1. Bõe la bi-bɩɩg a ye bãng tigis-kãseng sẽn zĩnd yʋʋmd 1935 wã sasa?

BI-BƖƖG a ye sẽn da tar yʋʋm 18 n deeg lisg yʋʋmd 1926. A roagdbã ra naaga Biiblã Zãmsdbã b sẽn boond rũndã-rũndã t’a Zeova Kaset rãmbã. B ra tara kom-dibli a tãabo, la kom-pugli a yiibu. B wuba b fãa sõma tɩ b tũud Wẽnnaam a Zeova, la b rɩkd a Zeezi Kirist togs-n-taare. Yʋʋmd fãa, Soaalã zaabr dɩɩbã sasa, bi-bɩɩgã me ra wãbda burã la a yũud divẽ wã, wa Biiblã Zãmsdbã fãa sẽn da maand wakat-kãngã. La a sẽn kelg sõsg gom-zug sẽn yaa “Kʋʋn-kãsengã,” a sẽn da get yɛlã to-to wã tiig n toeemame. Yɩɩ sõsg sẽn tall yõod wʋsgo. Yaa saam-biig a Joseph Rutherford n wɛgs sõs-kãng yʋʋmd 1935 wã tigis-kãseng sẽn zĩnd Wasĩnton D.C, Etazĩni soolmẽ wã. Bõe la Biiblã Zãmsdbã bãng tigis-kãsen-kãng sasa?

2. Bõe la saam-biig a Rutherford sõsgã sõng nebã tɩ b bãng vẽenega?

² Saam-biig a Rutherford sõsgã pʋgẽ, a wilga “kʋʋn-kãseng” ning yell b sẽn gomd Vẽnegr 7:9 pʋgẽ wã sẽn yaa neb ninsi. La wakat-kãnga, b ra tagsdame tɩ nin-kãensã me yaa sull a to sẽn na n kẽng saasẽ, la tɩ b tẽebã pãng pa ta pipi sullã ye. Saam-biig a Rutherford tika Biiblã n wilg tɩ kʋʋn-kãsengã pa na n tɩ vɩɩmd saasẽ, la tɩ yaa bãmb la Kiristã sẽn boond tɩ piis a taabã, * sẽn na n põs “to-kãsengã” sasa n wa vɩɩmd tẽngã zug wakat sẽn kõn  sa wã. (Vẽn. 7:14) A Zeezi yeelame: “Mam tara piis a taaba, sẽn pa yãg-kãngã piis ye. Mam segd n talla bãmb me n wa, la b na n kelga mam koɛɛgã. Na n yɩɩ yãgr a yembre, la pe-kɩɩm-yɛnga.” (Zã 10:16) Piis a taabã yaa neb sẽn maand sɩd ne a Zeova, n saagd n na n wa vɩɩmd wakat sẽn kõn sa arzãn pʋgẽ tẽngã zugu. (Mat. 25:31-33, 46) Bɩ d ges vẽnegr a woto sẽn toeem a Zeova nin-buiidã wʋsg vɩɩm to-to, bi-bɩɩgã sẽn da tar yʋʋm 18 wã sẽn naage.—Yɩɩn. 97:11; Yel. 4:18.

3-4. Yʋʋmd 1935 tigis-kãsengẽ wã, bõe la neb tusa bãng-yã, la bõe yĩnga?

³ Tigis-kãsengã sasa, sõsdã wa n kosame yaa: “Bɩ neb nins sẽn saagd n na n wa vɩɩmd tẽngã zug wakat sẽn kõn sa wã yik n yalse.” Ned a ye sẽn da zĩnd be yeelame tɩ kɛlgdb tus 20 la zakã sʋka, sẽn yɩɩd bãmb pʋɩ-sʋkã yikame. Rẽ poore, saam-biig a Rutherford yeelame: “Ges-y-yã! Ad kʋʋn-kãsengã.” Kɛlgdbã kaasa ne sũ-noogo. Neb nins sẽn yik n yalsã bãngame t’a Zeova pa yãk-b tɩ b na n tɩ vɩɩmd saasẽ ye. B bãngame tɩ b pa paam vʋʋsem sõngã zaeeb ye. Vẽkembeoogã, neb 840 n deeg lisg n lebg a Zeova Kaset rãmba, tɩ b sʋkã neb wʋsg naag piis a taabã.

