Yʋʋmd 1940 sẽnes la m roagdbã sɩng Biiblã zãmsg ne a Zeova Kaset rãmbã. Zãmsgã pa kẽng taoor ye. La m ma ra ket n paamda Gũusg Gasgã ne Réveillez-vous! wã. Yʋʋmd 1950 wã, tigis-kãseng sẽn tigimd tẽns toɛy-toɛy neb n zĩnd Niuyorke, tɩ m roagdbã kẽnge.

Rẽ poor bilfu, saam-biig a Lawrence Jeffries sɩngame n wat n kaagd tõndo. A baoome n na n sõng-m tɩ m bãng sɩdã. Sɩngrẽ wã, m da pa sak a Zeova Kaset rãmbã sẽn pa kẽesd b toog politikã yɛlẽ la sodaarã pʋgẽ wã ye. M yeel-a lame tɩ Amerik nebã fãa sã n da zãgs tɩ b pa na n kẽes b toog zab pʋsẽ, bɛɛbã tõe n wa reega tẽngã zãng n sooge. Saam-biig a Jeffries maaga a yĩng n kelge, n sok maam yaa: “Fo tagsdame tɩ bõe la a Zeova na n maane, sã n da mik tɩ Amerik nebã fãa tũud-a lame, tɩ bɛɛb wa n na n zab ne-ba?” A gom-kãensã, n paas bũmb a taab a sẽn yeel sõng-m lame tɩ m bãng tɩ m tagsgã ra pa zems ye. Woto kɩtame tɩ m da rat n bãng bũmb a taab Biiblã zug n paase.

Mam baoo sẽk n karem Gũusg Gasgã la Réveillez-vous! rãmb nins m ma sẽn da reeg hal daar zãrã. A ra bĩng-b-la ro-bil sẽn da be d roogã tẽngre. M wa m bãngame tɩ m sẽn zãmsd bũmb ningã yaa sɩda. Rẽ n so tɩ saam-biig a Jeffries sẽn wa n kos n na n zãms maam Biiblã, m sakame. M sɩnga tigissã kẽnd n pa vaandẽ ye. M sũur da nooma ne bũmb nins m sẽn zãmsdã, tɩ m yãk yam n lebg Rĩungã koe-moonda. M sẽn bãng t’a Zeova “daarã sẽn yaa ra-kãsengã kolgame” wã, m toeema m sẽn da rat n maan bũmb ning sɩngrẽ wã. (Sof. 1:14) M da pa le rat n kẽng inivɛrsite ye. M da rat n sõnga nebã tɩ b bãng sɩdã sẽn be Biiblã pʋgẽ wã.

 Yʋʋmd 1956 sigr kiuug rasem 13, m kolɛɛsã kareng saame tɩ m paam dipolom. La rasem a tãab poore, m deega lisg tigis-kãseng sasa. M da pa mi tɩ m na n paama bark wʋsg woto, m sẽn yãk yam n na n zãms Biiblã la m sõng neb a taab tɩ b bãng a Zeova wã ye.

Mam lisgã kiuug a yoob poore, m lebga wakat fãa so-pakda. Yʋʋmd 1956 yʋʋm-sar kiuug Rĩungã Tʋʋmd sebrã sõsg a ye gom-zug n da yaa: “Yãmb tõe n tɩ moona zĩig koe-moondbã raab sẽn yaa wʋsg bɩ?” M da tõeeeme. M sɩd da rat n tɩ moona zĩig a woto.—Mat. 24:14.

M yik n kẽnga Ɛdzfild sẽn be Karolindisiidã. Ra yaa koe-moondb a naas bal n da be beenẽ tigingã pʋgẽ. M tɩ paas-b lame tɩ d lebg d nu. D da tigimda taab saam-biig a ye roogẽ. Kiuug fãa, m da moonda lɛɛr koabga. M da pa tar sẽk wʋsg ye. Bala m da lʋɩta taoor koɛɛgã mooneg pʋgẽ, la m da wɛgsd sõss tigingã pʋgẽ. Sẽn da noom maamã yaa tɩ m sẽn da tʋmd wʋsg tigingã pʋgẽ wã, m da bãngda a Zeova sõma me n paasdẽ.

M zãmsa Biiblã ne pag sẽn da tar zĩig b sẽn segend kũ-rãmba, b mumb yĩnga. Zĩigã ra bee Jõnsõn. Ra pa zãr ne tõnd sẽn da beẽ wã ye. A maan-m-la neere, n sak n dɩk-m tʋʋmde. M da tʋmda rasem a wãn semen pʋgẽ. A leb n kõ-d-la ro-bil tɩ d maan d Rĩung roogo.

