1. Sẽn na yɩl n paam sũ-noog hakɩɩka, bõe yĩng tɩ d segd n bao Wẽnnaam?

 SŨ-NOOG hakɩɩkã pa f sũur sẽn na n yaa noog wakat-wakat ye. Ned tõe n talla sũ-noog hakɩɩk a vɩɩmã tõre. Wãn to? A Zeezi sẽn wa n sõsd ne nebã tãngã zugã, a yeelame yaa: “Sũ-noog rãmb la neb nins sẽn mi tɩ b segd n baoa Wẽnnaamã.” (Mat. 5:3) A ra miime tɩ Wẽnnaam naana ninsaal t’a tʋll ne a sũur fãa n bãng a Naandã sẽn yaa Wẽnnaam a Zeova wã, la a tũ-a. Sẽn mik t’a Zeova yaa “sũ-noog soabã,” neb nins sẽn tũud-a wã me tõe n paama sũ-noogo.—1 Tɩm. 1:11.

2-3. a) Sã n yaa ne a Zeezi, ãnd dãmb me n tõe n paam sũ-noogo? b) Bõe yell la d na n gom sõs-kãngã pʋgẽ, la bõe yĩng tɩ rẽ tar yõod wʋsgo?

² Yaa d sã n pa tar zu-loees bal la d tõe n paam sũ-noog bɩ? Ayo. A Zeezi sẽn wa n sõsd ne nebã tãngã zugã, a yeela bũmb sẽn ling-ba. A wilgame tɩ “neb nins sẽn kẽnd ne sũ-sãamsã” tõe n paama sũ-noogo. Tõe tɩ yaa b sẽn maan yel-wẽnd tɩ b sũur-kasetã ningd-b taal yĩnga, wall b sẽn maood ne zu-loees yĩnga. A Zeezi yeelame me tɩ “neb nins b sẽn namsd tɩrlmã yĩngã,” bɩ neb nins b sẽn ‘paoogde,’ b sẽn yaa Kirist karen-biisã yĩngã tõe n paama sũ-noogo. (Mat. 5:4, 10, 11) La wãn to la ned tõe n paam sũ-noog hakɩɩka, baa ne yel-kãensã?

³ A Zeezi wilga tõnd tɩ sũ-noog hakɩɩkã pa f sẽn na n paam tɩ f yɛlã yaa sõma ye. Yaa f sẽn na n bao Wẽnnaam ne f sũur fãa, la f kell n tall zood sõma ne-a. (Zak 4:8) Wãn to la d tõe n maan rẽ? Sõs-kãngã pʋgẽ, d na n yãa bũmb a  tãab sẽn tõe n sõng-d tɩ d paam sũ-noog hakɩɩka.

4. Sẽn na yɩl n paam sũ-noog hakɩɩka, bõe la d segd n maan pipi? (Yɩɩn-sõamyã 1:1-3)

⁴ PIPI: Sẽn na yɩl n paam sũ-noog hakɩɩka, yaa tɩlɛ tɩ d karemd Biiblã la d zãmsd-a. A Zeezi maka Wẽnnaam Gomdã ne rɩɩbo. Yaa tɩlɛ tɩ ninsaalbã ne rũmsã fãa paamd rɩɩb n dɩtẽ, sẽn na yɩl vɩɩmde. La yaa ninsaalbã bal n tõe n karem Wẽnnaam Gomdã. Yaa tɩlɛ tɩ d sɩd maan woto. Rẽ n so t’a Zeezi yeel yaa: “Ninsaal pa tog n vɩ ne rɩɩb bal ye. A tog n vɩɩ ne gomd ning fãa sẽn yit a Zeova noorẽ wã me.” (Mat. 4:4) Dẽnd d pa segd n bas daar tõr n pa karem Wẽnnaam Gomdã sẽn yaa Biiblã ye. Yɩɩn-gʋlsdã yeelame yaa: ‘Bark bee ne ned ning sẽn nong Sẽn-Ka-Saab tõogã, n tagsd a yell wĩndg la yʋngo.’—Karm-y Yɩɩn-sõamyã 1:1-3.

