1. A Zeova raab yaa bõe rũndã-rũndã?

 RŨNDÃ-RŨNDÃ, Wẽnnaam daab yaa d moon Rĩungã koe-noogã dũniyã gill zugu. (Mark 13:10; 1 Tɩm. 2:3, 4) Yaa a Zeova tʋʋmde, la yaa tʋʋmd sẽn tar yõod wʋsgo, hal t’a rɩk a bi-nongrã n lʋɩɩs taoore. D tõe n basa d yam t’a Zeezi sẽn wilgd-d sorã, d na n tõog n moona koɛɛgã n baas wa a Zeova sẽn datã, nand tɩ dũniyã saab ta.—Mat. 24:14.

2. Bõe la d na n yã sõs-kãngã pʋgẽ?

² Sõs-kãngã pʋgẽ, d na n yãame t’a Zeezi tũnugda ne tʋm-tʋmd sẽn tũud sɩdã n kõt tõnd noy la sagls sẽn yit Wẽnnaam Gomdã pʋgẽ, la t’a sõngd a karen-biisã tɩ b kẽesd b toog koe-noogã d sẽn moond duniyã gill zug t’a buud zɩ n zĩndã pʋgẽ. (Mat. 24:45) D na n yãa tõnd ned kam fãa sẽn tõe n maan n teel a Zeezi la tʋm-tʋmd sẽn tũud sɩdã.

3. B kõo a Zeezi noor t’a maan bõe?

³ A Zeezi n lʋɩt taoor koɛɛgã mooneg pʋgẽ. Bõe n kɩt tɩ d mi rẽ? Sẽn wa n ket bilf t’a leb saasẽ wã, a tigma ne a karen-biis kẽer Galile tãngã zugu. A yeel-b lame yaa: “Wẽnnaam kõo maam noor tɩ m ges bũmb fãa yell saasẽ la tẽngã zugu.” Ges-y a sẽn paas bũmb ningã: “Bɩ y kẽng n tɩ sõng buud fãa neb tɩ b lebg mam karen-biisi.” (Mat. 28:18, 19) Dẽnd b kõo a Zeezi noor me, t’a na n lʋɩ taoor koɛɛgã mooneg pʋgẽ.

4. Bõe yĩng tɩ d tõe n kɩs sɩd t’a Zeezi ket n lʋɩta taoor koɛɛgã mooneg pʋgẽ?

 ⁴ A Zeezi yeelame t’a karen-biisã na n moona koɛɛgã, la b “sõng buud fãa neb” tɩ b lebg yẽ karen-biisi, la t’a na n zĩnda ne a karen-biisã “daar fãa, hal tɩ ta dũniyã saabo.” (Mat. 28:20) A Zeezi sẽn yeel bũmb ningã wilgda vẽeneg t’a na n kell n lʋɩɩ taoor koɛɛgã mooneg pʋgẽ, hal n tãag rũndã.

5. Wãn to la d sõngd n pidsd bãngr-gomd ning sẽn be Yɩɩn-sõamyã 110:3 pʋgẽ wã?

⁵ A Zeezi ra pa maand yɩɩr n tagsdẽ tɩ dũniyã saab wakate, koe-moondbã sõor na n paoogame ye. A ra miime tɩ yɩɩn-gʋlsdã sẽn da pĩnd n togs bũmb ningã na n pidsame. Yɩɩn-gʋlsdã ra yeelame yaa: “Fo sẽn na n tigim f tãb-biisã daare, gãndaad n na n paam sũ-noog tɩ yãag-f zabrẽ wã.” (Yɩɩn. 110:3) Y sã n moond koe-noogã, y teenda a Zeezi la tʋm-tʋmd sẽn tũud sɩdã, n sõngd n pidsd bãngr-gom-kãngã. Yaa sɩd tɩ tʋʋmdã kẽngda taoore, la d segda zu-loees wʋsg me.

6. Zu-loe-bʋg la Rĩungã koe-moondbã paamd rũndã-rũndã?

⁶ Zu-loɛɛg a ye Rĩungã koe-moondbã sẽn segd yaa b sẽn paamd namsg b tũudmã yĩngã. Sɩdã kɩɩsdbã, tũudum taoor dãmba, la politikã taoor dãmb yelgda goam sẽn pa sɩda, d tʋʋmdã wɛɛngẽ. D zakã rãmba, d mitinsi, la d tʋmd-n-taasã sã n kelgd ziri kãensã, b tõe n dat n modg-d lame tɩ d bas a Zeova tũub la koɛɛgã moonego. Tẽns kẽere, b bugsda d saam-biisã, n yaand-ba, hal n mi n kẽes-b bãens roogo. Yel-kãensã pa ling tõnd ye. Bala a Zeezi ra pĩnd n yeelame: “Buudã fãa na n kisga yãmb mam yʋʋrã yĩnga.” (Mat. 24:9) D sẽn paamd namsg a woto wã pʋd n wilgdame tɩ d tata a Zeova yam. (Mat. 5:11, 12) Yaa a Sʋɩtãan n be nams-kãensã fãa poorẽ. La a Zeezi pãng yɩɩd-a-la hal zĩig sẽn zãre. Ne a Zeezi sõngre, d tõogdame tɩ koe-noogã tat buud fãa neba. D ges bũmb sẽn wilgd rẽ.

