1-2. Wa Matiye 5:11 wã sẽn wilgdã, b sã n wa namsd tõnd d tũudmã yĩnga, d manesem segd n yɩɩ wãna?

A ZEEZI yeela a karen-biisã tɩ b na n paama sũ-noog hakɩɩka. La a pĩnd n togsa neb nins sẽn nong yẽ wã tɩ b na n paama zu-loees me. (Mat. 10:22, 23; Luk 6:20-23) D sẽn yaa Kiristã karen-biisã, d sũy yaa noogo. La d tagsg yaa wãna, d zakã neb wall goosneemã sã n wa namsd tõnd d tũudmã yĩnga, pa rẽ bɩ d karen-bi-taas wall d tʋmd-n-taas sã n wa pẽdgd tõnd n dat tɩ d maan sẽn yaa wẽngã? D sã n tags woto fãa yelle, tõe n kɩtame tɩ d maand yɩɩre.

² Neb wʋsg pa tagsd tɩ b sã n wa paamd namsg b tũudmã yĩnga, seka b na maan sũ-noog ye. La Wẽnnaam Gomdã yaool n yeta tõnd vẽeneg tɩ yell a woto buud pʋgẽ, bɩ d maan sũ-noogo. Wala makre, karen-biig a Zak yeelame tɩ sã n wa yaa woto, d pa segd n maan yɩɩr tɩ loog ye. D pʋd n segd n kɩdma sũ-noogo. (Zak 1:2, 12) A Zeezi me yeelame tɩ d maan sũ-noogo, baa b sã n wa namsd tõnd d tũudmã yĩnga. (Karm-y Matiye 5:11.) Bõe la d tõe n maan n kell n tall sũ-noogo, baa b sã n wa namsd tõndo? D sã n ges lɛtr ning a Zak sẽn gʋls n tool pipi kiris-nebã pʋgẽ, d yãta bũmb wʋsg sẽn tõe n sõng-d rẽ wɛɛngẽ. Bɩ d reng n gom zu-loees kẽer pipi kiris-nebã sẽn paam yelle.

3. A Zak sẽn lebg a Zeezi karen-biigã poor bilfu, bõe n maane?

³ A Zeezi ba-biig a Zak sẽn lebg karen-biigã poor bilfu, nebã wa n yikame n namsd kiris-nebã Zerizalɛm, b tũudmã yĩnga. (Tʋʋ. 1:14; 5:17, 18) B sẽn wa n kʋ karen-biig a Etɩɛnnã, kiris-nebã wʋsg zoe n yii Zerizalɛm n  “sãeeg n kẽ Zide ne Samari soolmã,” hal n wa kẽng Sɩpr la Ãntiyoose. (Tʋʋ. 7:58–8:1; 11:19) D tõe n yeela vẽeneg tɩ karen-biisã maoo ne zu-loees wʋsgo. Baa ne rẽ, b sẽn kẽngẽ fãa, b kell n moona koe-noogã ne yẽesem, hal n lugl tigims Rom soolmã fãa pʋgẽ. (1 Pɩy. 1:1) La rẽ poore, b wa n maoo ne zu-loe-kɛgems a taaba.

4. Zu-loe-bʋs la pipi kiris-nebã ra segd n mao ne?

⁴ Pipi kiris-nebã ra segd n maoo ne zu-loees buud toor-toore. Wala makre, yʋʋmd 50 wã sẽnese, Rom naab a Kolood kõo noore, tɩ Zʋɩf-rãmbã fãa segd n yii Romme. Woto yɩɩ tɩlɛ ne Zʋɩf-rãmb nins sẽn da lebg kiris-nebã tɩ b zoe n bas b zagse, n tɩ zĩnd zĩis a taaba. (Tʋʋ. 18:1-3) Yʋʋmd 61 wã sẽnese, tʋm-tʋmd a Poll gʋlsame n wilg tɩ b ninga kiris-nebã taal zãma sʋka, n kẽes-b bãens roogo, la b fã-ba. (Ebre. 10:32-34) Wa neb a taabã, pipi kiris-nebã me maoo ne naongo, la bãase.—Rom. 15:26; Fili. 2:25-27.

