1. Bõe n kɩt tɩ zems-n-taar be a Zeova zakã neb sʋka?

D SŨUR nooma d sẽn paam n naag a Zeova zakã nebã. Bõe n kɩt tɩ laafɩ la zems-n-taar woto be tõnd sʋka. Bũmb a ye yaa tɩ d fãa maanda d sẽn tõe fãa n sakd zu-sobend ning a Zeova sẽn luglã. La yaa vẽeneg tɩ d sã n wʋmd zu-sobendã a Zeova sẽn luglã võor sõma, d zems-n-taarã me na n paasdame.

2. Sogs-bʋs la d na n leok sõs-kãngã pʋgẽ?

² Sõs-kãngã pʋgẽ, d na n goma zu-sobendã sẽn segd n yɩ to-to tigingã pʋgẽ wã yelle. Sẽn paase, d na n leoka sogs-kãensã: Saam-bi-pogsã tʋʋmd yaa bõe tigingã pʋgẽ? Yaa sɩd tɩ rao fãa sẽn deeg lisg tigingã pʋgẽ yaa saam-bi-poak fãa zu-soab bɩ? Kãsem-dãmbã sẽn tar zu-sobend ning saam-biisã la saam-bi-pogsã zugã yaa a yembr ne zak-soben-dãmbã sẽn tar zu-sobend ning b pagbã ne b kambã zugã bɩ? Bɩ d reng n ges d tagsg sẽn segd n yɩ to-to ne saam-bi-pogsã.

3. Bõe la d tõe n maane, n maneg n nand tʋʋmd ning saam-bi-pogsã sẽn tʋmd tigingã pʋgẽ wã?

³ D nanda d saam-bi-pogsã sẽn tʋmd wʋsg n get b zagsã rãmb yelle, n moond koe-noogã, la b teend tigingã. D na n maneg n nanda d saam-bi-pogsã, d sã n tags a Zeova ne a Zeezi sẽn get-b to-to wã yelle. Manesem ning tʋm-tʋmd a Poll sẽn da tar ne pagbã me tõe n sõng-d lame.

4. Biiblã pʋgẽ, bõe n wilgd t’a Zeova nanda pagbã wa a sẽn nand rapã to-to wã?

 ⁴ Biiblã wilgdame t’a Zeova nanda pagbã wa a sẽn nand rapã to-to wã. A wilgdame tɩ pipi kiris-nebã wakatẽ, a Zeova kõo pagb la rap vʋʋsem sõngã, tɩ b tõog n tʋm tʋʋm-kãsemse. Wala makre, b goma buud-goam toɛy-toɛya. (Tʋʋ. 2:1-4, 15-18) A Zeova zaee pagb ne rap ne vʋʋsem sõngã, tɩ b na n wa tɩ naag Kiristã n dɩ naam. (Gal. 3:26-29) Pagb ne rap fãa saagdame n na n wa vɩɩmd wakat sẽn kõn sa tẽngã zugu. (Vẽn. 7:9, 10, 13-15) A Zeova yãka pagb ne rap fãa tɩ b moond koe-noogã, la b zãmsd nebã Biiblã. (Mat. 28:19, 20) Wala makre, Tʋʋm sebrã pʋgẽ, b gomda pag a ye yʋʋr sẽn boond t’a Pirsill sẽn maan bũmb ningã yelle. Yẽnda ne a sɩd a Akila sõnga a Apolos sẽn da tar minim wʋsgã, t’a wʋm Biiblã gomd võor sõma.—Tʋʋ. 18:24-26.

5. Bõe la Luk 10:38, 39, 42 yeta, tɩ wilgdẽ t’a Zeezi ra waoogda pagbã?

⁵ A Zeezi ra waoogda pagbã, la a nand-ba. A ra pa maand wa fariziẽ-rãmbã sẽn da paoogd pagbã, la b pʋd n pa gomd ne-b zãma sʋka, tɩ b pa sokd b sõs ne-b Gʋls-sõamyã zugã ye. Wala makre, a ra sõsda Wẽnnaam Gomdã yel-zulumsã zug ne pagb la rap fãa. * (Karm-y Luk 10:38, 39, 42.) A ra sakdame tɩ pagb tũud-a tɩ b gilgd n moond koɛɛgã. (Luk 8:1-3) A sẽn yeel pagb tɩ b tɩ taas tʋm-tʋmdbã tɩ yẽ vʋʋgame wã, a waoog-b lame me.—Zã 20:16-18.

