A Poll yeelame: “Tõogã maasem yĩnga, mam kii tõogã yĩnga, sẽn na yɩl n lebg vɩɩg Wẽnnaam yĩnga.”—Gal. 2:19.

A Poll yeela woto n na n sõng tigims nins sẽn da be Galasi sẽn yaa Rom porvẽnsã tɩ b bãng bũmb sẽn tar yõod wʋsgo. Kiris-neb kẽer sẽn da be beenẽ ra sakda ziri karen-saam-dãmbã zãmsgã. Karen-saam-kãensã ra zãmsda nebã tɩ sẽn na yɩl n paam fãagre, yaa tɩlɛ tɩ b tũ a Moyiiz tõogã, sẽn yɩɩd fãa bãongã kõomã. La a Poll ra miime tɩ Wẽnnaam nifẽ, bãongã kõom pa le yaa tɩlɛ ne kiris-nebã ye. A Poll maaga a yĩng n sõs ne-ba, n na n wilg-b vẽeneg tɩ karen-saam-kãensã sẽn zãmsd nebã bũmb ninsã yaa ziri, la a sõng-b tɩ b kell n tall tẽeb sẽn tar pãng ne a Zeezi Kirist kũumã sẽn yɩ maoongã.—Gal. 2:4; 5:2.

Biiblã yeta vẽeneg tɩ ned sã n ki, a pa le mi bũmbu, d pa tõe n maan baa fʋɩ me n sõng-a ye. (Koɛ. 9:5) Woto wã, a Poll sẽn yeel tɩ “mam kii tõogã yĩngã,” a ra rat n yeelame t’a Moyiiz tõogã pa le tar pãng yẽ zug ye. A ra kɩsa sɩd t’a sẽn tẽed a Zeezi kũumã sẽn yɩ maoongã, a ‘lebga vɩɩg Wẽnnaam yĩnga.’

Yaa “tõogã maasem yĩng” la a Poll yɛlã sẽn toeem woto wã. Wãn to? A ra zoe n wilgame tɩ “pa tõogã tʋʋm maasem yĩng la ned paamd tɩ Wẽnnaam yeel t’a yaa tɩrg ye. Yaa a sẽn tẽed a Zeezi Kiristã maasem yĩng bala.” (Gal. 2:16) Dẽnd bũmb sẽn da tar yõod wʋsg n paam pidsg tõogã maasem yĩnga. A Poll wilga Galat kiris-nebã tɩ “b paas-a-la pʋlengã n na n kɩt tɩ yel-wẽnã lebg vẽenese, hal n tãag yagengã sẽn yaa soab ning b sẽn da pʋlem pʋlengã waoongo.” (Gal. 3:19) Sɩd me, tõogã ra wilgame tɩ ninsaalbã sẽn pa zems zãng la b yaa yel-wẽn-maandbã pa tõe n tũ tõogã kɛpɩ-kɛpɩ, la tɩ yaa tɩlɛ tɩ b paam maoong sẽn zems zãnga. Tõogã sõnga nebã tɩ b bãng “yagengã,” rat n yeel tɩ Kiristã. Ned sã n wilgdẽ t’a tẽeda a Zeezi Kiristi, a tõe n lebga tɩrg Wẽnnaam nifẽ. (Gal. 3:24) A Poll ra lebga tɩrg Wẽnnaam nifẽ, bala tõogã maasem yĩnga a saka a Zeezi la a ra tẽed-a. Dẽnd d tõe n yeelame t’a “kii tõogã yĩnga,” n lebg “vɩɩg Wẽnnaam yĩnga.” Tõogã ra pa le tar pãng a Poll zug ye. Yaa Wẽnnaam n da tar pãng a zugu.

Lɛtr ning a Poll sẽn gʋls n tool Rom kiris-nebã pʋgẽ, a goma bũmb a woto yell me. A yeelame: “M saam-biisi, yãmb me kii Tõogã wɛɛngẽ Kirist yĩngã maasem yĩnga . . . Tõnd paama d mens ne Tõogã, bala bũmb ning sẽn da so tõndã wɛɛngẽ tõnd kiime.” (Rom. 7:4, 6) Vɛrse-kãngã, ne Galat rãmb 2:19 wã pʋgẽ, a Poll ra pa gomd a sẽn na n ki, tõogã sẽn da wilgd t’a tara taal a sẽn yaa yel-wẽn-maandã yĩng ye. A ra gomda a sẽn paam a mengã yelle. Dẽnd tõogã ra pa le tar pãng yẽ la kiris-neb a taab sẽn paam vʋʋsem sõngã zaeeb wa yẽ wã zug ye. B ra paama b mense, b sẽn tẽed Kiristã maoongã yĩnga.