1. Bõe la a Zeova ne a nin-buiidã nengẽ?

WẼNNAAM A ZEOVA “sũur nooma ne b nebã.” (Yɩɩn. 149:4) Ad woto sɩd noogda sũuri! A Zeova nee d zʋg-sõma wã, la a ne tõnd sẽn tõe n wa lebg sõma to-to wã, la a sõngd tõnd tɩ d lebgd a zo-rãmba. D sã n kell n maan sɩd ne-a, a na n kell n yɩɩ d zoa wakat sẽn pa sate.—Zã 6:44.

2. Bõe yĩng tɩ yaa toog ne neb kẽer tɩ b tẽ t’a Zeova nong-b lame?

² Neb kẽer tõe n yetame yaa: ‘Mam miime t’a Zeova nonga a nin-buiidã, la m maanda wãn n kɩs sɩd t’a nonga maam?’ Bõe n tõe n kɩt tɩ ned wa sokd a meng woto? * A Oksana sẽn yaa saam-bi-poak sẽn nams a yãadem wakatã yeelame: “Mam sẽn wa n deeg lisg n sɩng so-pakrã, m sũur da nooma wʋsgo. La m sẽn wa n tar yʋʋm 15, m sɩngame n tẽegd bũmb nins fãa sẽn nams maam m sẽn da wa n yaa biigã. M wa n kʋmb n tagsdame tɩ m pa le tat a Zeova yam, la tɩ m pʋd n pa segd ne a nonglem ye.” A Yua yaa saam-bi-poak sẽn yaa so-pakda. Yẽ me yãadmã pa yɩ nana ye. A yeelame: “M dɩka m vɩɩmã n kõ a Zeova, bala m da ratame t’a sũur yɩ noogo. La m da kɩsa sɩd t’a pa tol n tõe n nong-m ye.”

3. Bõe yell la d na n gom sõs-kãngã pʋgẽ?

³ Wa saam-bi-pogs a yiibã yell d sẽn zoe n gomã, yãmb me nonga a Zeova wʋsgo, la y tõe n sãmbda a sã n sɩd nong-y lame. Bõe yĩng tɩ y segd n kɩs sɩd t’a geta y yelle? La y sã n wa tagsdẽ t’a Zeova pa nong yãmba, bõe la y tõe n maan tɩ sõng-yã? Bɩ d leok sogs-kãensã.

4. D sã n sãmbd a Zeova sã n nong-d lame, bõe yĩng tɩ yaa yelle?

⁴ Nonglem kõta ned pãng t’a maand sẽn yaa sõma. D sã n kɩs sɩd t’a Zeova nong-d lame la a teend-do, na n sõng-d lame tɩ d maand a raabã ne d sũur fãa, baa ne zu-loeesã. La d sã n sãmbd Wẽnnaam sã n geta d yelle, d pãngã na n “lebga zaalem.” (Yel. 24:10) Sẽn paase, d sã n koms raood n pa le tẽed tɩ Wẽnnaam nong-d lame, a Sʋɩtãan tõe n tõog-d-la nana-nana.—Efɛ. 6:16.

