1. Neb wʋsg manesem yaa wãn ne Biiblã saglsã? (Yel-bũnã 1:20, 21)

 TẼNS wʋsg pʋsẽ, d nong n yãta Rĩungã koe-moondb sẽn moond koɛɛgã zãma zĩisẽ, n kõt nebã sɛb ne sũ-noogo. Tõe tɩ yãmb zoe n maana a buudu. Sã n yaa woto, tõe tɩ y tẽega Yel-bũn sebrã sẽn gomd yamã yellã. B yeelame tɩ yamã bee kʋʋng sʋk n zẽkd a koɛɛg n kelemdẽ, n dat tɩ nebã wʋme. (Karm-y Yel-bũn 1:20, 21.) “Yam hakɩɩkã” sẽn yaa yam ning a Zeova sẽn kõtã bee Biiblã la d siglgã sɛbã pʋsẽ. Yaa yam-kãng la nebã segd n paam n wa tõog n vɩɩmd wakat sẽn ka sɛtã. Ned sã n sak n deeg d sebre, d sũur nooma wʋsgo. La pa nebã fãa n sakd n deegd d sɛbã ye. Kẽer pa rat n bãng Biiblã sẽn yet bũmb ningã ye. Sãnda laad-d lame. B tagsdame tɩ Biiblã pa le tar yõod rũndã-rũndã ye. Neb kẽer paoogda Biiblã sẽn yet bũmb ning sẽn yaa sõma la sẽn yaa wẽngã wɛɛngẽ wã, n yetẽ tɩ sẽn tũud-b rẽ wã yaa dem-dem wʋsgo. La a Zeova sẽn nong nebã, a ket n sõngd-b lame tɩ b tõe n paam yam hakɩɩkã. Wãn to la a maand rẽ?

2. Yɛ la d tõe n paam yam hakɩɩkã rũndã-rũndã, la bõe la neb wʋsg yãk yam n na n maane?

² Bũmb a ye a Zeova sẽn tũnugd ne n sõngd nebã tɩ b paamd yam hakɩɩkã yaa ne Biiblã sẽn yaa a Gomdã. Nebã fãa la bal tõe n paama Biiblã. La yaa wãn to yẽ ne sɛbã d sẽn yiisdã? Ne a Zeova sõngre, d yiisda sɛbã sẽn yɩɩd buud-goam tusr pʋgẽ. Neb nins sẽn sakd a Zeova sõngrã, rat n yeel tɩ sẽn karemd-b Biiblã la b tũud a sẽn yetã na n paama nafa. La neb wʋsg yãka yam n pa  kelgd a Zeova ye. B sã n wa rat n yãk yam n maan bũmbu, b nong n teegda b mengã yam wall b kelgd b taabã saglse. B tõeeme meng n yaal-do, d sẽn yãk yam n tũud Biiblã saglsã yĩnga. Sõs-kangã pʋgẽ, d na n yãa bũmb ning sẽn kɩt tɩ nebã tar manesem a woto wã. Bɩ d reng n ges d sẽn tõe n maan n paam yam ning sẽn yit a Zeova nengẽ wã.

3. Bõe la d tõe n maan n paam yam hakɩɩka?

³ Ned sẽn tar yam tũnugda ne bãngr ning a sẽn tarã n tʋmd tʋʋm-sõma. La yam hakɩɩkã baoodame tɩ d maan sẽn yɩɩd rẽ. Biiblã yetame: “A Zeova zoees n yaa yam sɩngre. F sã n bãng Sẽn yaa-a sõng n yɩɩdã, rẽ n yaa bãngre.” (Yel. 9:10, MN) D sã n wa segd n yãk yam n maan bũmb sẽn tar yõod wʋsgo, d segd n bao n bãnga a Zeova tagsgo. D maanda woto, d sã n bao n bãng Biiblã la d sɛbã sẽn yet bũmb ning d yam-yakrã wɛɛngẽ wã. D sã n maan woto, wilgdame tɩ d tara yam hakɩɩka.—Yel. 2:5-7.

