A Zeezi sẽn wa n be saasẽ wã, a bɩɩsa zʋg-sõma sẽn kɩt t’a lebg tʋmd-n-ta-sõngo. A sẽn wa n be tẽngã zugã, sõng-a lame t’a kell n yɩ tʋmd-n-ta-sõngo, tɩ nebã ra tõe n dɩk a togs-n-taare. Wãn to la tõnd me tõe n dɩk a togs-n-taare? D sã n maag d yĩng n ges a mak-sõngã, d yãta sagls a tãab sẽn tõe n sõng-d tɩ d yɩ tʋmd-n-ta-sõngo. Sagl-kãensã na n sõng-d lame tɩ zems-n-taar zĩnd tõnd ne d tẽed-n-taasã sʋkã.

Tʋmd-n-ta-sõng yaa sik-m-meng soaba. A nanda a tʋmd-n-taasã, n pa baood n na n wilg t’a minimã yɩɩd-b lame ye. Sik-m-mengã yaa bũmb a Zeezi sẽn zãms a Ba wã nengẽ. Baa ne sẽn yaa a Zeova a yembr bal la b segd n bool tɩ Naandã, a ra ratame tɩ nebã bãng tʋʋmd ning a Biigã sẽn tʋmã. Wẽnnaam sẽn yeel bũmb ningã wilgda rẽ. A yeelame: ‘D maan ninsaal t’a yɩ wa tõndo.’ (Sɩng. 1:26) A Zeova sẽn yeel woto wã, a Zeezi bãngame t’a sɩd yaa sik-m-meng soaba.—Yɩɩn. 18:36.

A Zeezi sẽn wa n be tẽngã zugã, a yɩɩ sik-m-meng soab wa Ba wã. Nebã sã n da pẽgd-a a sẽn maand bũmb ninsã yĩnga, a yet-b lame tɩ Wẽnnaam n segd ne pẽgre. (Mark 10:17, 18; Zã 7:15, 16) A Zeezi maana a sẽn tõe fãa sẽn na yɩl tɩ laafɩ kell n zĩnd yẽ ne a karen-biisã sʋka, n da get-b  wa a zo-rãmba, la pa wa yembs ye. (Zã 15:15) A pʋd n waasa b naoã, n na n wilg-b sik-m-meng sẽn yaa a soaba. (Zã 13:5, 12-14) Wa a Zeezi, tõnd me segd n nanda d tʋmd-n-taasã, n da baood n na n lʋɩɩs d raabã taoor ye. D sã n “waoogd taaba,” la d pa baoodẽ tɩ b pẽg-do, d tõogd n tʋma d tʋʋmdã sõma.—Rom. 12:10.

Sik-m-meng soab sak n deegame tɩ “sagendb sã n yaa wʋsgo, tõogr beeme.” (Yel. 15:22) Baa d bãngrã la d minimã sẽn yaa a soaba, d segd n tẽegame tɩ ned kae n mi bũmb fãa ye. Baa a Zeezi meng sak n deegame tɩ bũmb kẽer la a pa mi. (Mat. 24:36) Sẽn paase, a ra baood n bãngda a karen-biisã sẽn da pa zems zãngã tagsgo. (Mat. 16:13-16) Rẽ n so t’a tʋmd-n-taasã ra basd b yam n tʋmd ne-a. D sã n yaa sik-m-meng soaba, n sak n deeg tɩ pa bũmba fãa la d mi, la d kelgd d taabã tagsgo, sõngdame tɩ laafɩ kell n zĩnd d sʋka, tɩ d tõogd d tʋʋmã.

Sẽn yɩɩd fãa, tara yõod wʋsg tɩ kãsem-dãmbã yɩ sik-m-mens rãmb wa a Zeezi, b sã n wa naag taab n tʋmdẽ. B segd n tẽegame tɩ vʋʋsem sõngã tõe n sõnga sẽn yaa kãsem-soab ning fãa t’a togs bũmb sẽn tar yõod wʋsgo. Kãsem-dãmbã sã n wa tigim taaba, n bas tɩ b ned kamb fãa tõe n togs a tagsgo, b na n tõog n naaga taab n yãk yam sẽn na n naf tigingã neb fãa.

Tʋmd-n-ta-sõng pa dem-dem ne a tʋmd-n-taasã ye. A yaa nin-bʋgsgo, la wʋmda. A Zeezi yãa bũmb wʋsg a Ba wã sẽn maane, tɩ wilg t’a pa dem-dem ye. Wala makre, a Zeova tʋm-a lame sẽn na yɩl t’a wa fãag ãdem-biisã ne kũumã b sẽn da segd ne wã.—Zã 3:16.

Sã n da yaa tɩlɛ, bɩ sẽn zems ne yɛlã sẽn yaa to-to, a Zeezi ra wilgdame t’a yaa wʋmda. Tẽeg-y a sẽn sõng Fenisi pagã to-to wã, baa ne sẽn da yaa Israyɛll buudã neb nengẽ la b tʋm-a wã. (Mat. 15:22-28) Sẽn paase, a Zeezi ra pa dem-dem ne a karen-biisã ye. A zoa a Pɩyɛɛr sẽn kɩɩs neb sʋk t’a pa mi-a wã poore, a sak n kõ-a-la sugri. Rẽ poore, a bobla a Pɩyɛɛr tʋʋm sẽn tar yõod wʋsgo. (Luk 22:32; Zã 21:17; Tʋʋ. 2:14; 8:14-17; 10:44, 45) A Zeezi mak-sõngã wilgda vẽeneg tɩ d segd n yɩɩ  wʋmdba, tɩ ‘kɩt tɩ nebã fãa yã tɩ d yaa neb sẽn pa dem-dem ye.’—Fili. 4:5.

