ D nonga d tẽed-n-taasã. Woto wã, “bɩ d modg n da tol n maan bũmb sẽn tõe n kɩt tɩ saam-biig lak n lʋɩ wall a bʋdg ye.” (Rom. 14:13) D getẽ tɩ d saam-biisã yɩɩda tõndo, la d sakd n kõt-b sugr ne d sũur fãa. Bɩ d ra bas tɩ neb a taabã manesmã kɩt tɩ d lak n lʋɩ ye. D pʋd n yãk yam, n “baood bũmb nins sẽn wat ne laafɩ wã, la bũmb nins sẽn sõngd tɩ d fãa tẽebã pãng paasdẽ wã.”—Rom. 14:19.