5. Neb kẽer sẽn da sãmbd Wẽnnaam sã n nong-b lame wã, bõe n paam-ba?

⁵ Rũndã-rũndã, kiris-neb kẽer sẽn da maand sɩd ne a Zeova tẽeb komsame, b sẽn da tar sãmbs yĩnga. Wala makre, kãsem-soab a ye yʋʋr sẽn boond t’a Zak yeelame: “Baa ne m sẽn da tʋmd Betɛllẽ wã, la m be tiging sẽn gomd buud-gom-zẽng n moond koɛɛgã tɩ m sũur noomẽ wã, m da sokda m meng a Zeova sũur sã n sɩd nooma ne m sẽn maand bũmb nins n kõt-a wã. Wakat n wa n zĩnd meng tɩ m da sokd m meng a Zeova sã n kelgda m pʋʋsgã.” Saam-bi-poak a Eva me sẽn kẽes a meng zãng Wẽnnaam tʋʋmdã pʋgẽ wã yeelame: “M bãngame tɩ f sã n sãmbd a Zeova sã n sɩd nong-f lame, yaa yelle. Bala sãamda bũmb nins fãa f sẽn maand n kõt-a wã. Kɩtdame tɩ Wẽnnaam tũudmã yɛl pa le tar yamleoogo, la kɩtdẽ me tɩ f pa le tar sũ-noog a Zeova tũubã pʋgẽ ye.” A Mikayɛll sẽn yaa wakat fãa so-pakd la kãsem-soabã yeelame: “F sã n pa tẽed tɩ Wẽnnaam geta f yelle, f na n zãaga f meng ne-a.”

6. D sã n wa sãmbd Wẽnnaam sã n nong-d lame, bõe la d segd n maane?

⁶ Kiba-kãensã wilgda tags-kɛgã sẽn tõe n koms d tẽebã to-to. D sã n wa sɩng n sãmbd Wẽnnaam sã n nong-d lame, bõe la d segd n maane? D segd n yɩɩ tao-tao n yiis tags-kɛg a woto d yamẽ wã. Kos-y a Zeova t’a sõng-y tɩ y ledg y “tagsgã” ne ‘Wẽnnaam laafɩ wã sẽn na n gũ yãmb sũyã la y tagsa wã.’ (Yɩɩn. 139:23; Fili. 4:6, 7) La tẽeg-y tɩ y pa y yembr ye. Saam-biis kẽer sẽn tũud a Zeova ne b sũy fãa me maooda ne tags-kɛg a woto buudu. Baa neb kẽer sẽn da tũud a Zeova pĩnd wẽndẽ wã maoo ne tags-kɛg a woto. D ges yam ning d sẽn tõe n dɩk tʋm-tʋmd a Poll kibarã pʋgẽ.

7. Zu-loe-bʋs la a Poll mao ne?

⁷ Wakat ninga, y getame tɩ y tʋʋmã yaa wʋsgo, tɩ yaa toog ne-y tɩ y tõog n maan y sẽn segd n maanã fãa bɩ? Sã n yaa woto, y tõe n wʋma a Poll manesmã võore. A ra maanda yɩɩre. Pa tiging a yembr yĩng bal ye. Ra yaa “tigimsã fãa yĩnga.” (2 Kor. 11:23-28) Yãmb maooda ne bã-kʋdg tɩ kɩt tɩ naoor wʋsgo, y sũur pa noomẽ bɩ? A Poll ra maooda ne “gõaag yĩngã pʋgẽ” wakat fãa. Tõe tɩ ra yaa bãag sẽn da namsd-a wʋsgo, t’a rat ne a sũur fãa tɩ sa. (2 Kor. 12:7-10) Wakat ninga, y sũur sãamda y mengã pãn-komsmã yĩng bɩ? Ra mi n yaa woto ne a Polle. A yeelame t’a yaa “nimbãan-ned bala,” a sẽn da maood wakat fãa ne a mengã pãn-komsmã yĩnga.—Rom. 7:21-24.

8. Bõe n sõng a Poll t’a tõog n mao ne a zu-loeesã?

⁸ Baa ne a Poll sẽn da maood ne zu-loees sẽn sãamd sũur wʋsgã, a ra ket n tũuda a Zeova. Bõe n sõng-a t’a tõog n maan woto? Baa ne a sẽn da mi a pãn-komsmã sõma wã, a ra tẽeda a Zeezi maoongã ne a sũur fãa. A ra mii a Zeezi sẽn pʋlem tɩ ‘ned ning fãa sẽn tẽed yẽ na n paama vɩɩm sẽn ka sɛtã.’ (Zã 3:16; Rom. 6:23) Yaa vẽeneg t’a Poll ra naaga neb nins sẽn da tẽed a Zeezi maoongã. A ra kɩsa sɩd t’a Zeova na n kõo yel-wẽn-maandb nins fãa sẽn tekd yam n kot sugrã sugri.—Yɩɩn. 86:5.

