1. Sẽn zems ne Matiye 24:9 wã, bõe yĩng tɩ nebã sẽn kis tõndã pa segd n ling-du?

A ZEOVA naana tõnd tɩ d tõe n nong d taabã, la d rat me tɩ neb a taabã nong-do. Dẽnd ned sã n kis-du, zabd-d-la wʋsgo, la tõe n kẽes-d-la rabeem menga. Wala makre, saam-bi-poak a ye yʋʋr sẽn boond t’a Zorzina n be Erop yeelame: “M sẽn wa n tar yʋʋm 14, m ma kisga maam m sẽn da tũud a Zeova wã yĩnga. M da getame t’a raag-m lame n base, la m sɩng meng n sãmbd m sã n yaa nin-sõngo.” * Saam-biig a ye yʋʋr sẽn boond t’a Danilo yeelame: “Daar a ye, sodaas n pãb maam, n tʋ-ma, la b yeel tɩ b na n maan-m-la yelle, m sẽn yaa a Zeova Kaset soabã yĩnga. Kẽes-m-la ra-beem, la m da getẽ tɩ b paoog-m lame.” Kisgr a woto zabda wʋsgo, la pa segd n ling tõnd ye. Bala a Zeezi ra pĩnd n togsame tɩ nebã na n kisg-d lame.—Karm-y Matiye 24:9.

2-3. Bõe yĩng tɩ nebã kis a Zeezi karen-biisã?

² Dũniyã kisa a Zeezi karen-biisã. Bõe yĩnga? Bala wa a Zeezi, tõnd “pa dũniyã rẽnd” ye. (Zã 15:17-19) Baa d sẽn sakd ninsaalbã goosneema-rãmbã noyã, d pa kẽed politikã yɛlẽ, d pa pʋʋsd darpo wã, d leb n pa yɩɩnd tãb-kaoorã yɩɩl ye. Yaa a Zeova a ye bal la d tũuda. Tõnd wilgdame tɩ yaa Wẽnnaam n tar sor n na n dɩ naam, la a Sʋɩtãan ne a poorẽ dãmbã pa sak n deeg rẽ ye. (Sɩng. 3:1-5, 15) Tõnd moondame n yetẽ tɩ Wẽnnaam Rĩungã bal n na n wa ne ãdem-biisã zu-loeesã tɩɩm. La tɩ ka la bilfu, Wẽnnaam Rĩungã na n sãama kɩɩsdbã fãa. (Dãn. 2:44; Vẽn. 19:19-21)  Woto yaa koe-noog ne sik-m-mens rãmbã, la yaa koe-beed ne nin-wẽnsã.—Yɩɩn. 37:10, 11.

³ D sẽn tũud Wẽnnaam noyã me yĩng kɩtame tɩ nebã kis tõndo. Wẽnnaam noyã sẽn yaa tɩrsã yaa toor fasɩ ne dũniyã nebã rẽndã. Rũndã-rũndã, neb wʋsg saka raglem tʋʋm buud toor-toorã. Yaool n yaa rẽ poorẽ la Wẽnnaam sẽn sãam Sodom la Gomoorã. (Ziid 7) Tõnd sẽn tũud Wẽnnaam noyã, n pa sakd n tʋmd tʋʋm-kãensã wã, neb wʋsg yaanda tõndo, n yetẽ tɩ d yaa neb sẽn yaa dem-dem.—1 Pɩy. 4:3, 4.

4. Nebã sã n wa kis tõndo, zʋg-sõma bʋs n tõe n sõng-do?

⁴ Bõe n tõe n sõng-d tɩ d tõog toogo, nebã sã n wa kis tõnd la b tʋʋd tõndo? D segd n talla tẽeb hakɩɩk t’a Zeova na n sõng-d lame. Wa gãongo, d tẽebã tõe n koka “wẽng soabã pɛɛmã fãa sẽn wit bugmã.” (Efɛ. 6:16) La tẽebã bal pa sek ye. Nonglmã me yaa tɩlɛ. Bõe yĩnga? Bala, nonglem pa “yikd a sũur ye.” A tõogda toog bũmb fãa pʋgẽ, baa yaa yɛl sẽn wat ne sũ-sãamse. (1 Kor. 13:4-7, 13) Masã, bɩ d ges tõnd sẽn nong a Zeova la d tẽed-n-taasã, la d sẽn nong baa d bɛɛbã sẽn tõe n sõng-d to-to tɩ d tõog toogo, b sã n wa kis tõndo.

