1. Wãn to la Wẽnnaam sẽn nong-dã nafd tõndo?

TƲM-TƲMD a Zã yeelame tɩ “Wẽnnaam yaa nonglem.” (1 Zã 4:8) A sẽn yeel woto wã tẽegda tõnd bũmb d sẽn pa tõe n kɩɩse: Wa vɩɩmã sẽn yit Wẽnnaam nengẽ wã, nonglmã me yita a nengẽ. Wẽnnaam sɩd nonga tõndo! A nonglmã kɩtame tɩ d yam gãe, tɩ d sũur noomẽ, tɩ bũmb me pa paoog-d ye.

2. Wa Matiye 22:37-40 sẽn wilgdã, noy a yiib nins sẽn yaa kãsems n tɩ yɩɩdã la bʋse, la bõe yĩng tɩ yiib-n-soabã tũub tõe n yɩ toogo?

² Sã n yaa ne kiris-nebã, wilg tɩ d nonga d taabã pa yam-yãkr ye. Yaa noor d sẽn segd n tũ. (Karm-y Matiye 22:37-40.) D sã n wa bãng a Zeova sõma, tõe n lebga nana tɩ d tũ pipi noorã. Sẽn yɩɩd fãa, a Zeova zemsa zãnga, n get tõnd yell ne bʋgsem la ne nonglem. La yiib-n-soab noorã tũub tõe n yɩɩ toog ne-do. Bõe yĩnga? Bala d tẽed-n-taasã d sẽn be ne wakat fãa wã me pa zems zãng ye. Wakat ninga, b tõe n maana bũmb wall b yeel bũmb tɩ kɩt tɩ d tẽed tɩ b pa nong tõnd ye. A Zeova miime tɩ yell a woto buud tõe n paam-d lame. Rẽ n so t’a vẽneg Biiblã gʋlsdb kẽer tɩ b kõ sagls takɩ sẽn sõngd tõnd tɩ d bãng bũmb ning sẽn kɩt tɩ d segd n nong taabã, la d sẽn segd n wilg to-to tɩ d nong-b lame. A Zã naaga Biiblã gʋlsdb-kãens sʋka.—1 Zã 3:11, 12.

3. Bõe yell la a Zã gom n tɩ yɩɩda?

³ A Zã sɛbã pʋsẽ, a wilga naoor wʋsg tɩ kiris-nebã segd n wilgame tɩ b nonga taaba. Sɩd-sɩdã, a Zã evãnzillã pʋgẽ, a sẽn gom nonglmã yellã yɩɩda evãnzill-dãmb a  tãabã sẽn ketã sẽn naag taaba. A Zã sẽn wa n gʋlsd a evãnzillã ne a sɛb a tãabã, rẽ t’a ra zemsa yʋʋm koabga. Biiblã seb-kãensã wilgdame tɩ kiris-nebã sẽn maand bũmb ningã fãa segd n yɩɩ ne nonglem. (1 Zã 4:10, 11) La kaoosame t’a Zã meng yaool n na n bãng rẽ.

4. Yaa wakat fãa la a Zã wilg t’a nonga a taabã bɩ?

⁴ A Zã sẽn wa n yaa bi-bɩɩga, pa wakat fãa la a wilg t’a nonga a taabã ye. Wala makre, daar a ye, a Zeezi ne a karen-biisã ra togda sor n pasgd Samari n digd Zerizalɛm. Samari tẽn-bil a ye neb n zãgs tɩ b kõn deeg-b sãand ye. La bõe la a Zã yeel-yã? A yeelame tɩ b kɩt tɩ bugum yi yĩngr n dɩ tẽn-kãng nebã fãa. (Luk 9:52-56) Daar a to me, a Zã maana bũmb sẽn wilgd t’a ra pa nong tʋm-tʋmdb a taabã ye. Yẽ ne a ma-biig a Zak pirsa b ma wã t’a kos a Zeezi t’a kɩt tɩ b paam naam zĩis a Zeezi sɛɛgẽ Rĩungã pʋgẽ. Tʋm-tʋmdb a taabã sẽn bãng a Zak ne a Zã sẽn maan bũmb ningã, b sũyã yika wʋsgo. (Mat. 20:20, 21, 24) La baa ne a Zã kongrã, a Zeezi kell n wilgame t’a nong-a lame.—Zã 21:7.

