Bilf nand t’a Zeezi ki wã, bõe yĩng t’a lebg n togs a Davɩɩd goam nins sẽn be Yɩɩn-sõamyã 22:2 pʋgẽ wã?

Bilf nand t’a Zeezi ki wã, a togsa goam wʋsgo. Wala makre, goam nins sẽn be Matiye 27:46. Ad a sẽn yeele: “Mam Wẽnnaam, mam Wẽnnaam, bõe yĩng tɩ yãmb bas maam?” A Zeezi sẽn yeel woto wã, a pidsa gomd ning yɩɩn-gʋlsd a Davɩɩd sẽn togs tɩ be Yɩɩn-sõamyã 22:2 pʋgẽ wã. (Mark 15:34) D pa segd n yeel t’a Zeezi sẽn togs woto wã, yaa a sũur sẽn da sãam yĩnga, wall yaa a sẽn da pa le tar tẽeb wakat kãng yĩng ye. A Zeezi ra mii bũmb ning sẽn kɩt tɩ ra yaa tɩlɛ t’a ki wã, la a ra yãka yam n na n sak rẽ. (Mat. 16:21; 20:28) A ra miime me t’a kũumã wakate, a Zeova pa na n le maan baa fʋɩ n kogl-a ye. (Zoob 1:10) Dẽnd a Zeova basa a Zeezi t’a na n wilg vẽeneg t’a na n kell n sak-a lame, baa ne a kũumã sẽn na n yɩ toog to-to wã.—Mark 14:35, 36.

Woto wã, yaa bõe yĩng la a Zeezi sẽn lebg n togs yɩɩn-gʋlsdã goamã? Biiblã pa wilgd bũmb ning sẽn kɩt t’a Zeezi yeel woto wã ye. La d ges sẽn tõe n yɩ bũmb ning yĩng la a sẽn togs gom-kãnga wã. *

A Zeezi sẽn togs gom-kãensã wã, a ra rat n yeelame t’a Zeova pa na n kẽes a toog n sõng-a a kũumã wakat bɩ? A Zeezi ra segd n kiime tɩ yɩ maoong n dol d yel-wẽnã, tɩ pa tũ ne a Zeova sõngr ye. A ra yaa ninsaala, tɩ ra yaa tɩlɛ t’a ki, sẽn na  yɩl n “lemb kũum ned buud fãa yĩnga.”—Ebre. 2:9.

A Zeezi sẽn togs yɩɩn-kãngã goam a wãn balã, a ra ratame tɩ nebã tags yɩɩllã goamã zãng yell bɩ? Wakat kãngã, zʋɩf-rãmbã ra nong n dɩkda yɩɩn-sõamyã goamã wʋsg ne zugu. Dẽnd a Zeezi sẽn gom yɩɩn-sõamyã vɛrse a yembr bal yellã, zĩig pʋgẽ ra na n kɩtame tɩ nebã tags yɩɩllã goamã zãng yelle. Sã n da yaa woto la a Zeezi ra rat tɩ nebã maane, dẽnd a ra rat n sõnga a karen-biis nins sẽn yaa zʋɩf-rãmbã tɩ b tẽeg bãngr-goam wʋsg sẽn be yɩɩn-kãngã pʋgẽ n gomd yɛl nins sẽn da na n maan a kũumã wakatã yelle. (Yɩɩn. 22:8, 9, 16, 17, 19, 25) Sẽn paase, yɩɩllã baasgẽ, b pẽgda a Zeova n yetẽ t’a naamã taa dũniyã tɛk fãa.—Yɩɩn. 22:28-32.

A Zeezi sẽn lebg n togs a Davɩɩd gom-kãensã wã, yaa a sẽn da rat n wilg t’a pa tar taal bɩ? Nand t’a Zeezi ki wã, b reng n kaoo a bʋʋd n ning-a taal t’a tʋʋsa Wẽnnaam. (Mat. 26:65, 66) Sãnedrẽ wã neb yɩɩ tao-tao n tigim taaba, rẽ me yɩɩ yʋng-sʋka, n kao a bʋʋd tɩ pa zems ne noy nins sẽn luglã ye. (Mat. 26:59; Mark 14:56-59) A Zeezi sẽn lebg n sok tɩ “mam Wẽnnaam, mam Wẽnnaam, bõe yĩng tɩ yãmb bas maamã?” tõe tɩ yaa a sẽn da rat n wilg t’a pa maan baa fʋɩ sẽn segd ne a kʋʋb ye.

