1-2. Kirist maoongã yaa bõe, la bõe yĩng t’a yaa tɩlɛ ne-do?

A ÃDEM ra yaa ninsaal sẽn zems zãnga. A sẽn maan yel-wẽndã poore, a bõna vɩɩm sẽn kõn sa wã. La pa yẽ a yembr bal ye. A kambã la a yagensã fãa me bõna rẽ. Sugr kae a Ãdem beegrã yĩng ye. Bala a yãka yam n beeg a Zeova. La yaa wãn to yẽ ne a kambã la a yagensã? B pa tall taal baa bilf ne a Ãdem beegrã ye. (Rom. 5:12, 14) La bũmb bee a Zeova sẽn da tõe n maan n fãag-b ne kũumã b yaabã sẽn da segd ne wã bɩ? N-ye! A Ãdem beegrã poor bilf bala, a Zeova sɩngame n vẽnegd a sẽn na n maane, t’a Ãdem kambã la a yagens milyõ-rãmb wa paam b mens ne yel-wẽndã la kũumã sẽn yaa kãab-wẽngã. (Sɩng. 3:15) Wakat ning a Zeova sẽn yãkã sẽn wa n ta, a tʋma a Bi-riblã t’a yi saasẽ n wa kõ a “vɩɩmã tɩ yao neb wʋsg yĩnga.”—Mark 10:45; Zã 6:51.

² A Zeezi sẽn ki tɩ yɩ maoongã, yɩɩ yaood a sẽn yao n na n deeg bũmb ning a Ãdem sẽn bõnã. (1 Kor. 15:22) Bõe yĩng tɩ rẽ yaa tɩlɛ ne-do? Bala noy nins a Zeova sẽn gãneg tɩrlmã wɛɛngẽ a tõogã pʋgẽ wã wilga tɩlɛ tɩ b segd n yaoo vɩɩm, vɩɩm yĩnga. (Yik. 21:23, 24) A Ãdem bõna a vɩɩmã sẽn zems zãngã. A Zeezi kõo a ninsaal vɩɩmã sẽn zems zãngã tɩ yɩ maoongo, tɩ zems ne Wẽnnaam tɩrlmã. (Rom. 5:17) Woto kɩtame t’a Zeezi lebg “ba sẽn paad wakat sẽn ka sɛta,” neb nins fãa sẽn tẽed a maoongã yĩnga.—Eza. 9:5; Rom. 3:23, 24.

3. Sẽn zems ne Zã 14:31, la 15:13, bõe yĩng t’a Zeezi yãk yam n kõ a vɩɩmã sẽn zems zãngã tɩ yɩ maoongo?

³ A Zeezi sakame n kõ a vɩɩmã sẽn zems zãngã tɩ yɩ maoongo, a sẽn nong a saasẽ Ba wã la a nong tõnd me wã yĩnga. (Karm-y Zã 14:31; 15:13.) Nonglem-kãng kɩtame t’a yãk yam ne a sũur fãa n na n kell n sak a Ba wã a vɩɩmã tõre,  la a pids a raabã. A Zeezi sẽn kell n maan sɩd ne a Zeova n tãag a kũumã wilgda rẽ. Woto kɩtame t’a Zeova sẽn da rat tɩ ninsaalbã vɩɩm la tẽngã yɩ to-to sɩngrẽ wã na n pidsi. Sõs-kãngã pʋgẽ, d na n yãa bũmb ning sẽn kɩt tɩ Wẽnnaam bas t’a Zeezi nams wʋsg n yaool n na n ki wã. Sẽn paase, d na n yãa Biiblã gʋlsd a ye sẽn wilg t’a sũur nooma ne Kirist maoongã hal wʋsgo. Sẽn na n baase, d na n yãa d sẽn tõe n maan n wilg tɩ d sũur nooma ne Kirist maoongã, la d sẽn tõe n maan n wilg n paas tɩ d nanda maoong kãngã a Zeova ne a Zeezi sẽn kõ tõnd yĩngã.

