ZÃMSGÃ YĨNGA 45
A Zeova sõngda tõnd tɩ d moond koɛɛgã
“B na n bãngame tɩ Wẽnnaam no-rɛɛs n [da] be b sʋka.”—EZE. 2:5.
YƖƖLL 67 “Moon-y koɛɛgã”
D SẼN NA N YÃ WÃ a
1. D miime tɩ d tõe n wa paama bõe, la d tõe n kɩsa sɩd ne bõe?
D MIIME tɩ nebã na n namsa tõndo, d sẽn moond koɛɛgã yĩnga. Tõe tɩ namsgã na n wa paama pãnga. (Dãn. 11:44; 2 Tɩm. 3:12; Vẽn. 16:21) La d tõe n kɩsa sɩd t’a Zeova na n sõng-d lame. Bõe yĩnga? Bala a Zeova sõngda a nin-buiidã wakat fãa tɩ b tõogd n tʋmd tʋʋmd ning a sẽn kõ-bã, baa tʋʋmdã sẽn yaa toog to-to. Kibar sẽn wilgd rẽ yaa bũmb nins sẽn maan no-rɛɛs a Ezekɩyɛll vɩɩmã pʋgẽ wã, a sẽn wa n moond Zʋɩf-rãmb nins sẽn da be yembd Babilonnã.
2. A Zeova yeela a Ezekɩyɛll tɩ neb nins a sẽn segd n taas koɛɛgã manesem yaa wãna, la bõe yell la d na n gom sõs-kãngã pʋgẽ? (Ezekɩyɛll 2:3-6)
2 Nin-bʋs buud la a Ezekɩyɛll ra segd n taas koɛɛgã? A Zeova yeelame tɩ yaa kɩɩsdba, sũ-kɛglem dãmba, la nin-tõtse. B ra yaa neb sẽn kõsd wa gõose, la sẽn dũmd wa namse. Be bʋʋm la a Zeova sẽn yeel a Ezekɩyɛll n yɩlem t’a ra zoe rabeemã. (Karm-y Ezekɩyɛll 2:3-6.) A Ezekɩyɛll tõog n taasa nin-kãensã koɛɛgã, bala 1) a Zeova n tʋm-a, 2) a paama Wẽnnaam vʋʋsem sõngã, la 3) Wẽnnaam Gomdã paasa a tẽebã pãnga. Wãn to la bõn-kãensã a tãabã sõng a Ezekɩyɛlle, la wãn to la rẽ sõngd tõnd me rũndã-rũndã?
A ZEOVA N TƲM A EZEKƖYƐLL
3. Gom-bʋs n keng a Ezekɩyɛll raoodo, la bõe la a Zeova yeel-a, n wilg t’a teend-a lame?
3 A Zeova yeela a Ezekɩyɛll yaa: “Yaa maam n tʋmd foo.” (Eze. 2:3, 4) Gom-kãensã tog n kenga a Ezekɩyɛll raoodo. Bõe yĩnga? Sãmbg kae t’a tẽegame t’a Zeova ra yeela a Moyiiz ne a Ezayi me woto, a sẽn wa n yãk-b tɩ b na n lebg a no-rɛɛsdbã. (Yik. 3:10; Eza. 6:8) A leb n da miime t’a Zeova sõng-b lame tɩ b tõog n tʋm tʋʋmdã a sẽn kõ-bã, baa sẽn da pa nana wã. Dẽnd a Zeova sẽn yeel a Ezekɩyɛll naoor a yiib fãa tɩ yẽ n tʋm-a wã, seka a na kɩs sɩd t’a Zeova na n teel-a lame. Sẽn paase, a Ezekɩyɛll sebrã pʋgẽ, naoor wʋsg la a yeel yaa: “A Zeova goma ne maam n yeele.” (Eze. 3:16) Dẽnd yaa vẽeneg t’a Ezekɩyɛll ra kɩsa sɩd tɩ yaa a Zeova n tʋm-a. Sẽn paase, a Ezekɩyɛll ba wã ra yaa no-rɛɛsa. Dẽnd d tõe n yeelame t’a wilga a Ezekɩyɛll t’a Zeova ra togsda a no-rɛɛsdbã wakat fãa t’a na n sõng-b lame. Sɩd me, a Zeova goma ne a Zakoob, a Izaak la a Zeremi, n yeel b ned kam fãa yaa: “Mam bee ne foom.”—Sɩng. 26:24; 28:15; Zer. 1:8.
