1. D tagsg segd n yɩɩ wãna, d sẽn paam n tõe n pʋʋs a Zeova wã?

 SẼN naan-a saasã la tẽngã sakame tɩ d tõe n pʋʋsd-a. Woto yaa zu-zẽkr meng-menga. Tags-y n ges-y: D tõe n pelga d pʋg n pʋʋs a Zeova, sẽn yaa wakat ning fãa, la sẽn yaa ne buud-gomd ning fãa. D sã n wa ka laafɩ n be logto-yiri, wall d sã n wa be bãens roogẽ, d tõe n pʋʋsa d saasẽ Ba wã sẽn nong-dã, la d bas d yam t’a na n kelg-d lame. D sũur nooma wʋsgo, d sẽn paam n tõe n maan woto wã.

2. Bõe la rĩm a Davɩɩd maan-yã, tɩ wilgdẽ t’a sũur nooma ne a sẽn da paam n tõe n pʋʋs a Zeova wã?

² Rĩm a Davɩɩd sũur da nooma ne a sẽn paam n tõe n pʋʋs a Zeova wã. A yɩɩll a ye pʋgẽ, a yeela a Zeova yaa: “Bɩ mam pʋʋsgã zẽk wa wisd n ta y nengẽ.” (Yɩɩn. 141:1, 2) A Davɩɩd wakatẽ wã, maan-kʋʋdbã ra maagda b yĩng n maand wisdã, tũudum hakɩɩkã yĩnga. (Yik. 30:34, 35) A Davɩɩd sẽn gom wisdã yellã, wilgdame t’a ra rat n maaga a yĩng n tags a sẽn na n yeel a saasẽ Ba wã bũmb ning a pʋʋsg pʋgẽ. Tõnd me rata ne d sũur fãa, tɩ d pʋʋsgã ta a Zeova yam.

3. D sã n wa pʋʋsd a Zeova, d manesem segd n yɩɩ wãn to, la bõe yĩnga?

³ D sã n wa pʋʋsd a Zeova, segd n yɩɩ ne waoogr wʋsgo. Tags-y n ges-y a Zeova sẽn vẽneg a Ezayi, a Ezekɩyɛll a Dãniyɛll la a Zã tɩ b yã bũmb ninsã. Yaa sɩd tɩ ned fãa ne a sẽn yã bũmb ninga. La b fãa sẽn yã bũmb ningã wilgdame t’a Zeova yaa Rĩm sẽn ka to. A Ezayi yãa a Zeova sẽn “zao naam-geer sẽn zẽk wʋsg zugu.” (Eza. 6: 1-3) A Ezekɩyɛll yãa a Zeova sẽn zao saar sẽn yaa kãsenga, tɩ ‘vẽenem ning sẽn dag n gũmb yẽnda wã wõnd saag gom-tɩʋʋgo.’ (Eze. 1:26-28) A Dãniyɛll yãa ‘wakat fãa naabã,’ tɩ b fuugã ra yaa pɛɛlg faddd tɩ b geerã yaa wa bug-witim. (Dãn. 7:9, 10, Wẽnnaam Sebre 1983) La a Zã yãa a Zeova sẽn zao naam-geer zugu, tɩ saag gomtɩʋʋg gũbg geerã, t’a yalẽ wã wõnd emerood kugri. (Vẽn. 4:2-4) D sã n tags a Zeova ziirã sẽn ka to wã zugu, kɩtdame tɩ d bãng tɩ d sẽn paam n tõe n pʋʋs-a wã yaa zu-zẽkr meng-menga, la tɩ d segd n maana rẽ ne waoogr wʋsgo. La bõe yell la d tõe n gom d pʋʋsg pʋgẽ?