5-6. a) Bõe la d tõe n bãng Biiblã pʋgẽ? b) Wãn to la Biiblã kareng tõe n sõng-do?

⁵ A Zeova sẽn nong-dã yĩnga, a wilga Biiblã pʋgẽ d sẽn tõe n maan n paam sũ-noogo. D bãnga a sẽn dat tɩ d vɩɩmã yɩ to-to wã. D bãnga d sẽn tõe n maan tɩ tõnd ne yẽ zoodã pãng paase, la d sẽn tõe n maan n paam d yel-wẽnã sugri. D bãnga a sẽn pʋlem bũmb ning beoog-daare, tɩ na n yɩ bark meng-mengã. (Zer. 29:11) D sẽn zãms Biiblã n bãng woto fãa wã noom-d-la wʋsgo!

⁶ Biiblã pida ne sagls sẽn tõe n sõng tõnd d daar fãa vɩɩmã pʋgẽ. D sã n tũud sagl-kãense, d tõe n paama sũ-noogo. Baa y sũur sã n wa sãam wʋsg zu-loeesã  yĩnga, bɩ y maneg n wɩng ne a Zeova Gomdã karengo, la y bʋgsd-a zugu. A Zeezi yeelame: “Sũ-noog rãmb la neb nins sẽn wʋmd Wẽnnaam goamã la b tũudẽ wã!”—Luk 11:28.

7. Bõe la y tõe n maan tɩ Wẽnnaam Gomdã kareng naf-y sõma?

⁷ Y sã n wa karemd Wẽnnaam Gomdã, bɩ y maag y yĩng n bʋgs y sẽn karmã zugu. Sẽn na yɩl n wʋm rẽ võore, bɩ d rɩk makre. Ned n segl rɩɩb y sẽn nong wʋsg n wa kõ-yã. La sẽn mik tɩ y yãgdame wall y tagsda bũmb a taab yellã yĩnga, y vela rɩɩbã tʋʋll-tʋʋll n pa bãng a noosmã ye. Y sẽn dɩ n sa wã, y bãngame tɩ y rɩɩ tʋʋll-tʋʋll n maand y bãngẽ, y sẽn pa maag y yĩng n dɩ n bãng a noosmã. Tõe n yɩɩ woto me ne Biiblã karengo. Wakat ninga, y tõe n karma Biiblã yãg-yãge, n pa wʋm a goamã võor sõma ye. Rẽ wã, maagd-y y yĩng n karemd Wẽnnaam Gomdã la y bʋgsd a zugu. Mamsd-y yɛlã sẽn yɩ to-to wã, n wʋmd nebã koeesã, la y tagsd y sẽn karmã zug neere. Woto fãa na n kɩtame tɩ y sũ-noogã paase.

8. Wãn to la “tʋm-tʋmd sẽn tũud sɩd la sẽn tar yamã” tʋmd tʋʋmd ning b sẽn bobl-a wã? (Ges-y notã me.)

⁸ A Zeezi yãka “tʋm-tʋmd sẽn tũud sɩd la sẽn tar yamã” t’a sõngd tõnd wakat sẽn zemse, sẽn na yɩl tɩ d tẽebã ket n tar pangã. * La a sɩd sõngda tõnd hal sõma. (Mat. 24:45) Bũmb nins fãa tʋm-tʋmd sẽn tũud sɩdã sẽn yiisd d tẽebã kengr yĩngã tika Gʋls-sõamyã zugu. (1 Tes. 2:13) Rẽ fãa sõngda tõnd tɩ d bãngd a Zeova tagsa wã sẽn be Biiblã pʋgẽ wã. Rẽ n so tɩ d karemd Gũusg Gasgã la Reveillez vous! wã, la sõss nins sẽn be jw.org pʋgẽ wã. D segenda tigissã d sẽn paamd semen fãa wã. La kiuug fãa b sã n yiis JW Teledifiziyõ^® wã, d getame. D sã n karemd Biiblã la d zãmsd-a, na n sõng-d lame tɩ d tõog n maan bũmb a yiib-n-soabã sẽn tõe n kɩt tɩ d paam sũ-noog hakɩɩkã.