5. Wãn to la a Zeezi sẽn da nong a Ba wã sõng-a?

⁵ Yʋng ning sẽn deng t’a Zeezi bɛɛbã kʋ-a wã, a yeela a karen-biis nins sẽn kell n maan sɩd ne-a wã yaa: “Mam nonga Ba wã, mam maanda wa Ba wã sẽn yeel maam tɩ m maanã bala.” (Zã 14:31) A Zeezi sẽn da nong a Zeova wã yĩng sõng-a lame t’a tõog n mao ne namsg buud toor-toore. D sã n nong a Zeova, tõe n sõnga tõnd me woto.

6. Sẽn zems ne Rom dãmb 5:3-5 wã, a Zeova nin-buiidã manesem yaa wãn to ne dũniyã nebã sẽn kis-bã?

⁶ A Zeova nin-buiidã sẽn nong a Zeova wã yĩng sõngd-b lame tɩ b tõogd toog wakat fãa, b sã n namsd-b tẽebã yĩnga. Wala makre, zʋɩf rãmbã bu-kaoodb sull ning sẽn tar noor n yɩɩdã sẽn wa n yeel tʋm-tʋmdbã tɩ b bas koɛɛgã moonegã, b sẽn nong Wẽnnaamã yĩng kɩtame tɩ b yeel yaa: “Wẽnnaam n yaa naab ning tõnd sẽn segd n sakã, pa ninsaalbã ye.” (Tʋʋ. 5:29; 1 Zã 5:3) Rũndã-rũndã, goosneemã rãmb sẽn tar pãng namsda d saam-biis wʋsg ne wẽnem, la yaa b sẽn nong a Zeova ne nonglem hakɩɩkã yĩng n sõngd-b tɩ b tõogd toogo. D pa komsd raoodo, dũniyã sẽn kis tõndã yĩng ye. D pʋd n maanda sũ-noogo.—Tʋʋ. 5:41; karm-y Rom dãmb 5:3-5.

7. D zakã neb sã n namsd tõnd d tẽebã yĩnga, d manesem segd n yɩɩ wãna?

⁷ Sẽn yɩɩd fãa, sã n yaa d zakã rãmb n namsd tõnd d tẽebã yĩnga, tõe n yɩɩ toog wʋsg tɩ d kell n tõog toogo. D sã n wa sɩng a Zeova tũubu, d zakã neb kẽer tõe n tagsdame tɩ b belga tõndo. Sãnda tõe n tagsame tɩ d zugã lebgame. (Ges-y Mark 3:21.) B tõe n namsa tõnd ne toom wʋsgo. La woto pa segd n ling-d ye. Bala a Zeezi yeelame: “Ned meng zak rãmb na n yɩɩ a bɛɛba.” (Mat. 10:36) Sẽn yaa manesem ning fãa la d zakã rãmb tar ne tõndo, d pa na n ges-b wa d bɛɛb ye. Tõnd nonglmã ne a Zeova sã n paamd pãnga, d pʋd n na n maneg n nonga nebã n paase. (Mat. 22:37-39) D pa na n tol n bas Biiblã noyã tũubu, d sẽn dat n noog ninsaal sũur yĩng ye.

8-9. Bõe n sõng saam-bi-poak a ye t’a tõog n yals kãn-kãe, baa ne b sẽn da namsd-a wʋsg a tẽebã yĩngã?

 ⁸ A Zorzina, saam-bi-poak ning yell d sẽn gomã tõog n yalsa kãn-kãe baa ne a ma wã sẽn da namsd-a ne toom wʋsg a tẽebã yĩngã. Ad a sẽn yeele: “Maam ne m ma n sɩng Biiblã zãmsg ne a Zeova Kaset rãmbã. La kiis a yoob poore, m sẽn wa n dat n sɩng tigissã kẽndã, m ma manesmã toeema fasɩ. M bãngame t’a ra sõsda ne sɩdã-kɩɩsdbã. A sã n da gomd ne maam, m da nee vẽeneg t’a tagsda wa bãmba. A mii n tʋʋda maam, n takd m zugã zoobd la a sogd m kokoɛyã. A mi n wʋka m sɛbã n fãeege. M sẽn wa n tar yʋʋm 15, m deega lisgu. M ma sẽn da rat tɩ m bas a Zeova tũubã, a tɩ ninga maam kom-tõatb remsg zakẽ. Kẽer yaa neb sẽn da yũud dorg la b tʋmd tʋʋm-beedo. Ned sẽn segd n nong foo la a ges f yell sã n wẽneg n namsd foom f tẽebã yĩnga, yɩl n kell n tõog toog tõeeme n pa yɩ nana ye.”

