1. A Zeova nin-buiidã kẽer maooda ne zu-loe-bʋs buudu?

YÃMB namsda y sẽn maood ne zu-loe-kɛgeng yĩng bɩ? Tõe tɩ tigingã ned n maan bũmb tɩ sãamd y sũuri. (Zak 3:2) Pa rẽ bɩ y karen-bi-taas wall y tʋmd-n-taas n yaand yãmba, y sẽn tũud a Zeova wã yĩnga. (1 Pɩy. 4:3, 4) Bɩ tõe tɩ yaa y zakã rãmb n dat n gɩdg yãmb tɩ y ra kẽnd tigissã, bɩ n da gom y tẽebã yell ne y taabã ye. (Mat. 10:35, 36) Yell ning sã n namsd-y wʋsgo, y yam la y bas a Zeova tũubu. La y tõe n kɩsa sɩd tɩ sẽn wa n yaa zu-loɛɛg ning fãa taoore, a Zeova na n kõ-y-la yam la pãng tɩ y tõog n mao ne-a.

2. Sẽn zems ne Rom dãmb 15:4, wãn to la Wẽnnaam Gomdã kareng tõe n sõng-do?

² A Zeova kɩtame tɩ b gʋls neb kibay a Gomdã pʋgẽ. Yaa neb sẽn pa zems zãng sẽn mao ne zu-loe-kɛgemse. Woto yaa sẽn na yɩl tɩ d rɩk yam b kibayã pʋgẽ. Yaa woto la a Zeova kɩt tɩ tʋm-tʋmd a Poll gʋls tɩ be Rom dãmb 15:4 pʋgẽ. (Karm-y.) Kiba-kãensã kareng kengda d raoodo, la kɩt tɩ d tõe n saag tɩ manegr n wate. Sẽn na yɩl n dɩ b nafa, Biiblã kareng bal pa sek ye. D segd n basame tɩ Biiblã sẽn yetã kẽ d sũyã la a toeem d tagsa wã. D sã n wa baood saglg sẽn na yɩl n tõog n mao ne zu-loɛɛg ninga, bõe la d tõe n maane? Ad bũmb a naas sẽn tõe n sõng-do: 1) D pʋʋse, 2) d mams d yamẽ, 3) d bʋgse, la 4) d tũ d sẽn bãngã. * Bɩ d ges d sẽn tõe n maan bõn-kãensã to-to. Rẽ poore, d na n tũnuga ne manesem kãens n bãng yam ning d sẽn tõe n dɩk yɛl sẽn zĩnd rĩm a Davɩɩd ne tʋm-tʋmd a Poll vɩɩmã pʋgẽ.

3. Nand tɩ y sɩng Biiblã karengo, bõe la y segd n maane, la bõe yĩnga?

 ³ 1) D pʋʋse: Nand tɩ y sɩng Biiblã karengo, pʋʋs-y-yã a Zeova t’a sõng-y tɩ y bãng y sẽn tõe n tũ bũmb ning y sẽn na n karmã to-to. Wala makre, y sã n data saglg sẽn na n yɩl n tõog n mao ne zu-loɛɛg ninga, bɩ y kos a Zeova t’a sõng-y tɩ y paam sagls a Gomdã pʋgẽ, tɩ sõng-y tɩ y bãng y sẽn na n maanega.—Fili. 4:6, 7; Zak 1:5.

4. Bõe la y tõe n maan tɩ Biiblã kibar yɩ vẽeneg y yamẽ?

⁴ 2) D mams d yamẽ: A Zeova naana ninsaal t’a tõe n mams bũmb toor-toor a yamẽ. Y sã n dat tɩ Biiblã kibar yɩ vẽeneg y yamẽ, bɩ y mams yɛlã sẽn yɩ to-to wã, la y ning y meng ned ning yell b sẽn gomdã zĩigẽ. Mams-y y yamẽ n yã bũmb nins a soabã sẽn yã wã. La a sẽn tall manesem ning yellã taoorã, bɩ yãmb me modg n tall manesem kãnga.