5. Bõe yell la d na n gom sõs-kãngã pʋgẽ?

⁵ Sõs-kãngã pʋgẽ, d na n goma a Zã kibarã yelle, la bũmb kẽer a sẽn yeel nonglmã wɛɛngẽ. D na n yãa d sẽn tõe n wilg to-to tɩ d nonga d saam-biisã la d saam-bi-pogsã. Sẽn paase, d na n yãa bũmb sẽn tar yõod wʋsg zak soab sẽn tõe n maan n wilg t’a nonga a zakã rãmba.

6. Bõe la a Zeova maan tɩ wilgdẽ t’a sɩd nong-d lame?

⁶ Naoor wʋsgo, d tagsdame tɩ yaa d sã n gom gom-nood bal tɩ ned sũur yɩ noog la wilgd tɩ d nong-a lame. La d sã n sɩd nong d taabã, d na n tũnuga ne d tʋʋm-tʋmdɩ wã n wilg rẽ. (Ges-y Zak 2:17, 26.) Wala makre, a Zeova sɩd nong-d lame. (1 Zã 4:19) Biiblã pʋgẽ, a tũnuga ne goam sẽn be rasãnd n togs vẽeneg t’a nong-d lame. (Yɩɩn. 25:10; Rom. 8:38, 39) La d miime tɩ pa a sẽn yet bũmb ninsã bal n wilgd t’a nong-d lame ye. Yaa a sẽn maand bũmb ninsã me. A Zã yeelame: “Ad Wẽnnaam sẽn wilg b nonglmã to-to ne tõndo: Wẽnnaam tʋma b Bi-ribl sẽn-ka-to wã dũniyã pʋgẽ sẽn na yɩl tɩ d tõog n paam vɩɩm b Bi-riblã maasem yĩnga.” (1 Zã 4:9) A Zeova sakame t’a bi-nongrã nams la a ki tõnd yĩnga. (Zã 3:16) Rẽnd sãmbg kae t’a Zeova nong-d lame ye.

7. Bõe la a Zeezi maan n wilg t’a nonga tõndo?

 ⁷ A Zeezi kɩtame t’a karen-biisã bãng t’a sɩd nong-b lame. (Zã 13:1; 15:15) Pa ne a no-goamã bal la a wilg t’a nonga bãmb ne tõnd ye. Yaa ne a sẽn maan bũmb ningã me. A Zeezi yeelame: “Ned kae sẽn tar nonglem n yɩɩd ned sẽn na n kõ a vɩɩm a zo-rãmb yĩng ye.” (Zã 15:13) D sã n tags a Zeova ne a Zeezi sẽn maan bũmb ning n kõ-dã yelle, segd n kɩtame tɩ d rat n maan bõe?

8. Bõe la 1 Zã 3:18 wã sagend tõnd tɩ d maane?

⁸ D sã n sakd a Zeova ne a Zeezi, wilgdame tɩ d nong-b lame. (Zã 14:15; 1 Zã 5:3) A Zeezi kõo noor vẽeneg tɩ d nong taaba. (Zã 13:34, 35) D pa segd n wilg ne d no-goam bal tɩ d nonga d saam-biisã la d saam-bi-pogsã ye. D segd n wilga rẽ ne d sẽn maand bũmb ninsã me. (Karm-y 1 Zã 3:18.) Bõe la d tõe n maan takɩ n wilg tɩ d sɩd nong-b lame?