4. Gom-bʋs n keng a Ezekɩyɛll raoodo?
4 A Ezekɩyɛll sẽn wa n taasd Israyɛll nebã koɛɛgã, b fãa la bal manesem yɩɩ wãna? A Zeova ra yeelame yaa: “Israyɛll buudã ka na n dat n kelg foom ye, bãmb sẽn ka rat n kelg maamã yĩnga.” (Eze. 3:7) B sẽn pa kelg a Ezekɩyɛllã, yaa a Zeova la b pa kelge.” Gom-kãensã sõnga a Ezekɩyɛll t’a bãng tɩ nebã sẽn pa kelg-a wã pa rat n yeel t’a pa tʋm a tʋʋmdã sõma ye. A Zeova leb n wilga a Ezekɩyɛll tɩ bʋ-kaoor koees nins a sẽn taasã sã n wa pidsi, nin-buiidã na n bãngame tɩ no-rɛɛs n da be bãmb sʋka. (Eze. 2:5; 33:33) Gom-kãensã kenga a Ezekɩyɛll raood la kõ-a pãnga, t’a tõog n tʋm a tʋʋmdã n baase.
A ZEOVA N TƲM TÕNDO
Wa a Ezekɩyɛlle, nebã namsda tõnd la b mi n pa rat n kelg-d ye. La d miime t’a Zeova bee ne-do (Ges-y sull a 5-6)
5. Bõe la Ezayi 44:8 wã yeta, tɩ kengd tõnd raoodo?
5 Tõnd me sẽn mi tɩ yaa a Zeova n tʋm tõndã kengda d raoodo. A waoog-d lame, a sẽn boond tõnd t’a kaset rãmbã. (Eza. 43:10) Woto yaa zu-zẽkr tɛkẽ. Wa a Zeova sẽn yeel a Ezekɩyɛll t’a ra zoe rabeemã, a yeta tõnd me yaa: “Ra yɛɛs-y ye.” Bõe yĩng tɩ d pa segd n zoe rabeem bɛɛbã taoore? Bala, wa a Ezekɩyɛlle, yaa a Zeova n tʋm tõndo, la a teend-d lame.—Karm-y Ezayi 44:8.
6. a) Bõe la a Zeova yeele, tɩ wilgdẽ t’a teend-d lame? b) Bõe n kengd tõnd daood koɛɛgã mooneg wɛɛngẽ?
6 A Zeova yeelame t’a na n sõng-d lame. Wala makre, nand t’a Zeova yeel tɩ ‘yãmb yaa mam kaset rãmbã,’ a yeelame: “Fo sã n pɩʋʋgd koom, mam na n zĩnda ne foom. Fo sã n dʋʋgd kʋɩlse, koomã ka na n loog ne foom ye. Fo na n kẽna bugum pʋga, la bugmã kõn dɩ foom ye, bug-witmã kõn sãam foom ye.” (Eza. 43:2) D sã n wa moond koɛɛgã, d segda yɛl kẽer sẽn tõe n gɩdg tõndo, tɩ yaa wa kʋɩlg koom sẽn tõe n loog ne-do, la zu-loe-kɛgems sẽn wond bugum. Baa ne rẽ, a Zeova sõngda tõnd tɩ d ket n taasd nebã koɛɛgã. (Eza. 41:13) Wa a Ezekɩyɛll wakatẽ wã, rũndã-rũndã me, nebã fãa la bal pa rat n kelg koɛɛgã ye. La d segd n tẽegame tɩ woto pa rat n yeel tɩ d pa moond koɛɛgã sõma ye. D sẽn mi tɩ d sã n ket n moond koɛɛgã n pa base nooma a Zeova wã, kengda d raoodo. Tẽn-tʋmd a Poll yeelame tɩ “ned kam fãa na n deega a keoor wa sẽn zems a tʋʋmde.” (1 Kor. 3:8; 4:1, 2) Saam-bi-poak sẽn yaa so-pakd hal yʋʋm wʋsg yeelame: “Mam sẽn mi tɩ yaa d modgrã la a Zeova getã noogda m sũuri.”
A EZEKƖYƐLL PAAMA VƲƲSEM SÕNGÃ SÕNGRE
A Zeova vẽnega a Ezekɩyɛll t’a yã a saasẽ saarã, tɩ sõng-a t’a bas a yam t’a Zeova na n sõng-a lame t’a tõog n tʋm a tʋʋmdã n baase (Ges-y sull a 7)
7. A Ezekɩyɛll sã n da wa tẽeg bũmb ning a sẽn yã a vẽnegrã pʋgẽ wã fãa, sõngd-a lame t’a maneg n kɩs sɩd ne bõe? (Ges-y sebrã pipi neng fotã.)