4. A Zeezi sẽn gom bũmb ning yell a pʋʋsgã sɩngrẽ wã sõngda tõnd tɩ d bãng bõe? (Matiye 6:9, 10)

⁴ Karm-y Matiye 6:9, 10. A Zeezi sẽn wa n sõsd ne a karen-biisã tãngã zugã, a wilg-b-la b sẽn tõe n pʋʋs to-to tɩ ta Wẽnnaam yam. A Zeezi sẽn yeel tɩ “ad yãmb sẽn tog n pʋʋs to-to” wã poore, a pʋʋsgã pʋgẽ, a reng n goma bũmb ning sẽn tar yõod n tɩ yɩɩdã yelle. Wala makre, a goma Wẽnnaam yʋʋrã sẽn segd n paam waoogrã yelle, a Rĩungã sẽn na n wa sãam Wẽnnaam bɛɛbã, la bõn-sõma nins a sẽn na n maan tẽngã zugu, la ãdem-biisã yĩnga. D sã n gomd bõn-kãensã yell d pʋʋsg pʋgẽ, d wilgdame tɩ Wẽnnaam raabã pidsg tara yõod wʋsg d nifẽ.

5. Zemsame tɩ d pʋʋs a Zeova n gom bũmb sẽn pak tõnd yell bɩ?

⁵ A Zeezi pʋʋsgã pʋgẽ, a sẽn gom bũmb ning sẽn tar yõod n tɩ yɩɩdã yell n sa wã poore, a wilga bũmb a taab d sẽn tõe n kos d pʋʋsg pʋgẽ. D tõe n kosa a Zeova t’a kõ tõnd d daarã rɩɩbo, t’a kõ-d d yel-wẽnã sugri, t’a sõng-d tɩ d da maan yel-wẽnd makr sasa, la t’a fãag-d wẽng soabã nugẽ. (Mat. 6:11-13) D sã n kos a Zeova bõn-kãensã, d wilgdame tɩ d teeg-a-la zãng-zãnga, la tɩ d rat n taa a yam.

6. D sã n wa pʋʋsdẽ, d segd n kosa bũmb nins a Zeezi sẽn togs a pʋʋsgã pʋgẽ wã bal bɩ? Wilg-y y leoorã võore.

⁶ A Zeezi pa rat t’a karen-biisã rɩk a pʋʋsgã goam ne zugu, n togsdẽ n yɩlemdẽ  ye. A pʋʋsg a taab pʋgẽ, a goma bũmb a taab sẽn da tar yõod ne-a yelle. (Mat. 26:39, 42; Zã 17:1-26) Tõnd me sã n pʋʋsd a Zeova, d tõe n goma bũmb sẽn pak-d yelle. D sã n wa rat n yãk yam n maan bũmbu, d tõe n pʋʋsame n kos yam. (Yɩɩn. 119:33, 34) B sã n wa kõ-d tʋʋmd sẽn pa nana, d tõe n pʋʋsa a Zeova n kos sõngre, sẽn na yɩl n tõog n tʋm tʋʋmdã sõma. (Yel. 2:6) Roagdbã tõe n pʋʋsa b kambã yĩnga, kambã me tõe n pʋʋsa b roagdbã yĩnga. La d fãa tõe n pʋʋsa d Biibl karen-biisã la neb nins d sẽn moond koɛɛgã yĩnga. D pʋd n segd n maana woto. D pʋʋsgã pa segd n yɩ kosg bal ye.

7. Bõe yĩng tɩ d segd n pẽgd a Zeova d pʋʋsg pʋgẽ?

⁷ D pʋʋsgã pʋgẽ, d segd n mi n tẽeg n pẽga a Zeova. Ned pa be n zems ne pẽgr n yɩɩd a Zeova ye. A yaa ‘sõmblem soaba, la a kõt sugri.’ A yaa nimbãan-zoɛta, la maan-neer soaba. Sẽn paase, ‘a yaa sũ-maasem soaba, a nonglmã yaa kãsenga, la a yaa sɩd soaba.’ (Yɩɩn. 86:5, 15) D tara bʋʋm sẽn seke, n na n pẽg a Zeova a sẽn yaa soab ningã yĩnga, la a sẽn maand bũmb ninsã yĩnga.