⁴ Sõs-kãng poore, bi-bɩɩg ning yell d sẽn gom sɩngrẽ wã, la neb tusa basa burã wãbr la divẽ wã yũub Soaalã zaabr dɩɩbã sasa. Ne sik-m-menga, saam-biig a ye yeela bũmb neb wʋsg sẽn da tagsde. A yeelame: “Yʋʋmd 1935 Tẽegrã n yɩ yaoolem soab mam sẽn wãb burã la m yũ divẽ wã. Mam bãngame t’a Zeova pa yãk maam ne a vʋʋsem sõngã maasem, tɩ m na n naag neb nins sẽn na n tɩ vɩɩmd saasẽ wã ye. La m saagdame n na n wa vɩɩmd tẽngã zugu, n naag n tʋm n sõng t’a lebg arzãna.” (Rom. 8:16, 17; 2 Kor. 1:21, 22) Wakat-kãng tɛka, kʋʋn-kãsengã neb sõor tara paasgo, la b naaga sẽn paam-b zaeeb n ket tẽngã zugã n tʋmdẽ.

5. A Zeova tagsg yaa wãn to ne neb nins sẽn bas Tẽegrã burã wãbr la a divẽ wã yũubã?

⁵ A Zeova tagsg yaa wãn to ne neb nins sẽn bas Tẽegrã burã wãbr la a divẽ wã yũub yʋʋmd 1935 poorã? La rũndã-rũndã, kiris-ned sã n wãbd burã la a yũud divẽ wã, n wa bãng t’a pa paam vʋʋsem sõngã zaeebo, a maanda wãna? (1 Kor. 11:28) Kẽer sẽn da wãbd burã la b yũud divẽ wã, yaa b sẽn da tudg n tagsdẽ tɩ b na n tɩ vɩɩmda saasẽ wã. La b sã n sak n deeg tɩ b kongame, m bas burã wãbr la divẽ wã yũubu, la b ket n tũud a Zeova ne pʋ-peelem, sãmbg kae t’a na n sõdg-b lame n naag piis a taabã nebã. Baa ne b sẽn pa le wãbd burã la b yũud divẽ wã, b ket n kẽnda Tẽegrã, bala b sũur nooma wʋsg ne bũmb ning a Zeova la a Zeezi sẽn maan n kõ-bã.

6. A Zeezi kõo malɛgsã noor tɩ b maan bõe?

⁶ To-kãsengã sẽn ta n sa la balã, d sã n lebg n tẽeg Vẽnegr sak a 7 wã sẽn yet bũmb ning kiris-neb nins sẽn paam zaeebã la kʋʋn-kãsengã sẽn naag piis a taabã zugã, na n kenga d raoodo. A Zeezi kõo malɛgsã noor tɩ b kell n gãd sobd a naasã sẽn na n wa ne sãoongã kãn-kãe. B pa segd n bas sob-kãensã tɩ  fug tẽngã zugu, sã n pa b ninga kiris-neb nins sẽn paam vʋʋsem sõngã zaeeb bãnd n sa, tɩ wilgdẽ tɩ b taa a Zeova yam zãng-zãnga. (Vẽn. 7:1-4) Kirist ba-biisã sẽn paam zaeebã keoor na n yɩɩ b sẽn na n lebg rĩm-dãmb la maan-kʋʋdb ne a Zeezi saasẽ wã. (Vẽn. 20:6) A Zeova ne a Zeezi la malɛgsã fãa sũy na n yɩɩ noog wʋsgo, neb 144000 sã n wa paam b keoorã saasẽ.

7. Vẽnegr 7:9, 10 pʋgẽ, bõe la Wẽnnaam vẽneg a Zã t’a yã, la nin-kãens ra maanda bõe? (Ges-y sebrã pipi neng fotã.)

⁷ A Zã sẽn gom nanambs la maan-kʋʋdb 144000 yell poore, a yãa bũmb sẽn kõt sũ-noog wʋsgo. Yaa “kʋʋn-kãseng” sẽn põs Armagedõ sasa. B yaa toor ne neb 144000, bala b sõorã yɩɩda nin-kãensã hal zĩig sẽn zãre, tɩ ned pa mi b sõorã takɩ ye. (Karm-y Vẽnegr 7:9, 10.) B yera “kasaab-peelse,” tɩ wilgdẽ tɩ b pa bas t’a Sʋɩtãan ‘dũniyã rẽgem-ba,’ la tɩ b kell n maana sɩd ne Wẽnnaam la Kiristã. (Zak 1:27) B zẽka b koees n yetẽ tɩ b paama fãagre, a Zeova, ne a Zeezi sẽn yaa Wẽnnaam Pe-bilã sẽn maan bũmb ningã yĩnga. Sẽn paase, b ra zãada koms vãad b nusẽ, tɩ wilgdẽ tɩ b sak n deega ne sũ-noog t’a Zeezi n yaa rĩm ning a Zeova sẽn yãkã.—Ges-y Zã 12:12, 13.

