1. Bõe yĩng tɩ d tõe n yeel t’a Sʋɩtãan yaa wa tãoosa?

TÃOOS sẽn dat bala, yaa a paam n yõk rũng ning a sẽn datã, wall a kʋ-a. A tõe n tũnuga ne bẽds buud toor-toore, wala makre, a Zoob ziri-be-zo-rãmbã sẽn gom b rãmb nins yellã a yembre. (Zoob 18:8-10) Wãn to la tãoos tõe n belg rũng t’a wa lʋɩ a bẽdgẽ? A maagda a yĩng n bao n bãng rũngã yel-manesem, a sẽn kẽnd zĩig ningã, a sẽn nong bũmb ninsã, la a sẽn tõe n tall bẽdg ning n bẽd rũngã n paame. A Sʋɩtãan yaa wa tãoos a woto buudu. A maagda a yĩng n bao n bãng d yel-manesem, d sẽn nong n kẽnd zĩis ninsã, la bũmb nins sẽn noom-dã. Rẽ poore, a baooda bẽdg sẽn na n ling-du, n saagdẽ tɩ na n yõk-d lame. La Biiblã yetame tɩ baa a Sʋɩtãan bẽdg sã n yõk-do, d tõe n yii a bẽdgã pʋgẽ. A leb n wilgda d sẽn tõe n maan t’a ra wa paam-d n yõk ye.

2. A Sʋɩtãan bẽds a yiib me sẽn yõgd n tɩ yɩɩd la bʋse?

² A Sʋɩtãan bẽds a yiib me sẽn yõgd n tɩ yɩɩd yaa wuk-m-mengã la rat-tɩ-loogã. * Sẽn na maan yʋʋm tusa, a Sʋɩtãan tõog n bẽda ninsaalbã ne zʋg-wẽn-kãensã n yõke. A yaa wa liuun-bẽt sẽn bẽt liuul ne tãooga, wall ne gãmbr n yõkdẽ. (Yɩɩn. 91:3) La pa tɩlɛ tɩ d bas t’a Sʋɩtãan yõk-d ye. Bõe yĩng tɩ d yet woto? Bala a Zeova vẽnega tõnd tɩ d bãng a Sʋɩtãan sɩlem toor-toorã.—2 Kor. 2:11.

3. Bõe yĩng t’a Zeova kɩt tɩ b gʋls neb kibay Biiblã pʋgẽ?

³ Bũmb a ye a Zeova sẽn maan n keoogd tõnd ne wuk-m-mengã la rat-tɩ-loogã, yaa a sẽn kɩt tɩ b gʋls neb sẽn lʋɩ bẽd-kãens pʋgẽ kibay tɩ d tõe n dɩk yam rẽ pʋgẽ wã. D na n yãa a Sʋɩtãan sẽn maan to-to n tõog n bẽd baa neb sẽn tũ  a Zeova hal n kaoos yʋʋma. Woto rat n yeelame tɩ tõnd pa tõe n pa yɩ wuk-m-mens rãmb la rat-tɩ-loog rãmb bɩ? Ayo. A Zeova kɩtame tɩ b gʋls kiba-kãensã Biiblã pʋgẽ, “n na n keoog tõndo.” (1 Kor. 10:11) A miime tɩ d tõe n dɩka yam neb kibay pʋsẽ, n tõog n põs a Sʋɩtãan bẽdsã.

4. D sã n yaa wuk-m-meng soaba, bõe n tõe n paam-do?

⁴ A Sʋɩtãan ratame tɩ d lebg wuk-m-mens rãmba. A miime tɩ d sã n lebg wuk-m-mens rãmba, d na n yɩɩ wa yẽ, n kong vɩɩm sẽn ka satã. (Yel. 16:18) Rẽ n so tɩ tʋm-tʋmd a Poll yeel tɩ d gũus n da “wa wuk d menga, n wa paam taal ning b sẽn ning a Sʋɩtãanã ye.” (1 Tɩm. 3:6, 7) Yaa bũmb sẽn tõe n paam tõnd ned kam fãa, baa d nan sɩnga a Zeova tũub wall d tũud-a-la na maan yʋʋm wʋsgo.

