Wakat ning kisgr sẽn pa na n tol n le zĩndã
Baa d sã n tõogame n pa le kis d taabã, d pa tõe tɩ nebã pa kis taab ye. Neb la b kis zaalem yĩng bala. Woto wã, ãnd n tõe n kɩt tɩ kisgrã sa fasɩ?
Yaa Wẽnnaam a Zeova a ye bal n tõe n tɩ kisgr ra tol n le zĩnd ye. Biiblã sɩd yetame t’a na n wa kɩtame tɩ kisgrã sa fasɩ.—Yel-bũnã 20:22.
WẼNNAAM NA N SÃAMA BŨMB NINS SẼN WAT NE KISGRÃ
-
1. A SƲƖTÃANA. A Sʋɩtãan sẽn yaa malɛk ning sẽn kɩɩs Wẽnnaamã n wa ne kisgrã d sẽn ne rũndã-rũndã wã. Wẽnnaam na n sãama a Sʋɩtãan ne neb nins fãa sẽn kis b taabã wa yẽ wã.—Yɩɩn-sõamyã 37:38; Rom dãmbã 16:20.
-
2. A SƲƖTÃAN DŨNI-WẼNGÃ. Wẽnnaam na n menesa bũmb ning fãa sẽn yaa wẽng n be dũniyã zugã. Wala makre, politikã la tũudmã taoor dãmb sẽn kɩt tɩ nebã kis b taabã. Sẽn paase, Wẽnnaam na n sãama ligdã baoob siglsã sẽn naag ne yão-beedã.—2 Pɩyɛɛr 3:13.
-
3. D SẼN PA ZEMS ZÃNGÃ. Biiblã wilgame tɩ ninsaalbã fãa pa zems zãng ye. B tagsa wã la b tʋʋm-tʋmdɩ wã nong n yaa wẽnga. (Rom dãmbã 5:12) Rẽ kɩtame me tɩ neb wʋsg kis b taabã, bɩ n tar sũ-kẽk ne-ba. Wẽnnaam na n sõnga ninsaalbã tɩ b tõog n bas tagsa la yel-manesem a woto, tɩ rẽ kɩt tɩ kisgr ra tol n le zĩnd ye.—Ezayi 54:13.
BIIBLÃ YETAME TƖ DŨNI-PAALG N WATE, TƖ KISGR PA NA N ZĨND BE YE
-
1. B PA NA N LE MAAN NED KƐGR YE. Wẽnnaam Rĩungã sẽn be saasẽ wã na n sooga tẽngã, tɩ tɩrlem zĩnd wakat sẽn kõn sa. (Dãniyɛll 2:44) Nebã pa na n le tar tags-kɛg b taabã zugu, wall n pa le nand taab ye. Wẽnnaam na n kɩtame tɩ kɛgrã neba sẽn maand taabã sa.—Luk 18:7.
-
2. NEBA FÃA NA N VƖƖMDA LAAFƖ PƲGẼ. Ned baa a ye pa na n le namse, nen-kɛglmã wall zabã yĩng ye. (Yɩɩn-sõamyã 46:10) Tẽngã na n lebga bãan zĩiga. La sẽn nong-b laafɩ wã bal n na n vɩɩmd a zugu.—Yɩɩn-sõamyã 72:7.
-
3. NEBA FÃA NA N VƖƖMDA WAKAT SẼN KÕN SA, N TAR SŨ-NOOGO. Neba fãa na n nonga taaba. (Matiye 22:39) Ned baa a ye pa na n le tar tags-kɛga, wall n tẽeg bũmb sẽn na n nams-a yell ye. Wakat kãnga, ned pa na n le kisg a to ye. Nebã “na n paama vɩ-bãane, ne sũ-noog meng-menga.”—Yɩɩn-sõamyã 37:11.
Y ratame n wa vɩɩmd dũni a woto pʋgẽ bɩ? Masã menga, neb wʋsg basa b taabã kisgri, b sẽn tũud Biiblã sẽn yetã yĩnga. (Yɩɩn-sõamyã 37:8) A Zeova Kaset rãmbã sẽn yaa neb milyõ-rãmb n be dũniyã gill zugã maanda woto. Baa ne b sẽn yaa buud toor-toor neb la b yit tẽns toor-toorã, b nonga taab wa zak a ye neb la b zemsd taaba.—Ezayi 2:2-4.
Yaa ne sũ-noog la a Zeova Kaset rãmbã rat n sõng nebã tɩ b bãng b sẽn tõe n maan to-to n tõog n mao ne yel-kɛgã la bu-welsgã. Yãmb sẽn bãng bũmb ningã tõe n sõng-y lame tɩ y wa bas y taabã kisgri, n pʋd n nong-ba. Y na n bãnga y sẽn tõe n maan nebã neer to-to, baa sẽn kis-b yãmbã. Na n kɩtame tɩ y paam sũ-noog masã menga, tɩ y zoodã ne y taabã me pãng paase. Sẽn yɩɩd fãa, na n sõng-y lame tɩ y bãng y sẽn tõe n maan n wa paam n vɩɩmd wakat ning Wẽnnaam Rĩungã sẽn na n soog tẽnga, tɩ kisgr pa le beẽ wã.—Yɩɩn-sõamyã 37:29.
Découvrez aussi…
GŨUSG GASGÃ
Bõe la Wẽnnaam Rĩungã na n wa maane?
A Zeezi ra miime tɩ yaa Wẽnnaam Rĩungã bal n tõe n welg ãdem-biisã zu-loeesã fãa. Bõe la Rĩun-kãng zoe n maandẽ, tɩ tõe n sõng tõnd tɩ d maneg n kɩs-a sɩda?