5. Sogs-bʋs la d na n leoke?

⁵ A Zak sẽn wa n gʋls a lɛtrã sẽn deng yʋʋmd 62, a ra mii zu-loees nins a saam-biisã la a saam-bi-pogsã sẽn da maood ne wã sõma. A Zeova kɩtame t’a Zak gʋls lɛtr n tool kiris-nebã, n kõ-b sagls takɩ, n na n sõng-b tɩ b kell n maan sũ-noogo, baa ne b sẽn da maood ne zu-loeesã. Bɩ d lebg n ges a Zak sẽn gʋls bũmb ninsã, la d leok sogs-kãensã: Yaa sũ-no-bʋg yell la a Zak sẽn gomã? Bõe n tõe n kɩt tɩ kiris-ned pa paam sũ-no-kãngã? La wãn to la yamã, tẽebã, la raoodã tõe n sõng-d tɩ d kell n tall d sũ-noogã, sẽn wa n yaa zu-loɛɛg ning fãa sasa?

6. Wa Luk 6:22, 23 sẽn wilgdã, bõe yĩng tɩ kiris-ned tõe n maan sũ-noogo, b sã n wa namsd-a a tũudmã yĩnga?

⁶ Neb kẽer tagsdame tɩ sũ-noogã yaa b sẽn na n tar laafɩ, ligd wʋsgo, tɩ zems-n-taar be b zakã pʋgẽ. Sũ-noog ning yell a Zak sẽn gomã naaga Wẽnnaam vʋʋsem sõngã biis sʋka. La rẽ pa be ne d vɩɩmã yɛl sẽn yaa to-to ye. (Gal. 5:22) Kiris-ned paamda sũ-noog hakɩɩka, a sã n miẽ t’a tata a Zeova yam, la t’a rɩkda a Zeezi naoore. (Karm-y Luk 6:22, 23; Kol. 1:10, 11) Sũ-no-kãngã buud wita kiris-ned sũurẽ, wa bugum sẽn wit lãmp gell pʋgẽ. Lãmpã gell kɩtdame tɩ pemsmã la saagã pa tõe n kiis bugmã ye. Baa d sã n wa ka laafɩ, wall d pa le tar ligdi, sũ-no-kãngã buud pa menemd ye. D zakã neb wall neb a taab sã n wa yaand tõnd bɩ n namsd tõnd d tũudmã yĩnga, sũ-no-kãng pa sat ye. Sẽn wa n yaa wakat ning fãa la bɛɛb rat n kɩt tɩ d sũ-noogã sa, a pʋd n paasdame. Zu-loees nins fãa d sẽn paamd d tẽebã yĩngã wilgdame tɩ d sɩd yaa a Zeezi karen-biis hakɩɩka. (Mat. 10:22; 24:9; Zã 15:20) Dẽnd a Zak bee bʋʋm la a sẽn yeel tɩ: “M saam-biisi, yãmb sã n wa paamd zu-loees toɛy-toɛy bɩ y kɩdem sũ-noogo.”—Zak 1:2.

7-8. D tẽebã sã n paam makre, wãn to la rẽ nafd tõndo?

⁷ A Zak leb n wilga bʋʋm a to sẽn kɩt tɩ kiris-nebã sakd n maood ne zu-loees nins b sẽn paamd b tũudmã yĩngã. A yeelame tɩ ‘y tẽebã sẽn paam makr woto wã wata ne tõog-toogo.’ (Zak 1:3) D tõe n dɩka zu-loeesã kiris-nebã sẽn paamd b tũudmã yĩngã n mak ne boaag bugum b sẽn tar n kut sʋʋse. Sʋʋgã sã n wɩng tɩ b los-a koomẽ t’a maage, kutã pãng paasdame. Woto me, d sã n tõog toog namsgã pʋgẽ, d tẽebã pãng paasdame. Rẽ n so t’a Zak yeel yaa: “Bɩ tõog-toog tʋm a tʋʋmd n baas tɩ yãmb pid zãnga, n yɩ sõma bũmb fãa pʋgẽ, tɩ baa fʋɩ ra paoog-y ye.” (Zak 1:4) D sã n neẽ tɩ namsgã kɩtame tɩ d tẽebã pãng paasdẽ, d tõe n tõoga toog ne sũ-noogo.