Saam-biig ning sẽn zãms Biiblã ne maamã bi-ribl yʋʋr sẽn boond t’a Jolly Jeffries n yi Bruklin sẽn be Niuyorkã, n wa lebg mam tʋmd-n-taag so-pakrã tʋʋmd pʋgẽ. D ra bee ro-bil b sẽn da tõe n tak ne mobil pʋgẽ. Yaa saam-biig n da kõ-do.

D sẽn da beẽ wã, b ra pa yaood tʋm-tʋmdbã sõma ye. D sã n da tʋm daar tõre, d ra paamda dolaarã ligd a yiib bɩ a tãab bala. Daar a ye, m dɩka m ligdã fãa n da rɩɩbo. M sẽn da n sa n loogdẽ, rao n kolg maam n sok yaa: “Fo baooda tʋʋmd bɩ? M na n yao-f-la dolaarã ligd a ye, lɛɛr fãa.” A kõo maam rasem a tãab tʋʋmde, meeb zĩigẽ. M da segd n manega zĩigã tɩ lebg yɩlemde. Ra yaa vẽeneg t’a Zeova sõngd-m lame, tɩ m na n kell n pa Ɛdzfild. M tõog n kẽnga yʋʋmd 1958 tẽns toɛy-toɛy tigis-kãsengã Niuyork.

Tigis-kãsengã rasem a yiib-n-soabã daare, bũmb n maan tɩ yɩ-m noog wʋsgo. M sɛga saam-bi-poak a ye yʋʋr sẽn boond t’a Ruby Wadlington, sẽn da yaa wakat fãa so-pakd n be Galatin Tenesɩ. D yiibã fãa sẽn da rat n wa lebg misioneer-dãmbã yĩnga, tigis-kãsengã sasa d tɩ kelga tigisg b sẽn maan ne sẽn dat-b n kẽng Galaad lekollã. Rẽ poore, d wa n gʋlsda taab lɛta. Daar a ye, b boola mam Galatin tẽngã, tɩ m na n tɩ wɛgs zãma taoor sõsga. M tũnuga ne rẽ n kos a Ruby n na n kẽ kãadem ne-a. Rẽ poore, m yik n kẽnga a Ruby rãmb tigingẽ wã, la d kẽe kãadem yʋʋmd 1959 wã.

M sẽn wa n tar yʋʋm 23, b yãka maam tɩ m lebg Gallatin tigingã yel-gɛta (b boonda rẽ masã tɩ kãsem-dãmbã sull yel-gɛta). A Charles Thompson sẽn wa n lebg tigims sull yel-gɛtã, tõnd tigingã la a kaag pipi. A ra tara minim wʋsgo. La baa ne rẽ, a soka maam n na n bãng saam-biisã sẽn dat sõngr ning n tɩ yɩɩda, la tigims sull yel-gɛtb a taabã sẽn da maand n sõngd-bã. Woto sõnga maam tɩ m bãng tɩ nand tɩ d yãk yam n maan bũmbu, yaa sõma tɩ d reng n bao n bãng yɛlã vɩʋʋgo.

Yʋʋmd 1964 sig-noy kiuugã, b boola maam tɩ m naag n maan Rĩungã koe-moondb lekollã sẽn da kaoosd kiuugã. Yɩɩ Saout Lansing, Niuyorke. Lekollã sasa, karen-saam-dãmbã sõnga maam tɩ m tʋll n bãng a Zeova n paase, la m bɩɩs m zoodã ne-a.

Yʋʋmd 1965 yʋʋm-vẽkr kiuugã, b yãka maam tɩ m lebg tigims sull yel-gɛta, tɩ maam ne a Ruby gilgd n kaagd tigimsã. Tigimsã sõor da waoogame. Yaa sẽn sɩng ne Knoxville sẽn be Tennessee, hal n kolg Richmond sẽn be Virzini soolem wã. Karolindinoore, Kẽntuki, la Virzinideluwɛst tigimsã me ra naagame. Yaa nin-sablsã tigims bal la m da kaagda, bala bu-welsgã sẽn da tar pãng wʋsg Etazĩni nug-goabgã yĩnga, nin-sablsã ra pa tar sor n tigimd ne nasaar-dãmbã ye. Saam-biisã ra yaa naong rãmba. Rẽ n so, tɩ d ra pʋɩt d sẽn tarã ne sẽn da be-b raab pʋgẽ wã. Saam-biig a ye sẽn da yaa tigims sull yel-gɛt hal sẽn kaoos zãmsa maam bũmb sẽn tar yõod wʋsgo. A yeela maam yaa: “F sã n na n tɩ kaag tiginga, bɩ f yɩ tigingã neb saam-biiga, la f ra maan wa f yaa taoor soab ye. Yaa b sã n get foo wa b saam-biig la f na n tõog n sõng-b sõma.”

