1. Sẽn zems ne Malaki 3:16, seb-bʋg la a Zeova tara, la bõe n be a pʋgẽ?

 YƲƲM tusa la woto a Zeova sẽn tar sebr sẽn yaa toor zalle, n gʋlsd neb yʋy a pʋgẽ. Yaa a Abɛll sẽn yɩ pipi wẽn-sakdã yʋʋr la a reng n gʋls be. * (Luk 11:50, 51) Rẽ tɛka, a Zeova paasa neb a taab yʋy. La masã, lebga neb milyõ-rãmb yʋy n be be. Biiblã pʋgẽ, b boonda seb-kãng tɩ “tẽegr sebre,” “vɩɩm sebrã,” la “vɩɩm seb-pindmã.” Sõs-kãngã pʋgẽ, d na n boonda seb-kãng tɩ “vɩɩm sebrã.”—Mal. 3:16; Vẽn. 3:5; 17:8.

2. Ãnd dãmb yʋy la b gʋls vɩɩm sebrã pʋgẽ? Bõe la d tõe n maan n paam tɩ b gʋls d yʋʋrã vɩɩm sebrã pʋgẽ?

² Yaa neb nins sẽn tũ a Zeova ne b sũy fãa, la b nong-a wã yʋy n be sebrã pʋgẽ. B tõe n wa paama vɩɩm sẽn kõn sa. Rũndã-rũndã, d tõe n paamame t’a Zeova gʋls d yʋʋrã vɩɩm sebrã pʋgẽ, d sã n modg n paam zood sõma ne-a, a Bi-ribl a Zeezi Kirist maoongã maasem yĩnga. (Zã 3:16, 36) D saagdame n na n tɩ vɩɩmd saasẽ tɩ yaa tẽngã zugu, d fãa ratame t’a Zeova gʋls d yʋʋrã a sebrã pʋgẽ.

3-4. a) D yʋʋrã sã n zoe n bee vɩɩm sebrã pʋgẽ, wilgdame tɩ d na n wa paama vɩɩm sẽn ka sɛtã bɩ? Wilg-y y leoorã võore. b) Bõe yell la d na n gom sõs-kãngã pʋgẽ, la sõsg ning sẽn pʋgdã pʋgẽ?

³ Woto rat n yeelame tɩ neb nins fãa yʋy sẽn be vɩɩm sebrã pʋgẽ wã na n wa paama vɩɩm sẽn ka sɛtã bɩ? A Zeova sẽn yeel a Moyiiz bũmb ning Yikr 32:33 pʋgẽ wã leokda sok-kãngã. A yeel-a lame yaa: ‘Yaa ned ning sẽn  beeg maamã yʋʋr la m na n yẽes m sebrã pʋga.’ Dẽnd a Zeova tõe n yẽesa ned yʋʋr a sebrã pʋgẽ. Yaa wa a rengd n gʋlsda nebã yʋy ne kerɛyõ. (Vẽn. 3:5) D segd n modgame tɩ d yʋʋrã kell n zĩnd sebrã pʋgẽ, hal t’a Zeova wa maneg n gʋls-a ne biki, rat n yeel tɩ n pa le tõe n yẽes-a ye.

⁴ Woto tõe n kɩtame tɩ d sokd d meng sogs kẽere. Wala makre, bõe la Biiblã yet neb nins yʋy sẽn gʋls vɩɩm sebrã pʋgẽ wã wɛɛngẽ, la b rãmb nins yʋy sẽn pa be be wã wɛɛngẽ? Wakat bʋg la neb nins sẽn paam tɩ b yʋyã na n kell n pa vɩɩm sebrã pʋgẽ wã na n paam vɩɩm sẽn ka sɛtã? La na n yɩɩ wãn to ne neb nins sẽn ki n pa tol n paam n bãng a Zeova wã? Nin-kãensã tõe n paamame tɩ b gʋls b yʋyã vɩɩm sebrã pʋgẽ bɩ? D na n leoka sogs-kãensã sõs-kãngã pʋgẽ, la sõsg ning sẽn pʋgdã pʋgẽ.