8. D tõe n pʋʋsa a Zeova bark bõe ne bõe yĩnga? (Yɩɩn-sõamyã 104:12-15, 24)

⁸ D sẽn segd n pẽgd a Zeova d pʋʋsgã pʋgẽ wã sẽn yãk a toogo, d segdame me n pʋʋs-a barka, bõn-sõma nins a sẽn kõt tõndã yĩnga. Wala makre, d tõe n pʋʋsa a Zeova bark a sẽn naan fɩlɛɛr-dãmbã tɩ b yaa kulɛɛr toor-toorã yĩnga, d sẽn paamd rɩ-nood buud toor-toorã, la d sẽn tar zo-rãmb hakɩɩk yĩnga. D saasẽ Ba wã sẽn nong-dã kõ-d-la bõn-kãensã fãa la bũmb a taab n paase, sẽn na yɩl tɩ d paam sũ-noogo. (Karm-y Yɩɩn-sõamyã 104:12-15, 24.) Sẽn tar yõod n tɩ yɩɩda, d tõe n pʋʋsa a Zeova barka, a sẽn kõt tõnd bũmb wʋsg d tẽebã kengr yĩngã, la a sẽn kɩt tɩ d saagdẽ tɩ manegr n watã yĩnga.

9. Bõe n tõe n sõng-d tɩ d tẽegd n pʋʋsd a Zeova barka? (1 Tesalonik rãmbã 5:17, 18)

⁹ D sã n pa gũusi, d tõe n yĩmame n pa pʋʋs a Zeova barka, bũmb nins fãa a sẽn maand n kõt-dã yĩng ye. Bõe n tõe n  sõng-y tɩ y ra yĩmi? Y tõe n baoo sebr n gʋls bũmb kẽer y sẽn pʋʋs a Zeova n kose, la y gũus n ges a sẽn leokd y pʋʋsgã to-to wã. Rẽ poore, bɩ y pʋʋs-a barka, a sẽn leok y pʋʋsgã yĩnga. (Karm-y 1 Tesalonik rãmb 5:17, 18.) Tags-y n ges-y: Ned sã n wilg t’a sũur nooma ne bũmb d sẽn maan n kõ-a, noom-d lame. Woto me, d sã n tẽegd n pʋʋsd a Zeova bark a sẽn leok-d pʋʋsg yĩnga, noom-a lame. (Kol. 3:15) La d segd n pʋʋsa a Zeova barka, bũmb a to sẽn tar yõod wʋsg yĩnga.

10. Wa 1 Pɩyɛɛr 2:21 sẽn wilgdã, bõe yĩng tɩ d segd n pʋʋs a Zeova barka, a sẽn tʋm a Zeezi tẽngã zugã yĩnga?

¹⁰ Karm-y 1 Pɩyɛɛr 2:21. D segd n pʋʋsa a Zeova barka, a sẽn tʋm a bi-nongrã tẽngã zugã. D sã n ges a Zeezi vɩɩmã sẽn yɩ to-to wã, d bãngda bũmb wʋsg a Zeova zugu, la d sẽn segd n maan bũmb nins t’a sũur yɩ noog ne-do. D sã n tẽ Kiristã kũumã sẽn yɩ maoongã, d tõe n paama zood sõma ne Wẽnnaam, la d paam me tɩ laafɩ zĩnd tõnd ne yẽ sʋka.—Rom. 5:1.

11. Bõe yĩng tɩ d segd n pʋʋs ne a Zeezi yʋʋrã maasem?

¹¹ D pʋʋsda a Zeova barka, d sẽn tõe n pʋʋs-a ne a Bi-riblã maasem yĩngã. A Zeova tũnugda ne a Zeezi n leokd d kosgã. Sã n yaa ne a Zeezi yʋʋr la d pʋʋs a Zeova, a kelgdame, la a na n sak n leoka d pʋʋsgã. A Zeezi yeelame yaa: “Bũmb ning fãa yãmb sẽn na n kos ne mam yʋʋre, mam na n maana bõn-kãnga, sẽn na yɩl tɩ Ba wã paam ziir Biigã maasem yĩnga.”—Zã 14:13, 14.