D wa n tɩ kaaga tigin-bila, t’a Ruby sɩng Biiblã zãmsg ne pag sẽn tar bi-pugl sẽn zems yʋʋmde. Ned sẽn da kae n tõe n kẽng taoor ne pagã Biiblã zãmsgã yĩnga, a Ruby ra tũnugda ne lɛta n zãmsd-a Biiblã. D sẽn wa n le tɩ kaag tigingã, pagã ra wata tigissã fãa. B wa n tʋma saam-bi-pogs a yiib sẽn yaa zall so-pakdb tigin-kãng pʋgẽ. B kell n kẽnga taoor ne pagã Biiblã zãmsgo, tɩ pa kaoos la a reeg lisgu. Yʋʋmd 1995 wã, yʋʋm 30 poore, Patɛrson Betɛllẽ wã, saam-bi-poak n wa n gom ne a Ruby. Mik yaa pag ning a Ruby sẽn da zãms Biiblã bi-puglã. Yẽ ne a sɩdã ra waa Galaad lekollã koabg soabã.

D wa n tɩ kaagda Floriid tẽn-sʋk tigimsã. Ra yaa tɩlɛ tɩ d paam mobilli. D paama a ye n da, t’a ligdã ra pa toog ye. La pipi semennã bala, mobillã sãamame, tɩ ligd kae n manegdẽ ye. M boola saam-biig a ye m sẽn da tagsd t’a tõe n sõng-d lame. A tʋma ned t’a wa maneg mobillã, n pa reeg baa wakɩre. A yeelame bal yaa: “Zoe n yaoome.” A pʋd n kõo tõnd ligdi. Woto ra yaa kaset t’a Zeova sɩd geta a nin-buiidã yelle. Tẽega tõnd tɩ d segd n yɩɩ kõatba.

D sã n da tɩ kaag tiginga, saam-biisã reegda tõnd b zagsẽ. Woto kɩtame tɩ d paam zo-rãmb hakɩɩka. Daar a ye, m sɩnga m rapoor gʋlsg ne masĩni, n wa bas n yi. M sẽn wa n lebg n wa zaabrã, m yãame tɩ zakã bi-ribl sẽn zems yʋʋm a tãab n yõd n baas rapoorã. Hal yʋʋm wʋsg poore, m da ket n tẽegda rẽ n laad biigã.

Yʋʋmd 1971 wã, b yãka maam tɩ m na n lebg distrik yel-gɛt Niuyork. Ling-d-la wʋsgo. D sẽn yik n kẽng be wã tɩ m da tara yʋʋm 34 bala. Ra yaa pipi la woto saam-biisã sẽn paam distrik yel-gɛt sẽn yaa nin-sablga, la b reega maam sõma.

M sẽn da yaa distrik yel-gɛtã, wɩkɛn fãa m da wɛgsda sõss tigis-kãseng sasa, la m zãmsd nebã bũmb wʋsg a Zeova zugu. Ra nooma maam. Tigims sull yel-gɛtb wʋsg ra tara minim n yɩɩd maam. M lisgã daare, b sʋkã nin-yend n wɛgs lisgã sõsgã. Saam-biig a Theodore Jaracz ra naagame. A wa n lebga siglgã taoor lʋɩtb sull neda. Sẽn paase, saam-biis wʋsg n da tʋmd Bruklin Betɛllẽ wã, n tar minim wʋsgo. M sũur da noomame, tigims sull yel-gɛtbã ne Betɛllẽ tʋm-tʋmdbã sẽn da sõngd maam tɩ m basd m yam n tʋmd m tʋʋmdã. M yãa vẽeneg tɩ b yaa yel-gɛtb sẽn nong neba, sẽn teeg Wẽnnaam Gomdã la b teend siglgã ne b sũy fãa. B sik-m-mengã kɩtame tɩ m tõog n tʋm m distrik yel-gɛtã tʋʋmde.

Yʋʋm 1974 siglgã taoor lʋɩtb sullã yãka saam-biis tɩ b na n lebg tigims sull yel-gɛtba. Mam da naagame. Woto kɩtame tɩ m le lebg tigims sull yel-gɛta. So-kãnga, yɩɩ Karolindisiidi. Wakat kãng tɩ b ra kõo sor tɩ saam-biis sẽn yaa nin-sabls la nasaar-dãmb tõe n tigimd taaba. Woto ra yaa sũ-noog tɛkẽ!