4. Bilg-y a Zeezi kũumã sẽn yɩ to-to.

⁴ Mams-y n ges-y a Zeezi yaoolem daarã tẽngã zugã sẽn yɩ to-to. A ra tõe n boola malɛgs tus ka tɛk tɩ b wa kogl-a. La a pa maan woto ye. A basame tɩ Rom sodaasã yõk-a, n pãb-a ne wẽnem. (Mat. 26:52-54; Zã 18:3; 19:1) B pãb-a-la ne kalwaas sẽn bugd yĩngã nemse. Rẽ poore b kɩtame t’a palg ra-luk sẽn zɩs wʋsg a poorã sẽn da sĩind zɩɩmã zugu. A Zeezi sɩngame n vuud ra-lukã n debd zĩig ning b sẽn na n tɩ ka-a wã. La b kɩtame tɩ rao sẽn da yas beenẽ reeg raoogã n tʋke. (Mat. 27:32) A Zeezi sẽn ta zĩig ning b sẽn na n kʋ-a wã, sodaasã kaa a nusã ne a naoã raoogã zugu. A Zeezi zɩslmã kɩtame tɩ põent-rãmbã ra yãsgd a sãmpoagã n paasdẽ. A zo-rãmbã sũur da sãamame, t’a ma wã ra yãbda. La zʋɩf-rãmbã taoor dãmbã yẽ ra laad-a lame. (Luk 23:32-38; Zã 19:25) Yɩɩ toog woo toog n kaoos lɛɛr-dãmba. A sũurã ne a fulfuudã ra yõbgame, t’a vʋʋsgã ra lebgd toog n paasdẽ. Nand t’a Zeezi ki, a pʋʋsa a Zeova a yaoolem pʋʋsgo, n wilg t’a tõog n kell n maana sɩd n tãag a yõor tɛka. Rẽ poore a sulga a zugu, n ki. (Mark 15:37; Luk 23:46; Zã 10:17, 18; 19:30) Ad sɩd yɩɩ kũum sẽn yɩ toog wʋsgo, sẽn wogle, la sẽn yɩ paoogr menga!

5. Sã n yaa ne a Zeezi, bõe n da yaa wẽng n yɩɩd b sẽn kʋ-a to-to wã menga?

⁵ Pa b sẽn da na n kʋ a Zeezi to-to wã n da zabd-a n tɩ yɩɩd ye. Yaa bũmb ning b sẽn tik n na n kʋ-a wã n da zabd-a n yɩɩda. Bala b rõd-a lame t’a yaa wẽn-tʋʋsa, rat n yeel tɩ ned sẽn pa waoogd Wẽnnaam wall a yʋʋrã baa bilf ye. (Mat. 26:64-66) A Zeezi sã n da tags rẽ yelle, ra namsd-a-la wʋsgo, hal t’a ra rat t’a Ba wã kɩt t’a gil yel-kãngã sẽn yaa paoogrã. (Mat. 26:38, 39, 42) Bõe yĩng t’a Zeova bas t’a Bi-ribl-nongrã nams la a ki? Bɩ d ges bʋʋm a tãabo.

6. Bõe yĩng tɩ b ra segd n ka a Zeezi ra-luk zugu?

⁶ Pipi, b ra segd n kaa a Zeezi ra-luk zugu, sẽn na yɩl tɩ zʋɩf-rãmbã paam b mens ne kãab-wẽnga. (Gal. 3:10, 13) Sɩngrẽ wã, b ra pʋlmame tɩ b na n tũu Wẽnnaam tõogã, la b pa maan woto baa bilfu. Dẽnd kãab-wẽngã ra bee b zugu, tɩ b leb n da segd ne kũum me, b sẽn yaa a Ãdem yagensã yĩnga. (Rom. 5:12) Tõog ning Wẽnnaam sẽn da kõ Israyɛll nebã pʋgẽ, a wilgame tɩ ned sã n da maan yel-wẽnd sẽn segd ne kũum, b tog n kʋʋ a soabã. Rẽ poore, b ra tõe n yagla a kũumã ra-luk zugu. * (Tõo. 21:22, 23; 27:26) Dẽnd b sẽn ka a Zeezi ra-luk zugã kɩtame tɩ buud ning sẽn pa sak-a wã meng tõe n wa paam n dɩ a maoongã nafa.

