A Zeova yeela Israyɛll nebã tɩ b yɩ nin-buiid sẽn yaa sõamyã. Sẽn na yɩl n sõng-b tɩ b yɩ sõamyã, a yeelame: ‘Bɩ y ra kãneg taab ye. Ra rõd f to tɩ b kʋ-a ye. Mam yaa Sẽn-Ka-Saabo.’—Maan. 19:2, 16.

B sẽn yeel moorã Biiblã pʋgẽ tɩ f ‘ra rõd f to’ wã võor ne ebre yaa ‘ra yik n yals n dat tɩ b raag f yak zɩɩm ye.’ Rat n yeelame tɩ bõe? Zʋɩf-rãmbã sebr a ye sẽn gomd Maan-kʋʋr sebrã yell yetame: “Vɛrse wã bab-kãngã sẽn yet tɩ f ra yik n yals f to zugu, a taoore, bɩ a sɛɛgẽ wã võor wʋmb yaa toogo. Bala yaa toog tɩ d bãng ebre wã gom-bilã sẽn dat n yɛɛlgã takɩ.”

Bãngdb kẽer yeelame tɩ gom-kãngã ne b sẽn yeel bũmb ning vɛrse 15 wã pʋgẽ wã tũuda taaba. B yeta be yaa: “Da kao bʋʋd kegr ye. Ra mong naong soab bʋʋm a naongã yĩnga, la f ra kõ nin-kãseng bʋʋm a sẽn yaa nin-kãsengã yĩng ye. Bɩ y kao ba-biig bʋʋd tɩrga.” (Maan. 19:15) Woto yĩnga, b sẽn yeel vɛrse 16 pʋgẽ tɩ “ra rõd f to” wã, rat n yeelame tɩ Israyɛll ned ra pa segd n zãmb a to bʋʋdã wɛɛngẽ, leebgã wɛɛngẽ, la zakã pʋg yɛl wɛɛngẽ ye. Sẽn paase, a pa segd n tʋm pʋ-lik tʋʋma, sẽn na yɩl n naf a meng ye. La bũmb takɩ n tõe n sõng tõnd tɩ d maneg n wʋm vɛrse 16 võor sõma.

D ges b sẽn yeel bũmb ning vɛrse wã sɩngrẽ wã. Wẽnnaam yeela a nin-buiidã tɩ b ra gilgd n kãnegd b taabã ye. Ned sã n wɩd a to, tõe n waa ne yell me. La ned sã n kãneg a to, rẽ wẽnem n yɩɩda. (Yel. 10:19; Koɛ. 10:12-14; 1 Tɩm. 5:11-15; Zak 3:6) Ned sã n kãneg a to, naoor wʋsgo a yãka yam n togs goam sẽn pa sɩd a soabã zugu, n na n sãam a yʋʋre. Kãnegd tõe n kõo kaset sẽn yaa ziri ned zugu, baa sã n na n tũu ne a soabã yõore. Tẽeg-y tɩ neb n dõd a Nabot tɩ rẽ kɩt tɩ b lob-a kug n kʋ zaalem. (1 Rĩm. 21:8-13) Vẽenega, kãnegd tõe n dõda ned tɩ b kʋ-a, wa Maan-kʋʋr 19:16 babg a yiib-n-soabã sẽn yetã.

Sẽn paase, ned tõe n kãnega a to, a sẽn kis-a yĩnga. Pipi Zã 3:15 yetame yaa: “Ned ning fãa sẽn kis a saam-biig yaa nin-kʋʋda. La yãmb miime tɩ nin-kʋʋd baa a ye pa tar vɩɩm sẽn ka sɛtã tɩ be a meng pʋgẽ ye.” Wẽnnaam sẽn yeel bũmb ning vɛrse 16 pʋgẽ wã poore, a paasame yaa: “Bɩ f ra kisg f ba-biig f sũurẽ ye.”—Maan. 19:17.

Saglg ning sẽn be Maan-kʋʋr 19:16 yaa keoogr kiris-nebã yĩnga. D segd n gũusame n da wa tall tags-kɛg ned zugu, wall n kãneg ned ye. Koɛɛg-koɛɛg bala, d sã n dõd d to, d sẽn pa nong-a bɩ d sẽn maand sũ-kiir ne-a yĩnga, wilgdame tɩ d kis-a lame. Kiris-ned yaool n pa tog n kisg a to a bada.—Mat. 12:36, 37.