7. Kaset bʋg n wilgd tɩ Vẽnegr 14:6, 7 wã pidsdame?

⁷ D sẽn yaa Rĩungã koe-moondbã, zu-loɛɛg a to yaa tɩ d mi n sega ned sẽn pa wʋmd d buud-gomdã ye. A Zeezi vẽnega tẽn-tʋmd a Zã t’a bãng tɩ zu-loe-kãng pa tõe n kɩt tɩ koe-noogã pa ta buud fãa neb ye. (Karm-y Vẽnegr 14:6, 7.) Wãn to? D maanda d sẽn tõe fãa, tɩ neb wʋsg paamd segb n tõe n sak Rĩungã koɛɛgã. Rũndã-rũndã, neb wʋsg dũniyã gill zug tõe n paama sɛb sẽn tik Biiblã zug n karme, tõnd sɩt jw.org pʋgẽ. Bala sɩt-kãng pʋgẽ, y tõe n paama bũmb sẽn tik Biiblã zugu, buud-goam tusr la zak pʋgẽ. Siglgã taoor lʋɩtb sull kõo sore, tɩ b na n lebg Vɩɩmd-y wakat sẽn kõn sa! sebrã buud-goam 700 la zak pʋgẽ. Yaa seb-kãng la d tar n zãmsd nebã Biiblã n tɩ yɩɩda. B leb n yiisda video-rãmb mugsã yĩnga, la sɛb me tɩ zoensã tõe n karme. Woto sɩd pidsda Biiblã bãngr-goama. Neb sẽn “gomd buud-goam toɛ-toeya,” zãmsda “buud-gomd sẽn yaa yɩlemde,” rat n yeel tɩ sɩdã sẽn be Biiblã pʋgẽ wã. (Zaka. 8:23; Sof. 3:9, MN) D sẽn tõogd n maand woto fãa wã yaa d sẽn paam t’a Zeezi Kirist sẽn yaa d taoor soabã wilgd-d sorã yĩnga.

8. Koe-moonegã wata ne nafa bʋse?

⁸ Rũndã-rũndã, a Zeova siglgã nebã yaa milyõ a nii la zaka, n be tẽns 240 pʋsẽ. Yʋʋmd fãa, neb tusa n deegd lisgu.  La pa nin-kãensã sõorã n tar yõod n yɩɩd ye. Yaa b sẽn bɩɩsd zʋg-sõma wã, rat n yeel tɩ n “yeelg nin-paalgã.” (Kol. 3:8-10) B wʋsg ra yaa yoaadba, nen-kɛglem dãmba, bu-welsdba, la neb sẽn da nong b tẽngã tɩ loog noore. Wa Ezayi 2:4 sẽn pĩnd n togsã, b sɩd pa le ‘zãmsd zabr sẽn zabd to-to ye.’ D sẽn modgd n yeelgd nin-paalgã, sõngda neb wʋsg tɩ b wat a Zeova siglgã pʋgẽ, la wilgdẽ tɩ d tũuda a Zeezi Kirist sẽn yaa d taoor soabã. (Zã 13:35; 1 Pɩy. 2:12) Yaa a Zeezi sẽn sõngd tõndã yĩng n kɩt tɩ d tõogd n maand woto fãa wã.

9. Wa Matiye 24:45-47 sẽn wilgdã, bõe la a Zeezi ra pĩnd n togs t’a na n maana dũniyã saab wakate?

⁹ Karm-y Matiye 24:45-47. A Zeezi ra yeelame tɩ dũniyã saab wakate, a na n yãka “tʋm-tʋmd sẽn tũud sɩd la sẽn tar yam,” t’a kõt a nin-buiidã sagls la zãmsg sẽn tik Biiblã zugu. Dẽnd tʋm-tʋmdã sẽn sɩd tʋmd wʋsg rũndã-rũndã wã pa ling tõnd ye. Sɩd me, a Zeezi tũnugda ne rap sul-bil sẽn paam vʋʋsem sõngã zaeebo, n sõngd Wẽnnaam nin-buiidã la neb nins sẽn tigimd ne-bã, tɩ b paamd “rɩɩb wakat sẽn zemse,” b tẽebã kengr yĩnga. Nin-kãensã pa getẽ tɩ bãmb n so neb a taabã tẽeb ye. (2 Kor. 1:24) B pʋd n sak n deegame t’a Zeezi Kirist la a nin-buiidã naabã.—Eza. 55:4.

