YƲƲMD fãa, neb wʋsg la b lebsd n deegd tigingã pʋgẽ. Nin-kãensã tara yõod wʋsg a Zeova nifẽ. Tags-y n ges-y sũ-no-kãseng ning sẽn be saasẽ, ned sã n lebg n wa a Zeova nengẽ. (Luk 15:7, 10) B sã n lebs n deega yãmb tigingã pʋgẽ, bɩ y bas y yam t’a Zeezi ne malɛgsã n paas a Zeova mengã sũy noomame, y sẽn lebg n wa sɩdã pʋgẽ wã yĩnga. La y sã n wa maood n na n le paam zood sõma ne a Zeova, tõeeme n pa yɩ nana ne-y ye. Bõe n tõe n kɩt tɩ pa yɩ nana, la bõe n tõe n sõng-yã?

D tẽed-n-taas wʋsg sũy ket n sãamdame, baa b sẽn lebs n deeg-b tigingã pʋgẽ wã. Yɩɩ woto me ne rĩm a Davɩɩde. Baa ne a sẽn da paam t’a Zeova kõ-a sugrã, a yeelame: “Mam yel-wẽnã pʋgda maam.” (Yɩɩn. 40:13; 65:4) Ned sã n lebg n wa a Zeova nengẽ, yãnd tõe n ket n tar-a lame, bɩ a tõe n kell n ninga a meng taal hal n kaoos yʋʋma. B ra yiisa a Izabɛll tigingã pʋgẽ tɩ kaoos yʋʋm pisi la zakã. * A yeelame: “Yɩɩ toog tɩ m sak n deeg t’a Zeova tõe n kõ-m-la sugri.” Y sã n koms raoodo, zood ning y sẽn tar ne a Zeova wã pãng tõe n boogame. (Yel. 24:10) Bɩ y modg n da bas tɩ yɩ woto ye.

Neb kẽer maanda yɩɩre, n tagsdẽ tɩ b pa na n tõog n maan bũmb nins fãa b sẽn segd n maane, n yaool n le paam zood sõma ne a Zeova wã ye. D gom a Ãntowan yelle. B sẽn lebs n deeg-a tigingã pʋgẽ wã poore, a yeelame: “Mam yĩma bũmb wʋsg m sẽn da zãms la m sẽn da maane, b sẽn wa n nan pa yiis maam tigingã pʋgẽ wã.” Neb kẽer tagsda woto, tɩ kɩt tɩ b pa rat n le maan b sẽn tõe fãa a Zeova tũudmã pʋgẽ ye.

D rɩk makr wa sob-kãseng sẽn na n sãam ned zak a sẽn nong wʋsgo. A sã n tagsd sẽk la modgr ning a sẽn na n dɩk n lebs n maneg zakã, tõe n sãamda a sũuri. Woto me, zood ning y sẽn tar ne a Zeova wã sã n sãama y sẽn maan  yel-wẽn-kãseng yĩnga, y tõe n tagsdame tɩ yɩl n le paam zood sõma ne a Zeova, y segd n maana bũmb wʋsg sẽn yaa toogo. La y tõe n paama sõngre.

A Zeova yeta tõnd yaa: “M kotame tɩ y wa tɩ d yẽs ne taaba.” (Eza. 1:18) Yãmb zoe n modga wʋsg n na n yẽs ne a Zeova, n paam tɩ y yellã manege. A Zeova nonga yãmba, y sẽn modg n maan woto wã. Tags-y n ges-y. Yãmb sẽn lebg n wa a Zeova nengẽ wã yĩnga, a tõe n tika y mak-sõngã zug n wilg t’a Sʋɩtãan yaa ziri yagda.—Yel. 27:11.

Y sẽn lebg n wa a Zeova nengẽ wã, wilgdame tɩ y ratame n lebg a zoa. La yẽ me pʋlmame t’a na n sak n yɩɩ y zoa. (Zak 4:8) Neb a taabã sã n neẽ tɩ b lebs n deega yãmb tigingã pʋgẽ, yaa sõma. La rẽ bal pa sek ye. Bũmb a taab la y segd n maane. Y segd n modgame tɩ y nonglmã ne a Zeova sẽn yaa y Ba la y zoa wã pãng paasdẽ. Wãn to la y tõe n maan rẽ?

Modg-y n yãk-y bũmb kẽer sẽn pa yɩɩd y pãnga, n maandẽ. Yaa vẽeneg tɩ y ket n tẽra bũmb nins y sẽn bãng a Zeova zug sɩngrẽ wã, la a sẽn pʋlem arzãnã. La masã, y segd n le minim n maanda bũmb kẽere. Wala makre, n moond koɛɛgã wakat fãa, n kẽnd tigissã, la y nong n be ne y tẽed-n-taasã. D ges bũmb kẽer y sẽn tõe n yãk yam n maane.

