D ges Biiblã sẽn leokd sogs-kãensã to-to.

Tʋʋm 24:15 wilgdame tɩ b na n “vʋʋga nin-tɩrsã ne sẽn pa-b nin-tɩrsã me.” Nin-tɩrsã yaa neb nins sẽn da sakd Wẽnnaam nand tɩ b maan kaalmã. Dẽnd b yʋyã gʋlsa vɩɩm sebrã pʋgẽ. (Mal. 3:16) Sẽn pa-b nin-tɩrsã yaa neb nins sẽn pa paam weer n bãng a Zeova sõma wã. Dẽnd b yʋyã pa be vɩɩm sebrã pʋgẽ ye.

Zã 5:28, 29 wã gomda sull a yiib nins Tʋʋm 24:15 wã sẽn gomdã yelle. A Zeezi yeelame tɩ “neb nins sẽn tʋm tʋʋm-sõma wã na n vʋʋga vɩɩm yĩnga, la sẽn tʋm-b tʋʋm-wẽnsã na n vʋʋga bʋʋd yĩnga.” Nin-tɩrsã tʋma tʋʋm-sõma nand tɩ b maan kaalem. B na n vʋʋga vɩɩm yĩnga, bala b yʋyã ket n gʋlsa vɩɩm sebrã pʋgẽ. La sẽn pa-b nin-tɩrsã tʋma tʋʋm-wẽns nand tɩ b maan kaalem. B na n vʋʋg-b-la bʋʋd yĩnga. B yʋyã nan pa be vɩɩm sebrã pʋgẽ ye. B na n kao-b-la bʋʋdo, rat n yeel tɩ b na n gũus n gesa b manesem sẽn na n yɩ to-to. Wakat kãnga b na n paama weer n bao n bãng a Zeova sõma, n paam tɩ b gʋls b yʋyã vɩɩm sebrã pʋgẽ.

Vẽnegr 20:12, 13 wilgdame tɩ sẽn vʋʋg-bã fãa segd n sak n tũu “bũmb nins sẽn gʋls seb-pindsã pʋsẽ wã,” rat n yeel tɩ no-paalã Wẽnnaam sẽn na n kõ-d dũni-paalgã pʋgẽ wã. A Zeova na n sãama neb nins sẽn pa na n sak n tũ no-kãensã wã.—Eza. 65:20.

Dãniyɛll 12:2, pĩnd n togsame tɩ neb nins sẽn maan kaalmã sʋka, kẽer na n vʋʋgame “n paam vɩɩm sẽn kõn sa, tɩ kẽer vʋʋg n paam yãnde, n vɩɩmd paoog-kãseng pʋg wakat sẽn kõn sa yĩnga.” Vɛrse-kãngã gomda vʋʋgrã sẽn na n baas to-to. Yaa ‘vɩɩm sẽn kõn sa,’ wall ‘paoog-kãseng wakat sẽn kõn sa’ yĩnga. Dẽnd yʋʋm tusrã saabẽ, neb kẽer na n paama vɩɩm sẽn kõn sa, tɩ sãnda paam sãoong wakat sẽn kõn sa yĩnga.—Vẽn. 20:15; 21:3, 4.

D rɩk makre: D tõe n dɩka sull a yiibã neb sẽn na n vʋʋgã n mak ne sãamb sẽn dat n tɩ vɩɩmd tẽng a to. Nin-tɩrsã makda sãamb sẽn paam viza sẽn kõt-b sor tɩ b tõe n tʋme, wall sẽn kõt-b sor tɩ b tõe n zĩnd tẽngã pʋgẽ. Dẽnd b tara sor n tõe n maan bũmb kẽere. La sẽn pa-b nin-tɩrsã yaa wa sãamb sẽn paam viza sẽn kõt-b sor tɩ b tõe n zĩnd tẽngã pʋgẽ wakat bilf yĩnga, wall viza sẽn kõt-b sor tɩ b tõe n gilg n ges tẽngã bala. Sãam-kãensã segd n deng n maana bũmb kẽere, n yaool n paam sor n kell n vɩɩmd tẽngã pʋgẽ. Woto me, sẽn pa-b nin-tɩrsã sẽn na n vʋʋgã segd n saka a Zeova noyã la b wilg tɩ b yaa nin-tɩrse, n yaool n tõog n kell n zĩnd arzãnã pʋgẽ. Baa ne sẽn yaa viza ning la neb paam n tõe n kẽng tẽng a to, tẽn-kãng goosneema wã tõe n sakame tɩ b sʋkã neb kẽer lebg tẽng-n-biisi, la b kɩt tɩ sãnda yi b tẽngẽ wã. Yɛlã sẽn na n baas to-to wã bee ne sãambã sẽn na n tall manesem ningã. Woto me, yɛlã sẽn na n baas to-to ne neb nins sẽn na n vʋʋgã bee ne b tẽebã, la b tʋʋm-tʋmdɩ wã sẽn na n yɩ to-to dũni-paalgã pʋgẽ wã.

A Zeova pa nonglem Wẽnnaam bal ye. A yaa tɩrlem Wẽnnaam me. (Tõo. 32:4; Yɩɩn. 33:5) A na n wilga a nonglmã, a sẽn na n vʋʋg nin-tɩrsã la sẽn pa-b nin-tɩrsã. La a na n datame tɩ nebã fãa kell n tũ noy nins a sẽn na n gãneg sẽn yaa sõma ne sẽn yaa wẽngã wɛɛngẽ wã. Yaa neb nins bal sẽn na n wilg tɩ b nonga a Zeova la b sakda a noyã n na n kell n vɩɩmd dũni-paalgã pʋgẽ.