1. Bõe la kom-bɩɩsã tõe n maane?

KOM-BƖƖSE, bãng-y tɩ y tara yõod wʋsg tigingã pʋgẽ. Yãmb wʋsg tara pãnga, la keelem. (Yel. 20:29) Bũmb wʋsg la yãmb tõe n maan n sõng y tigingã. Tõeeme tɩ y gũuda ne y sũur fãa n dat tɩ b wa yãk-y tɩ y lebg kãsemb-sõngd tigingã pʋgẽ. La tõe tɩ y tagsdame tɩ neb a taabã getame tɩ y paoodame, bɩ tɩ y pa tar minim wʋsg tɩ b tõe n bobl yãmb tʋʋmd sẽn tar yõod ye. Baa y sã n ket n yaa bi-bɩɩga, bũmb kẽer n be y sẽn tõe n maan masã menga, n paam tɩ y tigingã neb nand yãmba, la b kɩs-y sɩda.

2. Bõe yell la d na n gom sõs-kãngã pʋgẽ?

² Sõs-kãngã pʋgẽ, d na n goma rĩm a Davɩɩd yell wʋsgo. Koɛɛg-koɛɛga, d leb n na n goma yɛl kẽer sẽn maan Zida rĩm-dãmb a yiib vɩɩm pʋgẽ yelle. Yaa rĩm a Aaza ne rĩm a Zozafate. D na n yãa zu-loees nin-kãensã a tãabã sẽn mao ne, b manesem sẽn yɩ to-to, la yam ning kom-bɩɩsã sẽn tõe n dɩk b kibarã pʋgẽ.

3. Bõe la kom-bɩɩsã tõe n maan n sõng neb nins sẽn kʋʋl n be tigingã pʋgẽ wã?

³ A Davɩɩd sẽn wa n yaa bi-bɩɩga, a bɩɩsa minim nebã sẽn da get tɩ tara yõod wʋsgo. A ra yaa ned tẽeb sẽn tar pãnga. A ra mii yɩɩl sõma, n tũnug ne minim-kãng n  sõng a Sayull, rĩm ning Wẽnnaam sẽn da yãkã. (1 Sãm. 16:16, 23) Kom-bɩɩse, rẽ yĩnga yãmb tara minim sẽn tõe n naf neb a taabã tigingã pʋgẽ bɩ? Y wʋsg tarame. Tõe tɩ y gũus n gesame tɩ sẽn kʋʋl-bã wʋsg nongame tɩ b wilg-b b sẽn tõe n tall b tablɛt-rãmbã wall b portaabl-dãmbã n zãms Biiblã b toor to-to, bɩ n maan tigissã. Yãmb sẽn tar minim te-kãensã wɛɛngẽ wã yĩnga, y tõe n sõnga neb nins sẽn kʋʋlã sõma.

4. Wa a Davɩɩde, zʋg-sõma bʋs la kom-bɩɩsã segd n bɩɩse? (Ges-y sebrã pipi neng fotã.)

⁴ A Davɩɩd wilga a daar fãa vɩɩmã pʋgẽ t’a yaa ned b sẽn tõe n teege. Wala makre, a sẽn wa n yaa bi-bɩɩga, a ra gũuda a ba wã piis neere. Ra yaa tʋʋm sẽn da tõe n wa ne yell a zugu. Kaoosg zugẽ, a Davɩɩd yeela rĩm a Sayull yaa: “Mam sẽn gũud m ba wã piisã, gɩgemd bɩ rigd-n-yĩidg sã n wa yõk rũnga, mam digd-a lame n pãb n deeg rũngã a noorẽ wã. La a sã n dat n zab ne maam, mam gãta a lɛlmã n pãb-a n kʋ.” (1 Sãm. 17:34, 35) A Davɩɩd da getame t’a segd n kogla piisã. La a sɩd talla raoodo, n zab ne we-rũms n kogl piisã. Kom-bɩɩsã rɩkda a Davɩɩd togs-n-taare, b sã n tʋmd tʋʋmd ning fãa b sẽn kõ-bã neere.