⁹ Bõe n sõng a Zorzina t’a tõog toogo? A yeelame: “M ma sẽn wa n sɩng m namsgã, rẽ tɩ yaa m sẽn da karem Biiblã tõr n sa bala. M da kɩsa sɩd zãng tɩ m bãnga sɩdã. La m da getame tɩ m zoodã ne a Zeova pãng paasame. Mam da nong n pʋʋsd-a lame, t’a ra kelgd-ma. M sẽn da wa n be kom-tõatbã remsg zĩigẽ wã, saam-bi-poak n bool maam a zakẽ, tɩ d naag taab n zãms Biiblã. Wakat kãnga, saam-biisã la saam-bi-pogsã ra kengda m daood wʋsgo. B ra geta maam wa b zakã neda. M yãa vẽeneg t’a Zeova pãngã yɩɩda d bɛɛbã, baa sẽn yaa neb ninsi.”

10. D tõe n basa d yam t’a Zeova na n maana bõe n sõng-do?

¹⁰ Tʋm-tʋmd a Poll wilgame tɩ baa fʋɩ “pa na n tõog n welg tõnd ne Wẽnnaam nonglmã sẽn be tõnd Zu-soab a Kirist Zeezi pʋgẽ wã ye.” (Rom. 8:38, 39) Baa ne d sẽn tõe n nams wakat bilf pʋgẽ wã, a Zeova na n zĩnda ne-d wakat fãa, n bels-d la a kõ-d pãnga. Wala a Zorzina kibarã sẽn wilgdã, a Zeova leb n tũnugda ne d saam-biisã la d saam-bi-pogsã sẽn yaa wa d zakã nebã n sõngd tõndo.

11. Wãn to la nonglem ning yell a Zeezi sẽn gom Zã 15:12, 13 pʋgẽ wã sõng a karen-biisã? Kõ-y makre.

¹¹ Yʋng ning sẽn deng a Zeezi kũumã, a yeela a karen-biisã tɩ b nong taaba. (Karm-y Zã 15:12, 13.) A ra miime tɩ  nonglem hakɩɩkã na n sõng-b lame tɩ b kell n zems taaba, n tõog toog dũniyã sẽn kis-bã yĩnga. D gom Tesalonik tigingã neb mak-sõngã yelle. B sẽn wa n lugl tigingã n sa bala, a nebã paama namsg b tẽebã yĩnga. Ne rẽ fãa, saam-biisã la saam-bi-pogsã kell n kõo mak-sõng a Zeova sakrã wɛɛngẽ, la nonglmã wɛɛngẽ. (1 Tes. 1:3, 6, 7) A Poll sagl-b lame, n wilg tɩ b kell n nong taaba, la b pʋd “n maan dẽ n paase.” (1 Tes. 4:9, 10) Nonglmã ra na n kɩtame tɩ b bels sũ-sãang rãmbã, la b sõng neb nins sẽn ka pãngã. (1 Tes. 5:14) B tũu a Poll saglgã. Bala a lɛtr a yiib-n-soabã a sẽn gʋls sẽn zems yʋʋmd rẽ poorã pʋgẽ, a yeel-b lame: “Yãmb tẽebã pãng paasda wʋsgo, tɩ yãmb ned kam fãa nonglem ne a taabã me paasdẽ.” (2 Tes. 1:3-5) Nonglmã sõng-b lame tɩ b tõog toog b sẽn wa n namsd-b b tẽebã yĩngã, la yel-tood sasa.