⁸ A Zak sebrã pʋgẽ, a leb n wilga yɛl kẽer sẽn tõe n kɩt tɩ d wa pa le tar sũ-noog ye. Yaa yel-bʋse, la wãn to la d tõe n mao ne yel-kãens n tõoge?

9. Bõe yĩng tɩ yaa tɩlɛ tɩ d paam yam?

⁹ Yellã: D sã n wa pa mi d sẽn maandga. D sã n wa be namsg pʋgẽ, d segd n baoo a Zeova sõngre, n tõog n yãk yam n maan sẽn tat a yam, sẽn na n naf d tẽed-n-taasã, la sẽn na n sõng tõnd mengã tɩ d kell n maan sɩd ne-a. (Zer. 10:23) Yaa tɩlɛ tɩ d paam yam, n tõog n bãng d sẽn na n tall  yel-manesem ninga, la d sẽn na n yeel sẽn namsd-b tõndã bũmb ninga. D sã n wa pa mi d sẽn maandga, d tõe n komsa raoodo, n tagsdẽ tɩ d yellã pa tar tɩɩm ye. La rẽ tõe n kɩtame tɩ d sũ-noogã sa tao-tao.

10. Wa Zak 1:5 sẽn yetã, d sã n dat n paam yam, bõe la d segd n maane?

¹⁰ Tɩɩmã: D kos a Zeova t’a kõ-d yam. D sã n dat n tõog n mao ne zu-loeesã ne sũ-noogo, d segd n deng n pʋʋsa a Zeova n kos-a t’a kõ-d yam, tɩ d tõog n yãk yam n maan sẽn zemse. (Karm-y Zak 1:5.) D sã n wa tagsdẽ t’a Zeova pa leok d pʋʋsg zĩig pʋgẽ, d manesem segd n yɩɩ wãna? A Zak yeelame tɩ d segd n ‘kell n kosa Wẽnnaam’ n da bas ye. A Zeova sũur pa na n sãam ne-do, d sã n ket n kot-a t’a kõ-d yam ye. A pa n ning-d taal me ye. D sã n pʋʋs d saasẽ Ba wã n kos-a t’a kõ-d yam tɩ d tõog n mao ne d zu-loeesã, a na n kõ-d-la “ne yamleoogo.” (Yɩɩn. 25:12, 13) A nee d namsgã, n kʋmd tõndo, la a rat n sõng-d ne a sũur fãa. Hakɩɩka, rẽ yaa bʋʋm sẽn sek d na maan sũ-noogo. La wãn to la a Zeova kõt tõnd yam?

11. Bõe me la d tog n maan n paam yam?

¹¹ A Zeova kõta tõnd yam ne a Gomdã maasem. (Yel. 2:6) Sẽn na yɩl n paam yam-kãngã, d segd n zãmsda Wẽnnaam Gomdã, la sɛb nins sẽn tik Biiblã zug siglgã sẽn yiisdã. La d pa segd n zãmsd Biiblã n na n paam bãngr bal ye. D segd n tũu sagls nins Wẽnnaam Gomdã sẽn kõtã me. A Zak yeelame: “Bɩ y yɩ Wẽnnaam gomdã sakdba, la y ra yɩ a kɛlgdb bal ye.” (Zak 1:22) D sã n tũud Wẽnnaam Gomdã saglse, d na n maneg n yɩɩ neb sẽn baood laafɩ, sẽn maand bũmb fãa ne yam, la sẽn pid ne nimbãan-zoeere. (Zak 3:17) Zʋg-sõma kãensã sõngda tõnd tɩ d tõog n mao ne zu-loɛɛg buud fãa, tɩ d sũ-noogã me pa sa ye.