8. Bõe la Vẽnegr 7:11, 12 yeta, tɩ sõngd tõnd tɩ d bãng sẽn be-b saasẽ wã manesem sẽn na n yɩ to-to?

⁸ Karm-y Vẽnegr 7:11, 12. Sẽn be-b saasẽ wã sẽn yã kʋʋn-kãsengã, b manesem yɩɩ wãna? A Zã yãame tɩ b fãa maanda sũ-noog la b pẽgd Wẽnnaam, b sẽn yã kʋʋn-kãsengã. A Zeova ne a Zeezi la malɛgsã fãa sũy na n yɩɩ noog wʋsgo, kʋʋn-kãsengã sã n wa põs to-kãsengã sasa, tɩ pids a Zã sẽn yã bũmb ningã.

9. Sẽn zems ne Vẽnegr 7:13-15 wã, bõe la kʋʋn-kãsengã maand masã menga?

⁹ Karm-y Vẽnegr 7:13-15. A Zã wilgame tɩ kʋʋn-kãsengã “pegsa b kasaabsã Pe-bilã zɩɩmã pʋgẽ n kɩt tɩ b lebg peelse.” Woto wilgdame tɩ b tara sũur-kaset sẽn pa ningd-b taale, la tɩ b tata a Zeova yam. (Eza. 1:18) B yaa kiris-neb sẽn dɩk b mens n kõ a Zeova n deeg lisgu, n tẽed a Zeezi maoongã ne b sũy fãa, la b tar zood sõma ne a Zeova. (Zã 3:36; 1 Pɩy. 3:21) Woto kɩtame tɩ b tõe n yals Wẽnnaam geerã taoore, n ‘tũud-a ne b sũy fãa wĩndg la yʋng’ tẽngã zugu. Baa masã menga, bãmb n moond Rĩungã koɛɛg n yɩɩda, la b sõngd nebã tɩ b lebgd a Zeezi karen-biisi, n lʋɩɩsd Wẽnnaam Rĩungã tʋʋm taoor b vɩɩmã pʋgẽ.—Mat. 6:33; 24:14; 28:19, 20.

10. Kʋʋn-kãsengã tõe n kɩsa sɩd ne bõe, la bõe la Wẽnnaam pʋlem tɩ b na n yã a pidsgu?

¹⁰ Kʋʋn-kãsengã sẽn na n põs to-kãsengã sasa wã kɩsa sɩd tɩ Wẽnnaam na n kell n gesa b yelle, bala “sẽn zao-a geerã na n tẽega b fu-roogã bãmb zutu.” Piis a taabã sẽn da sɩng n gũud bũmb ning hal daar zãrã na n pidsame. Ad Biiblã sẽn yete: “[Wẽnnaam] na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye. Bũmb nins sẽn da be pĩndã loogame.”—Vẽn. 21:3, 4.

11-12. a) Sẽn zems ne Vẽnegr 7:16, 17 wã, bark-bʋs la kʋʋn-kãsengã na n wa paame? b) Bõe la piis a taabã maand Tẽegrã sasa, la yaa bõe yĩnga?

¹¹ Karm-y Vẽnegr 7:16, 17. Masã menga, a Zeova Kaset rãmb kẽer la komã namsda, b sẽn pa tar ligd n na n da rɩɩb la bũmb a taab yĩnga, wall  zabã sẽn wa ne zu-loees b tẽngẽ wã yĩnga. Kẽer la b kẽes bãens roog b tẽebã yĩnga. La kʋʋn-kãsengã neb sũy noomame, bala b miime tɩ b sã n põs dũni-wẽn-kãngã sãoongã sasa, wakat fãa b na n paamda rɩɩb tɩ sekdẽ, la b paamd zãmsg sẽn yit a Zeova nengẽ. A Zeova sã n wa na n sãam a Sʋɩtãan dũniyã, n kɩt t’a sũ-puugrã sẽn yaa wa “tʋʋlg” sẽn yõogdã sig nebã zugu, a na n kogla kʋʋn-kãsengã. To-kãsengã poore, a Zeezi na n talla sẽn na n põs-bã n kẽng “vɩɩm ko-bunds zĩisẽ,” rat n yeel tɩ n sõng-b tɩ b paam vɩɩm sẽn kõn sa. Tags-y n ges-y-yã: Kʋʋn-kãsengã saagdame n na n wa paam bũmb sẽn yaa toor zalle. Neb milyaar-dãmbã sẽn vɩ wã sʋka, bãmb tõeeme n pa tol n ki ye.—Zã 11:26.

