Pipi Korẽnt rãmb 15:8 wã pʋgẽ, a Poll yeelame yaa: “Rẽ fãa poore, b vẽnega b meng ne ma-me, wa b sẽn vẽneg b meng ne bi-pɛɛlg sẽn dog tɩ pa ta.” Pĩndã, d ra yetame tɩ vɛrse-kãngã pʋgẽ, wõnda a Poll ra gomda a mengã yelle, a sẽn wa n paam tɩ b vẽneg-a t’a yã a Zeezi sẽn deeg naam saasẽ wã. Woto ra yaa wa a Poll paamame n leb n doge, bɩ n vʋʋg n lebg malɛk n kẽng saasẽ, yʋʋm kobs nand tɩ vʋʋgr a woto buud sɩnge. La d sẽn lebg n maan vaeesg vɛrse wã zugã, d yãame tɩ d segd n toeema bũmb kẽere.

Yaa sɩd tɩ vɛrse-kãngã pʋgẽ, a Poll ra gomda bũmb ning sẽn maane, a sẽn wa n tuub n lebg kiris-nedã. La a sẽn yeel tɩ yẽ yaa wa “bi-pɛɛlg sẽn dog tɩ pa ta” wã võor yaa bõe? Tõe t’a ra pa gomd bũmb a yembr bal yell ye. Bɩ d gese.

A Poll sẽn tuub n lebg kiris-nedã yɩɩ zĩig pʋgẽ, la pa yɩ nana ne-a ye. Naoor wʋsgo, bi-pɛɛlg sẽn dog tɩ pa ta rogem lingda neba. A Soll b sẽn wa n boond t’a Pollã ra togda sor n digd Damaase, n na n tɩ nams kiris-neb nins sẽn da be beenẽ wã. A ra pa mi t’a Zeezi sẽn vʋʋgã na n vẽnega a meng ne-a ye. A Poll sẽn tuub n lebg kiris-nedã linga yẽ menga, la kiris-neb nins a sẽn da rabd n na n tɩ nams Damaasã. Sẽn paase, bũmb ning sẽn maanã namsa a Poll wʋsgo, hal t’a lebg zoang wakat bilf yĩnga.—Tʋʋ. 9:1-9, 17-19.

A tuubgã pa yɩ wakat sẽn zems ye. Gɛrk gom-bil ning b sẽn lebg tɩ “rog tɩ pa ta” wã tõe n dat n yeelame me tɩ biig rogem sẽn pa zems a wakate. Wẽnnaam Sebr ning b sẽn yiis yʋʋmd 1983 wã pʋgẽ, b yeelame yaa: “B yaool n vẽnega b meng ne maam wa biig rogem sẽn ka zems a wakate.” A Poll sẽn wa n tuub n lebg kiris-nedã, rẽ t’a Zeezi ra zoe n leba saasẽ. Neb nins yell a Poll sẽn gom vɛrse nins sẽn loogã pʋgẽ wã paam n yãa a Zeezi a vʋʋgrã poore, nand t’a rʋ saasẽ. La a Poll yẽ pa paam n yã-a ye. (1 Kor. 15:4-8) A paamame t’a Zeezi vẽneg a meng t’a yã-a a vʋʋgrã poore, baa sẽn wõnd pa yɩ wakat sẽn zemsã.

A ra gomda a mengã yell ne sik-m-menga. Biibl mitb kẽer yeelame t’a Poll sẽn yeel woto wã, tõe t’a ra gomd n sãbsda a menga. Sã n yaa woto, dẽnd a Poll sak n deegame t’a ra pa segd ne zu-zẽkr ning a sẽn paamã ye. Sɩd me, a yeelame yaa: “Mam yaa tʋm-tʋmdbã yao-zʋʋga. Mam pa zems tɩ b bool maam tɩ tʋm-tʋmda, mam sẽn nams Wẽnnaam tigingã yĩnga. La Wẽnnaam barkã maasem yĩnga, mam yaa m sẽn yaa bũmb ningã.”—1 Kor. 15:9, 10.

Dẽnd wõnda a Poll ra gomda a Zeezi sẽn vẽneg a meng ne-a zĩig pʋgẽ tɩ ling-a wã, bɩ a sẽn tuub n lebg kiris-ned tɩ pa zems a wakatã, wall a sẽn da tagsd t’a pa segd ne vẽnegr a woto wã. Sẽn yaa a soab fãa, yaa vẽeneg tɩ bũmb ning sẽn paam a Pollã ra tara yõod wʋsg ne-a. Ra yaa kaset t’a Zeezi vʋʋgame, tɩ sãmbg kae ye. Dẽnd pa lingr la a Poll sã n da wa moond koɛɛgã n gomd a Zeezi vʋʋgrã yell fãa, a ra nong n gomd bũmb ning a sẽn yã wã yellã.—Tʋʋ. 22:6-11; 26:13-18.