6. Wãn to la tʋm-tʋmd a Poll wilg t’a ra waoogda pagbã?

⁶ Tʋm-tʋmd a Poll tẽega a Tɩmote t’a waoog pagbã. A Poll yeel-a lame t’a ges ‘pagb nins sẽn kʋʋlã wa a ma-rãmba,’ la a ges ‘pagb nins yʋʋm sẽn pa vẽsgã wa a ba-bi-pogse.’ (1 Tɩm. 5:1, 2) A Poll sõnga a Tɩmote wʋsg t’a lebg kiris-ned sẽn bɩ. La a sak n deegame tɩ yaa a Tɩmote yaab-poakã ne a ma wã n yɩ pipi n zãms-a “Gʋls-sõamyã.” (2 Tɩm. 1:5; 3:14, 15) A Poll lɛtr ning a sẽn gʋls Rom kiris-nebã pʋgẽ, a pʋʋsa saam-bi-pogse, n sõdg b yʋyã takɩ. A yãa tʋʋmd ning saam-bi-pogsã sẽn tʋm koe-moonegã pʋgẽ wã, la a wilg me t’a nanda b tʋʋmdã.—Rom. 16:1-4, 6, 12; Fili. 4:3.

7. Sogs-bʋs la d na n leok masã?

⁷ Wa sul nins sẽn loogã sẽn wilgã, vɛrse ka be Biiblã pʋgẽ n wilgdẽ tɩ saam-bi-pogsã yõod pa ta saam-biisã ye. Tõnd saam-bi-pogsã d sẽn nong wʋsg la sẽn yaa kõatbã sõngda tigingã hal sõma. Kãsem-dãmbã teega b sõngrã, sẽn na n yɩl n paam tɩ laafɩ la zems-n-taar kell n zĩnd tigingã pʋgẽ. La sogsg kẽer leoor la d segd n bãnge. Wala makre, bõe yĩng t’a Zeova rat tɩ saam-bi-poak teeg peende, wall a pil a zug wakat kẽere? Sẽn mik tɩ yaa rapã bal la b yãkd tɩ b lebg kãsem-dãmb la kãsemb-sõngdb tigingã pʋgẽ wã, rat n yeelame tɩ rao fãa yaa pag fãa zu-soab tigingã pʋgẽ bɩ?

8. Wa Efɛɛz rãmb 5:23 sẽn wilgdã, rao fãa sẽn deeg lisg tigingã pʋgẽ yaa saam-bi-poak fãa zu-soab bɩ? Wilg-y y leoorã võore.

⁸ D sã n na n leok koɛɛg-koɛɛg bala, yaa ayo. Tigingã pʋgẽ, rao fãa sẽn deeg lisg pa saam-bi-poak fãa zu-soab ye. Yaa Kiristã la d fãa zu-soaba. (Karm-y Efɛɛz rãmb 5:23.) Zakã pʋgẽ, raoã n tar zu- sobend a pagã zugu. (Efɛ. 6:1, 2) Bi-ribl sẽn deeg lisg pa tar zu-sobend a ma zug ye. La tigingã pʋgẽ, zu-sobend ning kãsem-dãmbã sẽn tar saam-biisã la saam-bi-pogsã zugã tara koaka. (1 Tes. 5:12; Ebre. 13:17) Saam-bi-pogs nins sẽn pa kẽ kãadem, la b pa le vɩ ne b ba wã la b ma wã ket n waoogda b roagdbã la kãsem-dãmbã. Baasg zãnga, wa tigingã rapã, b tara zu-soab a ye tãa, sẽn yaa a Zeezi.