9. A Poll goam nins sẽn be Galat rãmb 2:20 pʋgẽ wã wilgda tõnd bõe?

⁹ A Poll leb n da tẽedame tɩ Wẽnnaam nong-a-la hal wʋsgo, bala a tʋma a Zeezi t’a wa ki yẽ yĩnga. (Karm-y Galat rãmb 2:20.) Ges-y a Poll sẽn yeel bũmb ning vɛrse wã baasgẽ tɩ kõt bas-m-yamã. A yeelame tɩ ‘Wẽnnaam Bi-riblã nonga maam n kõ b meng mam yĩnga.’ A Poll pa tags tɩ yẽ yaa nin-wẽnga, hal tɩ Wẽnnaam pa tõe n nong-a ye. A pa yeel yaa: ‘Mam mii a Zeova sẽn nong m tẽed-n-taasã võore. La m pa tẽed t’a tõe n nonga maam ye.’ A Poll tẽega Rom kiris-nebã tɩ “tõnd sẽn da ket n yaa yel-wẽn-maandba, Kirist kii tõnd yĩnga.” (Rom. 5:8) Ad Wẽnnaam sẽn nong tõnd to-to wã sɩd pa tar koak ye!

10. Rom dãmb 8:38, 39 wã sõngda tõnd tɩ d bãng bõe?

¹⁰ Karm-y Rom dãmb 8:38, 39. A Poll ra kɩsa sɩd zãng tɩ Wẽnnaam nonglmã  tara pãnga. A yeelame tɩ baa fʋɩ pa tõe n “welg tõnd ne Wẽnnaam nonglmã” ye. A ra mii Wẽnnaam sẽn maan sũ-mar to-to ne Israyɛll nebã. A leb n da miime t’a Zeova zoee yẽ nimbãanega. Dẽnd yaa wa a Poll da yetame yaa: ‘Sẽn mik t’a Zeova tʋma a Bi-riblã ta wa ki mam yĩngã, rẽ yĩnga m tara bʋʋm n na n sãmbd a sã n nonga maam sɩda?’—Rom. 8:32.

11. Baa ne a Poll sẽn da tʋm tʋʋm-wẽns tɩ b gomd rẽ yell 1 Tɩmote 1:12-15 wã, bõe yĩng t’a ra kɩs sɩd tɩ Wẽnnaam nong-a lame?

¹¹ Karm-y 1 Tɩmote 1:12-15. Tõe tɩ wakat n da mi n zĩnd t’a Poll sã n tẽeg a pĩnd vɩɩmã yell bɩ ra namsd-a. A yeelame tɩ yẽ yaa “yel-wẽn-maandbã taoor soaba,” la rẽ pa lingr ye. Nand t’a bãng sɩdã, a ra kẽnda tẽng-tẽng n namsd kiris-nebã, n yõgd kẽer n kẽesd bãens rotẽ, la a sakdẽ tɩ b kʋʋd sãnda. (Tʋʋ. 26:10, 11) Tags-y n ges-y a Poll manesem sẽn da tõe n yɩ to-to, a sã n da seg bi-bɩɩg sẽn yaa kiris-neda, a sẽn da sak tɩ b kʋ a roagdbã. A Poll ra maanda a bãngẽ ne a kongrã, la a ra miime tɩ sẽn loog loogame. A sak n deegame tɩ Kirist kii yẽ yĩnga, la a yeel yaa: “Wẽnnaam barkã maasem yĩnga, mam yaa m sẽn yaa bũmb ningã.” (1 Kor. 15:3, 10) Yam-bʋg la y tõe n dɩke? Sak n deeg tɩ Kirist kii fo yĩnga, la tɩ rẽ kɩtame tɩ f tõe n paam zood sõma ne a Zeova. (Tʋʋ. 3:19) Sẽn tar yõod Wẽnnaam nifẽ yaa bũmb ning d sẽn maand masã wã, la d sẽn na n maan beoogã. La pa tʋʋm-wẽns nins d sẽn tʋm pĩndã, d ra yaa a Zeova Kaset soab tɩ d ra pa a Zeova Kaset soab me.—Eza. 1:18.