5. Sẽn zems ne Yɩɩn-sõamyã 25:14, bõe la kom-bɩɩsã tõe n maan tɩ tar yõod n yɩɩda?

⁵ A Davɩɩd sẽn wa n yaa bi-bɩɩga, a modgame n tall zood sõma ne a Zeova. Zood kãng ra tara yõod wʋsg ne a Davɩɩd n yɩɩd a raoodã, bɩ a sẽn da tar minim n tõe n wẽ kʋnd sõma wã. A Zeova ra pa a Davɩɩd Wẽnnaam bal ye. A ra yaa a zoa hakɩɩk me. (Karm-y Yɩɩn-sõamyã 25:14.) Bũmb ning yãmb sẽn tõe n maan tɩ tar yõod n yɩɩda, yaa y sẽn na n modg tɩ yãmb ne y saasẽ Ba wã zood pãng paase. La woto tõe n kɩtame tɩ b kõ-y tʋʋmd tigingã pʋgẽ n paase.

6. Tags-kɛg bʋs la neb kẽer da tar a Davɩɩd zugu?

⁶ A Davɩɩd ra pa segd n bas tɩ nebã sẽn da tar tags-kɛg a zugã koms a raood ye. Wala makre, a sẽn wa n sak ne yamleoog n na n tɩ zab ne a Goliatã, rĩm a Sayull baoome n na n koms a raoodo, n yeel-a yaa: “Fo ka tõe n kẽng n tɩ zab ne Filisti nin-kãngã ye. Bala, fo yaa bi-bɩɩga.” (1 Sãm. 17:31-33) Sẽn deng rẽ, a Davɩɩd ba-biigã ra ning-a-la taal t’a pa tʋmd a tʋʋmã sõma ye. (1 Sãm. 17:26-30) La a  Zeova ra pa get a Davɩɩd wa yãaga, bɩ ned sẽn pa tʋmd a tʋʋm sõma ye. A Zeova ra mii a Davɩɩd sõma. A Davɩɩd sẽn teeg a Zeova sẽn yaa a zoa wã, a paama pãng n tõog n kʋ a Goliate.—1 Sãm. 17:45, 48-51.

7. Yam-bʋg la y tõe n dɩk a Davɩɩd kibarã pʋgẽ?

⁷ Yam-bʋg la y tõe n dɩk a Davɩɩd Kibarã pʋgẽ? D bãngame tɩ d segd n yɩɩ maag-m-mens rãmba. Tõe n yɩɩ toog ne neb nins sẽn bãng yãmb tɩ y ra yaa kambã, tɩ b get yãmb masã wa neb sẽn bɩ. La y tõe n kɩsa sɩd t’a Zeova getame tɩ zʋʋg nif sẽn ne wã. A mii yãmb sõma, la y sẽn tõe n maan bũmb ninsã. (1 Sãm. 16:7) Paas-y zood ning y sẽn tar ne Wẽnnaamã pãnga. Yaa woto la a Davɩɩd maan-yã, a sẽn maag a yĩng n ges bũmb nins a Zeova sẽn naanã. A Davɩɩd bʋgsa rẽ zugu, n bãng Naandã sõma n paase. (Yɩɩn. 8:4, 5; 139:14; Rom. 1:20) Bũmb a to y sẽn tõe n maane, yaa y sẽn na n bao a Zeova sõngre, sẽn na yɩl n paam pãnga. Wala makre, y karen-bi-taasã kẽer yaand-y lame, y sẽn yaa a Zeova Kaset rãmbã yĩng bɩ? Sã n yaa woto, bɩ y pʋʋs a Zeova t’a sõng-y tɩ y tõog n mao ne zu-loe-kãngã. Rẽ poore, bɩ y tũ sagls nins sẽn be a Gomdã pʋgẽ wã, d sɛb nins sẽn tik Biiblã zugã, la video-rãmbã pʋsẽ wã. Y sã n yã a Zeova sẽn sõng-y tɩ y tõog n mao ne yell fãa, y manegd n kɩs-a-la sɩd n paase. Sẽn paase, neb a taabã sã n yã tɩ y teega a Zeova, b na n kɩs-y-la sɩd n paase.

8-9. Bõe n sõng a Davɩɩd t’a tõog n gũ ne sũ-mare, n yaool n na n wa lebg rĩma? Yam bʋg la kom-bɩɩsã tõe n dɩk a Davɩɩd mak-sõngã pʋgẽ?