D sã n pa dem-deme, na n sõng-d lame tɩ d tõogd n tʋmd ne ned buud fãa laafɩ pʋgẽ. A Zeezi manesmã ne neb a taabã ra yaa sõma, hal t’a bɛɛbã sẽn da maand sũ-kĩir ne-a wã yeel t’a yaa “yõor-yaood dɛɛgdbã la yel-wẽn-maandbã” zoa. Nin-kãensã ra sakd n kelgda a koɛɛgã. (Mat. 11:19) Wa a Zeezi, yãmb me tõogd n tʋmda ne y taabã laafɩ pʋgẽ bɩ? Rẽ wɛɛngẽ, saam-biig a ye yʋʋr sẽn boond t’a Luwi yeela bũmbu. A yɩɩ tigims sull yel-gɛt la Betɛllẽ tʋm-tʋmda, n paam n tʋm ne neb buud toor-toore. Ad a sẽn yeele: “Mam geta neb nins m sẽn tʋmd ne wã wa lalg b sẽn me ne tãn-koɛɛm buud toor-toore. Tãn-koɛɛmã sẽn yaa toor-toorã yĩng kɩtame tɩ meebã baood modgr wʋsgo. La baa ne rẽ, lalgã tõe n yɩɩ tɩrga. M modgame me n toeem yel-manesem kẽer m vɩɩmã pʋgẽ, sẽn na yɩl n tõog n tʋmd laafɩ pʋgẽ ne nebã, tɩ d tõogd n tʋmd d tʋʋmã n baasdẽ.” Ad woto sɩd yaa yam-sõngo!

Wakat bʋg la d tõe n wilg d tigingã neb tɩ d pa dem-deme? D sã n wa moond koe-noogã ne d sullã neba, yaa segb d sẽn paam n tõe n wilg rẽ. D tõe n moonda koɛɛgã ne koe-moondb yʋʋm la b yɛl sẽn yaa toor-toore. D segd n sak n basa sẽn noom tõndã, la d tũ bãmb sẽn dat tɩ d moon to-to wã, sẽn na yɩl tɩ b paam sũ-noog koɛɛgã mooneg pʋgẽ.

Tʋmd-n-ta-sõng sakd n ‘pʋɩta bũmb nins a sẽn tarã’ ne a taabã. (1 Tɩm. 6:18) A Zeezi sẽn wa n tʋmd ne a Ba a Zeova wã, a yãame t’a pa solgd-a bũmb ye. A Zeova sẽn wa n “yɛdgd sa-gãongã” t’a Zeezi ra bee ne-a, n da get a sẽn maand to-to wã. (Yel. 8:27) Kaoosg zugẽ, a Zeezi wilga a karen-biisã ‘bũmb nins fãa a sẽn wʋm a Ba wã nengẽ wã’ ne sũ-noogo. (Zã 15:15) Tõnd me tõe n dɩka a Zeova togs-n-taare, n sakd n pʋɩt d minimã la d bãngrã ne d tẽed-n-taasã. Tʋmd-n-ta-sõng pa soogd a taabã, a pa solgd-b bũmb b sẽn segd n bãnge, bɩ bũmb sẽn na n sõng-b ye. Yaa ne sũ-noog la a wilgd a taabã bũmb nins yẽ sẽn zãmsã.

D leb n tõe n kenga d tʋmd-n-taasã raoodo. Ned sã n yã d modgrã, la a wilg t’a sũur nooma ne-do, pa noom-d sɩda? A Zeezi pẽga a tʋmd-n-taasã, b tʋʋm-sõma wã yĩnga. (Ges-y Matiye 25:19-23; Luk 10:17-20.) A pʋd n yeel-b lame tɩ b na n “tʋma tʋʋm sẽn yɩɩd” yẽ rẽndã. (Zã 14:12) Yʋng ning sẽn deng a kũumã, a yeela a tẽn-tʋmdb nins sẽn kell n maan sɩd ne-a wã yaa: “Yãmb yaa neb nins sẽn pa ne maam m namsgã wakatã.” (Luk 22:28) Sãmbg kae tɩ gom-kãensã kenga b raoodo, la kɩt tɩ b maneg n tʋm ne sũ-noogo. Tõnd me sã n nong n pẽgd d tʋmd-n-taasã, yaa vẽeneg tɩ b na n tʋma ne sũ-noogo, la kɩt me tɩ b tʋʋmã wom biisi.

Saam-biig a ye yʋʋr sẽn boond t’a Kayode yeelame: “Tʋmd-n-ta-sõng pa baood n yɩ ned sẽn zems zãng ye. A kɩtdame t’a tʋmd-n-taasã sũy noomẽ, tɩ tʋʋmdã pa zɩɩb ne-b ye.” Yãmb yaa tʋmd-n-taag a woto buud bɩ? D tõe n soka d tẽed-n-taas kẽere, n bãng d sã n sɩd yaa tʋmd-n-ta-sõngo. Wala a Zeezi karen-biisã sũy sẽn da noom b sẽn da paam n tʋmd ne-a wã, y tẽed-n-taasã me sũy sã n noom b sẽn tʋmd ne yãmbã yĩnga, y tõe n yeela wa tẽn-tʋmd a Poll sẽn yeelã. A yeelame: “Tõnd yaa tʋmd-n-taas yãmb sũ-noog yĩnga.”—2 Kor. 1:24.