4. Bõe yĩng tɩ yaa a Zeova a ye bal n tõe n kõ-d yam?

⁴ Yaa a Zeova a ye bal n tõe n kõ-d yam hakɩɩka. (Rom. 16:27) Bõe yĩng tɩ d tõe n yeel tɩ yam hakɩɩkã yita a Zeova nengẽ? Pipi, a sẽn yaa bũmb fãa Naandã, a mii a bõn-naandsã fãa sõma. (Yɩɩn. 104:24) Yiibu, bũmb nins fãa a Zeova sẽn naanã wilgda a yamã. (Rom. 11:33) Tãabo, a Zeova saglsã nafda neb nins sẽn tũud-bã wakat fãa. (Yel. 2:10-12) D sã n dat n paam yam hakɩɩka, d segd n saka bõn-kãensã a tãabã la d tũ rẽ, d sã n wa rat n yãk yam n maan bũmbu.

5. Ned sã n pa sak n deeg tɩ yam hakɩɩkã yita a Zeova nengẽ, wata ne bõe?

⁵ Neb wʋsg sak n deegame tɩ bũmb nins sẽn be saasẽ la tẽngã zugã yaa neer wʋsgo. La baa ne rẽ, b yetame tɩ Naand kae, la tɩ bũmb fãa wa n bee woto bala. Neb kẽer me yetame tɩ b tẽeda Wẽnnaam, la b getame tɩ Biiblã pa le tar yõodo, n yãk yam n maand b sẽn date. Woto fãa waa ne bõe? Nebã sẽn bas yam ning sẽn yit Wẽnnaam nengẽ wã, n teeg b meng yamã kɩtame tɩ b vɩɩmã yaa sõma bɩ? Rẽ yĩnga, b tara sũ-noog hakɩɩk la b saagdẽ tɩ beoog na n yɩɩ neer bɩ? Bũmb nins d sẽn ne wã kɩtame tɩ d sak n deeg tɩ Biiblã sẽn yetã yaa sɩda. Ad a sẽn yete: “Ninsaal yam ne a bãngre, la a saglg yaa zaalem Sẽn-Ka-Saab taoore.” (Yel. 21:30) Rẽ n so tɩ d segd n ket n kot a Zeova t’a kõ-d yam hakɩɩka. La bʋko, neb wʋsg pa maand woto ye. Bõe yĩnga?

6. Wa Yel-bũn 1:22-25 sẽn wilgdã, ãnd dãmb n pa rat n sak yam ning sẽn yit a Zeova nengẽ wã?

⁶ Yam hakɩɩkã sã n wa be “soay zut n kelemdẽ,” neb wʋsg pa kelgd ye. Biiblã yetame tɩ neb sull a tã n pa tol n dat n sak yam hakɩɩkã ye. Yaa “zɩtba,” “nin-paoogdbã,” la “yalembã.” (Karm-y Yel-bũn 1:22-25.) Bɩ d maag d yĩng n ges bũmb ning sẽn kɩt tɩ nin-kãensã pa tol n dat n sak yam ning sẽn yit Wẽnnaam nengẽ wã, la bũmb ning sẽn tõe n sõng-d tɩ d ra wa maan wa bãmbã.

7. Bõe yĩng tɩ neb kẽer yãk yam n na n pa b “zɩɩlmã pʋgẽ”?

⁷ “Zɩtba” yaa neb nins sẽn tẽed bũmb nins fãa b sẽn wʋme, la neb b sẽn tõe n belg nana-nana. (Yel. 14:15) D mi n  sega nin-kãensã buud koɛɛgã mooneg sasa. Wala makre, tũudmã taoor dãmb la politikã taoor dãmb belgda neb milyõ-rãmba. Neb kẽer sũy sãamame, b sẽn wa n bãng tɩ nin-kãensã belg-b lame wã. La neb nins yell b sẽn gomd Yel-bũn 1:22 pʋgẽ wã yãka yam n na n pa zɩɩlmã pʋgẽ, rẽ sẽn noom-bã yĩnga. (Zer. 5:31) B maanda b sẽn date, n pa baood n bãng Biiblã sẽn yet bũmb ningã, la b tũ a noyã ye. Neb wʋsg manesem yaa wa pag a ye sẽn yet t’a yaa wẽn-tũud n be Kebɛk sẽn be Kanada wã. Daar a ye, a Zeova Kaset soab n wa n kaag-a t’a yeel-a yaa: “Tõnd prɛtrã sã n belg tõndo, taalã bee yẽ zugu, la pa tõnd zug ye!” Yaa vẽeneg tɩ d pa rat n dɩk neb nins sẽn yãk yam n na n pa zɩɩlem pʋgẽ wã togs-n-taar ye!—Yel. 1:32; 27:12.

