HAL pĩnd wẽndẽ wã, Israyɛll nebã ra kõta ligd n teend tũudum hakɩɩkã. La a Zeezi wakatẽ wã, zʋɩf-rãmbã ra segd n yaoo lampo toor-toore, hal tɩ ra lebg zɩɩb ne-ba.

Zʋɩf buudã rao fãa sẽn yaa kãsem ra segd n yaoo darkem a yiib lampo, sẽn na yɩl n teel sɛk-roogã la wẽnd-doogã tʋʋma. A Zeezi wakatẽ wã, b ra yaooda lampo-kãnga, sẽn na yɩl tɩ b tõog n maand maando, la b get wẽnd-doog ning a Erood sẽn me wã yelle. Zʋɩf-rãmb kẽer ra soka a Pɩyɛɛr n na n bãng a Zeezi tagsg lampo kãng yaoobã wɛɛngẽ. La a Zeezi pa wilg tɩ pa zems tɩ b yao ye. A pʋd n wilga a Pɩyɛɛr a sẽn na n maan to-to n paam ligd n tɩ yao.—Mat. 17:24-27.

Pĩnd wẽndẽ wã me, Wẽnnaam nin-buiidã ra segd n kõo piig-pʋɩɩr sẽn yaa lampo buudã. Rat n yeel tɩ b ra segd n pʋɩɩ b koodã bɩ b paoongã zĩis piiga, n yãk a ye n kõ. (Maan. 27:30-32; Sõd. 18:26-28) Tũudmã taoor dãmb ra yetame tɩ yaa tɩlɛ tɩ nebã kõ zẽ-vãad buud fãa piig-pʋɩɩre, baa ne “mante, anɛt la kumẽ.” A Zeezi pa gom n sãbs piig-pʋɩɩrã ye. La a wilgame tɩ gʋlsdbã la Fariziẽ-rãmbã yaa zãmb dãmba.—Mat. 23:23.

Wakat kãnga, zʋɩf-rãmbã ra segd n yaoo Rom dãmbã lampo buud toor-toore, bala ra yaa bãmb n da rɩt naam nin-buiidã zugu. Wala makre, ned sã n da so zĩiga, a ra segd n yaoo lampo sẽn da tõe n yɩ ligd bɩ teedo. B geelame n mik tɩ 100 zugu, yaoodã ra tõe n yɩɩ 20 n digd 25. Sẽn paase, zʋɩf buudã ned fãa ra segd n yaoo yõor-yaoodo. Yaa yaood-kãng wɛɛngẽ la Fariziẽ-rãmbã sẽn sok a Zeezi sokrã. A leok-b lame, tɩ wilgd tõnd tagsg sẽn segd n yɩ a soab lampo wã wɛɛngẽ. A yeelame: “Bɩ y kõ a Sezaar bũmb nins sẽn yaa a Sezaar dẽndã, la y kõ Wẽnnaam bũmb nins sẽn yaa Wẽnnaam dẽndã.”—Mat. 22:15-22.

Nebã ra yaooda lampo, teed nins fãa b sẽn da kẽesd soolmã pʋgẽ bɩ b sẽn talld n yitã yĩnga. Ra yaa batayo-rãmbã yalsg zĩisẽ, põ-rãmbẽ, zĩis so-bɛd sẽn yekd taaba, bɩ tẽnsã wall raasã noy la b ra yaood lampo-kãnga.

Lampo buud toor-toorã Rom dãmbã sẽn kɩt tɩ nebã ra yaoodã ra looga nugu, hal tɩ ra lebg zɩɩb ne nebã. Kʋdemd yel-mit a Tasit sẽn da yaa Rom nedã wilgame tɩ Rom naab a Tɩbɛɛr sẽn wa n dɩt naam a Zeezi sẽn wa n be tẽngã zugã, “Siri la Zide nebã kosame sẽn na yɩl tɩ b boog b lampo-rãmbã, bala ra looga nugu.”

Yaood dɛɛgdbã ra kɩtame tɩ nebã yaood tɩ yɩɩgd b sẽn sõmb n yao wã. Ned sã n da rat n yɩ yaood dɛɛgda, a ra segd n deng n kõo ligd wʋsgo, tɩ b yaool n kõ-a tʋʋmdã. Rẽ poore, nin-kãng rɩkda neb tɩ b saad n deesd yaoodã, tɩ b fãa tʋmd tʋʋm-kãng n dokd yõodo. Wõnda a Zase ra tara yaood dɛɛgdb sẽn da tʋmd n kõt-a. (Luk 19:1, 2) Dẽnd pa zaalem la nebã sẽn da kis yaood dɛɛgdbã ye.