7 A Ezekɩyɛll yãa Wẽnnaam vʋʋsem sõngã pãng sẽn ta zĩig ninga. Wẽnnaam vẽneg-a lame t’a yã a vʋʋsem sõngã sẽn sõngd malɛgsã sẽn tar pãngã, la a sẽn kɩtd tɩ saasẽ saarã ru-zãnt rãmbã sẽn yaa kãsems wʋsgã kẽnda. (Eze. 1:20, 21) A Ezekɩyɛll manesem yɩɩ wãna? A yeelame yaa: “Mam sẽn yã bõn-kãngã, mam lʋɩɩme n fõgen m neng tẽnga.” A Ezekɩyɛll yɛɛsa wʋsgo, n lʋɩ tẽnga. (Eze. 1:28) Rẽ poore, a Ezekɩyɛll sẽn tags bũmb nins a sẽn yã wã zugã, tog n sõng-a lame t’a kɩs sɩd tɩ ne vʋʋsem sõngã sõngre, a na n tõog n moona koɛɛgã n baase.
8-9. a) A Zeova sẽn yeel a Ezekɩyɛll t’a yik n yals yĩngrã, bõe n maane? b) Bõe la a Zeova maan n paase, sẽn na yɩl n kõ a Ezekɩyɛll pãng t’a tõog n tʋm a tʋʋmdã sẽn da pa nana wã?
8 A Zeova yeela a Ezekɩyɛll yaa: “Ninsaal biiga, yik n yaas f naoã zut tɩ m gom ne foo.” Gom-kãensã, n paas vʋʋsem sõngã kõo a Ezekɩyɛll pãng t’a tõog n yik n yalse. A yeelame: “Wẽnnaam vʋʋsmã siga mam zugu, n kɩt tɩ mam yik n yaas m naoã zut.” (Eze. 2:1, 2, MN) Wakat kãng tɛka, a Ezekɩyɛll koe-moonegã sasa fãa, Wẽnnaam sõng-a-la ne a nugã, rat n yeel t’a vʋʋsem sõngã. (Eze. 3:22; 8:1; 33:22; 37:1; 40:1) Wẽnnaam vʋʋsem sõngã sõngã a Ezekɩyɛll tʋʋmd ning Wẽnnaam sẽn da kõ-a wã pʋgẽ, sẽn yaa taas neb sẽn yaa tõatb la sũ-kɛglem dãmb koɛɛgã. (Eze. 3:7) A Zeova yeela a Ezekɩyɛll yaa: “Mam na n kɩtame tɩ f nengã yɩ kɛgenga, wa bãmb dẽndã, la m kɩt tɩ f yɩ sũ-keglem soab wa bãmba. Mam na n kɩtame tɩ f nengã kʋɩ wa diyaama sẽn yaa kɛgeng n yɩɩd pĩigã. Ra zoe-b ye, la f ra bas tɩ b kẽes-f rabeem ye.” (Eze. 3:8, 9) Dẽnd yaa wa a Zeova sẽn da yet a Ezekɩyɛll yaa: ‘Ra bas tɩ nin-kãensã sẽn yaa tʋb-pa-wʋmdbã manesmã koms f raood ye. M na n kõ-f-la pãnga.’
9 Rẽ poore, Wẽnnaam vʋʋsem sõngã sõnga a Ezekɩyɛlle, a sẽn wa n taasd nin-kãensã koɛɛgã. A yeelame: “Sẽn-Ka-Saab nug sẽn tar pãngã rag n sooga maam.” No-rɛɛsã rɩka rasem a yopoe n bʋgs koɛɛg ning a Zeova sẽn da rat t’a taas nebã zugu, n wʋm a võore, n tõog n taas-ba. (Eze. 3:14, 15) Rẽ poore, a Zeova yeel-a lame t’a kẽng tãng longẽ. Beenẽ, Wẽnnaam vʋʋsmã kẽ-a lame. (Eze. 3:23, 24) A Ezekɩyɛll ra segla a meng n sa n na n sɩng koɛɛgã moonego.
WẼNNAAM VƲƲSEM SÕNGÃ KÕTA TÕND ME PÃNGA
Wa a Ezekɩyɛlle, bõe n sõngd tõnd rũndã-rũndã tɩ d ket n moond koɛɛgã? (Ges-y sull 10)