8. Bõe n tõe n sõng-d tɩ d paam yam hakɩɩka?

⁸ Be bʋʋm la Biiblã sẽn yet tɩ d ra pa zɩɩlem pʋgẽ, la tɩ d yɩ neb sẽn bɩ sõma yam vẽenemã wɛɛngẽ wã. (1 Kor. 14:20) Yaa d sã n tũud Biiblã saglsã d vɩɩmã pʋgẽ la d paamd yam hakɩɩka. Bilf-bilfã, d wat n bãnga sagl-kãensã sẽn tõe n sõng-d tɩ d gil zu-loees to-to, la d yãk yam n tʋmd tʋʋm-sõma. Yɩta sõma tɩ d mi n tags d sẽn yãk yam n maand bũmb ninsã yelle. D sã n zãmsda Biiblã ne a Zeova Kaset rãmbã la d kẽnd tigissã, d segd n soka d meng n gese bõe yĩng tɩ d nan pa rɩk d meng n kõ kõ a Zeova n deeg lisgu. D sã n zoe n deega lisg me, rẽ yĩnga d modgdame tɩ d minimã paasd koe-moonegã la nebã zãmsgã wɛɛngẽ bɩ? D sẽn yãkd yam n maand bũmb ninsã wilgdame tɩ d tũuda Biiblã noyã bɩ? D manesmã sẽn yaa to-to ne nebã yaa wa a Zeezi me manesem sẽn da yaa to-to ne-bã bɩ? Sã n mikame tɩ bũmb kẽer la d segd n manege, bɩ d tags a Zeova sẽn yet bũmb ninsã zugu, bala yẽ n ‘kõt ka-yam soab yam.’—Yɩɩn. 19:8.

9. Bõe la “nin-yaandbã” maand tɩ wilgdẽ tɩ b pa rat yam ning sẽn yit a Zeova nengẽ wã?

⁹ Neb sull a yiib-n-soabã sẽn zãgs yam ning sẽn yit Wẽnnaam nengẽ wã yaa “nin-paoogdbã.” Wakat ninga, d segda nin-kãensã buud koɛɛgã mooneg sasa. B nong n yaanda b taabã. (Yɩɩn. 123:4) Biiblã ra pĩnd n togsame tɩ yaoolem wakatã, nin-yaandbã na n yɩɩ wʋsgo. (2 Pɩy. 3:3, 4) Wala a Lot reem-dãmbã, rũndã-rũndã, neb kẽer pa kelgd Wẽnnaam keoogrã ye. (Sɩng. 19:14) Neb wʋsg yaanda sẽn tuud-b Biiblã saglsã. Nin-yaandbã sẽn maand woto wã yaa b sẽn “sakd b mensã tʋls-wẽnsã” yĩnga. (Ziid 7, 17, 18) Biiblã sẽn bilg nin-yaandbã sẽn yaa to-to wã zemsa ne sɩdã-kɩɩsdbã manesmã, la neb a taab sẽn pa sakd a Zeova wã me manesem.

10. Wa Yɩɩn-sõamyã 1:1 sẽn wilgdã, bõe la d tõe n maan n da wa lebg nin-paoogdba?

¹⁰ Bõe la d segd n maane, n da wa lebg nin-yaandba? Bũmb a ye d sẽn tõe n maane, yaa d sẽn pa na n tall tũud-n-taar ne nin-paoogdbã ye. (Karm-y Yɩɩn-sõamyã 1:1.) Woto rat n yeelame tɩ d pa na n karemd bũmb nins sɩdã-kɩɩsdbã sẽn yiisdã, wall d kelgd rẽ ye. D sã n pa maan gũusgu, d tõe n wa sɩnga yẽgengo, n maand sãmbs ne a Zeova la a saglsã a sẽn tũnugd ne a siglgã n kõt-dã. Dẽnd d segd n soka d meng yaa: ‘Siglgã sã n wa kõ noor wall n toeem bũmb võore, m nong n yẽgemdame bɩ? M nong n yẽgemdeda ne neb nins sẽn lʋɩt taoorã bɩ?’ D sã n nong n maanda woto, la d yãk yam n na n  base, a Zeova sũur na n yɩɩ noog ne-do.—Yel. 3:34, 35.

11. “Yalembã” tagsg yaa wãn to ne a Zeova no-tɩrsã?

