1. Kirist yʋʋm tusr naamã sasa, bõe n na n zĩnd hal tɩ kõ-d sũ-noog wʋsgo?

 KŨUM vʋʋgrã sã n wa sɩng tẽngã zug Kirist yʋʋm tusr naamã sasa, na n yɩɩ sũ-noog tɛkẽ! D yãgdame n dat n le yã d nin-nongds nins sẽn maan kaalmã. Yaa woto me ne a Zeova. (Zoob 14:15, MN) Tags-y n ges-y nebã sẽn na n kɩdem sũ-noog to-to tẽngã gill zugu, b sã n wa paam tɩ b nin-nongdsã vʋʋge. Wa d sẽn yã sõsg ning sẽn loogã pʋgẽ wã, “nin-tɩrsã” yʋy sẽn gʋls vɩɩm sebrã pʋgẽ wã na n “vʋʋga vɩɩm yĩnga.” (Tʋʋ. 24:15; Zã 5:29) Tõe tɩ d nin-nongds wʋsg na n vʋʋga Armagedõ poor bilfu. * “Sẽn pa-b nin-tɩrsã,” rat n yeel tɩ neb nins sẽn pa paam weer sõma n bãng a Zeova, wall b pa paam segb n tũ-a ne b sũy fãa nand tɩ b maan kaalmã na n “vʋʋga bʋʋd yĩnga.”

2-3. a) Wa Ezayi 11:9, 10 sẽn wilgdã, zãms-bʋg la nebã na n paam dũniyã gill zugu, hal t’a buud zɩ n zĩndi? b) Bõe yell la d na n gom sõs-kãngã pʋgẽ?

² Na n yɩɩ tɩlɛ tɩ b zãms sẽn na n vʋʋg-bã fãa bũmb wʋsg a Zeova zugu. (Eza. 26:9; 61:11) Nebã fãa na n paama zãmsgo, hal t’a buud zɩ n zĩnd ye. (Karm-y Ezayi 11:9, 10.) Bõe yĩng tɩ d yet woto? Bala, yaa tɩlɛ tɩ sẽn pa-b nin-tɩrsã b sẽn na n vʋʋgã bao n bãng bũmb wʋsg a Zeezi Kirist zugu, a sẽn ki tɩ yɩ maoongã,  Wẽnnaam Rĩungã, a Zeova yʋʋrã sẽn ka to wã, la bũmb ning sẽn kɩt tɩ yẽ bal n tar sor n dɩ naamã. B segd n sõnga baa nin-tɩrsã sẽn na n vʋʋgã tɩ b bãng bũmb nins a Zeova sẽn vẽneg bilf-bilf a raabã ne tẽngã wɛɛngẽ wã. Nin-tɩrs kãensã kẽer maana kaalem n kaoose, tɩ b yaool n wa gʋls Biiblã zãng n sa. Dẽnd nin-tɩrsã ne sẽn pa-b nin-tɩrsã fãa na n zãmsa bũmb wʋsgo.

³ Ad sogsg d sẽn na n leok sõs-kãngã pʋgẽ: Wãn to la nebã na n paam zãmsgo, hal t’a buud zɩ n zĩndi? Nebã sã n sak zãmsgã, wãn to la na n naf-ba? La bõe n na n paam sẽn pa na n sak-b n tũ zãmsgã? Sogs-kãensã leoor tara yõod wʋsg ne tõnd rũndã-rũndã. Wa d sẽn na n yã wã, Dãniyɛll sebrã la Vẽnegr sebrã bãngr-goam kẽer na n sõng-d lame tɩ d maneg n wʋm bũmb ning sẽn na n zĩnd kũum vʋʋgrã poorã võor sõma. Pipi, bɩ d ges Dãniyɛll 12:1, 2 bãngr-gomdã sẽn togsd bũmb ning tɩ be yamleoogã.

4-5. Dãniyɛll 12:1 wilgdame tɩ bõe n na n maan saabã wakate?

⁴ Karm-y Dãniyɛll 12:1. A Dãniyɛll sebrã wilgda bõn-kãsems sẽn na n pʋgl taab saabã wakate. Wala makre, Dãniyɛll 12:1 wilgdame t’a Mikayɛll sẽn yaa a Zeezi Kiristã yaa ‘Wẽnnaam nebã gũuda.’ Bãngr-gomdã bab-kãngã sɩnga pidsg yʋʋmd 1914, a Zeezi sẽn wa n lebg Wẽnnaam Rĩungã rĩm saasẽ wã.