12. Wãn to la d tẽed-n-taas wilg tɩ b sɩd nonga taaba, zabr sẽn wa n yik b tẽngẽ wã?

¹² D leb n gom a Danilo, saam-biig ning yell d sẽn zoe n gomã, ne a pagã yelle. Zabr sẽn wa n yik b galʋ-tẽngẽ wã, b ra ket n kẽndã tigissã, n moond koɛɛgã wa b sẽn tõe tɛka, la b pʋɩt rɩɩb ning b sẽn tarã ne b tẽed-taasã. La daar a ye, sodaas n wa b zakẽ wã ne bug-raado. Ad a Danilo sẽn yeele: “B yeela maam tɩ m bas a Zeova tũubu. M sẽn zãgsã, b pãba maam, n maan wa b na n tãoo maam bug-raoogo, n maan tɩ vẽendã zʋʋg mam zugẽ wã. Nand tɩ b looge, b yeelame tɩ m sã n pa sak b raabã, b na n lebg n wa yõga m pagã. La saam-biisã yɩɩ tao-tao n kẽes tõnd tẽr pʋgẽ, tɩ d toeem galʋ-tẽnga. M kõn tol n yĩm saam-biisã sẽn wilg to-to tɩ b nong-d lame wã ye. Tõnd sẽn ta be wã, saam-biisã kõo tõnd rɩɩbo, la b sõng-d tɩ d paam tʋʋm la ro-gãaga. Rẽ kɩtame tɩ tõnd me tõog n sõng a Zeova Kaset rãmb kẽer sẽn da zoet n baood b mens zabrã yĩngã.” Kiba-kãensã fãa wilgdame tɩ tõnd sẽn yaa kiris-neb sẽn nong taabã tõe n sõng-d lame tɩ d tõog toogo, dũniyã neb sẽn kis tõndã yĩnga.

13. Wãn to la vʋʋsem sõngã sõngd tõnd tɩ d tõogd toog a Zeova tʋʋmdã pʋgẽ, baa nebã sã n kis-du?

¹³ A Zeezi yeela a karen-biisã tɩ b nong b bɛɛbã. (Mat. 5:44, 45) Woto maaneg yaa nana sɩda? A bada. La ne a Zeova vʋʋsem sõngã sõngre, yaa bũmb sẽn tõe. Nonglmã  naaga a Zeova vʋʋsem sõngã biis sʋka, n paas sũ-mare, maan-neere, sũ-bʋgsem la yõk-m-menga. (Gal. 5:22, 23) Zʋg-sõma kãensã sõngda tõnd tɩ d tõogd toogo, b sã n wa kis tõndo. Neb wʋsg sẽn da kis tõnd toeemame, b sɩda, b paga, b biig wall b yak sẽn yaa d tẽed-n-taag sẽn tall zʋg-sõma kãensã yĩnga. B wʋsg lebga tõnd saam-biis la d saam-bi-pogs d sẽn nong sõma. Sã n yaa toog ne-y tɩ y nong neb nins sẽn kis yãmb y sẽn tũud a Zeova wã yĩnga, bɩ y pʋʋs n kos vʋʋsem sõngã sõngre. (Luk 11:13) La y kell n kɩs sɩd tɩ wakat fãa, Wẽnnaam sakrã n yaa sõma n yɩɩda.—Yel. 3:5-7.

14-15. Wãn to la Rom-dãmb 12:17-21 wã sõng a Yasmin t’a wilg a sɩdã t’a nong-a lame, baa ne a sẽn da namsd-a ne wẽnemã?

¹⁴ D gom saam-bi-poak a ye yʋʋr sẽn boond t’a Yasmin yelle. A sẽn wa n lebg a Zeova Kaset soabã, a sɩdã ra tagsdame tɩ b belg-a lame, t’a mak n na n kɩt t’a bas Wẽnnaam tũubu. A tʋ-a lame, n yeel a roagdbã, tũudum taoor soaba, la sõey tɩ b bugs-a, n yeel t’a rat n wãa a zakã. A sɩdã pʋd n tɩ tʋʋ saam-biisã tigsg sasa. A Yasmin ra yãbda wakat fãa b sẽn da namsd-a woto wã yĩnga.

¹⁵ A Yasmin tẽed-n-taasã bels-a-la Rĩungã roogẽ, la b keng a raoodo. Kãsem-dãmbã yeel-a lame t’a tũ saglg ning sẽn be Rom-dãmb 12:17-21 wã. (Karm-y.) A Yasmin yeelame: “Ra yaa toog wʋsgo, la m kosa a Zeova t’a sõng-ma. Rẽ poore, m maana m sẽn tõe fãa n tũ Biiblã sẽn yetã. Mam sɩdã sa n da wa rẽgem rɩɩbã seglg zĩig ne pʋ-toogo, m basda m yam n yẽese. A sã n da tʋʋs-ma, m leokda ne bʋgsem. Baa a sẽn wa n ka laafɩ wã, m gesa a yell neere.”

16-17. Yam-bʋg la y tõe n dɩk a Yasmin kibarã pʋgẽ?