¹¹ Neb sull a tãab-n-soabã sẽn zãgs yam ning sẽn yit Wẽnnaam nengẽ wa yaa “yalembã.” Bala b yãka yam n pa na n tũ Wẽnnaam no-tɩrsã ye. B maanda sẽn yaa tɩrg b mens nifẽ. (Yel. 12:15) B zãgsa a Zeova sẽn yaa soab ning sẽn kõt yam hakɩɩkã. (Yɩɩn. 53:1) D sã n wa seg nin-kãensã koɛɛgã mooneg sasa, b sabsda tõnd d sẽn tũud Biiblã noyã yĩnga. Yam ning b sẽn tarã yaool n pa tõe n naf-d ye. Biiblã yetame yaa: “Yam zãra ne yalma. Yaa rẽ t’a ka tõe n yaag a noor tẽngã rignoorẽ ye.” (Yɩɩn. 24:7) Yalem pa tõe n kõ ned sagls sẽn na n naf-a ye. Rẽ n so t’a Zeova sagend tõnd tɩ d ‘zãag d meng ne yalma.’—Yel. 14:7.

12. Bõe n na n sõng-d tɩ d ra yɩ wa yalembã?

¹² Tõnd pa wa neb nins sẽn kis Wẽnnaam noyã ye. D nonga Wẽnnaam saglsã, la a no-tɩrsã. D sã n ges sakrã sẽn wat ne nafa ninsã, la kɩɩsgã sẽn wat ne yell ninsã, d manegd n nonga Wẽnnaam noyã. Tags-y n ges-y yɛl neb kẽer sẽn bao n kõ-b mense, b sẽn maan yalemd n pa sak a Zeova noyã yĩnga. La tags-y n ges-y y vɩɩmã sẽn tar bark to-to, y sẽn yãk yam n sakd Wẽnnaamã.—Yɩɩn. 32:8, 10.

13. A Zeova modgda tõnd tɩ d tũ a noyã bɩ?

¹³ A Zeova kɩtame tɩ nebã fãa tõe n paam yam hakɩɩka. A pa modg ned t’a sak-a ye. La a wilgda yɛl nins sẽn paamd neb nins sẽn pa sakd yam ning sẽn yit a nengẽ wã. (Yel. 1:29-32) Neb nins sẽn yãk yam n pa sakd a Zeova wã na n dɩɩ b tʋʋmã biisi. Nin-kãensã wat n paama toog la zu-loeese. La baasgo, b na n wa paama sãoongo. La a Zeova pʋlma neb nins sẽn kelgd a saglsã la b tũud a noyã yaa: “Sẽn kelgd-a maam zĩi ne bãane. Yẽnda na n vɩɩmda ne bãane, n ka tol n yɛɛsdẽ tɩ yel-beed na n wa paam-a ye.”—Yel. 1:33.

14-15. Yel-bũn 4:23 sõngda tõnd tɩ d bãng bõe?

¹⁴ D sã n tũud Wẽnnaam saglsã, nafd-d-la wakat fãa. Wa d sẽn zoe n gom tɩ loogã, a Zeova kɩtame tɩ nebã fãa tõe n paam a saglsã. Wala makre, a kõo sagls Yel-bũn sebrã pʋgẽ, tɩ d sã n tũud-b bɩ nafd-d wakat fãa. Bɩ d gom Yel-bũn sebrã pʋgẽ sagls a naas bal yelle.

¹⁵ Kolg-y y sũurã. Biiblã yetame yaa: “Maan gũusg ne f sũurã tagsg n yɩɩd bũmb fãa, bala, ninsaal vɩɩm yita a sũur pʋgẽ.” (Yel. 4:23) Tags-y n ges-y bũmb ning d sẽn segd n maan n kogl d sũur sɩd-sɩdã. D segd n dɩta rɩɩb sẽn yaa sõma, n maand yĩn-wɩsgre, la d zãagd d  mens ne minim-wẽnse. D segd n maana woto me, d sã n dat n kogl bũmb ning sẽn yit d sũurẽ wã. D segd n karemda Wẽnnaam Gomdã daar fãa, n segend d mens sõma tigissã yĩnga, la d kẽesd d toog tigissã sasa. D segd n modgdame n moond koɛɛgã n pa vaandẽ, n zãagd d mens ne minim-wẽnse, la d ra maan bũmb sẽn na n wa kɩt tɩ d tall tags-yoodo, wala makre, yoobã yɛl gesgo, la tũud-n-ta-wẽnse.