12. Bõe yĩng tɩ tar yõod tɩ d bao n bãng Biiblã sẽn yetã sõma?

 ¹² Wẽnnaam Gomdã yaa wa nin-gɛtga, n tõe n sõng-d tɩ d bãng bũmb nins sẽn dat manegr d vɩɩmã pʋgẽ, n demse. (Zak 1:23-25) Wala makre, d sã n wa zãms Wẽnnaam Gomdã, d tõe n bãngame tɩ d segd n yõka d menga, n da yikd d sũur tao-tao ye. Ne a Zeova sõngre, d bãngda d sẽn tõe n tall sũ-bʋgsem to-to ne nebã, wall d sã n wa maood ne yɛl sẽn tõe n yik d sũuri. D sẽn yaa sũ-bʋgsem dãmbã yĩnga, d tallda manesem sẽn zemse, d sã n wa tar zu-loeese. D tõogd n tagsa sõma, n bãng n yãk yam n maan sẽn segde. (Zak 3:13) Ad sɩd tara yõod tɩ d bãng Biiblã sẽn yetã sõma!

13. Bõe yĩng tɩ d segd n bao n bãng neb kẽer kibay sẽn be Biiblã pʋgẽ?

¹³ Wakat ninga, yaa d sã n wa tugd bal la d rɩkd yam. La pa tɩlɛ tɩ d tudgi, n nams n yaool n dɩk yam ye. Bũmb d sẽn tõe n maan n paam yam, yaa d sẽn na n dɩk yam neb a taabã sẽn maan tɩ yaa sõma, la b tudgrã pʋgẽ. Rẽ n so t’a Zak sagend tõnd tɩ d rɩk yam neb kẽer kibay sẽn be Biiblã pʋgẽ, wala makre, a Abrahaam, a Rahaab, a Zoob la a Eli. (Zak 2:21-26; 5:10, 11, 17, 18) Wẽn-sakdb kãensã tõog n maoo ne zu-loeese, sẽn da tõe n kɩt tɩ b sũ-noogã sa. B sẽn tõog toogã yaa mak-sõngo, sẽn wilgd tɩ ne a Zeova sõngre, tõnd me tõe n maana woto.

14-15. Bõe yĩng tɩ d segd n modg tɩ d sãmbsã sa?

¹⁴ Yellã: D sã n ket n tar sãmbse. Wakat ninga, tõe n yaa toog tɩ d wʋm bũmb Biiblã sẽn yet võor sõma. Bɩ a Zeova tõeeme n pa leok d pʋʋsgã wa d sẽn da tẽed to-to wã ye. Woto tõe n kɩtame tɩ d maand sãmbse. D sã n pa bao d sãmbsã tɩɩm, tõe n kɩtame tɩ d tẽebã pãng booge, hal n wa sãam d zoodã ne a Zeova. (Zak 1:7, 8) Tõeeme meng n kɩt tɩ d wa pa le tẽed tɩ manegr n wat ye.

¹⁵ Tʋm-tʋmd a Poll rɩka a sẽn saagd n na n wa paam bũmb ningã n mak ne baare. (Ebre. 6:19) Baar ning yell b sẽn gomd ka wã, yaa kut sẽn zɩs wʋsg b sẽn sogd sɛn bɩ wĩir noorẽ, tɩ be batayo pʋgẽ. Sob-kãseng sã n wa yik mogrã zugu, b lobgd-a-la koomã tẽngre, t’a kɩt tɩ sobgã pa tõe n peng batayo wã n tɩ fão kug-bedr sẽn be koomã pʋgẽ ye. La yaa sɛnnã sẽn sog batayo wã sã n pa kao la baarã tar yõodo. Wa tẽng-n-piisim sẽn tõe n sãam baar sɛnnã, sãmbsã me tõe n booga d tẽebã pãnga. Namsg sasa, ned sẽn maand sãmbs tõeeme n wa pa le tẽed t’a Zeova na n pidsa a pʋlemsã ye. D sã n pa le tar tẽebo, d pa na n le tẽed manegr me ye. A Zak yeelame tɩ “ned ning sẽn maand sãmbs yaa wa mogrã ko-pemd sobgã sẽn zẽkd t’a lengdẽ wã.” (Zak 1:6) Ned a woto pa tõe n paam sũ-noog baa bilf ye.