9. Bũmb a yiib-n-soab sẽn tõe n sõng-d tɩ d paam sũ-noog hakɩɩkã la bʋgo?

⁹ YIIBU: Sẽn na yɩl n paam sũ-noog hakɩɩka, d segd n sakda a Zeova noyã. Yɩɩn-gʋlsdã yeelame: “Sẽn zoet-b Sẽn-Ka-Saab la b kẽnd bãmb soayã zutã tara sũ-noogo.” (Yɩɩn. 128:1) Zoe a Zeova rat n yeelame tɩ d waoogd-a ne d sũur fãa, n da tol n maan bũmb n sãam a sũur ye. (Yel. 16:6) Rẽ n so tɩ d maand d sẽn tõe fãa n ket n tũud noy nins Wẽnnaam sẽn gãneg Biiblã pʋgẽ, sẽn yaa sõma la sẽn yaa wẽngã wɛɛngẽ wã. (2 Kor. 7:1) D sã n maand a Zeova sẽn nongã, la d zãagd d mens ne a sẽn kisã, d paamda sũ-noogo.—Yɩɩn. 37:27; 97:10; Rom. 12:9.

10. Sẽn zems ne Rom dãmb 12:2, bõe la d segd n yãk yam n maane?

¹⁰ Karm-y Rom dãmb 12:2. Ned tõe n miime tɩ yaa a Zeova n tar sor n na n wilg sẽn yaa sõma la sẽn yaa wẽnga, la a segdame me n yãk yam n sak Wẽnnaam noyã. Wala makre, ned tõe n miime tɩ goosneema wã n tar sor n na n yiis noy so-bɛdã zut kẽn wɛɛngẽ. La a tõeeme n pa rat n sak n tũ no-kãens ye. A tõe n kẽnda wa a sẽn date. D wilgda ne d manesmã t’a Zeova noyã tũub n yaa sõma n yɩɩda. (Yel. 12:28) A Davɩɩd me ra tagsda woto. Rẽ n so t’a yeel a Zeova yaa: “Yãmb na n kɩtame tɩ m bãng vɩɩm sore. Sũ-noog wʋsg bee yãmb nengẽ. Naar meng-meng  bee yãmb dɩtg wakat sẽn ka sɛta.”—Yɩɩn. 16:11.

11-12. a) D sũur sã n wa sãam wʋsg wall d sã n wa maand yɩɩre, d segd n gũusa ne bõe? b) Wãn to la Filip rãmb 4:8 wã tõe n sõng-do, d sã n wa rat n maan bũmb n deem bɩ n kok pemsem?

¹¹ D sũur sã n wa sãam wʋsg wall d sã n wa maand yɩɩre, d tõe n dat n maana bũmb sẽn na n kɩt tɩ d pa le tagsd d zu-loeesã yell ye. Woto pa wẽng ye. La d segd n gũusame n da wa maan bũmb a Zeova sẽn kis ye.—Efɛ. 5:10-12, 15-17.

¹² Lɛtr ning tẽn-tʋmd a Poll sẽn taas Filip kiris-nebã pʋgẽ, a yeel-b lame tɩ b ket n tagsd “bũmb nins fãa sẽn yaa tɩrse, . . . yɩlma, . . . sẽn tog ne nonglem, . . . sẽn yaa sõma” yelle. (Karm-y Filip rãmb 4:8.) Yaa sɩd t’a Poll ra pa gomd bũmb nins d sẽn maand n kokd pemsmã yell takɩ ye. La a sẽn yeel bũmb ninsã tõe n sõng-d lame, d sã n wa rat n maan bũmb n deem bɩ n kok pemsem. Ad bũmb y sẽn tõe n maane: Vɛrse wã zĩig ning fãa b sẽn gʋls tɩ “bũmb,” bɩ y yãk gom-bi-kãng n ledg ne gom-biis a taab wala “yɩɩlle,” “filim,” “feyetõ,” bɩ “ze-video.” D sã n maand woto, tõe n sõng-d lame tɩ d bãng bũmb nins sẽn yaa sõma la sẽn pa sõma Wẽnnaam nifẽ wã. D ratame tɩ d sẽn vɩ to-to wã zems ne a Zeova noyã sẽn ka to wã. (Yɩɩn. 119:1-3) Woto na n sõng-d lame tɩ d sũur-kasetã kell n yɩ yɩlemde, la sõng-d me tɩ d tõog n maan bũmb a tãab-n-soabã sẽn tõe n kɩt tɩ d paam sũ-noog hakɩɩkã.—Tʋʋ. 23:1.

