Kiris-neb kẽer tũnugda ne aplikasiyõ kãensã n sõsd ne b zakã rãmba, wall ne b tẽed-n-taase. La kiris-neb nins tẽeb sẽn bɩ wã ningda b yamẽ Biiblã sagl-kãngã: “Gũus-m-meng soab yãta yell n zoe n soonde, la zɩtbã zãgsda soondgo, n bao yell n kõ b mense.”—Yel. 27:12.

D sũy noomame, a Zeova sẽn dat n kogl tõndã yĩnga. Woto yĩnga, d lakda d mens ne neb nins sẽn wat ne welgrã, neb nins b sẽn yiis tigingã pʋgẽ wã, bɩ neb nins sẽn wat ne zãmsg sẽn pa sɩdã. (Rom. 16:17; 1 Kor. 5:11; 2 Zã 10, 11) Neb kẽer sẽn wat tigissã tõeeme n tar yel-manesem sẽn pa waoogd Wẽnnaam baa bilfu. (2 Tɩm. 2:20, 21) D sã n wa baood zo-rãmba, d segd n ninga rẽ d yamẽ. La sã n yaa ne aplikasiyõ kãensã buudã la d tũnugd ne n baood zo-rãmba, tõe n yɩ toog tɩ d bãng n yãk zo-sõma.

Sẽn yɩɩd fãa, sã n mikame tɩ yaa neb kʋʋng n maan sull n toond taab mesaaz-rãmba, d segd n maana gũusg n yɩɩda. Kiris-neb kẽer kẽe sul-kãsems pʋsẽ, la pa baas neer ye. Sã n mikame tɩ sullã neb sõor taa kobs bɩ tusa, kõn yɩ toog tɩ saam-biig bɩ saam-bi-poak tõog n maan gũusg sɩda? A pa na n tõog n bãng b sẽn sɩd yaa neb ninsi, la b tẽebã sã n tara pãng ye. Yɩɩn-sõamyã 26:4 yetame: “Mam ka zĩndid ne zĩrẽ-yagdbã ye. Mam ka tũud zãmb dãmbã ye.” Woto wilgdame tɩ d sã n na n tũnug ne aplikasiyõ kãensã buudã n tool ned mesaaze, segd n yɩɩ ned d sẽn mi sõma.

Baa sullã pʋgẽ nebã pa waooge, kiris-ned segd n gũusa ne sẽk ning a sẽn dɩkd n toond mesaaz-rãmbã, la sullã neb sẽn gomd bũmb ning yellã. D pa segd n tags tɩ yaa tɩlɛ tɩ d leok mesaaz fãa, baa ne a sẽn gomd bũmb ning yelle, bɩ baa a sẽn na n dɩk sẽk ningã ye. A Poll yeela a Tɩmote t’a gũus ne neb nins wat ne “gom-toogo, la b kẽesd b toog neb a taab yɛlẽ” wã. (1 Tɩm. 5:13) Rũndã-rũndã, ned tõe n tũnuga ne aplikasiyõ kãensã buudã n maan woto.

Kiris-ned tẽeb sẽn bɩ pa na n kẽes a toog neb wɩdg pʋga, bɩ n vẽneg yɛl a tẽed-n-taasã zugu, yɛl neb a taab sẽn pa segd n bãng ye. (Yɩɩn. 15:3; Yel. 20:19) A pa na n yelg bɩ n kelg kibay sẽn sidgd yĩnga, bɩ kibar a sẽn pa tõe n bãng sã n sɩd yaa sɩd ye. (Efɛ. 4:25) Ne tõnd sit jw.org n paas teledifiziyõ wã sẽn yit kiuug fãa wã maasem, d paamda bũmb wʋsg d tẽebã kengr yĩnga, la kibay d sẽn tõe n kɩs sɩd ne.

Kiris-neb kẽer tũnugda ne aplikasiyõ kãensã n koosd teed bɩ n daadẽ, wall n maand teed piblisite rãmba, bɩ n na n sõng neb tɩ b paam tʋʋma. Woto yaa ligd baoore, la pa naag a Zeova tũubã pʋgẽ ye. Kiris-neb nins sẽn pa rat n yɩ ‘neb sẽn nong ligdã’ pa na n sak n tũnug ne b saam-biisã n bao ligd ye.—Ebre. 13:5.

La rẽ yĩnga, d tõe n tũnuga ne aplikasiyõ kãensã buudã n na n kos ligd n kõ d saam-biis nins sẽn dat sõngrã, wall sabab-wẽns sẽn paam-b rãmbã bɩ? D sẽn nong d tẽed-n-taasã la d tagsd b yellã yĩnga, naoor wʋsgo, d rat n sõnga sẽn dat-b sõngrã la d keng b raoodo. (Zak 2:15, 16) D sã n tũnug ne neb tusa wã sẽn be d aplikasiyõ wã pʋgẽ wã n na n maan woto, tõe n tiisã Filiyallã, bɩ tigingã sẽn sigl bũmb nins sõma, sẽn na yɩl n sõng saam-biisã. (1 Tɩm. 5:3, 4, 9, 10, 16) Ned baa a ye pa segd n maan tɩ yaa wa b yãk-a lame t’a segd n ges a tẽed-n-taasã yell ye.

D segd n tʋllame n maan bũmb nins sẽn na n kɩt tɩ Wẽnnaam yʋʋr paam waoogrã. (1 Kor. 10:31) Rẽ wã, d sã n wa tʋmd ne aplikasiyõ nins d sẽn tar n toond mesaaz-rãmbã wall ne bũmb a to, d tags n ges rẽ sẽn tõe n wa ne yell ningã, la d maan gũusgu.