5. Bʋgsg rat n yeelame tɩ bõe, la wãn to la d tõe n bʋgse?

⁵ 3) D bʋgse: Bʋgsg rat n yeelame tɩ f tags f sẽn karmã zug neere, la f ges f sẽn tõe n tũ rẽ to-to f vɩɩmã pʋgẽ. Kɩtdame tɩ f bãng tagsa wã sẽn yekd taab to-to, tɩ sõng-f tɩ f wʋm f sẽn karemdã võor sõma. D sã n karem Biiblã n pa bʋgse, yaa wa d sẽn na n tar zẽ-biisi, n pa naag-b taab n dʋg ye. Bʋgsgã yaa wa d sẽn na n naag zẽ-biisã fãa taab n dʋge, sẽn na yɩl n bãng a noosmã. Y sã n dat n bʋgs neere, y segd n soka y meng sogsg kẽere, wala makre: ‘Bõe la ned ning yell b sẽn gomd kibarã pʋgẽ wã maan n na n welg a zu-loɛɛgã? Wãn to la a Zeova sõng-a? Wãn to la m sẽn bãng bũmb ningã tõe n sõng-m tɩ m mao ne m zu-loeesã?’

6. Bõe yĩng tɩ d segd n tũud d sẽn zãmsdã?

⁶ 4) D tũ d sẽn bãngã: A Zeezi yeelame tɩ d sã n pa tũud d sẽn zãmsd bũmb ningã, d yaa wa ned sẽn me a roog bĩisr zugu. Nin-kãng tʋma wʋsg zaalem yĩng bala. Bala saagã sã n ni ne pãng tɩ koomã pid zĩig fãa, roogã na n lʋɩɩme. (Mat. 7:24-27) Woto me d sã n pʋʋse, n mams kibarã d yamẽ la d bʋgse, n yaool n pa tũ d sẽn bãngã, d modgrã fãa yaa zaalem. D sã n wa paamd makr bɩ namsg d tẽebã yĩnga, d tẽebã pa na n tall pãng wʋsg ye. La d sã n zãmsd Biiblã la d tũud d sẽn bãngã, kɩtdame tɩ d yam-yãkrã yaa sõma n yɩɩda. D paamda sũur pʋgẽ bãane, la tẽeb sẽn tar pãng me. (Eza. 48:17, 18) Masã, bɩ d tũnug ne manesem a naas nins yell d sẽn zoe n gomã, n ges yam ning d sẽn tõe n dɩk ne yell sẽn zĩnd rĩm a Davɩɩd vɩɩmã pʋgẽ.

7. Biiblã kiba-bʋg yell la d na n gom masã?

⁷ Y zoa wall y zakã ned n maan bũmb tɩ sãam y sũur bɩ? Sã n yaa woto, y sã n lebg n ges rĩm a Davɩɩd biig a Absalom kibarã, na n sõng-y lame. A Absalom zãmba a ba wã, n bao n na n deeg a naamã.—2 Sãm. 15:5-14, 31; 18:6-14.

8. Bõe la y tõe n maan n paam a Zeova sõngre?

⁸ 1) D pʋʋse: Ning-y kibarã y yamẽ, la y togs a Zeova b sẽn maan-y bũmb ningã sẽn namsd-y to-to. (Yɩɩn. 6:7-10) Pelg-y y pʋg n togs-a sẽn be y sũurẽ wã. Rẽ poor bɩ y kos-a t’a sõng-y tɩ y paam sagls n bãng y sẽn na n maaneg yellã wɛɛngẽ.

9. Yel-bʋs n zĩnd a Davɩɩd ne a Absalom sʋka?

⁹ 2) D mams d yamẽ: Tags-y yell ning sẽn maan kibarã pʋgẽ wã yelle, la y mams y yamẽ n ges rẽ sẽn sãam rĩm  a Davɩɩd sũur to-to. A Davɩɩd biig a Absalom maana sɩlem yʋʋm wʋsgo, n na n paam tɩ nin-buiidã nong-a. (2 Sãm. 15:7) A Absalom sẽn wa n ges tɩ wakat taame wã, a tʋma tẽn-gũusdb Israyɛll soolmã fãa pʋgẽ tɩ b na n segl nin-buiidã tɩ b sak-a wa rĩma. A pʋd n tõogame t’a Ahitofɛll sẽn yaa a Davɩɩd zo-nongr la a sagend a ye wã sak n teel-a. (Yɩɩn. 41:2-10) A Absalom mooname tɩ yẽ lebga rĩma, la a kɩt tɩ b na n mak n yõk a Davɩɩd n kʋ. Tõe tɩ yaa wakat kãng la Davɩɩd sẽn da bẽed bã-kɛgengã. A Davɩɩd bãnga a Absalom sẽn da baood n na n maan bũmb ningã, n zoe n yi Zerizalɛm. A Absalom tãb-biisã ne a Davɩɩd tãb-biisã wa n baas n zaba taaba. Tõatbã kongã zabrã, tɩ b kʋ a Davɩɩd biig a Absalom.