7. Togs-y bʋʋm a yiib-n-soab sẽn kɩt tɩ Wẽnnaam bas t’a Bi-riblã namsã?

⁷ D ges bʋʋm a yiib-n-soab sẽn kɩt tɩ Wẽnnaam bas a Bi-riblã t’a namsã. Ra yaa  sẽn na yɩl n sõng a Zeezi t’a wa tõog n lebg maan-kʋʋdb kãsem tõnd yĩnga. A Zeezi sẽn deeg toog ningã kɩtame t’a bãng tɩ yɩl n kell n sak Wẽnnaam nams-toaag sasa pa nana ye. Yɛlã yɩɩ toog ne-a wʋsgo, hal t’a pʋʋs “ne kelems la nintãm” n kos sõngre. Hakɩɩka, a Zeezi sẽn paam sũ-sãang la toog sẽn yaa kãseng woto wã kɩtame t’a mi tõnd sẽn datã sõma n tõe n “sõng-do,” d sã n wa “be makr pʋgẽ.” D sũur nooma wʋsgo, d sẽn paam t’a Zeova yãk maan-kʋʋdb kãsem sẽn yaa nimbãan-zoɛt tõnd yĩnga, la sẽn tõe n “kʋm tõnd d pãn-komsmã pʋgẽ” wã!—Ebre. 2:17, 18; 4:14-16; 5:7-10.

8. Togs-y bʋʋm a tãab-n-soab sẽn kɩt tɩ Wẽnnaam bas tɩ b nams a Zeezi ne nams-toaagã?

⁸ Tãabo, a Zeova sẽn bas t’a Zeezi paam nams-toaagã yaa sẽn na yɩl n leok sokr sẽn tar yõod wʋsgo: Rẽ yĩnga, ninsaal tõe n kell n saka Wẽnnaam nams-toaag pʋgẽ bɩ? A Sʋɩtãan yetame tɩ ayo. A yetame tɩ ninsaalbã sẽn sakd Wẽnnaamã yaa b mensã nafr yĩng bala. A tẽedame tɩ wa b yaab a Ãdem sẽn maanã, bãmb me pa na n sak a Zeova ne b sũy fãa ye. (Zoob 1:9-11; 2:4, 5) A Zeova sẽn kɩs sɩd t’a Bi-riblã na n sak-a lame wã yĩnga, a basame tɩ b nams-a n tãag ninsaal sẽn tõe n tõog toog n ta zĩig ningã. A Zeezi kell n maana sɩd ne a Zeova, n wilg t’a Sʋɩtãan yaa ziri-yagda.

9. Mak-sõng-bʋg la tʋm-tʋmd a Zã kõ-do?

⁹ Biiblã sẽn yet bũmb ning Kirist maoongã wɛɛngẽ wã sõnga kiris-neb wʋsg tɩ b tẽebã kell n tall pãnga. B ket n moonda koɛɛgã baa ne b sẽn namsd-bã, la b kell n mao ne zu-loees buud toor-toor hal n tãag b kʋʋlem wakate. Wala makre, d gom tʋm-tʋmd a Zã yelle. A kell n moona koɛɛgã n gom Kiristã la a maoongã yell n maan yʋʋm 60 la zaka. A sẽn wa n tar yʋʋm 90 la zaka, b ra get-a-la wa Rom soolmã bɛ, tɩ rẽ kɩt tɩ b yõk-a n kẽng Patmos sẽn yaa ko-sʋk tẽngã n tɩ pag-a bãens roogo. Bõe la a maan tɩ pa zemse? Yaa a ‘sẽn da gomd Wẽnnaam yell la a kõt kaset a Zeezi zugã yĩnga.’ (Vẽn. 1:9) A sɩd kõo mak-sõng tẽebã la tõog-toogã wɛɛngẽ!

10. Wãn to la a Zã sɛbã wilgd t’a sũur da nooma wʋsg ne Kirist maoongã?

¹⁰ Sɛb nins Wẽnnaam sẽn vẽneg a Zã t’a gʋlsã pʋgẽ, a wilgame t’a nonga a Zeezi hal wʋsgo, la t’a sũur nooma ne a maoongã. A sɛbã pʋgẽ, a sẽn gom Kirist maoongã, bɩ a nafa wã yellã yɩɩda naoor koabga. Wala makre, a Zã yeelame: “Ned sã n baas n maan yel-wẽnde, tõnd tara sõangd sẽn be Ba wã nengẽ: Yaa a Zeezi Kirist sẽn yaa soab ning sẽn yaa tɩrgã.” (1 Zã 2:1, 2) A Zã sɛbã pʋgẽ me, a wilga “kõ kaset a Zeezi zugã” yõod sẽn ta zĩig ninga. (Vẽn. 19:10) Dẽnd yaa vẽeneg t’a Zã sũur da nooma wʋsg ne Kirist maoongã. Wãn to la tõnd me tõe n maan wa yẽ?