12. D sã n wa tagsdẽ tɩ d ka yõodo, bɩ tɩ pa segd tɩ Wẽnnaam nong-do, wãn to 1 Zã 3:19, 20 goamã tõe n sõng-do?

¹² Y sã n tags a Zeezi sẽn ki tõnd yel-wẽnã yĩngã, y tõe n yeelame yaa: ‘Mam pa  zems ne waoogr a woto ye.’ Bõe yĩng tɩ y tõe n wa tags woto? D sũurã sẽn pa zems zãngã tõe n belg-d lame tɩ d tags tɩ d ka yõodo, bɩ tɩ pa segd tɩ Wẽnnaam nong-d ye. (Karm-y 1 Zã 3:19, 20.) Sã n wa yaa woto, d segd n tẽegame tɩ “Wẽnnaam yɩɩda tõnd sũyã.” Tõnd saasẽ Ba wã nonglmã la a sugrã yɩɩda tags-kɛg nins sẽn yit d sũurẽ wã hal zĩig sẽn zãre. D segd n modgame n sak n deeg t’a Zeova nong-d lame. Sẽn na yɩl n maan woto, d segd n nong n zãmsda Wẽnnaam Gomdã, n pʋʋsd-a wakat fãa, la d nong n be ne a nin-buiidã sẽn maand sɩd ne-a wã. Bõe yĩng tɩ bõn-kãensã maaneg tar yõod wʋsgo?

13. D sã n zãmsd Wẽnnaam Gomdã, wãn to la na n sõng-do? (Ges-y zĩ-gũbrã me: “ Wẽnnaam Gomdã sẽn sõngd-b to-to.”)

¹³ Zãmsd-y Wẽnnaam Gomdã daar fãa, tɩ rẽ la y na n bãngd a Zeova zʋg-sõma wã n paasdẽ. Y na n yãame t’a sɩd nong-y-la hal wʋsgo. Y sã n bʋgsd Wẽnnaam Gomdã zug daar fãa, na n sõng-y lame tɩ y tõogd n tagsd neere, n “rems yɛlã” y yamẽ wã la y sũurẽ wã. (2 Tɩm. 3:16) Kãsem-soab a ye yʋʋr sẽn boond t’a Kevin, sẽn da tagsd t’a ka võor wilga bũmb ning sẽn sõng-a wã, n yeel yaa: “M sẽn karem Yɩɩn-sõamyã 103 soabã la m bʋgs a zugã, sõnga maam tɩ m yamã vẽnege, tɩ m bãng a Zeova tagsg sẽn sɩd yaa a soab mam zugu.” A Eva, saam-bi-poak ning yell d sẽn da gomã yeelame: “Daar fãa, m dɩkda sẽk n maag m yĩng n bʋgs bũmb nins a Zeova sẽn get tɩ tara yõodã zugu. Kõta maam sũur pʋgẽ bãane, la paasd m tẽebã pãnga.”

14. Wãn to la pʋʋsgã tõe n sõng-do?

¹⁴ Pʋʋsd-y wakat fãa. (1 Tes. 5:17) Sẽn na yɩl n paam zood sõma ne neda, d segd n sõsda ne taab wakat fãa, la ne pʋ-peelem. Yaa woto me ne zood ning tõnd sẽn tar ne a Zeova wã. D sã n pʋʋs a Zeova n togs-a d tagsgo, la yɛl nins sẽn pak-dã, d wilgdame tɩ d kɩs-a-la sɩda, la tɩ d miime t’a nong-d lame. (Yɩɩn. 94:17-19; 1 Zã 5:14, 15) A Yua, saam-bi-poak ning yell d sẽn gomã yeelame: “M sã n wa pʋʋsdẽ, pa bũmb nins m sẽn maan daarã pʋgẽ wã bal la m togsd ye. M pelgda m pʋg ne a Zeova, n togs-a sẽn be m sũurẽ wã fãa. Bilf-bilfã, mam wa n geta a Zeova wa Ba sẽn sɩd nong a kamba, la pa wa tʋʋmd taoor soab ye.”—Ges-y zĩ-gũbrã: “Y karm-a lame bɩ?”