Nong-y pʋʋsd-y-yã a Zeova: Y Ba a Zeova miime tɩ y sã n ket n ningd y meng taal bũmb ning y sẽn maan tɩ pa sõma wã yĩnga, tõe n yɩɩ toog ne-y tɩ y pʋʋs-a. (Rom. 8:26) La “wɩng-y ne pʋʋsgo,” n togs a Zeova tɩ y rata ne y sũur fãa n le paam a zoodo. (Rom. 12:12) A Ãndere tẽega b sẽn wa n lebs n deeg-a tigingã pʋgẽ wã, n yeel yaa: “M da ningda n meng taal wʋsgo, tɩ yãnd me ra tar-ma. La m sã n d pʋʋs n sa fãa, m yamã gãandedame.” Y sã n pa mi y sẽn na n pʋʋs a Zeova n yeel bũmb ninga, bɩ y ges rĩm a Davɩɩd sẽn pʋʋs a Zeova to-to, a sẽn wa n tek yam n kos sugrã. Pʋʋs-kãng bee Yɩɩn-sõamyã 51 ne 65 wã pʋgẽ.

Zãmsd-y Biiblã wakat fãa: Rẽ na n sõng-y lame tɩ y tẽebã pãng paase, la sõng-y me tɩ y maneg n nong a Zeova. (Yɩɩn. 19:8-12) Saam-biig a ye yʋʋr sẽn boond t’a Filip yeelame: “Mam sẽn da pa yãk wakat n na n karemd Biiblã la m zãmsd-a wã yĩnga, mam tẽebã pãng boogame, la kɩt tɩ m sãam a Zeova sũuri. Mam sẽn da pa rat n yɩlem m kongrã yĩnga, m yãka yam n na n zãmsd Biiblã wakat fãa n pa vaandẽ ye.” Yãmb me tõe n maana woto. Y sã n dat tɩ b sõng-y tɩ y bãng bũmb ning y sẽn tõe n zãms y Biibl zãmsgã wakate, y tõe n kosa y zoa sẽn tar zood sõma ne a Zeova t’a sõng-yã.

Lebg-y n bao-y y tẽed-n-taasã zoodo: Neb kẽer b sẽn lebs n deeg tigingã pʋgẽ tõe n maanda yɩɩre, n tagsdẽ tɩ neb a taabã sũy pa noom ne-b ye. Yɩɩ woto ne a Larisa. A yeelame: “Yãndã ra tara maam wʋsgo. Mam da getame tɩ m sãama tigingã neb sũy. Mam talla tagsa a woto n kaoos yʋʋma.” Bas-y y yam tɩ kãsem-dãmbã n paas neb a taab tẽeb sẽn bɩ rata ne b sũy fãa n sõng-y tɩ y le paam zood sõma ne a Zeova. (Ges-y zĩ-gũbrã: “ Kãsem-dãmbã sẽn tõe n maane.”) B sũy nooma y sẽn lebg n wa a Zeova nengẽ wã, la b rat tɩ yãmb me maan sũ-noogo.—Yel. 18:24.

Bõe la y tõe n maan n le paam tigingã neb zoodo? Kẽnd-y tigissã n paam n be ne y tẽed-n-taasã, la y naagd-b moond koɛɛgã wakat fãa. Wãn to la rẽ tõe n sõng-yã? Ad a Feligs sẽn yeele: “Tigingã neb ra gũuda mam waoongo. M da getame tɩ b nanda maam. B sõnga maam tɩ m bãng tɩ m le naaga tigingã neba, t’a Zeova kõ-m-la sugri, la tɩ m tõe n ket n tũud-a lame.”—Ges-y zĩ-gũbrã: “ Y sẽn tõe n maane.”

A Sʋɩtãan na n ket n wata ne zu-loeese, sẽn na yɩl n koms y raoodo, tɩ y bas n pa le bao a Zeova zood ye. (Luk 4:13) Bɩ y modg tɩ y zoodã ne a Zeova pãng paas masã menga.

A Zeova goma a nin-buiidã a sẽn mak ne piisã yelle, n yeel yaa: “Mam na n baoo pesg ning sẽn menem-a wã, mam na n talla sẽn kẽ-a moogã n wa. Mam na n tɩbsa karg sẽn kaoog-a wã, m na n tɩpsa sẽn bẽed-a wã, n kɩt t’a sãoog n paam pãnga.” (Eze. 34:16) A Zeova sõnga neb ka tɛka, tɩ b le paam zood sõma ne-a. Bɩ y bas y yam t’a rat n sõnga yãmb me tɩ y kell n tall zood sõma ne-a wakat fãa yĩnga.