ÃND DÃMB YƲY N BE SEBRÃ PƲGẼ?

5-6. a) Wa Filip rãmb 4:3 sẽn wilgdã, ãnd dãmb me yʋy la b gʋls vɩɩm sebrã pʋgẽ? b) Wakat bʋg la b na n paam tɩ b gʋls b yʋyã vɩɩm sebrã pʋgẽ, n pa na n le yẽese?

⁵ Ãnd dãmb yʋy n be vɩɩm sebrã pʋgẽ? Sẽn na yɩl n leok sok-kãngã, d na n goma neb sull a nu yelle. B sʋkã neb kẽer yʋy bee vɩɩm sebrã pʋgẽ, t’a taab yʋy pa be be ye.

⁶ Pipi sullã yaa neb nins a Zeova sẽn yãk tɩ b na n tɩ rɩ naam ne a Zeezi saasẽ wã. B yʋyã zoe n bee vɩɩm sebrã pʋgẽ bɩ? Nye. Tẽn-tʋmd a Poll sẽn yeel a “tʋmd-n-taas” nins sẽn da be Filip tẽngã bũmb ningã wilgdame tɩ sẽn paam-b zaeebã, sẽn yaa neb nins sẽn na n tɩ rɩ naam ne a Zeezi saasẽ wã yʋy zoe n bee vɩɩm sebrã pʋgẽ. (Karm-y Filip rãmb 4:3) La sẽn na yɩl tɩ b yʋyã kell n pa sebrã pʋgẽ, b segd n kell n saka a Zeova. Rẽ poore, b sã n wa paam  b yaoolem bãndã nand tɩ b maan kaalem, wall nand tɩ to-kãsengã sɩnge, a Zeova na n gʋlsa b yʋyã ne bik masã, n pa na n le yẽes ye.—Vẽn. 7:3.

7. Wa Vẽnegr 7:16, 17 sẽn wilgdã, wakat bʋg la kʋʋn-kãsengã neb na n paam tɩ b gʋls b yʋyã vɩɩm sebrã pʋgẽ, n pa na n tol n le yẽese?

⁷ Sull a yiib-n-soabã yaa kʋʋn-kãsengã neba. B yʋyã zoe n bee vɩɩm sebrã pʋgẽ bɩ? Nye. B yʋyã na n ket n bee sebrã pʋgẽ, b sã n wa põs Armagedõn zabrã sasa bɩ? Nye. (Vẽn. 7:14) A Zeezi yeelame tɩ nin-kãensã b sẽn mak ne piisã “na n paama vɩɩm sẽn ka sɛta.” (Mat. 25:46) La nin-kãensã sẽn na n põs Armagedõn zabrã sasa wã pa na n paam vɩɩm sẽn ka sɛtã zĩig pʋgẽ ye. Dẽnd yaa wa b yʋyã na n ket n gʋlsa ne kerɛyõ. Yʋʋm tusr naamã sasa, a Zeezi “na n kɩɩma bãmba, la a na n talla bãmb n kẽng vɩɩm ko-bunds zĩisẽ.” Yaoolem bʋ-kãoorã sasa, neb nins sẽn kell n sak Kiristã ne a Zeova ne b sũy fãa wã na n paamame t’a Zeova gʋls b yʋyã vɩɩm sebrã pʋgẽ, n pa na n tol n le yẽes-b ye.—Karm-y Vẽnegr 7:16, 17.

8. Ãnd dãmb yʋy n pa be vɩɩm sebrã pʋgẽ, la bõe n na n paam-ba?