10. Wa b sẽn wilg imaaz-rãmbã zugã, yaa seb-bʋg n sõng yãmb tɩ y wa sɩng a Zeova tũubu?

¹⁰ Yʋʋmd 1919 wã tɛka, tʋm-tʋmd sẽn tũud sɩdã yiisa sɛb buud toor-toore, n sõng neb wʋsg tɩ b paam n bãng Wẽnnaam Gomdã sẽn yet bũmb ningã. Yʋʋmd 1921 wã, tʋm-tʋmdã yiisa La harpe de Dieu sebrã, n na n sõng nebã tɩ b bãng Biiblã sẽn sɩd yet bũmb ning  Wẽnnaam la a raabã wɛɛngẽ. Tarẽ-n-tarẽ, b wa n yiisa sɛb a taab n paase. Seb-bʋg n sõng yãmb tɩ y bãng y saasẽ Ba wã, hal n wa nong-a? Yaa “Que Dieu soit reconnu pour vrai !” sebrã bɩ, La vérité qui conduit à la vie éternelle sebrã bɩ, Y tõe n vɩɩnda wakat sẽn-kõn-sa tẽng zug arzãnẽ sebrã bɩ, Bãngr sẽn tar n debd vɩɩm sẽn-kõn-saẽ wã sebrã bɩ, Biiblã sɩd yetame tɩ bõe? sebrã bɩ, Bõe la d tõe n bãng Biiblã pʋgẽ? sebrã bɩ, bɩ yaa Vɩɩmd-y wakat sẽn kõn sa! sebrã d sẽn nan yiis paalmã? B yiisa sɛb-kãensã fãa, sẽn na yɩl tɩ d tall n sõng nebã tɩ b lebg a Zeezi karen-biisi. La sebr fãa sɩd ra zemsa a wakate.

11. Bõe yĩng tɩ yaa tɩlɛ tɩ d fãa bao n bãng a Zeova la a Gomdã sõma?

¹¹ Pa neb nins sẽn nan sɩng Biiblã zãmsgã bal n segd n bao n bãng a Zeova la a Gomdã sõma ye. Tõnd fãa segd n maana woto. Tẽn-tʋmd a Poll yeelame: “Rɩɩb sẽn yaa taokã yaa neb nins sẽn bɩ wã yĩnga.” A Poll paasame tɩ d sã n tũud bũmb nins d sẽn zãmsd Biiblã pʋgẽ wã, na n sõng-d lame tɩ d bãng sẽn yaa ‘sõma ne wẽng n bake.’ (Ebre. 5:14) D vɩɩ toog wakate, tɩ nebã yel-menesmã me pa lebd be ye. Woto wã, tõe n yɩɩ toog tɩ d tõog n tũ a Zeova noyã. La a Zeezi getame tɩ d paamd bũmb nins sẽn na n sõng-d tɩ d tẽebã kell n tall pãngã. Bõn-kãensã fãa tika Wẽnnaam Gomdã sẽn yaa Biiblã zugu. A Zeezi wilgda tʋm-tʋmd sẽn tũud sɩdã sore, t’a sõngd tõnd tɩ d paamd rẽ fãa.

12. Wa a Zeezi, wãn to la d wilgd tɩ d waoogda Wẽnnaam yʋʋrã?

¹² Wa a Zeezi, tõnd me kɩtdame tɩ Wẽnnaam yʋʋrã paamd waoogr ning a sẽn segd ne wã. (Zã 17:6, 26) Wala makre, yʋʋmd 1931 wã tɛka, d sakame tɩ b boond tõnd t’a Zeova Kaset rãmba,  wa sẽn zems ne Biiblã. Woto wã, d wilgdame tɩ d saasẽ Ba wã yʋʋr tara yõod wʋsg d nifẽ, la d rat tɩ b bool-d ne yʋ-kãnga. (Eza. 43:10-12) Yʋʋmd-kãng zĩ-likr kiuugã tɛka, d ningda Wẽnnaam yʋʋrã Gũusg Gasgã d sẽn yiisdã zugu. Sẽn paase, Traduction du moonde nouveau wã pʋgẽ, d lebs n ninga Wẽnnaam yʋ-peellã zĩis nins fãa a sẽn segd n zĩnd a Gomdã pʋgẽ wã. La woto yaa toor fasɩ ne kiris-neb ne yʋʋrã rãmba, bala b yãka Wẽnnaam yʋʋrã sẽn yaa Zeova wã Biibl wʋsg b sẽn lebg pʋgẽ.