Yʋʋmd 1976 baasgẽ, b tʋma maam tɩ m tɩ kaag tigims sẽn be Zorzi, Atlãnta ne Kolõmbis sʋka. M tẽra daar a ye m sẽn wɛgs sõsg neb sẽn da maan kaalem yĩnga. Ned n ning zak bugum ne pʋ-toogo, tɩ kamb a nu sẽn yaa nin-sabls maan kaalem. B talla b ma wã n kẽng logtor-yiri, a sẽn da pogl wʋsgã yĩnga. A Zeova Kaset rãmb sẽn yaa nin-sabls la nasaar-dãmb n da wat logtor-yirã wakat fãa n na n bels roagdbã. Mam yãame tɩ saam-biisã ra nonga taab wʋsgo. Wẽnnaam nin-buiidã sẽn kʋmd taab woto wã kɩtame tɩ b tõogd n maood ne namsg buud fãa, baa sẽn yaa kɛgeng to-to.

Yʋʋmd 1977 wã, b kos-d lame tɩ d wa zĩnd Bruklin Betɛllẽ wã kiis a wãna, n sõng n tʋm tʋʋmde. Tʋʋmdã sẽn wa n dat n sa wã, siglgã taoor lʋɩtb sullã neb a yiib n wa n yã maam ne a Ruby, n sok tõnd n gese d sã n dat n kell n paa Betɛllẽ wã n tʋmdẽ. La d sakame.

M tʋma ne sull ning sẽn get koe-moonegã yellã n kaoos yʋʋm 24. Naoor wʋsgo, sul-kãng saam-biisã sõngd n welgda yɛl wʋsg sẽn pa nana. Yʋʋma noorã, siglgã taoor lʋɩtb sullã yiisda noy sẽn tik Biiblã zugu. No-kãensã sõnga sull ning sẽn get koe-moonegã yellã, tɩ b tõog n welg yɛl wʋsgo. Leb n sõnga tigims sull yel-gɛtbã, kãsem-dãmbã la so-pakdbã tɩ b paam minim. No-kãensã sõnga neb wʋsg tɩ b lebg kiris-neb tẽeb sẽn bɩ. Woto kɩtame t’a Zeova siglgã paam pãng n paase.

Yʋʋmd 1995 n tãag yʋʋmd 2018 wã, siglgã taoor lʋɩtb sullã tʋma maam tɩ m tɩ kaag Betɛl-dãmb toor-toore. B ra boonda ned a woto tɩ surveillant de zone. M kaaga filiyall taoor lʋɩtb sull neba, Betɛllẽ tʋm-tʋmdba, misioneer-dãmba, n keng b raood la m sõng-b tɩ b tõog n mao ne zu-loees buud toor-toore. D tẽed-n-taasã sẽn da togsd maam ne a Ruby b vɩɩmã sẽn yaa to-to wã kenga d raood wʋsgo. Wala makre, yʋʋmd 2000 wã, d tɩ kaaga Ruwanda saam-biisã. D sẽn wʋm saam-biisã, la Betɛllẽ tʋm-tʋmdbã sẽn maan to-to n yals kãn-kãe yʋʋmd 1994 bu-welsgã sasa wã kenga d raood wʋsgo. B wʋsgã nin-nongds n maan kaalem. Baa ne zu-loe-kɛgemsã, b kell n talla tẽeb la sũ-noogo, n da saagdẽ tɩ manegr n wate.

Masã d fãa tara yʋʋm 80 la zaka. Yʋʋm 20 la woto m sẽn naag Etazĩni filiyallã taoor lʋɩtb sull neb n tʋmdẽ. M zɩ n kẽng inivɛrsite ye. La a Zeova ne a siglgã maasem yĩnga, m paama zãmsg sẽn ka to. Kɩtame tɩ m tõe n zãms neba Biiblã tɩ naf-b wakat fãa yĩnga. (2 Kor. 3:5; 2 Tɩm. 2:2) Mam yãa Biiblã sẽn sõng neb tɩ b maneg b vɩɩmã, n paam zood sõma ne b Naandã. (Zak 4:8) Maam ne a Ruby ket n maanda d sẽn tõe fãa n sõngd neb a taabã tɩ b wilgdẽ tɩ b sũur nooma ne b sẽn bãngd bũmb wʋsg a Zeova zugu, la b sõngd neb a taab tɩ bãmb me bãngd sɩdã. Woto yaa bũmb sẽn yaa zu-zẽkr meng-meng a Zeova Kaset soab fãa sẽn tõe n paame!