⁸ Sull a tãab-n-soabã yaa neb nins b sẽn mak ne bʋʋse, tɩ b na n sãam-b Armagedõ zabrã sasa wã. B yʋyã pa be vɩɩm sebrã pʋgẽ ye. A Zeezi yeelame tɩ b “na n paama sãoong sẽn ka sɛta.” (Mat. 25:46) Wẽnnaam vẽnega a Poll t’a wilg tɩ b “na n kaoo nin-kãens bʋʋdo,” la tɩ “b sɩbgrã na n yɩɩ sãoong wakat fãa yĩnga.” (2 Tes. 1:9; 2 Pɩy. 2:9) Na n yɩɩ woto me ne neb nins fãa sẽn yãk yam n beeg vʋʋsem sõngã. Bãmb me na n paama sãoong wakat fãa yĩnga, la pa vɩɩm sẽn ka sɛtã ye. Yaa vẽeneg tɩ b pa na n vʋʋg ye. (Mat. 12:32; Mark 3:28, 29; Ebre. 6:4-6) Masã, bɩ d gom sull a yiibã sẽn ketã yelle. B na n vʋʋg-b lame tɩ b vɩɩmd tẽngã zugu.

ÃND DÃMB N NA N VƲƲGE?

9. Wa Tʋʋm 24:15 sẽn wilgdã, sull a yiibã neb sẽn na n vʋʋg tẽngã zugã la bʋse, la welgr bʋg n be sull a yiibã neb sʋka?

⁹ Biiblã gomda neb sull a yiib sẽn na n wa vʋʋg n vɩɩmd tẽngã zug yelle. Yaa “nin-tɩrsã ne sẽn pa-b nin-tɩrsã.” (Karm-y Tʋʋm 24:15.) “Nin-tɩrsã” yaa neb nins sẽn tũ a Zeova ne b sũy fãa, b sẽn wa n ket n vɩ wã. La “sẽn pa-b nin-tɩrsã” pa tũ a Zeova ne b sũy fãa ye. B talla yel-manesem naoor wʋsgo, sẽn wilgd tɩ b pa nin-tɩrs a Zeova nifẽ ye. Sẽn mik tɩ sull a yiibã fãa neb na n vʋʋgame wã, rat n yeelame tɩ b yʋyã bee vɩɩm sebrã pʋgẽ bɩ? Sẽn na yɩl n paam sok-kãngã leoore, bɩ d gom sull fãa yelle.

10. Bõe yĩng la b sẽn na n vʋʋg “nin-tɩrsã,” la bõe la b sʋkã neb kẽer na n paam n maane? (Ges-y seb-kãngã pʋgẽ “Karemdbã sogsgo,” sẽn gomd vʋʋgrã sẽn na n zĩnd tẽngã zugã yellã.)

¹⁰ “Nin-tɩrsã” yaa sull a naas-n-soabã. Nand tɩ b maan kaalem, b yʋyã ra zoe n bee vɩɩm sebrã pʋgẽ. La b yẽesa b yʋyã b kũumã poor bɩ? Ayo. Bala b ket n vɩɩ a Zeova pʋ-tẽerẽ wã. A Zeova “pa kũ-rãmb Wẽnnaam ye. B yaa nin-vɩɩs Wẽnnaam. Bala, Wẽnnaam nifẽ b fãa vɩɩme.” (Luk 20:38) Woto rat n yeelame tɩ nin-tɩrsã sã n wa vʋʋg tẽngã zugu, b yʋyã na n ket n bee vɩɩm sebrã pʋgẽ. La na n ket n gʋlsa ne kerɛyõ, rat n yeel t’a Zeova tõe n yẽesame. (Luk 14:14) Neb nins sẽn na n vʋʋgã sʋka, kẽer na n paam n yɩɩ “nanambs dũniyã fãa pʋga.”—Yɩɩn. 45:17.