⁵ B leb n yeela a Dãniyɛll t’a Zeezi “na n waame,” la tɩ na n yɩɩ “to-kãseng wakate. Hal ninsaalb sẽn be dũni tɛk tɩ tãag badaare, to-kãseng a woto buud nan ka zĩnd ye.” ‘To-kãseng wakatã’ yaa to-kãseng ning yell Matiye 24:21 wã sẽn gomdã. A Zeezi na n “waame,” rat n yeel t’a na n zab n fãaga Wẽnnaam nin-buiidã to-kãsengã saabẽ, rat n yeel tɩ Armagedõ. Vẽnegr sebrã goma nin-kãensã yelle, n yeel tɩ b yaa kʋʋn-kãseng “sẽn põs to-kãsengã sasa.”—Vẽn. 7:9, 14.

6. Kʋʋn-kãsengã sã n wa põs to-kãsengã sasa, bõe n na n maan rẽ poore? Wilg-y y leoorã võore. (Ges-y seb-kãngã pʋgẽ “Karemdbã Sogsgo,” sẽn gomd vʋʋgrã sẽn na n zĩnd tẽngã zugã yellã.)

⁶ Karm-y Dãniyɛll 12:2. Kʋʋn-kãsengã sã n wa põs to-kãsengã sasa, bõe n na n maan rẽ poore? Pĩndã d ra yetame tɩ Wẽnnaam nin-buiidã sẽn lebg n sɩng b tʋʋmdã ne yẽesem yaoolem wakatã yaa wa neb sẽn lebs n vʋʋge. * La yaool n pa woto ye. Vɛrse-kãngã pa gomd vʋʋgr a woto yell ye. A gomda kũum vʋʋgrã sẽn na n zĩnd dũni-paalgã sẽn watã pʋgẽ wã yelle. Bõe n kɩt tɩ d yet woto? Bala Zoob 17:16 pʋgẽ, b gomda “tẽng tomẽ” me yelle, t’a võorã yaa yaoogo. Woto wilgdame tɩ Dãniyɛll 12:2 wã gomda kũum vʋʋgr sɩd-sɩd yelle, sẽn na n sɩng yaoolem wakatã loogr poore, Armagedõ zabrã sã n wa sa.

7. a) Neb kẽer sẽn na n vʋʋg n paam “vɩɩm sẽn kõn sa” wã rat n yeelame tɩ bõe? b) Bõe yĩng tɩ rẽ yaa ‘kũum vʋʋgr sẽn yaa sõma n yɩɩda?’

⁷ La Dãniyɛll 12:2 sẽn yet tɩ neb kẽer na n vʋʋg n paama “vɩɩm sẽn kõn sa” wã rat n yeelame tɩ bõe? Wilgdame tɩ yʋʋm  tusrã sasa, neb nins sẽn na n vʋʋg n bao n bãng a Zeova ne a Zeezi la b sak-bã, bɩ n vʋʋg n ket n baood n bãngd-b la b sakd-bã, na n wa paama vɩɩm sẽn kõn sa. (Zã 17:3) Na n yɩɩ ‘kũum vʋʋgr sẽn yaa sõma n yɩɩd’ neb nins sẽn da paam tɩ b vʋʋg-b pĩndã. (Ebre. 11:35) Bõe yĩnga? Bala nin-kãensã b sẽn da vʋʋg pĩndã wa n le maana kaalem.

8. Bõe yĩng tɩ neb kẽer na n vʋʋg n paam ‘paoog-kãseng wakat sẽn kõn sa yĩnga?’

⁸ La pa sẽn na n vʋʋg-bã fãa n na n sak a Zeova zãmsgã ye. A Dãniyɛll bãngr-gomdã wilgame tɩ kẽer n na n “vʋʋg n paam yãnde, n vɩɩmd paoog-kãseng pʋg wakat sẽn kõn sa yĩnga.” B sẽn pa na n sak Wẽnnaamã yĩnga, b pa na n paam tɩ b gʋls b yʋyã vɩɩm sebrã pʋgẽ ye. Rẽ n so tɩ b na n kong vɩɩm sẽn kõn sa wã. B pʋd n na n paama ‘paoog-kãseng wakat sẽn kõn sa yĩnga,’ rat n yeel tɩ sãoongo. Dẽnd Dãniyɛll 12:2 gomda neb nins fãa sẽn na n vʋʋgã sẽn na n paam bũmb ninga, tɩ zems ne b sẽn maan bũmb ning b vʋʋgrã poorã. * (Vẽn. 20:12) Kẽer na n paama vɩɩm sẽn kõn sa, sãnda pa na n paam ye.

9-10. Bõe me n na n zĩnd to-kãsengã poore, la ãnd dãmb n na n ‘pɩnd wã sa-gãongã?’