10. Rĩm a Davɩɩd manesem ra tõe n yɩɩ wãna?

¹⁰ Rẽ poore, mams-y y yamẽ n ges a Davɩɩd sũur sẽn saam to-to yel-kãensã fãa sẽn paam-a wã. A ra nonga a Absalom, la a ra kɩsa a Ahitofɛll me sɩda. Baa ne rẽ, b yiibã fãa zãmb-a lame. B sãama a sũur hal wʋsgo, la b bao meng n na n kʋ-a. A Davɩɩd ra tõeeme n pa le kɩs a zo-rãmb a taabã sɩda, n tagsdẽ tɩ bãmb me teenda a Absalom. A ra tõeeme n tags a meng yell bala, n zoe n yi tẽngã yẽ a yembre. A ra tõe n komsa raood n base. La a pa maan bõn-kãensã baa a yembr ye. A pʋd n maoo ne a zu-loɛɛgã n tõoge. Bõe n sõng-a?

11. A Davɩɩd manesem yɩɩ wãn a zu-loɛɛgã pʋgẽ?

¹¹ 3) D bʋgse: Kiba-kãngã wilgdã tõnd bõe? Sok-y y meng yaa: “Bõe la a Davɩɩd maan n na n welg yellã?” A Davɩɩd pa yɛɛs n yãk yam tao-tao n maan bũmb sẽn pa zems ye. A leb n pa bas tɩ rabeemã kɩt t’a viig a sẽn segd n maanã ye. A pʋd n pʋʋsa a Zeova n kos sõngre. A kosa a zo-rãmbã me sõngre. A yɩɩ tao-tao n na n tũ bũmb ning a sẽn yãk yam n na n maanã. La baa ne a Davɩɩd sũur sẽn da sãam wʋsgã, a pa lebg sũ-to-neda, n pa le kɩs ned baa a ye sɩd ye. A kell n teega a Zeova la a zo-rãmbã me.

12. Wãn to la a Zeova sõng a Davɩɩde?

¹² Wãn to la a Zeova sõng a Davɩɩde? Y sã n maan vaeesg sɛbã pʋsẽ, y na n yãame t’a Zeova kõo a Davɩɩd pãng t’a tõog n mao ne a zu-loɛɛgã. (Yɩɩn. 3:1-9) A Zeova ninga a Davɩɩd barka, a yam-yãkrã yĩnga. A leb n teela a Davɩɩd zo-rãmb nins sẽn maan sɩd ne-a wã, b sẽn zab n na n kogl b rĩmã.

13. Ned sã n maan bũmb tɩ sãam y sũuri, wãn to la y tõe n dɩk a Davɩɩd togs-n-taare? (Matiye 18:15-17)

¹³ 4) D tũ d sẽn bãngã: Sok-y y meng yaa: ‘Wãn to la m tõe n dɩk a Davɩɩd togs-n-taare?’ Y segd maana bũmb tao-tao n welg yellã. Sẽn zems ne yɛlã sẽn yaa to-to wã, y tõe n maana wa b sẽn yeel Matiye sak 18 pʋgẽ wã kɛpɩ, bɩ n tũ saglgã b sẽn kõ wã. (Karm-y Matiye 18:15-17.) La y sũ-yikrã pʋgẽ, y pa segd n yɩ yãg-yãg n yãk yam n maan bũmb ye. Y segd n pʋʋsa a Zeova t’a kõ-y sũur pʋgẽ bãan la yam, tɩ y tõog n mao ne yellã. Ra bas-y y zo-rãmbã teegr ye. Pʋd n sak-y b sõngrã. (Yel. 17:17) Sẽn tar yõod n yɩɩdã, tũ-y sagls nins a Zeova sẽn kõt yãmb tɩ be a Gomdã pʋgẽ wã.—Yel. 3:5, 6.

