Neb wʋsg sẽn da kẽes b toog koɛɛgã mooneg pʋgẽ wã yĩnga, ra lebga tɩlɛ tɩ b paam sɛb wʋsg n paase. Saam-biis nins sẽn da be Burkilin Betɛllẽ wã ra yiisda sɛb kẽer b toore. La b ra yaooda neb a taab tɩ b yiisd seb-bɛdã n kõt-ba. Wakat n zĩnd tɩ neb nins sẽn da yiisd seb-bɛdã maan kiisi, n da pa le tõe n yiis sɛbã tɩ sek koe-moondbã ye. Rẽ n so tɩ saam-biig a Rutherford sok saam-biig a Robert Martin sẽn da yaa ẽnpirimeri wã taoor-soabã n gese b sã n pa tõe n yiisd seb-bɛdã b toore.

Saam-biig a Martin yeelame tɩ ra na n yɩɩ toeeng tɛkẽ. Bala b ra segd n paama b toorẽ doog la masĩn-bɛda. Saam-biisã tɩ luwaasa roog zĩig (18 Concord Street) sẽn be Burkilin, la b paam masĩn-dãmb nins sẽn yaa tɩlɛ tʋʋmdã yĩngã.

Neb kẽer sũy ra pa noom ne saam-biisã sẽn paam n na n sɩng seb-bɛdã yiisg b toorã ye. Neb nins sẽn da yiisd seb-bɛdã n kõt-bã taoor soabã wa n gesa saam-biisã sɛbã yiisg ro-pallã, n yeel yaa: “Yãmb tara tʋʋm-teed sẽn yaa sõma wʋsgo. La yãmb ned baa a ye pa mi a sẽn tõe n tʋm ne te-kãens to-to ye. M kɩsa sɩd tɩ ka ne kiis a yoob tɩ yãmb sãama y masĩn-dãmbã fãa.”

Saam-biig a Martin yeelame: “Ra wõnda a sẽn yeelã yaa sɩda. La d ra kɩsa sɩd t’a Zeova na n sõng-d lame. Sɩd me, a sõng-d lame.” Saam-biig a Martin ra bee bʋʋm. Bala pa yã n kaoos la saam-biisã yiisd sɛb bãmb tus a yiib daar fãa.

Sɛbã yiisg sẽn yãk a toogo, a Zeova nin-buiidã sɩngame n taasd nebã koe-noogã ne radio wã maasem. Yʋʋmd 1922, wao-fugdg rasem 26 daare, saam-biig a Rutherford n yɩ pipi n gom radio wã pʋgẽ. Ra yaa hat daar  zaabre. La yɩɩ radio a ye sẽn da be Losãnzelɛs sẽn be Kaliforni, Etazĩni wã la a wɛgs a sõsg ning gom-zug sẽn yaa: “Neb wʋsg sẽn vɩ rũndã-rũndã pa na n ki abada.”

B geelame n mik tɩ sẽn zems neb tus 25 n kelg sõsgã. Kẽer toola lɛta n wilg tɩ b sũur yɩɩ noog ne sõsgã. A Willard Ashford sẽn da be Sãnta Ana sẽn be Kaliforni wã naaga sẽn tool-b lɛtã wã. A pʋʋsa saam-biig a Rutherford barka, a sõsgã sẽn yɩ noog wʋsgã. A paasame yaa: “Neb a tãab n ka laafɩ tõnd zakã pʋgẽ. Dẽnd sõsgã sã n da yɩẽ zĩig a to, ra na n yɩɩ toog tɩ d tõog n wa kelge, baa sã n da wẽneg n yaa d zakã sɛɛga.”

Semen nins sẽn pʋglã, b ra ket n wɛgsda sõssã radio wã pʋgẽ. Yʋʋmd 1922 baasgẽ, b togsa Gũusg Gasgã pʋgẽ tɩ yaa “sẽn ta neb tus 300 la b taas koɛɛgã ne radio wã maasem.”