⁸ D gom zu-loɛɛg a to a Davɩɩd sẽn mao ne yelle. B sẽn zae a Davɩɩd t’a na n wa lebg rĩmã poore, a ra segd n gũu yʋʋm wʋsg n yaool n wa lebg Zida rĩma. (1 Sãm. 16:13; 2 Sãm. 2:3, 4) Wakat kãng fãa sasa, bõe n sõng a Davɩɩd t’a tall sũ-mar n gũ? A pa koms raood ye. A baoome n na n ges a sẽn tõe n maanegã. Wala makre, a sẽn wa n be Filisti nebã soolmẽ wã n zoet n na n põsg a Sayullã, a kell n bẽda ne wakat kãng n zab ne Israyɛll bɛɛbã. A sẽn maan woto wã, a kogla Zida soolmã todse.—1 Sãm. 27:1-12.

⁹ Yam-bʋg la kom-bɩɩsã tõe n dɩk a Davɩɩd mak-sõngã pʋgẽ? Tũnugd-y ne segb buud fãa y sẽn paame, n sõng y saam-biisã. D gom saam-biig a ye yelle. A yʋʋr la a Rikardo. * A sẽn wa n zems yʋʋm piiga, a yãka yam n na n wa lebg wakat fãa so-pakda. La a ra nan pa segl a meng n sa ye. Baa ne rẽ, a pa koms raoodo, bɩ n lebg sũ-to-ned ye. A pʋd n kẽesa a sẽkã wʋsg koɛɛgã mooneg pʋgẽ n paase. Ad a sẽn yeele: “M sã n lebg n tẽege, m bãngdame tɩ m da segd n toeema bũmb kẽer m vɩɩmã pʋgẽ, la m sɩd tõog n maana woto. Mam da modgdame n lebgd n tɩ kaagd neb nins fãa sẽn dat n bãng n paasã. La m sã n da na n tɩ kaag ned fãa, m segenda m meng sõma. M pʋd n paamame n sɩng n zãmsd ned Biiblã. M minimã sẽn da paasdã, m maneg n kɩsa sɩd ne m mengã.” Masã, a Rikardo lebga wakat fãa so-pakd sẽn tar yẽesem, la kãsemb-sõngda.

10. Daar a ye, bõe la a Davɩɩd maan-yã, a sẽn wa n segd n yãk yam n maan bũmb sẽn tar yõodo?

¹⁰ D gom zu-loɛɛg a to a Davɩɩd sẽn mao ne yelle. A Davɩɩd ne a tãb-biisã sẽn wa n zoet n na n põsg a Sayullã, b ra basa b zagsã rãmb n na n tɩ zabe. A  Davɩɩd ne a tãb-biisã sẽn wa n loogã, bɛɛb n wa n kẽ tẽngã n yõg b zagsã rãmb n tall-b n loog yembdo. A Davɩɩd ra tõe n yeelame tɩ yẽ sẽn tar minim wʋsg zabr pʋgẽ wã yĩnga, a mii a sẽn tõe n maan n tɩ fãag a zakã rãmb yembdã pʋgẽ. La a pa maan woto ye. A baoo a Zeova sõngre. Ne maan-kʋʋd a Abiatar maasem, a Davɩɩd soka a Zeova yaa: “Mam sã n pʋgl nin-bãmbã, mam na n paam-b lame bɩ?” A Zeova yeela a Davɩɩd t’a kẽnge, la a wilg-a t’a bas a yam t’a na n tõoga a bɛɛbã. (1 Sãm. 30:7-10) Yam-bʋg la y tõe n dɩk yel-kãnga pʋgẽ?

11. Nand tɩ y yãk yam n maan bũmbu, bõe la y segd n maane?

¹¹ Reng-y n kos-y sagls n yaool n yãk yam n maan bũmbu. Kos-y y roagdbã saglse. Y leb n tõe n goma ne tigingã kãsem-dãmb sẽn tar minim, n paam saglse. A Zeova kɩsa kãsem-dãmbã sɩda. Yãmb me tõe n kɩs-b-la sɩda. A Zeova get-b-la wa “kũun” a sẽn kõ tigingã. (Efɛ. 4:8) Y sã n tall b tẽebã buudu, la y kelgd sagls nins b sẽn kõt yãmbã, na n naf-y-la wʋsgo. Masã, bɩ d ges yam ning d sẽn tõe n dɩk rĩm a Aaza kibarã pʋgẽ.

