1. Bõe n kɩt tɩ neb wʋsg yam yuusdẽ?

RŨNDÃ-RŨNDÃ, tũudum wʋsg neb yetame tɩ b yaa kiris-neba, la tɩ b sẽn tũud Wẽnnaam to-to wã tata a yam. Rẽ n so tɩ neb wʋsg yam yuusdẽ. B sokda b mens yaa: “Rẽ yĩnga, tũudum hakɩɩkã yaa a yembre bal bɩ, bɩ tũudmã fãa tata Wẽnnaam yam?” Yãmb kɩsa sɩd t’a Zeova Kaset rãmbã sẽn zãmsd nebã Biiblã to-to wã, la b sẽn tũud Wẽnnaam to-to wã bal n tat a yam bɩ? Rẽ yĩnga, d sɩd tõe kɩsa sɩd ne rẽ bɩ? Bɩ d ges bũmb ning sẽn kɩt tɩ d kɩs sɩd ne rẽ wã.

2. Bõe n kɩt tɩ tẽn-tʋmd a Poll ra kɩs sɩd t’a sẽn tẽed bũmb ninsã yaa sɩda? (1 Tesalonik rãmbã 1:5)

² Tẽn-tʋmd a Poll ra kɩsa sɩd zãng t’a sẽn tẽed bũmb ninsã yaa sɩda. (Karm-y 1 Tesalonik rãmb 1:5.) Pa rẽ sẽn da kõt-a sũ-noog bal yĩng ye. A Poll pʋd n da maagda a yĩng n zãmsd Wẽnnaam Gomdã sõma. A ra kɩsa sɩd tɩ “Gʋls-sõamyã tõr yaa Wẽnnaam n vẽneg tɩ b gʋlse.” (2 Tɩm. 3:16) Bõe la a Poll bãng Gʋls-sõamyã pʋgẽ? A yãa kaset sẽn wilgd vẽeneg t’a Zeezi n yaa Mesi ning b sẽn da pĩnd n togs t’a watame wã. Yaool n yaa kaset-kãens la zʋɩf tũudmã taoor dãmb sẽn yãk yam n pa sak n tẽ wã. Nin-kãensã ra yetame tɩ b zãmsda nebã sɩdã Wẽnnaam zugu, la b yaool n da maanda yɛl kẽer Wẽnnaam sẽn kisi. (Tɩt 1:16) A Poll pa maan wa bãmb ye. A pa yãk a sẽn na n tẽ Wẽnnaam Gomdã pʋgẽ, la a sẽn pa na n tẽ ye. A yãka yam n na n zãms nebã Wẽnnaam Gomdã, la a tũ “Wẽnnaam daabã fãa.”—Tʋʋ. 20:27.

3. Yaa tɩlɛ tɩ d paam d sogsgã fãa leoore, n yaool n tõog n kɩs sɩd tɩ d bee tũudum hakɩɩkã pʋgẽ bɩ? (Ges-y zĩ-gũbrã: “ A Zeova tʋʋmã la a tagsa wã ‘sõor yaa wʋsg tɩ ka tõe n sõd n sɛ ye.’”)

 ³ Neb kẽer tagsdame tɩ tũudum hakɩɩkã neb segd n tõe n leoka sogsg buudã fãa, baa sogsg nins Biiblã sẽn pa leokdã. Rẽ yĩnga, nebã sẽn tagsd woto wã zemsame bɩ? D ges a Poll sẽn yeel bũmb ninga. A yeela a tẽed-n-taasã tɩ b ‘mak bũmb fãa n gese.’ La a yeel-b lame me tɩ bũmb wʋsg võor la a ra pa wʋmde. (1 Tes. 5:21) A yeelame: “Tõnd tara bãngr sẽn pa pid zãnga.” La a paas yaa: “Bala yaa ne nen-gɛtg maasem la tõnd get rũndã-rũndã n ne pulum-pulmi.” (1 Kor. 13:9, 12) Dẽnd pa bũmb fãa võor la a Poll ra wʋmd ye. Yaa woto me ne tõndo. A ra mii bũmb nins sẽn yaa tɩlɛ ne ned fãa t’a bãng Wẽnnaam zugã. A sẽn da mi bũmb ninsã ra seka a na kɩs sɩd t’a sẽn tẽed bũmb ninsã yaa sɩda.