Nebã sẽn da wilgd tɩ b sũur nooma ne b sẽn paamd n kelgd sõssã radio wã pʋgẽ wã yĩnga, Biiblã Zãmsdbã yãka yam n na n pak b toorẽ radio zĩig sẽn be Ɛstetɛn Ayilãnd. Ra pa zãr ne Burkilin Betɛllã ye. Rẽ zugẽ, Biiblã Zãmsdbã wa n tũnugda ne bãmb mengã radio b sẽn boond tɩ WBBR, n na n taas Rĩungã koɛɛgã neb wʋsg sẽn be tẽns toɛy-toɛya.

Yʋʋmd 1922 sigr rasem 15 wã, b togsa Gũusg Gasgã pʋgẽ tɩ tigis-kãseng n na n zĩnd Sedaar Põent Owayo, bõn-bɩʋʋng rasem a 5 n tãag a rasem 13. Biiblã Zãmsdbã sẽn wa n kẽng tigis-kãsengã, b sũy yɩɩ noog wʋsgo.

Saam-biig a Rutherford pipi sõsgã sasa, a yeela kɛlgdbã yaa: “Mam kɩsa sɩd zãng-zãng tɩ Zu-soabã na n ninga tigis-kãsengã barka, la a ges tɩ d tõog n moon koɛɛgã n yɩɩd d sẽn zoe maanã.” Sõsdbã fãa kenga b tẽed-n-taasã raood n yɩlme, sẽn na yɩl tɩ b moon koɛɛgã.

Rẽ poore, bõn-bɩʋʋng rasem a 8 sẽn yɩ arzũm daarã, sẽn ta neb tus a 8 n kẽ tigis-kãsengã roogẽ, n gũud ne b sũy fãa n na n kelg saam-biig a Rutherford sõsgã. B ra saagdame t’a na n togs-b-la “ADV” wã sẽn da gʋls boollã seb-vãoogã zugã võore. Nebã sẽn wa n zĩ wã, b wʋsg yãa bũmb b sẽn pil wa pĩir tɩ be yĩngrã, sõsdã sẽn da yas zĩig ningã.  A Arthur Claus ra yii Tulsa sẽn be Oklahoma, Etazĩni wã n wa tigis-kãsengã. A sẽn ta wã, a tɩ zĩnda zĩig a sẽn tõe n wʋm sõsgã sõma. Bala wakat kãng tɩ bũmb kae b sẽn tõe n maan n yãng goamã tɩ nebã tõe n wʋm sõma ye.

Tigis-kãsengã taoor lʋɩtã taasa kɛlgdbã koɛɛga, n yeel tɩ saam-biig a Rutherford sã n wa sɩng a sõsgã, ned pa le tar sor n na n kẽ roogã pʋg ye. Woto ra yaa sẽn na yɩl tɩ ned ra wa tiis-a ye. Badaare, wakat a 9 sẽn wa n loog minit 30, saam-biig a Rutherford sɩnga a sõsgã. A karma a Zeezi goam nins sẽn be Matiye 4:17 wã. A Zeezi yeela be yaa: “Saasẽ Rĩungã kolgame.” Saam-biig a Rutherford goma nebã sẽn na n maan to-to n wʋm Rĩungã koɛɛgã yelle, n yeel yaa: “A Zeezi mengã wilgame t’a waoongã wakate, a na n baoo a nin-buiidã, n tigs b rãmb nins sẽn maand sɩd ne-a wã.

Saam-biig a Claus sẽn da zĩ taoorã tẽega sẽn yɩ to-to wã, n yeel yaa: “Tõnd da maaga d yĩng n kelgd sõsgã, n pa rat tɩ gomd baa a ye põsg-d ye.” La zĩig pʋgẽ, a yĩnsã yika zabre, tɩ yɩ tɩlɛ t’a yi roogã pʋgẽ. La a sũur da pa noom ye. Bala a ra miime t’a pa na n paam sor n le kẽ ye.

Minit a wãn poor bala, a yĩnsã sɩnga sãoogre. A sẽn wa n lebg n watẽ wã, a wʋma nebã sẽn wẽed nu-pogse. A baoome n na n bãng sẽn yaa bũmb ninga. A yeela a meng tɩ baa yaa roogã zugu, a na n dʋʋme n paam n kelg saam-biig a Rutherford sõsgã n baase. Saam-biig a Claus sẽn da tar yʋʋm 23 maana a sẽn tõe fãa n dʋ roogã zugu. Voy n da be yĩngrã, tɩ b ra pags n base. A yeelame t’a sẽn kolg zĩ-kãnga, a ra wʋmda sõsdã goamã sõma.