14. Zu-loe-bʋs sasa la 2 Tɩmote 1:12-16; 4:6-11, 17-22 kareng na n keng y raoodo?

¹⁴ Y zakã neb n namsd yãmb y tẽebã yĩng bɩ? Bɩ y sẽn be tẽng ningã, b gɩdga a Zeova Kaset rãmbã tũudmã tʋʋm kẽere, wall b tʋʋmã fãa bɩ? Sã n yaa woto, y sã  n karem 2 Tɩmote 1:12-16; 4:6-11, 17-22, na n kenga y raood wʋsgo. * Yaa a Poll sẽn da wa n be bãens roogẽ la gʋls Biiblã gom-kãensã.

15. Bõe la y tõe n kos a Zeova?

¹⁵ 1) D pʋʋse: Nand tɩ y karem vɛrse kãense, bɩ y togs a Zeova y zu-loɛɛgã, la y wilg-a yellã sẽn namsd-y to-to wã. Pelg-y y pʋg n togs-a sẽn be-y sũurẽ wã fãa. Rẽ poor bɩ y kos-a t’a sõng-y tɩ y yã sagls a Poll zu-loeesã kibar pʋgẽ, tɩ sõng-y tɩ y bãng y sẽn na n maaneg n tõog n mao ne y zu-loɛɛgã.

16. Bõe n paam a Polle?

¹⁶ 2) D mams d yamẽ: D ning d meng a Poll zĩigẽ. B kẽes-a-la roog Rom n sog-a ne bãense. B ra zoe n kẽes-a-la bãens roogo, la so-kãngã wã, a kɩsa sɩd tɩ b na n kʋ-a lame. A zo-rãmbã kẽer daag-a lame n base, t’a pãngã me ra boog wʋsgo.—2 Tɩm. 1:15.

17. A Poll manesem ra tõe n yɩɩ wãn a zu-loɛɛgã pʋgẽ?

¹⁷ A Poll ra tõe n tẽega pĩndã yelle, n tags t’a sã n da pa lebg kiris-ned sẽn tar yẽesem, woto t’a pa be bãens roogẽ ye. A ra tõe n yika a sũur ne Aazi soolmã rap nins sẽn da raag-a n basã, wall a pa le kɩs a zo-rãmbã baa a ye sɩd ye. La a Poll pa maan bõn-kãensã baa a ye. Bõe yĩng t’a kell n kɩs sɩd t’a zo-rãmbã na n maana sɩd ne-a, la t’a Zeova na n ning-a-la barka?

18. A Poll manesem yɩɩ wãn a zu-loɛɛgã pʋgẽ?

¹⁸ 3) D bʋgse: Sok-y y meng yaa: “Bõe la a Poll maan n tõog n mao ne a zu-loɛɛgã?” Baa ne a Poll sẽn da mi tɩ b na n kʋ-a lame wã, a pa yĩm bũmb ning sẽn tar yõod n yɩɩdã ye: Yaa a Zeova yʋʋrã sẽn na n paam waoogrã. A ra ket n tagsda a sẽn tõe n maan n keng neb a taabã raoodo. A teega a Zeova, n da pʋʋsd-a wakat fãa. (2 Tɩm. 1:3) A pa tags a zo-rãmb nins sẽn daag-a n basã yell wʋsg ye. A wilgame t’a sũur nooma ne a zo-rãmb nins sẽn kell n teel-a la b maan bũmb toor-toor n sõng-a tɩ wilg tɩ b nong-a lame wã. Sẽn paase, a Poll ra ket n zãmsda Wẽnnaam Gomdã. (2 Tɩm. 3:16, 17; 4:13) Sẽn yɩɩd fãa, a ra kɩsa sɩd zãng t’a Zeova ne a Zeezi nong-a lame. B pa tol n daag-a n bas ye. A ra mii vẽeneg tɩ b na n keo-a lame, a sẽn kell n maan sɩd ne-bã yĩnga.

19. Wãn to la a Zeova sõng a Polle?

¹⁹ A Zeova ra pĩnd n togsa a Poll t’a na n yãa namsgo, a sẽn yaa kiris-nedã yĩnga. (Tʋʋ. 21:11-13) Wãn to la a Zeova sõng a Polle? A reega a Poll pʋʋsgã, n wa kõ-a pãnga. (2 Tɩm. 4:17) B wilga a Poll t’a bas a yam t’a na n paama a tʋʋm-toogã keoore. Sẽn paase, a Zeova kɩtame t’a Poll zo-rãmbã sõng-a ne sõng-vẽenese.