4. Bõe la d tõe n maan n maneg n kɩs sɩd tɩ d bee tũudum hakɩɩkã pʋgẽ? Bõe yell la d na n gom kiris-neb hakɩɩkã wɛɛngẽ?

⁴ Bũmb a ye d sẽn tõe n maan n maneg n kɩs sɩd tɩ d bee tũudum hakɩɩkã pʋgẽ, yaa d sẽn na n ges a Zeezi sẽn wilg tũudum hakɩɩkã sẽn segd n yɩ to-to wã, n dɩk rẽ n mak ne a Zeova Kaset rãmbã sẽn maand to-to rũndã-rũndã wã. Sõs-kãngã pʋgẽ, d na n yãame tɩ kiris-neb hakɩɩkã 1) zãagda b mens ne bõn-naands pʋʋsgo, 2) b waoogda a Zeova yʋʋrã, 3) b nonga sɩdã, la 4) b nonga taab wʋsgo.

5. Bõe la a Zeezi maan-yã, tɩ wilgd d sẽn segd n tũ Wẽnnaam to-to? Bõe la d tõe n maan tɩ wilg tɩ d tũuda a Zeezi sẽn yeelã?

⁵ A Zeezi sẽn da nong Wẽnnaam wʋsgã yĩnga, a kell n tũu a Zeova ne a sũur fãa  a sẽn wa n be saasẽ wã, la a sẽn wa n be tẽngã zugã me. (Luk 4:8) A yeela a karen-biisã tɩ bãmb me tũ a Zeova a ye tãa. A Zeezi la baa a karen-biisã pa tol n pʋʋs bõn-naands ye. Sẽn mik tɩ ned pa tõe n yã Wẽnnaam ne nifã, bũmb kae d sẽn tõe n maan tɩ sɩd wõneg-a baa yaa bilf ye. (Eza. 46:5) La rẽ yĩnga, d tõe n maana nin-sõamyã imaaz n wõgemded a taoor n pʋʋsdẽ bɩ? Tõod piigã a Zeova sẽn da kõ wã sʋka, a yeela yiib-n-soab noorã pʋgẽ yaa: ‘Ra maan bõn-naandg sẽn wẽnd bũmb sẽn be saasẽ, wall sẽn be tẽngã zugu, wall sẽn be koom pʋsẽ dũniyã tẽngr ye. Ra wõgemd bõn-kãens taoor n waoog-b ye.’ (Yik. 20:4, 5) Neb nins sẽn dat n ta Wẽnnaam yamã mii vẽeneg t’a pa rat tɩ d pʋʋs bõn-naands ye.

6. A Zeova Kaset rãmbã sẽn tũud a Zeova to-to wã yaa wa ãnd dãmba?

⁶ Kʋdemd yel-mitb kẽer wilgame tɩ pipi kiris-nebã ra tũuda Wẽnnaam bala. Wala makre, sebr a ye sẽn gomd kʋdemdã yɛl yell wilgame tɩ b ra pa rat n wʋm tɩ b gomd neb sẽn tar bõn-naands b pʋʋsg zĩisẽ yell ye. B pʋd n da kisa rẽ. Rũndã-rũndã, a Zeova Kaset rãmbã me manesem yaa wa pipi kiris-nebã. Sɩd me, d pa pʋʋsd nin-sõamyã bõn-naandse, wall malɛgs ye. D pʋd n pa pʋʋsd a Zeezi meng ye. D pa pʋʋsd darpo wã, d pa maand bũmb sẽn na n wõnd d waoogda d tẽngã wa d sẽn waoogd Wẽnnaam to-to wã ye. Sẽn yaa a soab fãa, d yãka yam n na n sak a Zeezi sẽn yeel bũmb ningã. A yeelame: “Yaa fo Wẽnnaam a Zeova bal la fo segd n waooge.”—Mat. 4:10.