16. Bõe yĩng tɩ Yel-bũn 23:4, 5 sẽn yet bũmb ningã tõe n sõng tõnd rũndã-rũndã?

¹⁶ Kɩt-y tɩ y sẽn tarã sek-yã. Biiblã sagenda tõnd yaa: “Da nams f meng n pʋg arzegs ye. . . . Fo yonga f nin n get arzegse? Bãng tɩ b na n wa loogame, bala, b mii pɩgs pusbu, la b na n yɩka wa sɩlga, n loog saasẽ.” (Yel. 23:4, 5) Ned tõe n bõna a ligd nana-nana. La rũndã-rũndã, naong rãmb la baa arzɛgs rãmb maanda b sẽn tõe fãa n na n paam ligd wʋsgo. Rẽ kɩtame tɩ naoor wʋsgo, b maand bũmb sẽn sãamd b yʋʋre, b zoodã ne neb a taaba, la b laafɩ wã menga. (Yel. 28:20; 1 Tɩm. 6:9, 10) La yam hakɩɩkã sõngda tõnd tɩ d pa maand yɩɩr wʋsg ne ligdã baoob ye. Woto sõngda tõnd tɩ d ra yɩ yao-be-neba, la d kɩt tɩ bũmb ning d sẽn tarã sek-do, tɩ d sũur noomẽ.—Koɛ. 7:12.

17. Wa Yel-bũn 12:18 sẽn wilgdã, bõe n tõe n sõng-d tɩ d paam ‘yam soab goama’?

¹⁷ Reng-y n tags-y n yaool n gome. D sã n ka maan gũusgu, d no-goamã tõe n sãama d taabã sũuri. Biiblã yetame: “Gom-to-ned goam pogenda wa zabr sʋʋga, la yam soab goam wata ne maagre.” (Yel. 12:18) D sã n pa yelgd d taabã kong-bõonesã, na n sõngame tɩ laafɩ kell n zĩnd tõnd ne d taabã sʋka. (Yel. 20:19) D sã n dat tɩ d no-goamã keng d taabã raood la ra sãamd b sũuri, d segd n karemda Wẽnnaam Gomdã daar fãa la d bʋgsdẽ. (Luk 6:45) D sã n bʋgsd Biiblã sẽn yetã zugu, d no-goamã na n yɩɩ wa “yam bulga,” n kengd d taabã raoodo.—Yel. 18:4.

18. Wãn to la Yel-bũn 24:6 sõngd tõnd tɩ d tõe n moon koɛɛgã sõma?

 ¹⁸ Tũud-y siglgã saglse. Biiblã yeela bũmb sẽn tõe n sõng-d vẽenega. A yetame yaa: “Yaa ne magb la f tõe n kẽng zabrẽ. Sagendb sã n yaa wʋsgo, f paamda tõogre.” (Yel. 24:6) Wãn to la sagl-kãngã tũub sõngd tõnd koɛɛgã mooneg la nebã zãmsgã wɛɛngẽ? D segd n tũuda sagls nins b sẽn kõt-dã, n da moond koɛɛgã la d zãmsd nebã wa d sẽn dat ye. D tigissã sasa, d paamda saglse. Bala d kelgda sõss sẽn tik Biiblã zug la bũmb a taaba, tɩ sõngd tõnd tɩ d paamd minim. Sẽn paase, a Zeova siglgã yiisda sɛb la video-rãmb sẽn sõngd nebã tɩ b tõe n wʋm Biiblã goamã võore. Yãmb tʋmda ne tʋʋm-te-kãensã sõma bɩ?

19. Yãmb tagsg yaa wãn ne yam ning a Zeova sẽn kõtã? (Yel-bũnã 3:13-18)

¹⁹ Karm-y Yel-bũn 3:13-18. D sũur nooma wʋsg ne sagls nins d sẽn paamd Wẽnnaam Gomdã pʋgẽ wã. Sãmbg kae tɩ sagl-kãensã nafda tõnd hal sõma. Sõs-kãngã pʋgẽ, d yãa sagls sẽn be Yel-bũn sebrã pʋgẽ. La yaa vẽeneg tɩ Biiblã pida ne sagls sẽn yit a Zeova nengẽ. Bɩ d mogd n tũud sagls nins a Zeova sẽn kõt tõndã wakat fãa. Neb wʋsg pa get tɩ sagls nins sẽn yit Wẽnnaam nengẽ wã tara yõod ye. La tõnd yẽ kɩsa sɩd tɩ “ned sã n tar yam, a tara sũ-noogo.”