¹⁶ A Yasmin paama barka, a sẽn wilg t’a nonga a sɩdã. Ad a sẽn yeele: “Mam sɩdã sɩngame masã n kõt maam sɩd n yɩɩd pĩndã. Bala a bãngame tɩ m togsda sɩd wakat fãa. A sɩngame n kelgd maam ne waoogre, m sã n wa gomd m tũudmã yell ne-a, la a sak tɩ d na n tall laafɩ ne taab zakã pʋgẽ. Masã a yeta maam tɩ m kẽng m tigissã tɩ gɩdgr kaẽ ye. Tõnd zakã pʋgẽ vɩɩmã lebga sõma n paas hal wʋsgo, tɩ d noom ne taab sõma masã. Mam daabã yaa m sɩdã sẽn na n wa sak sɩdã, n naag maam tɩ d tũud a Zeova.”

¹⁷ A Yasmin mak-sõngã wilgdame tɩ nonglem “pa komsd raood n bas ye. . . . A saagda manegr bũmb fãa pʋgẽ, a tõogda  toog bũmb fãa pʋgẽ.” (1 Kor. 13:4, 7) Kisgr tõe n talla pãng la sãamd sũur wʋsgo. La nonglmã pãng yɩɩda kisgrã hal zĩig sẽn zãre. Nonglem kɩtdame tɩ ned yam tek t’a sak n tũ a Zeova. La woto noogda a Zeova sũuri. Baa nebã sã n ket n kis tõndo, d tõe n kell n talla sũ-noogo. Wãn to?

18. Bõe yĩng tɩ d tõe n maan sũ-noogo, b sã n wa kis-du?

¹⁸ A Zeezi yeelame: “Sẽn wa n yaa wakat ning fãa la nebã kis yãmba, . . . yãmb yaa sũ-noog rãmba.” (Luk 6:22) Pa tõnd mengã n dat tɩ nebã kisg-d ye. D pa baood tɩ nebã kisg-d d tẽebã yĩng tɩ d maan sũ-noog ye. Sã n yaa woto, bõe yĩng tɩ d tõe n maan sũ-noogo, b sã n wa kis-du? Ad bʋʋm a tãabo: Pipi, d sã n tõogd toogo, d tata Wẽnnaam yam. (1 Pɩy. 4:13, 14) Yiibu, d tẽebã lebgda sõma n yɩɩd pĩndã, t’a pãngã me paase. (1 Pɩy. 1:7) La tãabo, d na n wa paama keoor yõod sẽn pa tõe n bãng n bilgi. Yaa vɩɩm sẽn kõn sa.—Rom. 2:6, 7.

19. Bõe yĩng tɩ tʋm-tʋmdbã kell n maan sũ-noogo, b sẽn pãb-bã poore?

¹⁹ A Zeezi vʋʋgrã poor bilfu, tʋm-tʋmdbã paama sũ-noog ning yell a sẽn da gom ne-bã. B sẽn wa n pãb-b la b kõ-b noor tɩ b ra le moon koɛɛgã, b kɩdma sũ-noogo. Bõe-yĩnga? “Bala, b paamame tɩ b nams-b a Zeezi yʋʋrã yĩnga.” (Tʋʋ. 5:40-42) B ra nonga b Zu-soabã, n yɩɩd b sẽn yɛɛsd b bɛɛbã kisgrã. B moona koɛɛgã n pa tol n base, n wilg tɩ b tara nonglem. D tẽed-n-taas wʋsg ket n maanda a Zeova raabã ne b sũy fãa, baa ne zu-loeesã. B miime t’a Zeova pa na n yĩm b tʋʋmdã, la nonglmã b sẽn wilg a yʋʋrã yĩngã yell ye.—Ebre. 6:10.

20. Bõe yell la d na n gom sõsg ning sẽn pʋgdã pʋgẽ?

²⁰ Dũni kãngã sã n ket n beẽ fãa, a nebã na n kell n kisga tõndo. (Zã 15:19) La d pa segd n zoe rabeem ye. Wa d sẽn na n yã sõsg ning sẽn pʋgdã pʋgẽ wã, a Zeova na n kõo neb nins sẽn maand sɩd ne-a wã pãnga, la a kogl-ba. (2 Tes. 3:3) Bɩ d ket n nong a Zeova, d tẽed-n-taasã, la baa d bɛɛbã menga. D sã n tũ sagl-kãngã, zems-n-taar na n kell n zĩnda d sʋka, tɩ d tẽebã me tar pãnga. Woto na n waooga a Zeova, la kõ kaset tɩ nonglem pãng yɩɩda kisgr hal zĩig sẽn zãre.