9. A Zã sẽn da nong nebã yĩnga, bõe la a maan-yã?

⁹ A Zã ra tõe n kell n paa ne a ba wã n tʋmd zĩmã yõgb tʋʋmdã, n paam ligd wʋsgo. La a pa maan woto ye. A kell n dɩka a vɩɩmã sẽn ketã n sõng nebã sẽn na yɩl tɩ b bãng a Zeova ne a Zeezi sõma. A Zã sẽn yãk yam n na n tʋm tʋʋmd ningã pa yɩ nana ne-a ye. B nams-a lame la b tall-a n tɩ kẽes bãens roog koɛɛgã mooneg yĩnga. Rẽ t’a lebga nin-kẽema. (Tʋʋ. 3:1; 4:1-3; 5:18; Vẽn. 1:9) Baa ne b sẽn da balg a Zã, a sẽn da moond n gomd a Zeezi yellã, a kell n wilgame t’a tagsda neb a taabã yelle. Wala makre, a sẽn wa n be Patmos sẽn yaa ko-sʋk tẽngã, a gʋlsa bũmb ning b sẽn vẽneg-a t’a yã wã, la a kɩt tɩ b tool rẽ tigimsã, sẽn na n yɩl tɩ b bãng “bũmb nins sẽn segd n maan ka la bilfã.” (Vẽn. 1:1) Rẽ poore, wõnda b sẽn wa n yiis a Zã Patmosã, a gʋlsa a evãnzillã sẽn gomd a Zeezi vɩɩmã la a koe-moonegã yellã. Sẽn paase, a gʋlsa sɛb a tãabo, n na n keng a tẽed-n-taasã raoodo. Bõe la y tõe n maan n tall mong-m-meng yam wa a Zã?

10. Bõe la y tõe n maan n wilg tɩ y nonga nebã?

¹⁰ Yãmb tõe n wilga ne y sẽn yãk yam n na n maan bũmb ningã tɩ y nonga nebã. A Sʋɩtãan dũniyã ratame tɩ y rɩk y sẽkã la y pãngã fãa n tʋm y meng yĩng n bao ligd la yʋʋre. Dũniyã gill zugu, koe-moondbã mongda b mens n kẽesd b sẽkã wʋsg koɛɛgã mooneg pʋgẽ, la b sõngd nebã tɩ b paamd zood sõma ne a Zeova. Kẽer pʋd n dɩkda b sẽkã fãa n moond koɛɛgã la b zãmsd nebã Biiblã.

11. Bõe la kiris-neb wʋsg maand tɩ wilgdẽ tɩ b nonga a Zeova la b tẽed-n-taasã?

¹¹ Yaa tɩlɛ ne kiris-neb wʋsg tɩ b rɩk b sẽkã fãa la bal n tʋm n ges b mens la b zakã rãmb yelle. Baa ne rẽ, nin-kãensã sẽn maand sɩd ne a Zeova wã maanda b sẽn tõe fãa n teend a siglgã. Wala makre, kẽer kẽesda b toog n sõngd sabab-wẽns sẽn paamd b rãmbã, tɩ sãnda sõngd n met siglgã roto, tɩ ned kam fãa me tõe n kõ ligd n teel Rĩungã tʋʋm d sẽn tʋmd dũniyã gill zugã. B sẽn maand woto fãa wã yaa b sẽn nong b taabã yĩnga. Semen fãa, d kẽnda tigissã la d kẽesd d toogo, tɩ wilgdẽ tɩ d nonga d saam-biisã la d saam-bi-pogsã. Baa d sã n yaame, d pa vaand tigissã ye. Baa d sã n yɛɛsdame, d zẽkda d nug n  leoke. Baa d ned kam fãa sẽn maood ne a zu-loeesã, d baasd n kengda taab raood nand tɩ tigissã sɩnge, la tigissã poor me. (Ebre. 10:24, 25) D sũur sɩd nooma wʋsgo, d sẽn ne d tẽed-n-taasã sẽn maand woto fãa wã!

12. Bõe me la a Zã maan-yã, tɩ wilgdẽ t’a nonga a tẽed-n-taasã?

¹² A Zã pa pẽg a tẽed-n-taasã bal n wilg t’a nong-b lame ye. A kõ-b-la sagls me. Wala makre, a lɛta-rãmbã pʋsẽ, a pẽga a tẽed-n-taasã, b tẽebã la b tʋʋm-sõma wã yĩnga. La a kõ-b-la sagls takɩ me yel-wẽnã wɛɛngẽ. (1 Zã 1:8–2:1, 13, 14) Tõnd me segd n pẽgda d saam-biisã la d saam-bi-pogsã, b tʋʋm-sõma wã yĩnga. La d sã n wa yã tɩ ned n tall manesem sẽn pa zemse, d segd n maaga d yĩng n kõ-a sagls takɩ, tɩ wilg tɩ d nong-a lame. Yaa sɩd tɩ yɩl n sagl d zoa, baoodame tɩ d tall raoodo. La Biiblã yetame tɩ zo-rãmb hakɩɩk sagenda taaba, wa kut sẽn saasd a to to-to wã.—Yel. 27:17.