La ra pa a Arthur a ye n da be roogã zug ye. A zo-rãmb me n da zao be. A zoa a yembr yʋʋr sẽn boond t’a Frank Johnson kolg-a lame n sok yaa: “Fo tara sʋ-bil sẽn dɩt sõma bɩ?”

 A Arthur leokame yaa: “N-ye, m tarame.”

La a Frank yeel-a lame yaa: “Tõnd da pʋʋsdame n na n paam ned sẽn tar sʋ-bila. Fo nee bõn-kãnga b sẽn pil wa pĩirã? Yaa peend b sẽn gʋls a zugu, n sẽb ne wĩir n ka ne poẽnt-rãmba. Maag f yĩng n kelg Bʋ-kaoodã. * A sã n wa yeel tɩ: ‘Woto yĩnga, moon-y-yã, moon-y-yã,’ bɩ f wãag wĩy a naasã.”

A Arthur ra zãada sʋ-bilã, tɩ yẽ ne a zo-rãmbã gũud saam-biig a Rutherford sẽn na n wa yeel tɩ moon-y-yã, moon-y-yã, tɩ b wãag wĩyã tɩ peendã sigi. Pa yã n kaoos la saam-biig a Rutherford sɩng a sõsgã babg ning sẽn tar yõod n tɩ yɩɩdã wɛgsgo. Tõe t’a ra gomda ne sũ-noog la ne yẽesem wʋsgo. A wa n zẽka a koɛɛg n yeel yaa: “Yɩ-y kaset rãmb sẽn maand sɩd ne Zu-soabã. Kell-y n nang-y pãng zabrã pʋgẽ, hal n tãag b sẽn na n wa sãam Babilon-kãsengã fasɩ. Moon-y koɛɛgã zĩig zãnga. Dũniyã nebã segd n bãngame t’a Zeova n yaa Wẽnnaam, la t’a Zeezi Kirist yaa rĩm-dãmb Rĩma, la zu-soben-dãmb Zu-soaba. Rũndã yaa ra-kãsenga. Rĩmã rɩta naam masã! Yãmb yaa a koe-taasdba. Woto yĩnga, moon-y-yã, moon-y-yã, moon-y Rĩmã la a Rĩungã!”

A Arthur yeelame tɩ yẽ ne saam-biis a taabã wãaga wĩyã, tɩ peendã kell n yidg n sigi. Gʋls-biis nins sẽn yaa “ADV” wã võor ra bee peendã zug ne ãngilindi. Rat n yeelame tɩ: “Moon-y Rĩmã la a Rĩungã.”

Tigis-kãsengã sẽn zĩnd Sedaar Põentã sõnga Biiblã Zãmsdbã tɩ b na n kell n wɩng ne tʋʋmd ning sẽn tar yõod n tɩ yɩɩdã, sẽn yaa Rĩungã koɛɛgã moonegã. Neb nins sẽn da tar yam-sõngã sũy yɩɩ noog wʋsgo, n da rat ne b sũy fãa n moon koɛɛgã. Saam-biig a ye sẽn da yaa so-pakd wakat kãng n be Oklahoma, Etazĩni yeelame: “Tõnd sẽn da moond zĩig ningã neb wʋsg ra yaa sarbõn tuudba, n da yaa naong rãmba.” A wilgame tɩ naoor wʋsgo, nebã sã n da karem sebr ning b sẽn boond tɩ L’Âge d’Or, b raagda nintãm. A yeelame: “D sẽn da paamd n kengd b raoodã ra yaa bark meng-menga.”

Biiblã Zãmsdbã yãame t’a Zeezi goam nins sẽn be Luk 10:12 tara yõod wʋsgo. A Zeezi yeela be yaa: “Tigsgã yaa wʋsgo, la tʋm-tʋmdbã sõor paoodame.” Yʋʋmd 1922 baasgẽ, Biiblã Zãmsdbã yãka yam n na n moon Rĩungã koe-noogã sõma dũniyã zĩig fãa.