11. Bõe n na n yɩ tɩlɛ ne “sẽn pa-b nin-tɩrsã,” nand tɩ b wa paam tɩ b gʋls b yʋyã vɩɩm sebrã pʋgẽ?

 ¹¹ Sẽn na n baase, sull a nu-n-soabã yaa “sẽn pa-b nin-tɩrsã.” Tõeeme tɩ b sẽn da pa mi a Zeova noyã yĩnga, nand tɩ b maan kaalem b pa maan a Zeova raabã ye. Rẽ n so tɩ b yʋyã ra pa be vɩɩm sebrã pʋgẽ ye. Wẽnnaam sã n wa vʋʋg-ba, na n kõ-b-la weer tɩ b wa paam tɩ b gʋls b yʋyã vɩɩm sebrã pʋgẽ. “Sẽn pa-b nin-tɩrsã” na n wa rata sõngr wʋsgo. Bala b sʋkã neb kẽer tʋma tʋʋm-wẽns wʋsgo, b sẽn wa n ket n vɩ wã. Dẽnd na n yɩɩ tɩlɛ tɩ b zãms-b Wẽnnam noyã, tɩ b bãng b sẽn tõe n tũ rẽ to-to. Sẽn na yɩl n sõng-b tɩ b wa tõog n maan rẽ, Wẽnnaam Rĩungã na n gesame tɩ b paam zãmsg dũniyã gill zugu, hal t’a buud zɩ n zĩnd ye.

12. a) Ãnd dãmb n na n zãms sẽn pa-b nin-tɩrsã? b) Bõe n na n paam neb nins sẽn pa na n sak n tũ bũmb nins b sẽn zãms-bã?

¹² Ãnd dãmb n na n zãms sẽn pa-b nin-tɩrsã? Yaa kʋʋn-kãsengã neba, ne nin-tɩrsã sẽn na n vʋʋgã. Sẽn pa-b nin-tɩrsã sã n dat n wa paam tɩ b gʋls b yʋyã vɩɩm sebrã pʋgẽ, b segd n deng n paama zood sõma ne a Zeova, la b rɩk b mens n kõ-a. A Zeezi Kirist ne sẽn paam-b vʋʋsem sõng zaeebã na n maaga b yĩng n ges sẽn pa-b nin-tɩrsã manesem sẽn yaa to-to ne zãmsg ning b sẽn paamdã. (Vẽn. 20:4) B na n sãama ned ning fãa sẽn pa sak n tũ b sẽn zãms-a bũmb ningã, baa a soab tara yʋʋm koabga. (Eza. 65:20) A Zeova ne a Zeezi mii sẽn be ned sũurẽ. Dẽnd b na n gesame tɩ ned baa a ye ra wa ne sãoong dũni-paalgã pʋgẽ ye.—Eza. 11:9; 60:18; 65:25; Zã 2:25.

‘VƲƲG VƖƖM YĨNGÃ,’ LA ‘VƲƲG BƲƲD YĨNGÃ’

13-14. a) Pĩndã, wãn to la d ra wʋmd a Zeezi goam nins sẽn be Zã 5:29 pʋgẽ wã võore? b) A Zeezi sẽn yeel bũmb ningã wilgda bõe?

¹³ A Zeezi leb n goma neb nins sẽn na n vʋʋg n vɩɩmd tẽngã zugã yelle. Wala  makre, a yeelame: “Wakat n wat tɩ sẽn be-b yaad pʋsẽ wã fãa na n wʋm bãmb koɛɛg n yi. Neb nins sẽn tʋm tʋʋm-sõma wã na n vʋʋga vɩɩm yĩnga, la sẽn tʋm-b tʋʋm-wẽnsã na n vʋʋga bʋʋd yĩnga.” (Zã 5:28, 29) A Zeezi ra rat n yeelame tɩ bõe?