16. D sã n wa tar sãmbse, bõe la d segd n maane?

¹⁶ Tɩɩmã: D bao d sãmbsã tɩɩm, la d mogd n paas d tẽebã pãnga. D ra bas tɩ d yamã yuus ye. No-rɛɛs a Eli wakatẽ wã, a Zeova nin-buiidã yam da yuusdame. A Eli yeel-b lame yaa: “Yãmb na n saad n yeebda goabg la rɩtg hal tɩ ta rabʋre? Sẽn-Ka-Saab sã n yaa Wẽnnaam, bɩ y tũ-ba, la Baall sã n yaa Wẽnnaam, bɩ y tũ-a.” (1 Rĩm. 18:21) Yaa woto me rũndã-rũndã. D segd n maana vaeesgo, n tõog n kɩs sɩd t’a Zeova n yaa Wẽnnaam, tɩ Biiblã yaa a Gomde, la t’a Zeova Kaset rãmbã n yaa a nin-buiidu. (1 Tes. 5:21) D sã n maan woto fãa, na n kɩtame tɩ d sãmbsã sa, tɩ d tẽebã pãng me paase. D sã n dat tɩ b sõng-d tɩ d sãmbsã sa, bɩ d tɩ yã kãsem-dãmbã. D sã n dat n ket n maand a Zeova raabã ne sũ-noogo, d segd n yɩɩ tao-tao n bao d yellã tɩɩm.

17. D sã n koms raoodo, bõe n tõe n paam-do?

¹⁷ Yellã: D sã n koms raoodo. Wẽnnaam  Gomdã yetame: “Fo sã n bas tɩ f raood boog yel-pakr wakate, f pãngã fãa lebga zaalem bala.” (Yel. 24:10) Dẽnd d sã n koms raoodo, d sũ-noogã me na n saa tao-tao.

18. Tõog toog rat n yeelame tɩ bõe?

¹⁸ Tɩɩmã: D teeg a Zeova n paam raood n tõog toogo. D sã n dat n tõog toog zu-loeesã sasa, d segd n talla raoodo. (Zak 5:11) Gom-bil ning a Zak sẽn tũnug ne n gom ‘tõog-toog’ yellã bilgda ned sẽn na n yas a zĩigẽ kãn-kãe, n pa yẽrgdẽ ye. Yaa wa sodaag sẽn na n tall raoodo, n yals a bɛ taoor n pa yẽrgd baa bilfu, baa a bɛ wã sẽn na n maan-a bũmb ning fãa.

19. Yam-bʋg la d tõe n dɩk a Poll mak-sõngã pʋgẽ?

¹⁹ Tʋm-tʋmd a Poll kõo mak-sõngo, raoodã la toogã tõogr wɛɛngẽ. Wakat ninga, a ra neeme t’a ka pãng ye. La a ra tõogda toogo, bala a ra teega a Zeova sẽn na n yɩl n paam pãnga. (2 Kor. 12:8-10; Fili. 4:13) Tõnd me sã n sik d meng n sak n deeg tɩ d rata a Zeova sõngre, d tõe n paama a Poll pãngã la a raoodã buudu.—Zak 4:10.

20-21. D tõe n kɩsa sɩd ne bõe?

²⁰ D tõe n kɩsa sɩd tɩ zu-loees nins d sẽn maood ne wã pa sɩbgr sẽn yit a Zeova nengẽ ye. Rẽ wɛɛngẽ, a Zak yeela bũmb sẽn tõe n kɩt tɩ d bas d yam. A yeelame: “Ned sã n wa paam zu-loɛɛg bɩ a ra yeele: ‘Yaa Wẽnnaam n makd maam.’ Bala ned pa tõe n mak Wẽnnaam tɩ b maan wẽnga, la Wẽnnaam me pa makd ned t’a maan wẽng ye.” (Zak 1:13) D sã n kɩsa sɩd ne rẽnda, tõnd ne d saasẽ Ba wã zoodã na n paama pãng n paase.—Zak 4:8.

²¹ A Zeova “pa tekde, la b pa toeemd” me ye. (Zak 1:17) A sõnga pipi kiris-nebã tɩ b tõog n mao ne b zu-loeesã. A na n sõnga tõnd me rũndã-rũndã. Kos-y a Zeova ne y sũur fãa, t’a sõng-y tɩ y paam yam, tẽebo, la raoodo. A na n deega y pʋʋsgã. Rẽ, y tõe n kɩsa sɩd t’a na n sõng-y lame tɩ y kell n tall y sũ-noogã, n tõog toog zu-loeesã pʋgẽ.