13. Bõe n kɩt tɩ y kɩs sɩd t’a Zeezi wilgda “tʋm-tʋmd sẽn tũud sɩd la sẽn tar yamã” sor rũndã-rũndã? (Zã 6:68)

¹³ Ne “tʋm-tʋmd sẽn tũud sɩd la sẽn yamã” maasem, a Zeezi lugla siglg sẽn yaa toor zall tẽngã zugu, sẽn na yɩl n teel tũudum hakɩɩkã. Yãmb tagsg yaa wãn ne siglg kãnga? Tõe tɩ yãmb me tagsda wa tẽn-tʋmd a Pɩyɛɛre. A ra yeela a Zeezi yaa: “Tõnd na n loogame n kẽng ãnda nengẽ? Yãmb gomda vɩɩm sẽn ka sɛt goama.” (Zã 6:68) D sã n da pa be a Zeova siglgã pʋgẽ, d vɩɩmã ra na n yɩɩ wãn to rũndã-rũndã? Ne a Zeova siglgã maasem, a Zeezi getame tɩ d paamd bũmb nins fãa sẽn tõe n sõng-d tɩ d kell n maan sɩd ne Wẽnnaamã. A sõngd-d lame tɩ d paamd minim koɛɛgã mooneg pʋgẽ. A songd-d lame me tɩ d yeelgd nin-paalgã, sẽn na yɩl n ket n tat a Zeova yam.—Efɛ. 4:24.

14. Koronaviriisã bã-longdgã sasa, wãn to la y sẽn paam n be a Zeova siglgã pʋgẽ wã naf yãmba?

¹⁴ A Zeezi wilgda tõnd sor yel-pakr sasa. Sagls nins d sẽn paam koronaviriisã bã-longdgã wakatã wilgda  rẽ vẽenega. Dũniyã pʋgẽ, neb wʋsg ra pa mi b sẽn maandg ye. La a Zeezi gesame tɩ d paam sagls la noy sẽn na n kogl-do. B sagl-d lame tɩ d ningd yõ-lima d sã n wa yi d zagsẽ, la d da pẽnegd nebã wʋsg ye. B tẽega kãsem-dãmbã tɩ b modg n paamd tigingã neb kibar wakat fãa, la b ges tɩ b paam bũmb nins sẽn yaa tɩlɛ b koglg la b tẽebã kengr yĩngã. (Eza. 32:1, 2) Siglgã taoor lʋɩtb sullã taasa tõnd koeese, tɩ d paam sagls la raood kengre.

15. Bã-longdgã sasa, sagl-bʋs la d paam tigissã la koe-moonegã wɛɛngẽ? La woma bi-bʋse?

¹⁵ Bã-longdgã sasa, d paama sagls tigissã maaneg la koɛɛgã mooneg wɛɛngẽ. Tao-tao bala, d sɩngame n maand tigissã la tigis-kãsemsã ne videokõnferãns maasem. Sẽn paase, koe-moonegã ra lebga ne lɛta la telefõn maasem. A Zeova ninga d modgrã barka. Filiyal-dãmb wʋsg pʋgẽ, b yãame tɩ koe-moondbã sõor paasa wʋsgo. Neb wʋsg paama kibay sẽn kengd raoodo.—Ges-y zĩ-gũbrã: “ A Zeova ningda d koe-moonegã barka.”

16. D tõe n basa d yam ne bõe?

¹⁶ Tõe tɩ neb kẽer ra tagsdame tɩ bã-longdgã sasa, siglgã ra maanda gũusg tɩ loog noore. La bilf-bilfã, b wa n bãngame tɩ saglsã ra zemsame. (Mat. 11:19) D sã n bʋgs a Zeezi sẽn wilgd-d sor ne nonglem to-to wã zugu, d basda d yam tɩ sẽn wa n yaa a soab fãa, a Zeova ne a Bi-ribl-nongrã na n kell n sõng-d lame.—Karm-y Ebre-rãmb 13:5, 6.

17. Y sẽn paam t’a Zeezi yaa y taoor soabã, y tagsg yaa wãn to?

¹⁷ D sẽn paam t’a Zeezi yaa d taoor soabã yaa bark meng-menga. D yaa buud toor-toor neba, n be tẽns toor-toor pʋsẽ, n gomd buud-goam toor-toore, n naag taab n be siglg a ye pʋgẽ tɩ welsg pa be d sʋk ye. D paamda sagls wʋsg sẽn tik Wẽnnaam Gomdã zugu, la d paamd minim me n tõe n moon koɛɛgã sõma. D ned kam fãa paamda sõngr n tõe n yeelg nin-paalgã, la d zãmsd d sẽn tõe n maan n kell n nong taaba. D sũur nooma wʋsgo, d sẽn paam t’a Zeezi yaa d taoor soabã.