11. Bõe n tõe n sõng-d tɩ d yals kãn-kãe, ned bɩ bũmb sã n wa rat tɩ d maan sẽn yaa wẽnga?

¹¹ D yõk d mens n da sak n maan sẽn yaa wẽng ye: D sũur sã n sɩd yaa noog ne Kirist maoongã, d pa na n tags yaa: ‘Bũmb bɩ ned sã n wa rat n kɩt tɩ m maan sẽn yaa wẽnga, pa tar yõod tɩ m yals kãn-kãe ye. M tõe n maana sẽn yaa wẽnga, tɩ rẽ poor bɩ m kos Wẽnnaam sugri.’ Bũmb bɩ ned sã n wa rat n kɩt tɩ d maan sẽn yaa wẽnga, d tog n yeelame yaa: ‘Ayo! M sã n tags a Zeova ne a Zeezi sẽn maan bũmb ning fãa n kõ maamã, m yɩta wãn n maan woto?’ Woto yĩnga, d tõe n kosa a Zeova t’a kõ-d pãnga,  n yõk a sɛɛg n yeel yaa: ‘Ra bas maam tɩ m maan yel-wẽnd makr sasa ye.’—Mat. 6:13.

12. Wãn to la d tõe n tũ saglg ning sẽn be 1 Zã 3:16-18 pʋgẽ wã?

¹² D nong d saam-biisã la d saam-bi-pogsã: D sã n nong d tẽed-n-taasã, d wilgdame tɩ d sũur nooma ne Kirist maoongã. Bõe yĩng tɩ d yet woto? Bala a Zeezi pa kõ a vɩɩmã tõnd yĩng bal ye. Yaa tõnd saam-biisã me yĩnga. A sẽn sak n ki b yĩngã, wilgdame tɩ b tara yõod wʋsg a nifẽ. (Karm-y 1 Zã 3:16-18.) Yaa tõnd sẽn tar manesem ning ne d saam-biisã n wilgd tɩ d nong-b lame. (Efɛ. 4:29, 31–5:2) Wala makre, b sã n wa pa keeme, bɩ b sã n wa maood ne zu-loe-kɛgems wala sabab-wẽnse, d sõngd-b lame. La d tẽed-n-taag sã n wa maan bɩ n yeel bũmb tɩ sãam d sũuri, d manesem segd n yɩɩ wãn to?

13. Bõe yĩng tɩ d segd n yɩ sug-kõatba?

¹³ Yãmb nong n tara sũ-kẽk ne y tẽed-n-taasã bɩ? (Maan. 19:18) Sã n yaa woto, bɩ y tũ sagl-kãngã: “Bɩ y maand sũ-mar ne taaba, la y sakd n kõt taab sugr baa ned sã n wa tar yell ne a to. A Zeova sẽn sak n kõ yãmb sugrã, yãmb me segd n maana woto.” (Kol. 3:13) Wakat ning fãa d sẽn kõ d saam-biig wall d saam-bi-poak sugri, d wilgda d saasẽ Ba wã tɩ d sũur sɩd nooma ne Kirist maoongã. Wãn to la d tõe n ket n paasd d sũ-noogã ne Wẽnnaam kũun-kãngã?

14. Togs-y bũmb a ye d sẽn tõe n maan n paas d sũ-noogã ne Kirist maoongã.

¹⁴ D pʋʋs a Zeova barka, Kirist maoongã yĩnga. Saam-bi-poak a ye sẽn be Ẽnd n tar yʋʋm 83, t’a yʋʋr boond t’a Zoana yeelame: “Mam tagsdame tɩ tara yõod tɩ d gomd Kirist maoongã yell d pʋʋsgã pʋgẽ daar fãa, la d pʋʋsd a Zeova bark rẽ yĩnga.” Yãmb mengã pʋʋsgã pʋgẽ, bɩ y tags bũmb takɩ y sẽn maan daarã pʋgẽ tɩ pa sõma, la y kos a Zeova sugr dẽ yĩnga. Y sã n beeg tɩ beegrã yaa kãsenga, y segdame me n tɩ kos kãsem-dãmbã sõngre. B na n kelg-y lame la b kõ-y sagls sẽn yit Wẽnnaam Gomdã pʋgẽ. B na n naag-y lame n pʋʋse, n kos a Zeova t’a kell n sõng-y ne a Zeezi maoongã maasem tɩ y “paam laafɩ” tẽebã wɛɛngẽ.—Zak 5:14-16.