15. Wãn to la a Zeova wilgd t’a sɩd nong-d lame?

¹⁵ Nong-y n be-y ne y zo-rãmb nins sẽn maand sɩd ne a Zeova wã. B yaa kũun a Zeova sẽn kõ-do. (Zak 1:17) D saasẽ Ba a Zeova wilgame t’a nand-d lame, a sẽn  kɩt tɩ d tar saam-biis la saam-bi-pogs tɩ d yaa wa zak a ye neba, n wilgd wakat fãa tɩ b nong-d lame wã. (Yel. 17:17) A Poll lɛtr ning a sẽn gʋls n tool Kolos kiris-nebã pʋgẽ, a goma kiris-neb kẽer sẽn da sõng-a yelle, n yeel tɩ b ‘belsda yẽ wʋsgo.’ (Kol. 4:10, 11) Baa a Zeezi meng ra rata a zo-rãmb sẽn yaa malɛgs la ninsaalb sõngre, hal t’a sũur da noom ne a sẽn paam tɩ b sõng-a wã.—Luk 22:28, 43.

16. Wãn to la zo-rãmb hakɩɩk tõe n sõng-d tɩ d maneg n bɩɩs d zoodã ne a Zeova?

¹⁶ Rẽ yĩnga, yãmb baooda y zo-rãmb nins sẽn be tigingã pʋgẽ wã sõngre, la y sakd b sõngrã bɩ? D sã n dɩk d yell bɩ d zu-loɛɛg n togs kiris-ned tẽeb sẽn bɩ, pa rat n yeel tɩ d ka võor ye. Pʋd n yaa bũmb sẽn tõe n kogl-do. A Zake, saam-biig ning yell d sẽn zoe n gomã yeelame: “Mam sẽn yõg zood ne kiris-neb tẽeb sẽn bɩ wã sõngda maam wʋsgo. M sã n wa tar tags-kɛga, nin-kãensã sẽn yaa m zo-rãmbã maagda b yĩng n kelg maam, la b wilg tɩ b sɩd nong-m lame. Ne bãmb maasem, m neeme t’a Zeova sɩd nong-m lame, la a get-m yelle.” Sɩd tara yõod wʋsg tɩ d bao zo-rãmb d tẽed-n-taasã sʋka, la d kell n modg tɩ d zoodã tall pãnga.

17-18. Ãnd la d segd n kelge, la bõe yĩnga?

¹⁷ A Sʋɩtãan ratame tɩ d bas n pa le maand sẽn yaa tɩrg ye. A ratame tɩ d tẽ t’a Zeova pa nong-do, la tɩ pa segd t’a fãag-d ye. La wa d sẽn yã wã, woto yaa ziri fasɩ.

¹⁸ A Zeova nong-y lame. Yãmb tara yõod wʋsg a nifẽ. Y sã n sakd-a, wa a Zeezi, yãmb me na n ‘kell n paa a nonglmã pʋgẽ’ wakat fãa yĩnga. (Zã 15:10) Rẽ wã, ra kelgd-y a Sʋɩtãana, wall y sũurã sẽn ningd-y taalã ye. Pʋd n kelgd-y a Zeova, soab ning sẽn get bũmb nins d sẽn tar tɩ yaa sõma n yɩɩdã. Bas-y y yam t’a Zeova “sũur nooma ne b nebã,” yãmb me sẽn naage!