⁹ Karm-y Dãniyɛll 12:3. ‘To-kãsengã wakat’ poore, bõe n na n zĩndi? Dãniyɛll 12:2 sẽn yãk a toogo, vɛrse a 3 me gomda bũmb sẽn na n zĩnd to-kãsengã poore.

¹⁰ Ãnd dãmb la sẽn na n ‘pɩnd wa sa-gãongã?’ Bũmb ning a Zeezi sẽn yeel tɩ be Matiye 13:43 sõngda tõnd tɩ d bãnge. A yeelame: “Wakat kãnga, nin-tɩrsã na n yãga wa wĩntoogã sẽn yãgd to-to wã bãmb Ba wã Rĩungã pʋgẽ.” A Zeezi sẽn deng n gom goam nins n yaool n na n wa yeel woto wã wilgdame t’a ra gomda ‘Rĩungã kamb’ yelle, rat n yeel t’a ba-biisã sẽn paam zaeeb n na n dɩ naam ne-a saasẽ Rĩungã pʋgẽ wã. (Mat. 13:38) Dẽnd Dãniyɛll 12:3 gomda sẽn paam-b zaeebã yelle, la b sẽn na n tʋm tʋʋmd ning yʋʋm tusr naamã sasa wã me yelle.

11-12. Tʋʋm-bʋg la neb tus-koabg la tus pis-naas la a naasã na n tʋm yʋʋm tusrã sasa?

¹¹ Wãn to la sẽn paam-b zaeebã na n “zãms neb a taabã tɩ b tũ tɩrlem sorã?” Sẽn paam-b zaeebã na n naaga a Zeezi Kirist n ges nebã zãmsgã yell tẽngã zugu, yʋʋm tusrã sasa. Neb tus-koabg la tus pis-naas la a naasã pa na n yɩ rĩm-dãmb bal ye. B na n yɩɩ maan-kʋʋdb me. (Vẽn. 1:6; 5:10; 20:6) Dẽnd b na n waa ne “buud fãa neb bãas tɩɩm,” la b sõng ãdem-biisã bilf-bilf tɩ b wa zems zãnga. (Vẽn. 22:1, 2; Eze. 47:12) Sẽn paam-b zaeebã na n paama sũ-noog tɛkẽ!

¹² “Neb a taabã” b sẽn na n zãms tɩ b tũ tɩrlem sorã yaa ãnd dãmba? Yaa sẽn na n vʋʋg-bã, ne sẽn na n põs-b Armagedõ zabrã sasa wã, n paas kamb nins sẽn na n dog dũni-paalgã pʋgẽ wa. Yʋʋm tusrã sã n wa sa, rẽ tɩ sẽn be-b dũniyã zugã fãa lebga neb sẽn zems zãnga. Dẽnd wakat bʋg la b na n gʋls b yʋyã ne bik vɩɩm sebrã pʋgẽ, tɩ pa le tõe n yẽese?

13-14. Nebã fãa sã n wa zems zãng tẽngã zugu, bõe la b segd n maan n yaool n paam vɩɩm sẽn ka sɛtã?

¹³ D segd n tẽegame tɩ ned sã n wa zems zãnga, pa rat n yeel t’a na n paama vɩɩm sẽn kõn sa wã tɩlɛ ye. Tẽeg-y-yã a Ãdem ne a Awa yelle. B ra zemsa zãnga, la ra yaa tɩlɛ tɩ b kell n wilg tɩ b sakda a Zeova n yaool n paam vɩɩm sẽn ka sɛtã. La bʋko, b pa kell n sak a Zeova ye.—Rom. 5:12.

¹⁴ Yʋʋm tusrã poore, nebã vɩɩm na n lebga wãn tẽngã zugu? Nebã fãa na n lebga neb sẽn zems zãnga. B sẽn zems zãngã, b na n kell n teela a Zeova naamã wakat fãa yĩng bɩ? Bɩ kẽer na n maana wa a Ãdem ne a Awa, n kɩɩs a Zeova baa ne b sẽn zems zãngã? Wãn to la d na n paam sogs-kãensã leoore?

15-16. a) Wakat bʋg la nebã fãa na n paam weer n wilg b sã n sɩd sakda a Zeova? b) Yaoolem makrã na n basa wãna?

¹⁵ B na n paga a Sʋɩtaan n kaoos yʋʋm tusri. Wakat kãnga, a pa na n le tõog n belg ned ye. La yʋʋm tusrã poore, b na n bas-a lame t’a yi. Dẽnd a na n makame n belg ninsaalbã sẽn zems zãngã. Makrã sasa, ninsaalbã sẽn zems zãngã na n paama weer n wilg vẽeneg b sã n teenda Wẽnnaam naamã la b waoogd a yʋʋrã. (Vẽn. 20:7-10) Ned  fãa manesem sẽn na n yɩ to-to wakat kãnga n na n wilg a sã n na n paamame tɩ b gʋls a yʋʋrã vɩɩm sebrã pʋgẽ wakat fãa yĩnga.