13. Bõe la d pa segd n maane?

¹³ Wakat ninga, d tõe n yãka yam n pa na n maan bũmb kẽere, tɩ wilg tɩ d nonga d tẽed-n-taasã. Wala makre, d pa segd n yɩ tao-tao n yik d sũuri, b sẽn yeel bũmb ningã yĩng ye. D tẽeg yell a ye sẽn maane, a Zeezi kũumã sẽn wa n kolgã. A yeela a karen-biisã tɩ b sã n dat n paam vɩɩm, yaa tɩlɛ tɩ b wãb a yĩn-nemsã la b yũ a zɩɩmã. (Zã 6:53-57) Gom-kãngã sãama a karen-biisã sũyã, tɩ b wʋsg bas a tũubu. La a zo-rãmb hakɩɩkã, a Zã sẽn naage, pa raag-a n bas ye. B kell n paa ne-a. Yaa sɩd tɩ b ra pa wʋmd a Zeezi gomdã võor sõma ye. Pʋd n ling-b lame. La b pa tags t’a sẽn yeel bũmb ningã yaa wẽnga, tɩ kɩt tɩ b sũy sãam ye. B kɩs-a-la sɩda, n miẽ t’a sẽn yeelã yaa sɩda. (Zã 6:60, 66-69) Woto wilgdame tɩ d pa segd n yɩ tao-tao n sãam d sũuri, d zoa sẽn yeel bũmb ning yĩng ye. D pʋd n segd n basame t’a bilg-d a gomdã võore.—Yel. 18:13; Koɛ. 7:9.

14. Bõe yĩng tɩ d pa segd n bas tɩ kisgr paam pãng d sũurẽ wã?

¹⁴ A Zã leb n keoog-d lame tɩ d ra kisg d tẽed-n-taasã ye. D sã n pa tũ a saglgã, tõe n yɩɩ sabab t’a Sʋɩtãan tõog-do. (1 Zã 2:11; 3:15) A buud paama neb kẽer pipi kiris-nebã wakatã saabẽ. A Sʋɩtãan ra maanda a sẽn tõe fãa n na n kɩt tɩ  Wẽnnaam nin-buiidã kisg taaba, la b welg taaba. A Zã sẽn wa n gʋlsd a lɛta-rãmbã, rẽ tɩ rap sẽn tar a Sʋɩtãan yamã buud n soos n kẽ tigingã pʋgẽ. Wala makre, a Dioterfɛs ra bee tiging a ye pʋgẽ, n da wat ne welgr hal tɩ pa nana ye. (3 Zã 9, 10) A ra pa nand neb nins siglgã taoor lʋɩtb sullã sẽn da tʋmd tɩ b kẽnd n kaagd tigimsã ye. A pʋd makame n na n dig neb nins sẽn da maand yẽ sẽn da kis b rãmbã sãandã n yiis tigingã pʋgẽ. Tɩtaam tek woto! Rũndã-rũndã, a Sʋɩtãan ket n maanda a sẽn tõe fãa n na n welg Wẽnnaam nin-buiidã. Bɩ d ra tol n bas tɩ kisgrã sẽn wat ne welgrã zĩnd d sʋk ye.

15. Bõe la zak soab segd n tẽegdẽ?

¹⁵ Bũmb a ye sẽn tar yõod zak soab sẽn tõe n maan n wilg t’a nonga a zakã rãmba, yaa a sẽn na n sõngd-b tɩ b paamd bũmb nins sẽn yaa tɩlɛ ne b vɩɩmã. (1 Tɩm. 5:8) La a segd n tẽegame tɩ yaa a sẽn na n sõng-b tɩ b paam zood sõma ne a Zeova n tar yõod n yɩɩda. (Mat. 5:3) Rẽ wɛɛngẽ, a Zeezi kõo zak-soben-dãmbã mak-sõngo. A Zã evãnzillã pʋgẽ, a wilgame tɩ baa ne a Zeezi sẽn wa n be ra-lukã zugã, a ra ket n tagsda a zakã rãmb yelle. A Zã ra yasa ne a Zeezi ma a Maari, zĩig ning b sẽn ka a Zeezi n na n kʋ wã. Baa ne a Zeezi sẽn da be toog wʋsg pʋgẽ wã, a kosa a Zã t’a yõdg n ges a Maari yelle. (Zã 19:26, 27) A Zeezi ra tara yaop sẽn da tõe n sõng b ma wã t’a paam bũmb nins sẽn yaa tɩlɛ ne a vɩɩmã. La wõnda wakat-kãng tɩ b baa a ye ra nan pa lebg a Zeezi karen-biig ye. Dẽnd a Zeezi ra rata ned sẽn na n ges a ma wã yelle, la a sõng-a tũudmã wɛɛngẽ me.