7. Wãn to la a Zeova Kaset rãmbã tũudmã yaa toor fasɩ ne tũudum a taabã?

⁷ Neb wʋsg nong n kelgda tũudum taoor dãmb yʋy sẽn yi. B nanda nin-kãensã hal wʋsgo, tɩ yaa wa b waoogd-b-la wa b sẽn waoogd Wẽnnaam to-to wã. Nebã pita b egiliiz-rãmbã, b raada b sɛbã, la b kõt ligd wʋsg n teend-ba. Neb kẽer sakd n deega nin-kãensã sẽn yet fãa. D tõe n yeelame tɩ egiliizã neb sũy nooma wʋsg ne b taoor dãmbã, n yɩɩd a Zeezi meng sẽn da na n be b sʋka. Tũudum hakɩɩkã neb yẽ tũuda Wẽnnaam la pa ninsaal ye. Yaa sɩd tɩ d nanda neb nins sẽn lʋɩt tõnd taoorã, la d sakda a Zeezi sẽn yeel bũmb ning tɩ yaa vẽenegã. A yeelame: “Yãmb fãa yaa saam-biisi.” (Mat. 23:8-10) Tõnd pa waoogd ninsaal wa d sẽn waoogd Wẽnnaam to-to wã, yaa tũudum taoor soab tɩ yaa politik taoor soab me. D pa maand baa fʋɩ me n teend nin-kãensã ye. D pʋd n pa kẽesd d toog politikã la dũniyã yɛl pʋgẽ ye. Woto kɩtame tɩ tõnd yaa toor fasɩ ne tũudum nins fãa sẽn yet tɩ b yaa kiris-nebã.—Zã 18:36.

8. Bõe n kɩt tɩ d miẽ t’a Zeova ratame tɩ d waoog a yʋʋrã, la d sõng neb a taabã tɩ b bãng yʋ-kãnga?

⁸ Daar a ye, a Zeezi pʋʋsa Wẽnnaam n yeel yaa: “M Ba, waoog-y y yʋʋrã.” A Zeova mengã zĩnda saasẽ n zẽk a koɛɛgã n yeel t’a na n sɩd waooga a yʋʋrã. (Zã 12:28) A Zeezi sẽn wa n be tẽngã zugã, a waooga a Ba wã yʋʋrã. (Zã 17:26) Rẽ n so tɩ kiris-neb hakɩɩkã getẽ tɩ yaa zu-zẽkr bũmbu, b sẽn pʋt Wẽnnaam yʋʋrã, la b sõngd neb a taabã tɩ b bãngd yʋ-kãnga.

9. Wãn to la pipi kiris-nebã ra wilgd tɩ b waoogda Wẽnnaam yʋʋrã?

⁹ Pipi kiris-nebã wakatẽ, b sẽn lugl kiris-neb tigingã poor bilf bala, a Zeova ‘yãka neb bãmb sʋk tɩ b yɩ buud a yʋʋrã yĩnga.’ (Tʋʋ. 15:14) Pipi kiris-nebã ra  getame tɩ b sẽn pʋt Wẽnnaam yʋʋrã, la b sõngd neb a taabã tɩ b bãngd yʋ-kãnga yaa zu-zẽkr meng-menga. B ninga yʋ-kãng Biiblã sɛbã b sẽn gʋlsã pʋgẽ, la b ra pʋt-a b sã n da wa moond koɛɛgã. * B sẽn maan woto wã wilgdame tɩ b sɩd da yaa buud ning Wẽnnaam sẽn yãk a yʋʋrã yĩngã.—Tʋʋ. 2:14, 21.

10. Bõe n wilgd t’a Zeova Kaset rãmbã yaa neb a Zeova sẽn yãk a yʋʋrã yĩnga?

¹⁰ A Zeova Kaset rãmbã yaa neb a Zeova sẽn yãk a yʋʋrã yĩng bɩ? D ges bũmb sẽn wilgd rẽ. Rũndã-rũndã, tũudum taoor dãmb wʋsg maanda b sẽn tõe fãa n na n kɩt tɩ nebã ra bãng tɩ Wẽnnaam tara yʋ-peell ye. B yãka Wẽnnaam yʋ-peellã Biibl-dãmb nins b sẽn lebgã pʋgẽ. Wakat ning menga, b gɩdgda nebã tɩ b ra pʋd yʋ-kãng b egiliiz-rãmbẽ wã ye. * Dẽnd yaa vẽeneg tɩ yaa a Zeova Kaset rãmbã bal n wilgd tɩ b sɩd waoogda Wẽnnaam yʋʋrã wa sẽn segdã, hal tɩ ned pa tõe n kɩɩs ye. Yaa tõnd bal n sõngd nebã tɩ b bãngd Wẽnnaam yʋ-peellã. Woto yĩnga, d maanda d sẽn tõe fãa n vɩ tɩ zemsd ne d yʋʋrã sẽn yaa a Zeova Kaset rãmbã. (Eza. 43:10-12) D yiisa Dũni-paalgã lebgre sẽn yɩɩd bãmb milyõ 240. Biibl-kãng pʋgẽ,  d lebsa Wẽnnaam yʋ-peellã zĩis nins fãa Biiblã lɛbgdb a taabã sẽn yãgsã. D leb n yiisda sɛb ne buud-goam 1000 la zaka, sẽn tik Biiblã zugu, la sẽn sõngd nebã tɩ b bãngd Wẽnnaam yʋ-peellã.