13. Bũmb a tãab-n-soabã sẽn tõe n sõng-d tɩ d paam sũ-noog hakɩɩkã yaa bõe? (Zã 4:23, 24)

¹³ TÃABO: Modg-y tɩ yaa a Zeova tũubã la y lʋɩɩsd taoore. A Zeova sẽn yaa d Naandã yĩnga, zemsame tɩ d tũ-a. (Vẽn. 4:11; 14:6, 7) Dẽnd d segd n modgame tɩ d sẽn tũud-a to-to wã yɩ wa a sẽn datã, rat n yeel tɩ n tũ-a “ne sɩɩga, la ne sɩda.” (Karm-y Zã 4:23, 24.) D ratame tɩ Wẽnnaam vʋʋsem sõngã sõng-d tɩ d bãng n tũ Wẽnnaam tɩ zems ne Biiblã sẽn yetã. Baa b sã n gɩdga d tũudmã wall d tʋʋm kẽer tẽng ning d sẽn beẽ wã, d segd n kell n lʋɩɩsa tũudmã yɛl taoore. Masã menga, d tẽed-n-taas koabg la zak n be bãens roogo, b sẽn yaa a Zeova Kaset rãmbã yĩnga. * Baa ne rẽ, b maanda b sẽn tõe fãa n ket n pʋʋsdẽ, n zãmsd Biiblã la b sõngd neb a taabã tɩ b bãngd Wẽnnaam la a Rĩungã! B sã n wa sãbsd tõnd wall n namsd tõnd d tẽebã yĩnga, d tõe n kell n maana sũ-noogo, n miẽ t’a Zeova bee ne-do, la t’a na n keo-d lame.—Zak 1:12; 1 Pɩy. 4:14.

14. Bõe n paam saam-biig sẽn yaa bi-bɩɩg sẽn yit Tajikistan, la bõe yĩnga?

¹⁴ D tẽed-n-taas kẽer maooda ne zu-loe-kɛgemse. La b sẽn tũud bũmb a tãab nins yell d sẽn gomã, b tara sũ-noog hakɩɩka. Bɩ d gom bũmb ning sẽn paam a Jovidon Bobojonov yelle, a sẽn zãgs t’a pa na n kẽ sodaarã yĩnga. A yita Tajikistan n tar yʋʋm 19. Yʋʋmd 2019 zĩ-likr rasem a 4 daare, b wa n wõd-a lame n yiis a zakẽ wã n tɩ pag-a bãens roog kiisi, la b nams-a wa ned sẽn maan bũmb sẽn yaa wẽng wʋsgo. Tẽns wʋsg pʋsẽ, kiba-kɩtbã goma b sẽn nams saam-biigã woto wã yelle. B yeelame tɩ b pãb-a lame, n dat n modg-a t’a wẽen t’a na n kẽe sodaarã n zab n sõng a tẽngã, la a reeg sodaarã fuug n yeelge. Rẽ poore, b kao-a-la bʋʋd n ning-a  taale, n tall-a n kẽng zĩig nebã sẽn tʋmd tʋʋm-wɛgla. La tẽngã naab wa n baas n basa a yellã taale, la a yeel tɩ b bas-a t’a looge. Baa ne nams-toaagã, a Jovidon kell n maana sɩd ne a Zeova, la a kell n tall sũ-noogo. Bõe n sõng-a? Yaa a sẽn da ningd a yamẽ wakat fãa t’a segd n baoo Wẽnnaamã.