Rẽ yĩnga, a Zeezi ra rat n tẽega nebã tɩ baa ne a Zeova sẽn bas t’a Davɩɩd sẽn yaa yɩɩn-kãngã gʋlsdã namsã, wilgdame t’a Davɩɩd ra pa le tat a Zeova yam bɩ? A Davɩɩd sẽn sok woto wã, pa wilgd t’a ra pa le tar tẽeb ye. A sẽn sok woto wã poore, a togsa goam sẽn wilgd t’a kɩsa sɩd t’a Zeova tõe n fãaga a nin-buiidã. Sẽn paase, a Zeova ra ket n ningd-a-la barka. (Yɩɩn. 22:24, 25, 28) Woto me, baa ne a Zeezi sẽn da yaa a “Davɩɩd biigã” sẽn da be ra-lukã zug n namsdẽ wã, ra pa rat n yeel t’a pa le tat a Zeova yam ye.—Mat. 21:9.

Rẽ yĩnga a Zeezi ra rat n wilgame t’a sũur sãama wʋsgo, a Zeova sẽn bas n pa le kogend-a, n dat t’a wilg t’a na n tõog n kell n sak-a lame wã yĩng bɩ? Sɩngrẽ wã, a Zeova ra pa zoe n yãk yam n dat t’a Bi-riblã nams la a ki ye. La rẽ wa n lebga tɩlɛ a Ãdem ne a Hawa beegrã poor bala. A Zeezi pa maan bũmb sẽn da yaa wẽng ye. La ra yaa tɩlɛ t’a nams la a ki, sẽn na yɩl n welg no-koeemd ning a Sʋɩtãan sẽn wa ne wã, la a kõ a vɩɩmã tɩ yɩ maoongo, n na n yao n deeg bũmb ning ninsaalbã sẽn bõnã. (Mark 8:31; 1 Pɩy. 2:21-24) Woto fãa ra pa tõe n pidsi, a Zeova sã n da pa bas a Zeezi koglg wakat bilf pʋgẽ ye. La ra yaa pipi la woto a sẽn bas n pa kogl a Zeezi ye.

A Zeezi ra rat n sõnga a karen-biisã tɩ b tags bũmb ning sẽn kɩt t’a Zeova bas-a t’a ki woto wã zug bɩ? * A Zeezi ra miime tɩ b sẽn na n yõk-a wa bi-bɛɛg n ka ra-luk zug t’a ki wã ra na n komsa neb wʋsg tẽebo. (1 Kor. 1:23) A karen-biisã sã n tagsa bũmb ning sẽn kɩt t’a ki wã zug neere, dẽnd b sɩd wʋma a kũumã võor sõma. (Gal. 3:13, 14) Rẽ wã, b na n ges-a-la wa Fãagda, la pa wa bi-bɛɛg ye.

Sẽn yaa bʋʋm ning fãa n kɩt t’a Zeezi lebg n togs a Davɩɩd gom-kãensã wã, a bãngame tɩ yell ning fãa sẽn da paamd-a wã pidsda a Zeova raabo. A Zeezi sẽn lebg n togs yɩɩn-kãngã goamã poor bilfu, a yeelame: “A pidsame!” (Zã 19:30; Luk 22:37) Hakɩɩka, a Zeova sẽn bas a Zeezi koglg wakat bilf yĩngã, kɩtame t’a Zeezi tõog n pids bũmb nins fãa b sẽn tʋm-a tẽngã zug t’a wa maanã. Kɩtame me t’a tõog n pids bũmb nins fãa b sẽn da gʋls “a Moyiiz Tõogã pʋgẽ, No-rɛɛsdbã sɛbã pʋsẽ, la Yɩɩn-sõamyã sebrã pʋgẽ” n gomd yẽ yellã.—Luk 24:44.