5. Wa Koɛɛg soab 7:16, 20 sẽn wilgdã, wãn to la ned wilgd t’a yaa wuk-m-meng soaba?

⁵ Wuk-m-meng soab yaa rat-m-ye soaba. A Sʋɩtãan datame tɩ d yɩ rat-m-ye rãmba, tɩ yaa d mengã yell bal n pak-do, la pa a Zeova, sẽn yɩɩd fãa, d sã n wa maood ne zu-loeese. Wala makre, b rõda yãmb bɩ, bɩ b maan-y-la kɛgre? A Sʋɩtãan sẽn nong yaa y sẽn na n ning a Zeova wall y saam-biisã taale. Sẽn paase, a ratame tɩ y tẽ tɩ yellã tɩɩm yaa y sẽn na n maand y yam, la y ra tũ sagls nins a Zeova sẽn kõ tõnd tɩ be a Gomdã pʋgẽ wã ye.—Karm-y Koɛɛg soab 7:16, 20.

6. Yam-bʋg la d tõe n dɩk Peyiba saam-bi-poakã kibarã pʋgẽ?

⁶ D gom saam-bi-poak a ye sẽn be Peyiba yelle. A ra yikda a sũur wʋsg a tẽed-n-taasã kongr yĩnga. A yãka yam n na n zãag a meng ne-ba. Ad a sẽn yeele: “M da getame tɩ m lebga m yembr masã, la m da ket n pa rat n kõ-b sugr ye. M yeela m sɩdã tɩ rẽnda d toeem tiginga.” Rẽ poore, saam-bi-poakã wa n gesa yʋʋmd 2016 tʋʋlg kiuug teledifiziyõ wã. Be, b kõo saglse, n wilg d sẽn tõe n maan to-to d tẽed-n-taasã pãn-komsem taoore. Ad  saam-bi-poakã sẽn paase: “Mam bãngame tɩ m da segd n talla pʋ-peelem la sik-m-menga, n tags mam mengã pãn-komsem yelle, la m da baoodẽ tɩ tigingã neb toeem ye. Teledifiziyõ wã sõnga maam tɩ m maneg n teeg a Zeova, la m sak tɩ yẽ bal n tar sor n na n wilg tõnd d sẽn segd n maanega.” Yam-bʋg la d tõe n dɩke? Y sã n wa tar zu-loeese, tagsd-y-yã a Zeova yell n tɩ yɩɩda. Kos-y-yã-a t’a sõng-y tɩ y ges neb a taabã wa yẽ meng sẽn get-b to-to wã. Y saasẽ Ba wã nee b pãn-komsmã, la a sakdame n kõt-b sugri. A ratame tɩ yãmb me maan woto.—1 Zã 4:20.

7. Bõe n paam rĩm a Ozɩyas?

⁷ Wuk-m-mengã kɩtame tɩ rĩm a Ozɩyas pa sak n kelg neb a taab saglse, la a maan bũmb a sẽn da pa tar sor n na n maane. A Ozɩyas yɩɩ ned sẽn da tʋm tʋʋm sẽn nafde. A tõoga zab wʋsgo, a mee tẽns wʋsgo, la a ra tar pʋt wʋsg me. A Zeova “rag n sõngd-a lame.” (2 Kib. 26:3-7, 10) Biiblã yeelame: “La yẽnda sẽn wa n mik t’a pãngã lebga wʋsgã, yẽnda wuka a meng tɩ wa ne a sãoongo.” A Zeova ra pĩnd n yeelame tɩ yaa maan-kʋʋdbã bal n tar sor n na n yõog wisd wẽnd-doogã pʋgẽ. La rĩm a Ozɩyas wuka a meng n kẽng wẽnd-doogẽ wã n tɩ yõog wisdu. A Zeova sũur pa yɩ noogo, t’a lob ra-kãngã sẽn yaa wuk-m-meng soabã wãoodo. A Ozɩyas kell n yɩɩ wãoor a yõor tɛka.—2 Kib. 26:16-21.