¹⁴ Pĩndã, d ra yetame t’a Zeezi ra gomda tʋʋm nins sẽn na n vʋʋg-bã sẽn na n tʋm b vʋʋgrã poore, rat n yeel tɩ kẽer na n vʋʋgame n tʋm tʋʋm-sõma, t’a taab me vʋʋg n tʋm tʋʋm-wẽnse. La bãng-y t’a Zeezi pa yeel tɩ sẽn na n vʋʋg-bã na n tʋma tʋʋm-sõma wall b na n tʋma tʋʋm-wẽns ye. A ra gomda tʋʋm b sẽn zoe n tʋme, la pa b sẽn na n wa tʋm yell ye. A ra gomda neb sẽn “tʋm tʋʋm-sõma,” la sẽn ‘tʋm-b tʋʋm-wẽns’ yelle. Woto wilgdame tɩ yɩɩ nand tɩ b maan kaalem la b tʋm tʋʋm-kãense. Woto võor yaa nana, bɩ bõe? Bala b pa na n bas ned baa a ye t’a tʋm tʋʋm-wẽns dũni-paalgã pʋgẽ ye. Dẽnd yɩɩ nand tɩ sẽn pa-b nin-tɩrsã maan kaalemã la b tʋm tʋʋm-wẽnsã. Woto wã, a Zeezi sẽn gom ‘vʋʋg vɩɩm yĩnga,’ la ‘vʋʋg bʋʋd yĩngã’ võor yaa bõe?

15. Ãnd dãmb n na n ‘vʋʋg vɩɩm yĩngã,’ la bõe yĩnga?

¹⁵ Nin-tɩrsã sẽn tʋm tʋʋm-sõma nand tɩ b maan kaalmã na n “vʋʋga vɩɩm yĩnga,” bala b yʋyã ra zoe n gʋlsa vɩɩm sebrã pʋgẽ. Woto rat n yeelame tɩ neb “nins sẽn tʋm tʋʋm-sõma wã” vʋʋgrã yell b sẽn gomd Zã 5:29 pʋgẽ wã, ne nin-tɩrsã vʋʋgrã yell b sẽn gomd Tʋʋm 24:15 pʋgẽ wã yaa yembre. D sẽn bilg a võorã woto wã zemsa ne Rom dãmb 6:7 sẽn yet bũmb ningã. B yeta be yaa: “Ned sẽn ki paamame tɩ b bas a yel-wẽnã taale.” Nin-tɩrs-kãensã kũumã sasa, Wẽnnaam basa tʋʋm-wẽns nins b sẽn da tʋmã taale. La a ket n tẽra tʋʋm-sõma nins fãa b sẽn tʋme, b sẽn da wa n ket n vɩ wã. (Ebre. 6:10) La b sã n wa vʋʋge, b segd n kell n saka a Zeova, sẽn na yɩl n paam tɩ b yʋyã kell n zĩnd vɩɩm sebrã pʋgẽ.

16. ‘Vʋʋg bʋʋd yĩngã’ võor yaa bõe?

¹⁶ La na n yɩɩ wãn ne neb nins sẽn tʋm tʋʋm-wẽns nand tɩ b maan kaalmã? Yaa sɩd t’a Zeova basa b yel-wẽnã taale, b sẽn maan kaalmã yĩnga. La b pa tũ-a b sẽn da wa n ket n vɩ wã ye. Dẽnd b yʋyã pa gʋls vɩɩm sebrã pʋgẽ ye. Woto wã, “sẽn tʋm-b tʋʋm-wẽnsã” vʋʋgrã, ne “sẽn pa-b nin-tɩrsã” vʋʋgrã yell b sẽn gomd Tʋʋm 24:15 pʋgẽ wã yaa a ye. Bãmb na n “vʋʋgã bʋʋd yĩnga.” * B na n bʋʋ sẽn pa-b nin-tɩrsã, rat n yeel tɩ b na n gũus n gesa b sã n na n sak n tũu a Zeova. Na n kaoosa bilfu, tɩ b yaool n bãng b sã n na n paamame tɩ b gʋls b yʋyã vɩɩm sebrã pʋgẽ. (Luk 22:30) Yaa sẽn pa-b nin-tɩrsã sã n bas b pĩnd tʋʋm-wẽnsã la b rɩk b mens n kõ a Zeova bal la b na n paam tɩ b gʋls b yʋyã vɩɩm sebrã pʋgẽ.