¹² Piis a taabã sẽn saagd n na n paamã yaa bõn-kãsenga, hal tɩ b pʋʋsd a Zeova ne a Zeezi bark rẽ yĩnga. Yaa sɩd tɩ b pa yãk-b tɩ b na n tɩ vɩɩmd saasẽ ye. La woto pa rat n yeel t’a Zeova nifẽ, b yõodã pa ta sẽn paam-b zaeebã ye. Sẽn paam-b zaeebã ne piis a taabã fãa paamame n tõe n pẽg Wẽnnaam ne Kiristã. Bũmb a ye b sẽn maand n pẽgd-ba, yaa b sẽn naagd n maand Kiristã kũumã tẽegrã.

13-14. Bõe yĩng tɩ piis a taabã ne kiris-neb nins sẽn paam zaeeb n ket tẽngã zugã fãa segd n maand Kiristã kũumã tẽegre?

¹³ Yʋʋma noorã, sẽn kẽnd-b Tẽegrã neb tusr sʋka, pa wat n yɩɩd nin-yend n na n wãb burã la a yũ divẽ wã ye. Tigims wʋsg pʋsẽ, ned sẽn wãbd burã la a yũud divẽ wã ka be ye. Sẽn kẽnd-b Tẽegrã sʋka, wʋsgã fãa saagdame n na n wa vɩɩmd tẽngã zugu. Sã n yaa woto, bõe yĩng tɩ b kẽnd n maand Kiristã kũumã tẽegre? Yaa bũmb ning yĩng me sẽn kɩt tɩ neb kẽnd b zoa yi-kãadem kibsẽ wã. Yaa b sẽn dat n wilg tɩ b nonga pagã ne a sɩdã, la tɩ b teend-b lame wã. Woto me, piis a taabã sẽn kẽnd Tẽegrã, yaa b sẽn dat n wilg tɩ b nonga Kiristã ne sẽn paam-b zaeebã, la tɩ b teend-b lame wã. Leb n wilgdame tɩ b sũur nooma ne a Zeezi sẽn ki tɩ yɩ maoongo, tɩ b tõe n wa  paam n vɩɩmd wakat sẽn kõn sa tẽngã zugã.

¹⁴ Bũmb sẽn tar yõod wʋsg me sẽn kɩt tɩ piis a taabã kẽnd Tẽegrã, yaa sẽn na n yɩl n tũ a Zeezi sẽn kõ noor ningã. A Zeezi sẽn wa n na n sigl Soaalã zaabr dɩɩbã ne a tʋm-tʋmdb nins sẽn kell n maan sɩd ne-a wã, a yeel-b lame yaa: “Bɩ y maand woto n tẽegd mam yelle.” (1 Kor. 11:23-26) Rẽ n so tɩ kiris-neb sẽn paam vʋʋsem sõngã zaeeb sã n ket tẽngã zugu, piis a taabã na n ket n maanda Soaalã zaabr dɩɩbã. B pʋd n boonda nebã fãa tɩ b wa naag-b n maan Tẽegrã.

15. Bõe la d tõe n maan Tẽegrã sasa, n pẽg Wẽnnaam ne Kiristã?

¹⁵ Tẽegrã sasa, d paamdame n tõe n pʋʋs la d yɩɩl n pẽg Wẽnnaam la Kiristã. Sõsgã b sẽn na n wɛgs rõandã wã gom-zug yaa: “Wilg-y tɩ y nanda bũmb ning Wẽnnaam ne Kiristã sẽn maan yãmb yĩngã!” Na n sõnga tõnd tɩ d maneg n wilg tɩ d sũy nooma ne a Zeova la Kiristã. B sã n wa pɩʋʋgd ne burã la divẽ wã, na n kɩtame tɩ sẽn wa-bã fãa maneg n tags rẽ sẽn makd bũmb ninsã. Burã ne divẽ wã makda a Zeezi yĩngã la a zɩɩmã. Na n kɩtame tɩ d tẽeg t’a Zeova sakame t’a Biigã wa ki tõnd yĩnga, tɩ rẽ kɩt tɩ d tõe n wa paam vɩɩm sẽn kõn sa. (Mat. 20:28) Ned ning fãa sẽn nong d saasẽ Ba wã ne a Biigã na n datame n wa Tẽegrã.