11. Wãn to la pipi kiris-nebã wilg tɩ b nonga sɩdã?

¹¹ A Zeezi nonga sɩdã, rat n yeel tɩ sɩdã Wẽnnaam zugu, la Wẽnnaam daabã. A Zeezi sẽn da vɩ to-to wã ra zemsa ne a sẽn da tẽed bũmb ningã. La a sõnga neb a taabã tɩ b bãng a sẽn tẽed bũmb ninsã. (Zã 18:37) A Zeezi karen-biis hakɩɩkã me ra nonga sɩdã ne b sũy fãa. (Zã 4:23, 24) Tẽn-tʋmd a Pɩyɛɛr pʋd n boola kiris-neb tũudmã tɩ “sɩdã sorã.” (2 Pɩy. 2:2) Pipi kiris-nebã sẽn da nong sɩdã ne b sũy fãa wã yĩnga, b zãaga b mens ne tũudum a taabã neb sẽn da yet bũmb ninsã, rog-n-migsã, la tagsa nins fãa sẽn pa zems ne sɩdã. (Kol. 2:8) Rũndã-rũndã me, kiris-neb hakɩɩkã modgdame tɩ b sẽn tẽed bũmb ninsã fãa, la b sẽn vɩ to-to wã zemsd ne a Zeova Gomdã, tɩ wilgd vẽeneg tɩ b “ket n kẽnda sɩdã pʋgẽ.”—3 Zã 3, 4.

12. Siglgã taoor lʋɩtb sull sã n wa bãng tɩ b segd n toeema bũmb võor b sẽn da bilgi, bõe la b maanda, la bõe yĩng tɩ b sakd n toeemdẽ?

¹² A Zeova Kaset rãmbã pa yetẽ tɩ b wʋmda bũmb fãa võor sõma Biiblã pʋgẽ ye. Wakat ninga, b sẽn bilgd Biiblã gomd ning võor to-to wã, wall b sẽn sigind yɛl kẽer to-to wã pa tolg n zems kɛpɩ ye. La woto pa segd n ling tõnd ye. Biiblã wilgda vẽeneg tɩ Wẽnnaam nin-buiidã na n wʋmda Biiblã goamã võor bilf-bilf n paasdẽ. (Kol. 1:9, 10) Yaa bilf-bilf la a Zeova vẽnegd a nin-buiidã tɩ b wʋmd Biiblã goamã võore. La d segd n kell n talla sũ-mar n gũ, hal t’a Zeova wa vẽneg-d tɩ d tõog n wʋm Biiblã gomd ning võor sõma. (Yel. 4:18) Siglgã taoor lʋɩtb sull sã n wa bãng tɩ b segd n toeema b sẽn da bilg Biiblã gomd ning võor to-to wã, b toeemda rẽ tao-tao. Rũndã-rũndã, egiliiz-rãmb wʋsg sã n wa toeem bũmb b sẽn da zãmsd b nebã, yaa b sẽn dat n noog b sũur yĩnga, bɩ b sẽn dat tɩ nebã pẽg-b yĩnga. La a Zeova Kaset rãmbã yẽ sã n wa toeem bũmb võor b sẽn da bilgi, yaa b sẽn dat n maneg n ta a Zeova yam yĩnga, la b tũ-a wa a Zeezi sẽn da tũud-a to-to wã. (Zak 4:4) D sã n wa toeem bũmb kẽere, pa dũniyã neb tagsg sẽn toeem rẽ wɛɛngẽ yĩng ye. Yaa d sẽn maneg n wʋmd Biiblã goamã võor sõma yĩnga. Bala d nonga sɩdã.—1 Tes. 2:3, 4.

13. Zʋg-sõng bʋg sẽn yaa kãseng n yɩɩd la kiris-neb hakɩɩkã tara? Bõe n wilgd tɩ nonglem hakɩɩk sɩd bee a Zeova Kaset rãmbã sʋka?