17-18. Bõe la neb nins fãa sẽn na n vʋʋg tẽngã zugã segd n maan tɩlɛ? ‘Tʋʋm’ nins yell b sẽn gomd Vẽnegr 20:12, 13 pʋgẽ wã yaa bõe?

¹⁷ Neb nins sẽn na n vʋʋgã segd n sak n tũu noy nins b sẽn na n gʋls seb-pindem paalã b sẽn na n lak yʋʋm tusrã sasa wã, baa b ra yaa nin-tɩrse, wall neb sẽn pa  nin-tɩrse. Wẽnnaam vẽnega tẽn-tʋmd a Zã t’a yã rẽ sẽn na n yɩ to-to wã, n yeel yaa: “Mam yãa kũ-rãmbã, b nin-kãsems la b nin-bõoneg tɩ b yas geerã taoore, la b laka seb-pindsi. B laka seb-pindem a to. Yẽ soabã n yaa vɩɩm seb-pindmã. B tika bũmb nins sẽn gʋls seb-pindsã pʋsẽ wã n kao kũ-rãmbã bʋʋd wa sẽn zems b tʋʋma.”—Vẽn. 20:12, 13.

¹⁸ Bõe ‘tʋʋm’ zug la b na n tik n kao sẽn na n vʋʋg-bã bʋʋdo? Yaa tʋʋm nins b sẽn tʋm nand tɩ b maan kaalmã bɩ? Ayo. Tẽeg-y tɩ b sẽn ki wã, b paamame tɩ Wẽnnaam bas b yel-wẽnã taale. Dẽnd b ‘tʋʋmã’ pa tõe n yɩ tʋʋm nins b sẽn da tʋm pĩndã ye. B tʋʋmã bee ne b sã n na n saka zãmsg ning b sẽn na n paam dũni-paalgã pʋgẽ wã, wall b pa na n sake. Baa neb nins sẽn da tũud a Zeova ne b sũy fãa, wala makre, a Nowe, a Sãmwɛll, a Davɩɩd la a Dãniyɛll fãa segd n bao n bãnga a Zeezi Kirist sõma, la b sak n tẽ a kũumã sẽn yɩ maoongã. Nin-kãensã sã n segd n maana woto, dẽnd yaa sẽn pa-b nin-tɩrsã n segd n maan rẽ n tɩ yɩɩda.

19. Bõe n na n paam neb nins sẽn pa na n sak n tũ zãmsg ning b sẽn paame, t’a buud pa na n le zĩndã?

¹⁹ Bõe n na n paam neb nins sẽn pa na n sak n tũ zãmsg ning b sẽn paame, t’a buud pa na n le zĩndã? Vẽnegr 20:15 wã leokda sok-kãngã. B yeta be yaa: “Ned ning fãa yʋʋr sẽn pa gʋls vɩɩm sebrã pʋgẽ, b lob-a-la bugum mogrẽ wã.” Sɩd me, Wẽnnaam na n sãam-b-la wakat fãa yĩnga. Woto yĩnga, d segd n modgame n paam tɩ b gʋls d yʋʋrã vɩɩm sebrã pʋgẽ, hal tɩ kell n pa be wakat fãa.

20. Tʋʋm-bʋg sẽn yaa kãseng la d na n tʋm yʋʋm tusr naamã sasa? (Ges-y sebrã pipi neng fotã.)

²⁰ Yʋʋm tusr naamã sasa na n yɩɩ sũ-noog wakat meng-menga! D na n paam n zãmsa neb ka tɛk a Zeova noyã tẽngã zugu, hal tɩ tʋʋm-kãng buud zɩ n zĩnd ye. Na n yɩɩ wakat nin-tɩrsã ne sẽn pa-b nin-tɩrsã fãa sẽn segd n wilg vẽeneg tɩ b tʋllame n tũ a Zeova noyã. (Eza. 26:9; Tʋʋ. 17:31) Zãms-kãngã sẽn yaa tʋʋm-kãsengã na n yɩɩ wãn to? Sõsg ning sẽn pʋgdã na n sõng-d lame tɩ d bãng rẽ.