16. Wãn to la sẽn paam-b zaeebã ne piis a taabã fãa yaa a ye?

¹⁶ Sẽn paam-b zaeebã ne piis a taabã fãa yaa a ye a Zeova nifẽ. A pa get tɩ b yɩɩda taab ye. A getame tɩ b fãa tara yõod a nifẽ, t’a sẽn nong-b to-to wã zem taaba. Sɩd me, yaa a Bi-nongrã vɩɩm la a tall n yao n fãag sẽn paam-b zaeebã ne piis a taabã fãa. Bũmb sẽn yaa toor sẽn paam-b zaeebã ne piis a taabã sʋkã, yaa b saagrã bala. B fãa segd n kell n maana sɩd ne Wẽnnaam la Kiristã. (Yɩɩn. 31:24) D tẽeg t’a Zeova kõta ned fãa a vʋʋsem sõngã tɩ zems ne a soabã sẽn datã, la pa be ne a soabã paama vʋʋsem sõngã zaeeb bɩ a pa paam ye.

17. Sẽn paam-b zaeeb n ket tẽng zugã gũuda bõe?

¹⁷ Kiris-neb nins sẽn paam zaeebã pa rog n zoe n saagdẽ n na n tɩ vɩɩmd saasẽ ye. Yaa a Zeova n yãk-ba. B tagsda b saagrã yelle, n pʋʋsd rẽ yĩnga, la b yãgd n na n wa tɩ paam b keoorã saasẽ. B pa mi b yĩngã sẽn na n lebg to-to saasẽ wã ye. (Fili. 3:20, 21; 1 Zã 3:2) La baa ne rẽ, b yãgdame n na n wa tɩ paam a Zeova ne  a Zeezi, la malɛgsã saasẽ. B yãgdame n na n paam n tɩ naag sẽn paam-b zaeebã fãa saasẽ Rĩungã pʋgẽ.

18. Bõe la piis a taabã gũuda?

¹⁸ Piis a taabã saagdame n na n wa vɩɩmd tẽngã zug wakat sẽn kõn sa, tɩ woto yaa bũmb ninsaal fãa sẽn tʋll n paame. (Koɛ. 3:11) B gũuda wakat ning b sẽn na n wa paam n sõng n tʋm n kɩt tɩ dũniyã gill lebg arzãnã. B gũuda ne b sũur fãa, wakat ning b sẽn na n wa tõog n me b roto, n sel tɩɩse, la b wub b kambã tɩ b tar laafɩ hakɩɩka. (Eza. 65:21-23) B gũudame n na n wa tõog n gilg n ges tãmsã, wetã, mogrã, la b sẽn na n tõog n zãms bũmb wʋsg a Zeova sẽn naanã fãa zugã. La sẽn yɩɩd fãa, b sũy nooma wʋsgo, b sẽn mi tɩ b zoodã ne a Zeova na n maneg n paasame wã.

19. Tẽegrã sasa, d paamda segb n tõe n maan bõe, la rõandã nengẽ wã na n yɩɩ wakat bʋgo?

¹⁹ A Zeova kɩtame tɩ ned ning fãa sẽn maand sɩd ne-a, saagd n na n wa paam bũmb sẽn yaa kãsenga. (Zer. 29:11) Kiristã kũumã tẽegr yaa segb tõnd ned kam fãa sẽn paame, n tõe n pẽg Wẽnnaam ne Kiristã, bũmb nins b sẽn maan n kõ-do, tɩ d tõe n wa paam vɩɩm sẽn kõn sa wã yĩnga. Sãmbg sẽn kae, Tẽegrã yaa tigsg ning sẽn tar yõod n yɩɩda, kiris-neb hakɩɩkã sẽn maand yʋʋmd fãa. Rõanda, Tẽegrã na n yɩɩ tʋʋlg kiuug rasem 27 sẽn yaa sibr daarã, wĩndgã lʋɩɩs poore. Neb wʋsg na n tõog n tigma taab tɩ gɩdgr kaẽ ye. La kẽer na n zĩnda bãens rotẽ n maane. A Zeova ne a Zeezi la sẽn paam-b zaeeb n be saasẽ wã geta tõndo. Woto wã, Wẽnd na kɩt tɩ tiging fãa, sull fãa, la ned kam fãa tõog n maan Tẽegrã tɩ yɩ sõma!