12. Zʋg-sõma bʋs la a Aaza ra tara, a sẽn wa n sɩng naam dɩɩbã?

¹² Rĩm a Aaza sẽn wa n yaa bi-bɩɩga, a ra yaa sik-m-meng la raood soaba. Wala makre, a sẽn wa n ledg a ba a Abiza n na n dɩ naamã, a kɩtame tɩ b menes bõn-naandsã pʋʋsg soolmã pʋgẽ. Sẽn paase, a yeela “Zʋʋda nebã tɩ b bao Sẽn-Ka-Saab sẽn yaa bãmb yaab-rãmba Wẽnnaamã, la b sak bãmb tõodã ne b noyã.” (2 Kib. 13:23-14:6) Etiopi rao a Zeera sẽn wa ne sodaas milyõ a yembr n na n zab ne Zida wã, a Aaza talla yam n bao a Zeova sõngre. A yeelame: “Sõng-y-do Sẽn-Ka-Saab sẽn yaa tõnd Wẽnnaam! Bala, tõnd teega yãmba.” A Aaza gom-kãensã sẽn tar pãngã wilgda vẽeneg t’a ra kɩsa sɩd t’a Zeova na n fãaga yẽ ne a nin-buiidã. A sɩd teega a saasẽ Ba wã, tɩ kɩt tɩ b “tõog Kuus nebã,” rat n yeel tɩ Etiopi nebã.—2 Kib. 14:7-11.

13. Yel-bʋg n wa n paam a Aaza, la bõe yĩnga?

¹³ Sãmbg kae tɩ y na n sak n deegame tɩ pa yɩ nana baa bilf ne a Aaza, sodaas bãmb milyõ sẽn wa n na n zab ne-a wã ye.  A Aaza sẽn teeg a Zeova wã, a tõoga zabrã. La zu-loɛɛg sẽn pa ta woto sẽn wa n wa wã, a pa bao a Zeova sõngr ye. Israyɛll rĩm-wẽng a Baasa sẽn wa n dat n zab ne-a tɩ kẽes a rabeemã, a Aaza tɩ baoo sõngr Siiri rĩmã nengẽ. A sẽn maan woto wã waa ne yel-beedo. A Zeova kɩtame t’a no-rɛɛs a Hanani yeel a Aaza yaa: “Fo basa Sẽn-Ka-Saabã teegre, n tɩ teeg Siiri rĩmã. Woto yĩng kɩtame tɩ Siiri tãb-biisã na n põsg f nugẽ.” La wakat kãng tɛka, a vɩɩmã yɩɩ zab woo zaba. (2 Kib. 16:7, 9; 1 Rĩm 15:32) Yam-bʋg la d tõe n dɩk kiba-kãngã pʋgẽ?

14. Wãn to la y tõe n teeg a Zeova? Sẽn zems ne 1 Tɩmote 4:12, y sã n teeg a Zeova, wãn to la na n naf yãmba?

¹⁴ Kell-y n yɩ-y sik-m-mens rãmba, la y teeg a Zeova wakat fãa. Y sẽn wa n deeg lisgã, y wilgame tɩ y tẽeda a Zeova la tɩ y kɩs-a-la sɩda. La yaa ne sũ-noog wʋsg la a Zeova sak tɩ y lebg a zakã neda. Y sẽn segd n maan masã yaa y ket n teegd a Zeova. Tõe n wõnda yaa nana tɩ y teeg a Zeova, y sã n wa rat n yãk yam n maan bũmb sẽn tar yõod wʋsgo. La sasa a taabã y maanda wãna? Ad sɩd tara yõod wʋsg tɩ y teeg a Zeova, y sã n wa rat n yãk yam reemã wɛɛngẽ, nug-tʋʋmã wɛɛngẽ, la y sẽn magd n na n wa maan bũmb nins y vɩɩmã pʋgẽ wã wɛɛngẽ. Ra teeg-y y meng yam ye. Bao-y sagls Biiblã pʋgẽ sẽn na n sõng-y tɩ y bãng n yãk yam, tɩ rẽ poor bɩ y sak n tũ y sẽn bãng bũmb ningã. (Yel. 3:5, 6) Y sã n maan woto, y na n nooga a Zeova sũuri, leb n na n kɩtame tɩ y tigingã neb nand yãmba.—Karm-y 1 Tɩmote 4:12.