8. Wa 1 Korẽnt rãmb 4:6, 7 wã sẽn wilgdã, bõe yĩng tɩ d segd n zãag d meng ne wuk-m-mengã?

⁸ Wuk-m-mengã tõe n wa kɩtame tɩ tõnd me lʋɩ bẽdg ning a Ozɩyas sẽn lʋɩ wã pʋgẽ bɩ? D gom saam-biig a Zooze yelle. A rag n yaa omdafɛɛr hal tɩ yõod kẽed-a sõma, n leb n da yaa kãsem-soab nebã sẽn nand wʋsg tigingã pʋgẽ. A ra wɛgsda sõss tigs-kãsemsẽ, tɩ tigims sull yel-gɛtbã me ra mi n kot-a saglse. Ad a sẽn yeele: “M da teega m mengã minim la m bãngre, la m da pa teeg a Zeova ye. M da tagsdame tɩ m tẽebã tara pãnga, n da pa kelgd a Zeova keoogrã la a saglsã ye.” A Zooze wa n maana yel-wẽnd tɩ b yiis-a tigingã pʋgẽ. Yʋʋm wʋsg poore, b lebg n deeg-a-la tigingã pʋgẽ. Ad a sẽn yeel masã: “A Zeova sõnga maam tɩ m bãng tɩ sẽn tar yõod n yɩɩdã pa d yʋʋrã sẽn na n yi ye. Yaa d sẽn na n maand bũmb nins a sẽn yeel tɩ d maanã.” Bɩ d tẽeg tɩ minim ning  fãa d sẽn tare, la tʋʋmd ning fãa d sẽn paam tigingã pʋgẽ yaa a Zeova n kõte. (Karm-y 1 Korẽnt rãmb 4:6, 7.) D sã n yaa wuk-m-meng soaba, d pa tar yõod a Zeova nifẽ ye.

9. Rat-tɩ-loogã kɩtame t’a Sʋɩtãan ne a Awa maan bõe?

⁹ D sã n wa gomd rat-tɩ-loog yelle, d tẽegda a Sʋɩtãan yelle. A sẽn da yaa a Zeova malɛkã yĩnga, a ra paamame t’a Zeova kõ-a tʋʋm-kãsemse. La a ra ratame tɩ yɩɩd woto. A ra ratame tɩ nebã waoogd yẽ wa Wẽnde, tɩ yaool n yaa a Zeova bal n segd ne waoogr a woto. A Sʋɩtãan datame tɩ d yɩ wa yẽnda. Rẽ n so t’a rat tɩ d tẽ tɩ d sẽn tar bũmb ninsã pa sek ye. A sẽn mak n na n maan woto pipi, yaa a sẽn wa n tɩ gom ne a Awa wã. Ne nonglem, a Zeova kõo a Awa ne a sɩdã rɩ-nood wʋsgo, rat n yeel tɩ “tɩɩs nins fãa sẽn be zẽedã pʋgẽ wã biisi.” A ye bal la a yeel tɩ b ra rɩ a biisã ye. (Sɩng. 2:16) Baa ne rẽ, a Sʋɩtãan belga a Awa t’a tags t’a segd n dɩɩ tɩɩg ning biis b sẽn gɩdg tɩ b ra rɩ wã. A Awa wa n pa le nand bũmb nins a sẽn tarã ye. A wa n data sẽn zʋʋg rẽ. D mii yel-kãngã sẽn baas to-to. A beega Wẽnnaam n wa baas n ki.—Sɩng. 3:6, 19.

10. Wãn to la rĩm a Davɩɩd lʋɩ rat-tɩ-loogã bẽdg pʋgẽ?

¹⁰ Rat-tɩ-loogã kɩtame tɩ rĩm a Davɩɩd yĩm bũmb nins a Zeova sẽn maan n kõ-a wã, wala makre, arzɛka, naam, la a sẽn kɩt t’a tõog a bɛɛbã. A Davɩɩd yɩɩ sõm-mita, n da sak n deeg tɩ Wẽnnaam kũunã “sõor yaa wʋsg tɩ ka tõe n sõd n sɛ ye.” (Yɩɩn. 40:6) La wakat n wa n zĩnd t’a Davɩɩd yĩm bũmb nins a Zeova sẽn maan n kõ-a wã. A wa n lebga rat-tɩ-loog soaba, hal n getẽ t’a sẽn da tarã pa sek ye. Baa ne a Davɩɩd sẽn da tar pagb wʋsgã, a wa n basame t’a yamã kẽ rao a to paga. Pʋg-kãng yaa a Batseba, Hɛt rao a Uuri pagã. A Davɩɩd yoo ne a Batseba, t’a rɩk pʋga. A sẽn maanã yaa wẽng wʋsgo, la a wa n maana bũmb wẽnem sẽn yɩɩd rẽ. A kɩtame tɩ b kʋ a Uuri. (2 Sãm. 11:2-15) Bõe n da be a Davɩɩd yamẽ? A ra tagsdame t’a Zeova pa tõe n yã bɩ? Baa ne a Davɩɩd sẽn maan sɩd ne a Zeova n kaoos yʋʋmã, a wa n lebga rat-tɩ-loog soaba, tɩ kɩt t’a paam toog wʋsgo. Zu-noogã, a wa n sak n  deega a kongrã, n tek yam n kos sugri. A sẽn paam t’a Zeova kõ-a sugrã sɩd yɩɩ sũ-noog tɛkẽ.—2 Sãm. 12:7-13.