¹⁶ Neb sõor d sẽn pa mi n na n kɩɩs a Zeova naamã, wa a Ãdem ne a Awa sẽn maanã. Bõe n na n paam-ba? Vẽnegr 20:15 wã yetame: “Ned ning fãa yʋʋr sẽn pa gʋls vɩɩm sebrã pʋgẽ, b lob-a-la bugum mogrẽ wã.” Vẽenega, b na n sãama kɩɩsdbã wakat fãa yĩnga. Yaoolem makrã sasa, ninsaalbã sẽn zems zãngã wʋsg na n kell n saka a Zeova. Rẽ, b na n paamame tɩ b gʋls b yʋyã vɩɩm sebrã pʋgẽ wakat sẽn kõn sa yĩnga.

17. Bõe la malɛk yeel a Dãniyɛll tɩ na n zĩnda tõnd wakatã? (Dãniyɛll 12:4, 8-10)

¹⁷ D sã n tags bũmb nins sẽn watã yelle, kõta sũ-noogo! La a Dãniyɛll leb n paamame tɩ malɛk taas-a koɛɛg sẽn tar yõod wʋsgo, sẽn gomd tõnd wakatã sẽn yaa ‘yaoolem wakatã’ yelle. (Karm-y Dãniyɛll 12:4, 8-10; 2 Tɩm. 3:1-5) Malɛkã yeela a Dãniyɛll yaa: “Neb wʋsg na n karma sebrã n paam bãngr n paase.” Woto wilgdame tɩ wakat n da wat tɩ Wẽnnaam nin-buiidã na n wʋm a Dãniyɛll sebrã bãngr-goamã võor sõma. Malɛkã leb n yeelame tɩ wakat kãnga,  “nin-wẽnsã na n ket n maanda wẽngã, la bãmb ned baa a ye ka na n wʋm yɛlã võor ye.”

18. Bõe n na n paam nin-wẽnsã ka la bilfu?

¹⁸ Rũndã-rũndã, wõnda nin-wẽnsã pa paamd sɩbgre, b tʋʋm-wẽnsã yĩng ye. (Mal. 3:14, 15) La ka la bilfu, a Zeezi na n kaoo nin-wẽnsã b sẽn mak ne bʋʋsã bʋʋdo, n welg-b ne nin-sõma wã b sẽn mak ne piisã. (Mat. 25:31-33) Nin-wẽnsã pa na n põs to-kãsengã sasa ye. B pa na n vʋʋg dũni-paalgã pʋgẽ me ye. Bala b pa na n gʋls b yʋyã ‘tẽegr sebrã’ Malaki 3:16 sẽn gomdã pʋgẽ ye.

19. Bõe la d segd n maan masã menga, la bõe yĩnga? (Malaki 3:16-18)

¹⁹ Yaa masã meng la d segd n wilg ne d tʋʋmã tɩ d pa naag nin-wẽnsã sʋk ye. (Karm-y Malaki 3:16-18.) A Zeova tigimda neb sẽn yaa yẽ mengã “rẽnda,” rat n yeel tɩ neb a sẽn nong wʋsgo. Yaa vẽeneg tɩ d rat n zĩnda nin-kãensã sʋka.

20. Bõe la a Zeova pʋlem a Dãniyɛlle, la bõe yĩng tɩ yãmb yãgd n dat tɩ rẽ pidsi?

²⁰ Sɩd-sɩdã, bõn-sõma wʋsg n paamd pidsg masã menga. La bõn-sõma sẽn yɩɩd woto n na n paam pidsgu. Ka la bilfu, Wẽnnaam a Zeova na n sãama nin-wẽnsã fãa. Rẽ poore, d na n yãa a sẽn pʋlem a Dãniyɛll bũmb ningã pidsgu. A yeel-a lame yaa: “Fo na n paama vʋʋsgo, n yik n deeg f keoor yaoolem daarã.” (Dãn. 12:13) Yãmb yãgdame n na n yã a Dãniyɛll la y nin-nongdsã sẽn maan kaalmã sẽn na n wa yikã bɩ? Sã n yaa woto, bɩ y maan y sẽn tõe fãa n kell n sak a Zeova. Rẽ, y tõe n basa y yam t’a na n gʋlsa y yʋʋrã vɩɩm sebrã pʋgẽ wakat fãa yĩnga.