15. Wa b sẽn togs 2 Kibay 18:1-3; 19:2, bõe la rĩm a Zozafat maan tɩ yaa tudgri?

¹⁵ Wa ninsaalbã fãa, yãmb me pa zems zãng ye. Wakat ninga, y na n tudgame. La woto pa segd n gɩdg yãmb tɩ y pa maan y sẽn tõe fãa a Zeova tʋʋmdã pʋgẽ ye. D gom rĩm a Zozafat yelle. A ra tara zʋg-sõma wʋsgo. A sẽn wa n yaa bi-bɩɩga, a “baoo Sẽn-Ka-Saabo, sẽn yaa a ba a Davɩɩd Wẽnnaamã, yẽnda kẽna wa sẽn zems bãmb tõodã.” Sẽn paase, a tʋma nanambs tɩ b saag Zida soolmã fãa pʋgẽ n na n zãms nebã tɩ b bãng a Zeova sõma. (2 Kib. 17:4, 7) La baa ne a Zozafat sẽn  da yaa pʋ-peelem soabã, a yãka yam n maan yɛl sẽn wa n baas wẽnga. Woto kɩtame t’a Zeova tʋm a no-rɛɛs t’a wa kõ-a saglse. (Karm-y 2 Kibay 18:1-3; 19:2.) Yam-bʋg la y tõe n dɩk kiba-kãngã pʋgẽ?

16. Yam-bʋg la y tõe n dɩk a Razɛɛv kibarã pʋgẽ?

¹⁶ B sã n kõ-y sagls bɩ y sak la y tũ. Wa kom-bɩɩs a taabã, tõe tɩ yaa toog ne yãmb tɩ y lʋɩɩs a Zeova tʋʋmdã taoor y vɩɩmã pʋgẽ. La ra koms-y raood ye. Tags-y saam-biig a ye yʋʋr sẽn boond t’a Razɛɛv kibarã yelle. A tẽega a sẽn da wa n yaa bi-bɩɩgã n yeel yaa: “Sasa kãnga, m da pa mi m sẽn na n tees m vɩɩmã neng ning ye. Wa kom-bɩɩs a taabã, mam sẽn da nong n tɩ yɩɩd yaa ɛspoorã la reemã n yɩɩd tigissã kẽnd la koɛɛgã moonego.” Bõe n sõng a Razɛɛve? Kãsem-soab a ye n kõ-a saglse. Ad a Razɛɛv sẽn yeele: “A sõnga maam tɩ m tags saglg ning sẽn be 1 Tɩmote 4:8 wã zugu.” A Razɛɛv sika a meng n sak n deeg saglgã n maneg n tags bũmb nins a sẽn lʋɩɩs taoorã a vɩɩmã pʋgẽ wã zug neere. A yeelame: “M yãka yam n na n lʋɩɩs a Zeova raabã maaneg taoor m vɩɩmã pʋgẽ.” Baasa wãna? A meng yeelame yaa: “Mam sẽn paam saglgã yʋʋm a wãn poore, m modgame n wa tõog n lebg kãsemb-sõngd tigingã pʋgẽ.”

17. Kãsembã tagsg yaa wãn to ne kom-bɩɩs nins sẽn tũud a Zeova wã?

¹⁷ Kãsembã sũur nooma ne yãmb a kom-bɩɩsã sẽn tũud a Zeova ne “yam a yembr” ne-bã. (Sof. 3:9) Yãmb sẽn modgd n tʋmd tʋʋm nins b sẽn kõ yãmbã ne yẽesem la ne y pãng fãa wã noom-b-la wʋsgo. B sũy nooma ne-yã.—1 Zã 2:14.

18. Wa b sẽn togs Yel-bũn 27:11 pʋgẽ wã, a Zeova tagsg yaa wãn to ne kom-bɩɩs nins sẽn tũud-a wã?

¹⁸ Kom-bɩɩse, ra tol-y n yĩm-y t’a Zeova nonga yãmb la t’a kɩs-y-la sɩd ye. A ra pĩnd n togsame tɩ yaoolem wakatã, kom-bɩɩs sẽn yaa wa tãb-biis n na n kõ-b mens ne yamleoog n tũ-a. (Yɩɩn. 110:1-3) A miime tɩ y nong-a lame, la tɩ y ratame n maan y sẽn tõe fãa n tũ-a. Woto yĩnga, bɩ y tall sũ-mar ne neb a taabã, la ne yãmb mengã. Y sã n wa tudgi, bɩ y sak saglg la kiblg ning b sẽn na n kõ yãmbã, n get rẽ wa bũmb sẽn yit a Zeova nengẽ. (Ebre. 12:6) Tʋm-y tʋʋm nins b sẽn bobl-y wã neere. La sẽn yɩɩd fãa, y sẽn maand fãa pʋgẽ bɩ y modg tɩ y saasẽ Ba wã sũur yɩ noog ne-yã.—Karm-y Yel-bũn 27:11.