11. Wa Efɛɛz rãmb 5:3, 4 sẽn yetã, bõe n tõe n sõng-d tɩ d ra yɩ rat-tɩ-loog soaba?

¹¹ Yam-bʋg la d tõe n dɩk a Davɩɩd kibarã pʋgẽ? D bãngame tɩ d tõe n zaba ne rat-tɩ-loogã, d sã n kell n wilg tɩ d yaa sõm-mitba, bũmb nins fãa a Zeova sẽn kõ-dã yĩngã. (Karm-y Efɛɛz rãmb 5:3, 4.) D segd n wilgame tɩ d sũur nooma ne bũmb nins fãa d sẽn tarã. D segd n sõnga Biibl karen-biisã tɩ b tẽeg bũmb takɩ a Zeova sẽn maan n kõ-ba, la b pʋʋs-a bark rẽ yĩnga. Ned sã n maan woto daar fãa semennã pʋgẽ, wilgdame t’a pʋʋsa bark yɛl toor-toor a yopoe zug a Zeova sẽn maan n kõ-a. (1 Tes. 5:18) Yãmb me maanda woto bɩ? Y sã n bʋgsd bũmb nins fãa a Zeova sẽn maand n kõt yãmbã zugu, na n sõng-y lame tɩ y yɩ sõm-mita. La y sã n yaa sõm-mita, y na n maanda sũ-noog ne y sẽn tar bũmb ninsã. Woto, y pa na n yɩ rat-tɩ-loog soab ye.

12. Rat-tɩ-loogã kɩtame t’a Zida maan bõe?

¹² A Zida Iskariot sẽn yɩ rat-tɩ-loog soabã, a wa n baas n zãmba a Zu-soabã. La a Zida ra pa sɩng n yaa nin-wẽng ye. (Luk 6:13, 16) A Zeezi yãk-a lame t’a yɩ a tʋm-tʋmda. Vẽenega, a Zida ra yaa ned sẽn tʋmd sõma tɩ b ra tõe n kɩs-a sɩda, tɩ kɩt tɩ b ra yãk-a t’a ra get ligdã koglg yelle. A Zeezi ne a tʋm-tʋmdbã ra tallda ligd-kãnga, n get b mens yell la b sõngd nebã koe-moonegã wakate. Ligd-kãng yaa wa kũun ning d sẽn kõt rũndã-rũndã dũniyã gill koe-moonegã yĩngã. La a Zida wa n sɩnga ligda zuubu, baa ne a Zeezi sẽn keoo-b n yɩlem rat-tɩ-loogã wɛɛngẽ wã. (Mark 7:22, 23; Luk 11:39; 12:15) A Zida pa kelg keoog-kãensã ye.

13. Wakat bʋg la a Zida rat-tɩ-loogã lebg vẽeneg n paase?

¹³ A Zida rat-tɩ-loogã wa n lebga vẽenega, sẽn deng bilf bal tɩ b kʋ a Zeezi wã. A Zeezi ne a karen-biisã, n paas a Maari la a ma-bi-poak a Mart ra kẽnga wãoor a Sɩmo zakẽ wã n na n tɩ rɩ. Rɩɩbã wakate, a Maari yikame n pʋdg a Zeezi zugã kaam sẽn tar yũ-noogo, t’a ligdã yaa toog wʋsgo. A Zida ne karen-biis a taabã sũy sãama wʋsg ne yel-kãngã. Tõe tɩ karen-biis a taabã ra getame tɩ b sã n da rɩk ligd-kãng n kẽes koe-moonegã pʋgẽ n são. La a Zida yẽ sũurã sẽn da sãamã pa rẽ yĩng ye. A ra yaa wagdre, n da rat n zu ligdã sẽn da be koglgã pʋgẽ wã. Rẽ poore, rat-tɩ-loogã kɩtame t’a Zida zãmb a Zeezi n deeg ligdi.—Zã 12:2-6; Mat. 26:6-16; Luk 22:3-6.