9. Bõe yĩng tɩ wakat ninga yaa tɩlɛ tɩ saam-bi-poak teeg peende, wall a pil a zugu?

⁹ Yaa sɩd t’a Zeova yãka rapã tɩ b na n lʋɩ taoor n ges zãmsgã yell tigingã pʋgẽ, la a pa yãk pagbã tɩ b tõe n maan woto ye. (1 Tɩm. 2:12) Bõe yĩnga? Yaa wa a sẽn yãk a Zeezi t’a yaa rao fãa zu-soabã. Yaa sẽn na yɩl tɩ zũnd-zãnd ra zĩnd tigingã pʋgẽ ye. Sã n wa lebg tɩlɛ tɩ saam-bi-poak tʋm tʋʋmd rao sẽn deeg lisg sẽn da segd n tʋme, a Zeova ratame tɩ wakat-kãng bɩ saam-bi-poakã teeg peende, wall a pil a zugã. * (1 Kor. 11:4-7) A Zeova sẽn yeel tɩ saam-bi-pogsã maan woto wã, pa sẽn na n paoog-b ye. Yaa a sẽn dat n kõ-b segb tɩ b wilg tɩ b waoogda zu-sobendã yẽ meng sẽn luglã. Bɩ d leok sok-kãngã masã: Zak-soben-dãmbã la kãsem-dãmbã zu-sobendã tekda zĩ-bʋgo?

10. Bõe n tõe n kɩt tɩ kãsem-soab wa rat n lugl noy tigingã neb yĩnga?

¹⁰ Kãsem-dãmbã nonga Kiristã, la b nong piisã a Zeova ne a Zeezi sẽn gũnug-bã. (Zã 21:15-17) Kãsem-soab sẽn get tigingã neb yellã yĩnga, a tõe n tagsdame t’a yaa wa b ba tigingã pʋgẽ.  A tõe n wa tagsdame tɩ zak soab sã n tara sor n tõe n lugl noy sẽn na yɩl n kogl a zakã rãmba, kãsem-soab me tõe n lugla noy sẽn na yɩl n kogl tigingã neba. Saam-biis la saam-bi-pogs kẽer tõe n wa ratame tɩ kãsem-dãmbã yɩ b zu-soben-dãmb tũudmã wɛɛngẽ, n yãkd yam yɛl kẽer wɛɛngẽ n kõt-b tɩ b tũudẽ. La rẽ yĩnga, tigingã kãsem-dãmbã ne zak-soben-dãmbã zu-sobend yaa yembr bɩ?

11. Wãn to la zak-soben-dãmbã la kãsem-dãmbã zu-sobend wõnd taaba?

¹¹ Tʋm-tʋmd a Poll wilgame tɩ yɛl kẽer wɛɛngẽ, zak soab ne kãsem-soab zu-sobend wõnda taaba. (1 Tɩm. 3:4, 5) Wala makre, a Zeova ratame tɩ zakã neb sak b zakã soab zu-sobendo. (Kol. 3:20) La a ratame me tɩ tigingã neb sak kãsem-dãmbã. A Zeova ratame tɩ zak-soben-dãmbã la kãsem-dãmbã modg tɩ neb nins yell b sẽn getã tẽeb ket n tar pãnga. B leb n segd n modgame tɩ neb nins sẽn sakd b zu-sobendã neẽ tɩ b nong-b lame. Wa zak soab sẽn get a zak rãmb yell sõma wã, kãsem-dãmbã me segd n modgame tɩ neb nins yell b sẽn getã paam sõngr toog wakate. (Zak 2:15-17) Sẽn paase, a Zeova ratame tɩ kãsem-dãmbã la zak-soben-dãmbã sõng neb nins sẽn sakd b  zu-sobendã tɩ b tũ yẽ noyã. La a pa rat tɩ b ‘maan tɩ zʋʋg bũmb nins sẽn gʋls’ Biiblã pʋgẽ wã ye.—1 Kor. 4:6.

12-13. Wa Rom dãmb 7:2 sẽn wilgdã, wãn to la zak-soben-dãmbã zu-sobend yaa toor ne kãsem-dãmbã rẽndã?

¹² La zĩis kẽer wɛɛngẽ, kãsem-soab ne zak-soab zu-sobend yaa toor wʋsgo. Wala makre, a Zeova yãka kãsem-dãmbã tɩ b tõe n yɩ bʋ-kaoodba, la a kõ-b sore, tɩ b tõe n yiis bɛɛgdb nins sẽn pa tekd yam n kot sugrã tigingã pʋgẽ.—1 Kor. 5:11-13.