10. Bõe n sõngd tõnd tɩ d tõogd n moond koɛɛgã, la bõe yĩnga?
10 Bõe n sõngd tõnd tɩ d tõogd n moond koɛɛgã? Sẽn na yɩl n paam sok-kãngã leoore, tẽeg-y bũmb ning sẽn sõng a Ezekɩyɛllã. Nand t’a sɩng koɛɛgã moonego, vʋʋsem sõngã kõ-a-la pãng ning sẽn da yaa tɩlɛ ne-a wã. Wa sẽn yɩ to-to ne a Ezekɩyɛllã, rũndã-rũndã me, yaa ne vʋʋsem sõngã sõngr bal la d sẽn tõogd n moond koɛɛgã. Bõe yĩng tɩ d yet woto? Bala a Sʋɩtãan zabda ne tõnd n dat tɩ d bas koɛɛgã moonego. (Vẽn. 12:17) Neb kẽer tagsdame t’a tara pãng wʋsgo, hal tɩ d pa tõe n zab ne-a n tõog ye. La ne koe-moonegã maasem, d tõogd-a lame. (Vẽn. 12:9-11) Wãn to? D sã n wa moond koɛɛgã, d wilgdame tɩ d pa zoet a Sʋɩtãan sẽn maand bũmb ninsã ye. D sã n wa moond koɛɛgã fãa, yaa wa d sẽn tõogd-a. D sẽn ket n moond koɛɛgã baa ne bɛɛbã sẽn dat n gɩdg tõndã, kɩtame tɩ d tõe n yeel tɩ bõe? D tõe n yeela vẽeneg tɩ yaa vʋʋsem sõngã n kõt tõnd pãnga, la t’a Zeova sũur nooma ne-do.—Mat. 5:10-12; 1 Pɩy. 4:14.
11. Wãn to la Wẽnnaam vʋʋsem sõngã tõe n sõng-do? Bõe la d tõe n maane, n ket n paamd vʋʋsem sõngã sõngre?
11 A Zeova sẽn kɩt t’a Ezekɩyɛll nengã lebg kɛgengã sõngda tõnd tɩ d bãng bõe me? Vʋʋsem sõngã tõe n sõnga tõnd tɩ d mao ne zu-loɛɛg buud fãa d sẽn tõe n paam koɛɛgã mooneg sasa. (2 Kor. 4:7-9) Bõe la d tõe n maane, n ket n paamd vʋʋsem sõngã sõngre? D segd n pʋʋsda a Zeova wakat fãa n kot-a a vʋʋsem sõngã, la d kɩs sɩd t’a na n kelga d pʋʋsgã. A Zeezi yeela a karen-biisã yaa: “Mam yeta yãmb tɩ y ket n kotẽ, . . . Ket-y n gẽesd-y . . . Ket-y n kogsd-y kʋɩlengã.” Sɩd me, a Zeova ‘kõta neb nins sẽn kot bãmbã vʋʋsem sõngã.’—Luk 11:9, 13; Tʋʋ. 1:14; 2:4.
WẼNNAAM GOAMÃ KENGA A EZEKƖYƐLL TẼEBÃ
12. Wa Ezekɩyɛll 2:9–3:3 sẽn wilgdã, seb-pindgã yii yɛ, la bõe n da gʋls a pʋgẽ?
12 Wẽnnaam vʋʋsem sõngã sõnga a Ezekɩyɛll t’a paam raoodo, la pa rẽ bal ye. A goamã kenga a tẽebã me. Wẽnnaam vẽnega a Ezekɩyɛll t’a yã nug sẽn zãad seb-pindga. (Karm-y Ezekɩyɛll 2:9–3:3.) Seb-pindgã yii yɛɛnẽ? Bõe la b ra gʋls a pʋgẽ? Wãn to la keng a Ezekɩyɛll tẽebã? Seb-pindgã yii Wẽnnaam geerẽ wã. A Ezekɩyɛll ra yãa malɛgs a naase. Tõe tɩ yaa b sʋkã nin-yend la a Zeova kɩt t’a kõ a Ezekɩyɛll seb-pindgã. (Eze. 1:8; 10:7, 20) Wẽnnaam goam n da be a pʋgẽ. Ra yaa bʋ-kaoor koees a Ezekɩyɛll sẽn da segd n taas tõatbã sẽn da be yembdã. (Eze. 2:7) Seb-pindgã pʋgẽ ne a poorã fãa ra tara gʋlsem.
13. A Zeova yeela a Ezekɩyɛll t’a maan seb-pindgã bõe, la bõe yĩng tɩ ra yaa noog a noorẽ wã?
13 A Zeova yeela a no-rɛɛsã t’a wãb seb-pindgã ‘n pids a pʋga.’ A Ezekɩyɛll sɩd wãba sebrã wa a Zeova sẽn yeel-a wã. A Zeova sẽn kɩt t’a maan woto wã võor yaa bõe? A ra segd n wʋma koɛɛg ning a sẽn da tog n taas nebã võor sõma. Wẽnnaam goamã ra segd n kẽ-a-la sõma, tