A Zeezi yeela nebã tɩ b modg tɩ laafɩ zĩnd b sʋka. Daar a ye, a yeela a tẽn-tʋmdbã yaa: “Ra tags-y tɩ mam waame n na n kɩt tɩ laafɩ zĩnd tẽngã zug ye. Mam pa wa ne laafɩ ye. M waa ne sʋʋga. Bala, m waame n na n kɩt tɩ welgr zĩnd bi-ribl ne a ba sʋka, bi-pugl ne a ma sʋka, la pag ne a sɩd-ma sʋka.” (Mat. 10:34, 35) A Zeezi ra rat n yeelame tɩ bõe?

A Zeezi ra pa rat tɩ zagsã rãmb welg taab ye. La a ra miime t’a sẽn zãmsd nebã bũmb ningã tõe n waa ne welsg zags kẽer pʋsẽ. Woto yĩnga, neb nins sẽn dat n lebg a Zeezi karen-biis la b wa reeg lisgã segd n bãngame tɩ b zakã rãmb sũy tõeeme n pa yɩ noog ne-b ye. Ned sã n wa sɩng a Zeova tũubu, t’a pag bɩ a sɩd wall a zakã neb a taab sẽn pa tũud a Zeova sɩng a namsg a tũudmã yĩnga, tõe n yɩɩ toog t’a kell n tũ Kirist sẽn zãms nebã bũmb ninsã.

Biiblã sagenda kiris-nebã tɩ b modg tɩ ‘laafɩ zĩnd bãmb ne nebã fãa sʋka.’ (Rom. 12:18) La a Zeezi sẽn zãmsd nebã bũmb ninsã tõe n yɩɩ wa “sʋʋg” zags kẽer pʋsẽ. Tõe n yɩɩ woto, zakã neb kẽer sã n sakda a Zeezi zãmsgã t’a taab kɩɩsdẽ. Sã n wa yaa woto, ned ning sẽn tũud a Zeova wã zak rãmb lebgda a “bɛɛba.”—Mat. 10:36.

Kiris-neb nins sẽn vɩ ne b zakã neb nins sẽn pa tũud a Zeova wã segd n yãka sã n yaa a Zeova ne a Zeezi sũur la b na n nooge, bɩ yaa b zakã rãmba. Wala makre, b zakã ned sẽn pa tũud a Zeova tõe n pẽdg-b lame n dat tɩ b naag-b n maan ziri tũudmã kibsa. Sã n wa yaa woto, b segd n yãka b sẽn na n noog a soab sũuri. A Zeezi yeelame: “Ned ning sẽn nong a ba wall a ma n yɩɩd maam pa zems tɩ yɩ mam karen-biig ye.” (Mat. 10:37) A Zeezi ra pa rat n yeel tɩ ned sã n lebg a karen-biiga, a pa segd n le nong a zakã rãmb wa pĩndã ye. A ra ratame tɩ b bãng bũmb ning sẽn segd n tall yõod b vɩɩmã pʋgẽ n tɩ yɩɩdã. D zakã neb nins sẽn pa tũud a Zeova wã sã n namsd tõnd d tũudmã yĩnga, d na n ket n nong-b lame. La d miime tɩ yaa a Zeova la d segd n nongẽ n tɩ yɩɩda.

D zakã neb sã n namsd tõnd d tũudmã yĩnga, tõe n sãama d sũur hal wʋsgo. Baa ne rẽ, a Zeezi karen-biisã segd n ninga b yamẽ a sẽn yeel-b bũmb ningã. Ad a sẽn yeelã: “Ned ning sẽn pa na n sak n dɩk a kũum ra-luk n tũ maam pa zems tɩ yɩ mam karen-biig ye.” (Mat. 10:38) Woto rat n yeelame tɩ kiris-nebã getame tɩ b zakã neb sẽn pa tũud a Zeova wã sẽn namsd-b b tũudmã yĩngã, naaga zu-loees nins Kiristã karen-biisã sẽn segd n mao ne wã. La b saagdame tɩ b sẽn tar yel-manesem sẽn yaa sõma wã yĩnga, b zakã neb na n wa toeema yam n sak n tũ Biiblã sẽn yetã.—1 Pɩy. 3:1, 2.