¹³ La a Zeova kõo zak-soben-dãmbã zu-sobend a sẽn pa kõ kãsem-dãmbã. Wala makre, a kõo zak soab sore, t’a tõe n lugl noy la a kɩt tɩ b tũ rẽ a zakã pʋgẽ. (Karm-y Rom dãmb 7:2.) Wala makre, zak soab tara sor n na n yãk lɛɛr ning kambã sẽn segd n wa zakẽ, tɩ ra zʋʋg rẽndã ye. A leb n tara sor n na n kibl a kambã, b sã n pa sak n tũ no-kãnga. (Efɛ. 6:1) Sãmbg sẽn ka be, zak soab sẽn nong a zak rãmb na n deng n yẽsa ne a pagã, n yaool n lugl noy a zakã rãmb yĩnga. Bala, b yiibã lebga “yĩng a yembre.” *—Mat. 19:6.

14. a) Wa Mark 10:45 wã sẽn wilgdã, bõe yĩng t’a Zeova sẽn yãk a Zeezi t’a yaa tigingã zu-soabã yaa bũmb sẽn zemse? b) Siglgã taoor lʋɩtb sullã tʋʋmd yaa bõe? (Ges-y zĩ-gũbrã: “ Siglgã taoor lʋɩtb sullã tʋʋmde.”)

¹⁴ Ne Kirist maoongã maasem, a Zeova raa tigingã neb fãa yembr-yembr vɩɩm, la neb nins fãa sẽn na n tall tẽeb ne a Zeezi wã vɩɩm. (Mark 10:45; Tʋʋ. 20:28; 1 Kor. 15:21, 22) Rẽnd zemsame t’a Zeova yãk a  Zeezi sẽn kõ a vɩɩmã ãdem-biisã yĩngã t’a yɩ tigingã Zu-soaba. A Zeezi sẽn yaa d Zu-soabã, a tara sor n na n lugl noy tõnd ned kam fãa yembr-yembrã, zagsã, la tigingã fãa yĩnga, la a kɩt tɩ d tũ-ba. (Gal. 6:2) La pa noy bal la a Zeezi lugund ye. A geta tõnd ned kam fãa yell neere, la a nong-do.—Efɛ. 5:29.

15-16. Yam-bʋg la d tõe n dɩk saam-bi-poak a Marle la saam-biig a Benzame sẽn yeel bũmb ningã pʋgẽ?

¹⁵ Saam-bi-pogsã wilgdame tɩ b waoogda Kiristã, b sã n tũud sagls nins rap nins a sẽn yãk tɩ b lʋɩt taoorã sẽn kõtã. Saam-bi-poak a ye yʋʋr sẽn boond t’a Marle, n be Etazĩni togsa bũmb yẽ sẽn tagsde, tɩ saam-bi-pogs wʋsg me tagsd woto. Ad a sẽn yeele: “Mam sũur nooma wʋsg ne m sẽn kẽ kãadem, la m paam n yaa saam-bi-poak sẽn be tigingã pʋgẽ wã. Wakat fãa, m segd n modgame n tall yam-tagsg sẽn zems ne zu-sobendã a Zeova sẽn luglã. La m sɩdã ne tigingã saam-biisã kɩtame tɩ zu-sobendã sakrã yaa nana ne-ma. Bala b waoogd-m lame la b pẽgd-ma, tʋʋmd ning m sẽn tʋmdã yĩnga.”

¹⁶ Saam-biisã sã n waoogd saam-bi-pogsã la b nand-ba, b wilgdame tɩ b wʋmda zu-sobendã võor sõma. Saam-biig a ye yʋʋr sẽn boond t’a Benzame, n be Ãngeletɛɛr yeelame: “Saam-bi-pogsã sẽn kõt leoor nins tigissã sasa wã, la b kõt sagls nins Biiblã zãmsg wɛɛngẽ la koe-moonegã wɛɛngẽ wã sõnga maam tɩ m paam minim n paase. Mam tagsdame tɩ b sẽn tʋmd tʋʋmd ningã tara yõod hal wʋsgo.”

17. Bõe yĩng tɩ d segd n waoog zu-sobendã a Zeova sẽn luglã?

¹⁷ Tigingã neb fãa, rapã, pagbã, zak-soben-dãmbã la kãsem-dãmbã sã n wʋmd zu-sobendã võor sõma la b sakd-a, kɩtdame tɩ laafɩ zĩnd tigingã neb sʋka. La sẽn yɩɩd fãa, rẽ na n waa ne pẽgr n kõ d saasẽ Ba a Zeova sẽn nong-dã.—Yɩɩn. 150:6.