16. Bõe tʋʋm la a Zã ra tara?

¹⁶ A Zã ra tara tʋʋm wʋsgo. Wa tʋm-tʋmdb a taabã, a ra segd n lʋɩɩ taoor koɛɛgã mooneg pʋgẽ. Tõe me t’a ra kẽe kãadem, n segd n ges a zakã rãmb yelle, la a sõngd-b me tɩ b wɩngd ne a Zeova tũubu. (1 Kor. 9:5) Yam-bʋg la zak-soben-dãmbã tõe n dɩk rẽ wɛɛngẽ?

17. Bõe yĩng tɩ zak soab segd n sõng a zakã rãmb tɩ b paamd bũmb nins sẽn yaa tɩlɛ b tẽebã kengr yĩngã?

¹⁷ Saam-biig sẽn yaa zak soab tõe n  tara tʋʋm wʋsgo. A tʋʋmã zĩigẽ, a segd n tʋmda sõma, sẽn na yɩl t’a Zeova paam pẽgre. (Efɛ. 6:5, 6; Tɩt 2:9, 10) A tõe n tara tʋʋm a taab tigingã pʋgẽ me. Wala makre, ges tɩ tigingã neb paamd tẽeb la raood kengre, la a lʋɩ taoor koɛɛgã mooneg pʋgẽ me. Rẽ sẽn yãk a toogo, a segd n zãmsda Biiblã wakat fãa ne a pagã la a kambã. A zakã rãmb sũur na n yɩɩ noog wʋsg ne-a, a sẽn modgd woto tɩ b paamd bũmb nins sẽn yaa tɩlɛ ne b vɩɩmã, la a getẽ me tɩ b paamd tẽeb kengr la sũ-noogã.—Efɛ. 5:28, 29; 6:4.

18. A Zã ra kɩsa sɩd ne bõe?

¹⁸ A Zã vɩɩmd n kaoosame, la a paam me n tʋm tʋʋm wʋsgo. A maoo ne yɛl buud toor-toor sẽn da tõe n koms a tẽebã. Baa ne rẽ, a kell n maana a sẽn tõe fãa n tũ noy nins a Zeezi sẽn kõ wã, wala makre, a sẽn yeel tɩ d nong d tẽed-n-taasã. Woto kɩtame t’a Zã ra kɩs sɩd t’a Zeova ne a Zeezi nong-a lame, la tɩ b na n kõ-a-la pãng t’a tõog n mao ne zu-loɛɛg buud fãa. (Zã 14:15-17; 15:10; 1 Zã 4:16) A Sʋɩtãan ne a dũniyã pa tõog n kɩt t’a Zã pa wa nong a tẽed-n-taasã, la a wilg rẽ ne a no-goam la a tʋʋm-tʋmdɩ ye.

19. Bõe la 1 Zã 4:7 wã sagend tõnd tɩ d maane, la yaa bõe yĩnga?

¹⁹ Wa a Zã, tõnd me vɩɩ dũni sẽn be a Sʋɩtãan sẽn kis nebã nugẽ. (1 Zã 3:1, 10) Yaa sɩd t’a ratame tɩ d ra le nong d tẽed-n-taasã ye. La a pa tõe rẽ, sã n pa tõnd n kõ-a sor ye. Bɩ d yãk yam n na n kell n nong d saam-biisã la d saam-bi-pogsã, la d wilg rẽ ne d no-goam, la d tʋʋm-tʋmdɩ. Woto, d sũur na n yɩɩ noog wʋsgo, d sẽn paam n naag a Zeova nin-buiidã sẽn yaa wa zak a ye nebã, tɩ d vɩɩmã me tall barka.—Karm-y 1 Zã 4:7.