15. A Jovidon sẽn wa n be bãens roogẽ wã, a maana wãn n paam n bãng a Zeova n paase?

¹⁵ A Jovidon sẽn wa n be bãens roogẽ wã, a ra ket n baood n bãngda a Zeova n paasdẽ, baa ne a sẽn da pa tar Biibl wall siglgã sebr baa a ye wã. Wãn to la a tõog n maan rẽ? Saam-biisã ra ningda rɩɩb korg pʋgẽ, la b gʋls daarã vɛrse wã korgã zug n tall n tɩ kõ-a. Woto, a ra paamd n karemda Biiblã daar fãa la a bʋgsd a zugu. A sẽn yi bãens roogẽ wã, a sagla neb nins sẽn nan pa paam nams-toaagã, n yeel yaa: “Yaa tɩlɛ tɩ y maan y sẽn tõe fãa n tũnug ne lohorem ning y sẽn tarã n karemd Wẽnnaam Gomdã la siglgã sɛbã, n bãng a Zeova sõma n paase.”

16. A Jovidon ra tagsda bõe yell n tɩ yɩɩda?

¹⁶ D saam-biigã saka a Zeova noyã. A ra pa basd tɩ tags-wẽns soog-a, a ra pa tʋmd tʋʋm-yood me ye. Yaa a Zeova la a raabã yell n da pak-a n tɩ yɩɩda. A Jovidon ra tagsda bũmb nins a Zeova sẽn naanã  yelle, tɩ ra noom-a. Yibeoog fãa a sã n da neke, a wʋmda liuuli wã yãbre. Yʋng sã n ta, a maagda a yĩng n get kiuugã la ãdsã. Ad a sẽn yeele: “Kũun a woto sẽn yit a Zeova nengẽ wã ra kõt-m-la sũ-noogo, la kengd m raoodo.” D sã n tagsd bũmb nins a Zeova sẽn naanã yelle, la a sẽn tũnugd ne Biiblã n zãmsd tõndã, kõt-d-la sũ-noogo. Sũ-no-kãng tõe n sõng-d lame tɩ d tõog toogo.

17. Ned sã n wa maood ne a Jovidon zu-loɛɛgã buudu, wãn to 1 Pɩyɛɛr 1:6, 7 sẽn yetã tõe n sõng-a?

¹⁷ A Jovidon ra lʋɩɩsda a Zeova tũubã taoore. A ra miime tɩ tara yõod t’a kell n maan sɩd ne Wẽnnaam. A Zeezi yeelame: “Yaa fo Wẽnnaam a Zeova bal la f segd n waooge, la yaa bãmb b ye bal la f segd n sak ne f sũur fãa.” (Luk 4:8) Sodaasã ne b taoor dãmbã ra ratame t’a Jovidon bas a Zeova tũubu. La daar fãa la yʋng fãa, a Jovidon ra pʋʋsda a Zeova ne a sũur fãa n kotẽ t’a sõng-a t’a kell n maan sɩd ne-a, n da koms raood n bas ye. Baa ne b sẽn maan a Jovidon kɛgrã, a kell n maana sɩd ne a Zeova. Kɩtame t’a paam bũmb a sẽn da pa tare, nand tɩ b yõk-a, n pãb-a la b kẽes-a bãens roogã. Yaa bõe? Yaa a tẽebã sẽn paam makrã. Masã, a tẽebã tara pãng tɩ noom-a wʋsgo.—Karm-y 1 Pɩyɛɛr 1:6, 7.

18. Bõe la d tõe n maan n kell n tall d sũ-noogã?

¹⁸ A Zeova mii bũmb ning sẽn tõe n sõng-d tɩ d paam sũ-noog hakɩɩka. Y sã n tũud bũmb a tãabã sẽn kõt sũ-noog hakɩɩkã, y na n tõog n kell n talla sũ-noogo, baa zu-loe-kɛgems sasa. Y sã n maan woto, yãmb me na n tõog n yeelame yaa: “Bark bee neb nins sẽn paam tɩ Sẽn-Ka-Saab yaa b Wẽnnaamã zutu!”—Yɩɩn. 144:15.