12. Bõe yĩng tɩ d segd n pʋʋs a Zeova barka, a sẽn tʋm a Biigã t’a wa ki tɩ yɩ maoongã yĩnga?

¹² A Zeova kõta tõnd d yel-wẽnã sugri, a Zeezi sẽn ki n dol d yel-wẽnã yĩnga. Biiblã goma a Zeezi yelle, n yeel t’a yaa d ‘maan-kʋʋdb kãsma,’ la t’a zĩi “Wẽnnaam sẽn yaa kãsengã geerã nug-rɩtg saasẽ.” (Ebre. 8:1) A Zeezi yaa d “sõangd sẽn be Ba wã nengẽ.” (1 Zã 2:1) D sũur nooma wʋsgo, a Zeova sẽn kõ tõnd maan-kʋʋdb kãsem sẽn wʋmd d pãn-komsmã võore, “la sẽn yõkd Wẽnnaam sɛɛg tõnd yĩngã.” (Rom. 8:34; Ebre. 4:15) D sẽn yaa ninsaalb sẽn pa zems zãngã yĩnga, d da pa tõe n paam n pʋʋs a Zeova, sã n da pa a Zeezi maoongã maasem yĩng ye. Hakɩɩka, d pa tõe n pʋʋs a Zeova bark n sa, kũun-kãseng ning a sẽn kõ-dã yĩnga, rat n yeel t’a sẽn sak t’a Bi-nongrã wa ki tõnd yĩngã.

13. Yʋng ning b sẽn yõk a Zeezi wã, wãn to la a wilg t’a nonga a karen-biisã?

¹³ Yʋng ning b sẽn yõk a Zeezi wã, a pʋʋsa a karen-biisã yĩng n kaoose, n kos a Ba wã t’a gũ-ba, “wẽng soabã yĩnga.” (Zã 17:15) Woto wilgdame t’a Zeezi ra nong-b-la hal wʋsgo. Baa ne a sẽn da mi tɩ pa na n kaoos la b nams-a wã, a ra tagsda a ten-tʋmdbã yelle.

14. Bõe la d tõe n maan tɩ wilg tɩ d nonga d tẽed-n-taasã?

¹⁴ Wa a Zeezi, pa d mengã yell bal n segd n pak tõnd ye. D segd n pʋʋsda d tẽed-n-taasã yĩng wakat fãa. D sã n maand woto, d wilgdame tɩ d sakda a Zeezi sẽn yeel tɩ d nong taabã, la d wilgda a Zeova tɩ d nonga d tẽed-n-taasã wʋsgo. (Zã 13:34) D sã n pʋʋsd d tẽed-n-taasã yĩnga, pa sẽk sãoong ye. Wẽnnaam Gomdã yetame tɩ “nin-tɩrg se-yõkr tara  pãng wʋsgo, n sɩd tõe n sõng neda.”—Zak 5:16.

15. Bõe yĩng tɩ d segd n pʋʋs d tẽed-n-taasã yĩnga?

¹⁵ D segd n pʋʋsa d tẽed-n-taasã yĩnga, bala b maooda ne zu-loees wʋsgo. D tõe n kosa a Zeova t’a sõng-b tɩ b tõog toog b sã n wa ka laafɩ, sabab-wẽns sasa, zabr sasa, b sã n wa namsd-b b tẽebã yĩnga, la zu-loees a taab sasa. D tõeeme me n pʋʋs d tẽed-n-taas nins sẽn tʋmd wʋsg n sõngd sẽn be b sõngr daab pʋgẽ wã yĩnga. Tõe tɩ y mii neb sẽn maood ne zu-loeese. Y tõe n pʋda b yʋyã y pʋʋsg pʋgẽ. Y sã n kos a Zeova t’a sõng d tẽed-n-taasã tɩ b tõog toogo, wilgdame tɩ y nong-b-la ne y sũur fãa.