¹³ Pipi kiris-nebã ra tara zʋg-sõma wʋsgo. La zʋg-sõng ning b sẽn da tar tɩ nebã pẽgd-b n yɩɩd yaa nonglmã. A Zeezi yeelame: “Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:34, 35) Rũndã-rũndã, a Zeova Kaset rãmbã sẽn be dũniyã gill zugã nonga taaba, la b zemsd taab me. Tõnd yaa toor fasɩ ne tũudum a taabã neba. Bala d yaa wa zak a ye rãmba, baa ne d sẽn yit tẽns toɛy-toɛyã, tɩ d minundã me pa yembrã. D tigissã la d tigis-kãsemsã sasa, d yãta vẽeneg tɩ nonglem hakɩɩk sɩd bee d sʋka. Woto sõngda tõnd tɩ d maneg n kɩs sɩda, tɩ d sẽn tũud a Zeova to-to wã tata a yam.

14. Wa Kolos rãmb 3:12-14 sẽn wilgdã, bõe la d tõe n maan n wilg tɩ d sɩd nonga taab wʋsgo?

¹⁴ Biiblã yetame tɩ d “nong taab wʋsgo.” (1 Pɩy. 4:8) Bũmb a ye d sẽn tõe  n maan n wilg tɩ d nonga taab wʋsg yaa d sẽn na n kõt d taabã sugri, la d da get b kongrã ye. Sẽn paase, d baooda segb buud toor-toor n maand d tigingã nebã fãa neere, baa neb nins sẽn beeg tõndã. (Karm-y Kolos rãmb 3:12-14.) D sã n nong taab wʋsg woto, wilgdame tɩ d sɩd yaa kiris-neb hakɩɩka.

15. Bõe me la d maanda, tɩ wilgdẽ tɩ d sẽn tũud a Zeova to-to wã yaa wa pipi kiris-nebã me sẽn da maandã?

¹⁵ Bũmb kẽer wɛɛngẽ me, tõnd sẽn tũud a Zeova to-to wã yaa wa pipi kiris-nebã sẽn da maandã. Wala makre, d sẽn sigl bũmb kẽer to-to wã wɛɛngẽ. Wa pipi kiris-nebã, tõnd me tara yel-gɛtb sẽn togs soay n kaagd d tẽed-n-taasã, kãsem-dãmba, la kãsem-sõngdba. (Fili. 1:1; Tɩt 1:5) Wa bãmba, tõnd me tũuda noy nins a Zeova sẽn gãneg pag ne rao lagengã, kãadmã la zɩɩmã wɛɛngẽ wã. Sẽn paase, d pa sakd tɩ neb nins sẽn pa rat n tũ Wẽnnaam noyã zĩnd tigingã pʋgẽ ye.—Tʋʋ. 15:28, 29; 1 Kor. 5:11-13; 6:9, 10; Ebre. 13:4.

16. Efɛɛz rãmb 4:4-6 sẽn yet bũmb ningã sõngda tõnd tɩ d bãng bõe?

¹⁶ A Zeezi yeelame tɩ neb wʋsg na n yetame tɩ b yaa yẽ karen-biisi, la tɩ pa b fãa n yaa yẽ karen-biis hakɩɩk ye. (Mat. 7:21-23) Biiblã pĩnd togsame me tɩ yaoolem wakatã, neb wʋsg na n “wõnda wẽn-sakdba.” (2 Tɩm. 3:1, 5) Biiblã yaool n wilgdame tɩ yaa “tẽeb a yembre,” rat n yeel tɩ tũudum a yembr bal n tat Wẽnnaam yam.—Karm-y Efɛɛz rãmb 4:4-6.

17. Rũndã-rũndã, ãnd dãmb tũudum la tũudum hakɩɩkã?

¹⁷ Ãnd dãmb tũudum n yaa tũudum hakɩɩkã rũndã-rũndã? D yãa kaset sẽn wilgd vẽeneg tɩ yaa a Zeova Kaset rãmbã tũudmã bala. D yãa a Zeezi sẽn wilg d sẽn segd n tũ Wẽnnaam to-to wã, la pipi kiris-nebã me sẽn da tũud Wẽnnaam to-to wã. D sẽn paam n naag a Zeova nin-buiidã, n mi sɩdã a Zeova zug la d mi a raabã sɩd yaa zu-zẽkr menga. Bɩ d maan d sẽn tõe fãa n kell n gãd sɩdã kãn-kãe.