14. Wãn to la pag a ye ne a sɩd tũ saglg ning sẽn be Luk 16:13 pʋgẽ wã?

¹⁴ A Zeezi tẽega a karen-biisã gom-kãngã sẽn yaa sɩdã: “Yãmb pa tõe n yaa Wẽnnaam yembse, la y yaa arzɛgsã yembs me ye.” (Karm-y Luk 16:13.) Sɩd yaa vẽenega. D ges pag a ye ne a sɩd sẽn be Rumani sẽn tũ a Zeezi sagl-kãngã tɩ naf-b to-to. B kãab-b-la tʋʋmd wakat bilf pʋgẽ, tẽng a to sẽn yidg laogã wɛɛngẽ n yɩɩd bãmb tẽngã. Ad b sẽn yeele: “Tõnd da tara bãnkã sam-kẽeng n segd n yao. Rẽ kɩtame tɩ d tags sɩngrẽ wã tɩ tʋʋm-kãngã yaa a Zeova barka.” Yaool n da yaa bẽdga. Tʋʋmdã ra na n kɩtame tɩ b pa tõog n le tʋm a Zeova tʋʋmã sõma ye. B karma yʋʋmd 2008 sa-sik kiuug pipi daar Gũusg Gasgã sõsg ning gom-zug sẽn yaa: “Kell-y n sak-y Wẽnnaam ne yam a yembre.” Kɩtame tɩ b bãng n yãk b sẽn na n maan bũmb ningã. Ad b sẽn yeele: “Sã n mikame tɩ yaa sẽn na yɩl n paam ligd  wʋsg la d sẽn na n kẽng tẽng a to n tɩ tʋmã, rat n yeelame tɩ d lebsa d zoodã ne a Zeova wã poorẽ. D ra kɩsa sɩd tɩ ra na n sãama tõnd ne a Zeova zoodã.” Rẽ n so tɩ b zãgs tʋʋmdã. Baasa wãna? Rao wã paama tʋʋmd sẽn zemse, a meng tẽngẽ wã. Ad pagã sẽn yeele: “A Zeova nugã zɩ n yɩ koɛɛg ye.” Pagã ne a sɩdã sũur yaa noog wʋsg b sẽn sak t’a Zeova na n yɩ b Zu-soaba, la pa ligdã.

15. Bõe yĩng tɩ d tõe n kɩs sɩd tɩ d tõe n põsa a Sʋɩtãan bẽdsã?

¹⁵ La d sã n wa mik tɩ d lebga wuk-m-meng soab bɩ rat-tɩ-loog soaba? D tõe n toeemame. A Poll yeelame tɩ neb nins a Sʋɩtãan sẽn ‘yõg vɩɩsã’ tõe n põs n yii bẽd-kãngã pʋgẽ. (2 Tɩm. 2:26) Yɩɩ woto ne rĩm a Davɩɩd. A wa n sak n kelga a Natã keoogrã, n tek yam n bas a rat-tɩ-loogã la a maneg yẽ ne a Zeova zoodã. D da tol n yĩm t’a Zeova pãng yɩɩda a Sʋɩtãan ye. D sã n sak a Zeova sõngrã, d tõe n põsa bẽdg ning fãa a Sʋɩtãan sẽn na n bẽd tõndo.

16. Bõe n na n sõng-d tɩ d gil a Sʋɩtãan bẽdsã?

¹⁶ Vẽenega, d pa segd n bao n põs a Sʋɩtãan bẽdsã bal ye. D pʋd n segd n bao n gil-b lame. Yaa ne Wẽnnaam sõngr bal la d tõe n tõoge. D pa segd n tags tɩ d tẽebã tara pãng hal tɩ d pa tõe n lebg wuk-m-meng bɩ rat-tɩ-loog soab ye. Baa neb sẽn tũ a Zeova n kaoos yʋʋm wʋsg wa n lebga wuk-m-mens rãmb la rat-tɩ-loog rãmba. Rẽ wã, bɩ y pʋʋsd daar fãa n kot a Zeova t’a sõng-yã, tɩ y ges zʋg-wẽn-kãensã sã n pa zoe n kɩt tɩ y tagsa wã la y yel-manesmã pa le yaa sõma zãng ye. (Yɩɩn. 139:23, 24) Maan-y y sẽn tõe fãa n da tol n lebg wuk-m-meng bɩ rat-tɩ-loog soab ye.

17. Bõe n na n paam d bɛ a Sʋɩtãan ka la bilfu?

¹⁷ Yaa sẽn na maan yʋʋm tusa la a Sʋɩtãan yaa tãoosa. La ka la bilfu, b na n sẽb-a lame, n wa baas n sãam-a. (Vẽn. 20:1-3, 10) D yãgdame tɩ daar-n-kãng ta. La nananda, bɩ y ket n gũusd ne a Sʋɩtãan bẽdsã. Modg-y n da tol n lebg wuk-m-meng la rat-tɩ-loog soab ye. Yãk-y yam ne y sũur fãa, n ‘kɩɩs a Sʋɩtãana, t’a na n zoe n zãaga yãmba.’—Zak 4:7.