20. Sẽn zems ne Rom dãmb 8:38, 39 wã, wãn to la d tõe n dɩk a Poll togs-n-taare?

²⁰ 4) D tũ d sẽn bãngã: Sok-y y meng yaa: Wãn to la m tõe n dɩk a Poll togs-n-taare? Wa a Polle, bɩ d ning d yamẽ tɩ b na n nams-d-la d tẽebã yĩnga. (Mark 10:29, 30) Sẽn na yɩl n kell n sak a Zeova namsg sasa, d segd n teeg-a lame, n pʋʋsd-a, la d ket n zãmsd Biiblã wakat fãa n pa vaandẽ ye. D leb n segd n tẽegda wakat fãa tɩ bũmb a ye sẽn tar yõod d sẽn segd n maane, yaa d sẽn na n sõng t’a Zeova yʋʋrã paam waoogre. D tõe n kɩsa sɩd t’a Zeova pa na n tol n bas-do, la tɩ bũmb kae ned sẽn tõe n maan n kɩt t’a Zeova pa le nong-d ye.—Karm-y Rom dãmb 8:38, 39; Ebre. 13:5, 6.

21. Bõe n sõng a Aya ne a Ɛktoor tɩ b tõog n mao ne b zu-loeesã?

²¹ D yɛlã sẽn yaa to-to fãa, kibay nins sẽn be Biiblã pʋgẽ wã tõe n kõ-d-la pãnga. Wala makre, a Aya sẽn yaa so-pakd n be Zapõ wã yeelame t’a Zonas kibarã sõng-a lame t’a pa le yɛɛsd n na n moon zamã sʋk ye. A Ɛktoor sẽn yaa bi-bɩɩg sẽn be Ẽndonezi t’a roagdbã pa tũud a Zeova wã yeelame t’a Rut kibarã sõng-a lame t’a bãng a Zeova sõma la a tũud-a.

22. Wãn to la y tõe n maan tɩ Biiblã kibar b sẽn karme, bɩ ‘Tall-y b tẽebã buudã’ kibar naf-y wʋsgo?

²² Yɛ me la y tõe n paam wẽn-sakdb kibay sẽn na n sõng-y tɩ y paam pãnga? D video-rãmbã, ne Biiblã kibay b sẽn karmã, n paas d sõss nins sẽn yit t’a gom-zugã yaa: ‘Tall-y b tẽebã buudã’ tõe n sõng-y lame tɩ Biiblã kibay yɩ vẽeneg y yamẽ. * Nand tɩ y ges bɩ y kelg wall y karem kiba-kãensã sẽn be yamleoogã, kos-y-yã a Zeova t’a sõng-y tɩ y yã sagls kibarã pʋgẽ y sẽn tõe n tũ. Ning-y y meng ned ning yell b sẽn gomd kibarã pʋgẽ wã zĩigẽ. Bʋgs-y wẽn-sakdb kãens sẽn maan bũmb ningã zug neere, la a Zeova sẽn sõng-b to-to tɩ b tõog n mao ne b zu-loeesã. Rẽ poor bɩ y tũ bũmb ning y sẽn bãngã. Pʋʋs-y-yã a Zeova bark a sẽn sõngd yãmbã, la y bao y sẽn tõe n maan to-to n keng y taabã raood la y sõng-ba, n wilg a Zeova tɩ y sũur nooma ne a sẽn sõngd yãmbã.

23. Sẽn zems ne Ezayi 41:10, 13, bõe la a Zeova pʋlem tõndo?

²³ Dũni-kãngã sẽn be a Sʋɩtãan nugẽ wã kɩtame tɩ vɩɩmã yaa toogo, hal tɩ wakat ninga pa nana baa-baa. (2 Tɩm. 3:1) La d pa segd n yɛɛsdẽ, bɩ n maand yɩɩr ye. A Zeova mii yɛl nins sẽn namsd tõndã. A pʋlmame tɩ d sã n wa rat sõngre, a na n tebenda tõnd ne a nug-rɩtg sẽn tõogdã. (Karm-y Ezayi 41:10, 13.) D sã n kɩs sɩd zãng-zãng t’a Zeova na n teela tõndo, d na n paama pãng Gʋls-sõamyã maasem yĩnga, n tõog n mao ne zu-loɛɛg buud fãa.