16. Bõe yĩng tɩ d segd n pʋʋsd sẽn lʋɩt-b taoorã yĩnga?

¹⁶ Sẽn lʋɩt-b taoor tigingã pʋgẽ wã sã n paam tɩ d pʋʋsd b yĩnga, noom-b lame, la nafd-ba. Yɩɩ woto ne tẽn-tʋmd a Polle. Ad a sẽn yeele: “Pʋʋsd-y mam yĩng me tɩ m sã n wa na n gom fãa bɩ m paam goam sẽn zemse, n gom ne raood n kɩt tɩ nebã bãng koe-noogã yel-soalgdgã sẽn yaa sõngã.” (Efɛ. 6:19) Rũndã-rũndã me, saam-biis wʋsg n lʋɩt taoor n tʋmd wʋsgo. D sã n kot a Zeova t’a ning b modgrã barka, d wilgdame tɩ d nong-b lame.

17-18. Wakat bʋg la b tõe n kos tõnd tɩ d lʋɩ neb taoor n pʋʋse, la bõe la d pa segd n yĩmi?

¹⁷ Wakat ninga, b tõe n kos-d lame tɩ d lʋɩ neb taoor n pʋʋse. Wala makre, saam-bi-poak tõe n kosa saam-bi-poak a to sẽn yãag-a t’a na n tɩ zãms ned Biiblã t’a lʋɩ taoor n pʋʋse. Saam-bi-poakã sẽn pa mi Biibl karen-biigã sõma wã yĩnga, a tõe n datame n pʋʋs zãmsgã baasgẽ. Woto wã, a na n bãnga a sẽn na n yeel bũmb ning a pʋʋsgã pʋgẽ, tɩ zems ne karen-biigã yɛl sẽn yaa to-to.

¹⁸ Rĩungã roogẽ tigsg wall koe-moonegã yiib tigsg sasa, b tõe n kosa saam-biig t’a lʋɩ taoor n pʋʋse. Sã n wa yaa woto, saam-biigã pa segd n yĩm bũmb ning yĩng sẽn kɩt tɩ b tigim taabã ye. D pa segd n tũnug ne pʋʋsg n sagl tigingã nebã, wall n taas koees ye. Tigissã sasa, naoor wʋsgo,  yɩɩllã ne pʋʋsgã zemsa minit a nu bala. Woto wã, saam-biig ning sẽn na n pʋʋsã pa segd n ‘gom wʋsgo,’ sẽn yɩɩd fãa a pʋʋsgã sã n na n yɩɩ tigsgã sɩngrẽ.—Mat. 6:7.

19. Bõe n na n sõng-d t’a Zeova bʋ-kaoorã daar da wa ling-du?

¹⁹ D segd n maneg n wɩnga ne pʋʋsgo, bala a Zeova bʋ-kaoorã daar kolgame. Rẽ wɛɛngẽ, a Zeezi yeelame: “Woto yĩnga, bɩ y kell n gũ, la y yõkd Wẽnnaam sɛɛg wakat fãa sẽn na yɩl n tõog n põs bõn-kãensã fãa sẽn tog n wa wã.” (Luk 21:36) Sɩda, d sã n wɩngd ne pʋʋsgo, d tẽebã na n talla pãnga, la a Zeova daarã pa na n wa ling-d ye.

20. Bõe la d tõe n maan tɩ d pʋʋsgã yɩ wa wisd sẽn tar yũ-noogo?

²⁰ Bõe la d bãng sõs-kãngã pʋgẽ? D sũur nooma wʋsgo, d sẽn paam n tõe n pʋʋs a Zeova wã. D sã n wa pʋʋsdẽ, d segd n gomda a Zeova raabã pidsg yell n tɩ yɩɩda. D leb n tog n pʋʋsa a Zeova bark a Bi-riblã la a Rĩungã yĩnga, la d pʋʋsd d tẽed-n-taasã me yĩnga. D segdame me n pʋʋs n kos bũmb nins sẽn yaa tɩlɛ ne-dã, la bũmb nins sẽn na n sõng-d tɩ d tẽebã kell n tall pãngã. D sã n deng n tags bũmb ning yell d sẽn na n gom d pʋʋsg pʋgẽ wã neere, wilgdame tɩ d sũur nooma ne d sẽn paam n tõe n pʋʋs Wẽnnaamã. D pʋʋsgã gom-biis na n wõnda wisd sẽn tar yũ-noog a Zeova taoore, n ‘tat a yam.’—Yel. 15:8.