15. Bõe yĩng tɩ d segd n bao sẽk n karem sõss nins sẽn gomd Kirist maoongã yellã, la d bʋgs a zugu?

¹⁵ D bʋgs Kirist maoongã zugu: Saam-bi- poak sẽn tar yʋʋm 73 tɩ b boond-a t’a Razamani yeelame: “M sã n wa karemd b sẽn nams a Zeezi to-to wã, m nintãmã yɩlsdame.” Tõe tɩ yãmb me sã n tags b sẽn nams Wẽnnaam Bi-riblã to-to wã, y sũur sãamdame. La y sã n bʋgsd maoong ning a sẽn kõ wã zugu, y na n maneg n nonga yẽ ne a Ba wã. Sẽn na yɩl n sõng-y tɩ y bʋgs Kirist maoongã zugu, y tõe n zãmsa rẽ y meng Biibl zãmsg sasa.

16. D sã n sõngd nebã sẽn na yɩl tɩ b bãng Kirist maoongã yõodo, wãn to la rẽ nafd tõndo? (Ges-y sebrã pipi neng fotã.)

¹⁶ D sõng neb a taabã tɩ b bãng Kirist maoongã sẽn yaa bũmb ninga: D sã n wa gomd Kirist maoongã yell ne ned fãa, d sũur sẽn noom to-to ne Kirist maoongã na n maneg n paasame. D tara tʋʋm-teed sẽn yaa sõma wʋsgo, d sẽn tõe n tall n sõng nebã tɩ b bãng bũmb ning sẽn kɩt t’a Zeezi ki tõnd yĩngã. Wala makre, d tõe n tũnuga ne Koe-noog sẽn yit Wẽnnaam nengẽ! sebrã sak a 4. Sag-kãng gom-zugã yetame tɩ: “Yãmb mii a Zeezi Kirist bɩ?” D leb n tõe n tũnuga ne Bõe la d tõe n bãng Biiblã pʋgẽ? sebrã sak a 5 wã. A gom-zugã yetame tɩ: “A Zeezi maoongã yaa Wẽnnaam kũun sẽn ka to.” Sẽn paase, yʋʋmd fãa d manegd n wilgame tɩ d sũur nooma ne Kirist maoongã, d sẽn kẽnd a Zeezi Kirist kũumã tẽegrã, la d sẽn boond neb a taabã tɩ b wa naag-dã. A Zeova sẽn kɩt tɩ d tõe n sõng nebã tɩ b bãng a Bi-riblã sɩd yaa zu-zẽkre!

17. Bõe yĩng tɩ Kirist maoongã yaa kũun sẽn ka to Wẽnnaam sẽn kõ ãdem-biisã?

¹⁷ Sãmbg sẽn ka be, d tara bʋʋm sẽn sek d na maan sũ-noog wʋsg ne Kirist maoongã, la d kell n tall sũ-no-kãngã. Kirist maoongã maasem yĩnga, d tõe n paama zood sõma ne a Zeova, baa ne d sẽn pa zems zãngã. Kirist maoongã maasem yĩnga, b na n sãama a Sʋɩtãan tʋʋmã zãng tẽma. (1 Zã 3:8) Kirist maoongã maasem yĩnga, a Zeova sẽn da rat tɩ tẽngã yɩ to-to sɩngrẽ wã na n pidsame. Tẽngã gill na n lebga arzãna. Ned ning fãa yãmb sẽn na n seg na n nonga a Zeova la a tũud-a. Rẽ wã, daar ne a to fãa bɩ d baood segb buud toor-toor n na n wilg tɩ d sũur nooma ne Kirist maoongã, sẽn yaa kũun sẽn ka to Wẽnnaam sẽn kõ ãdem-biisã.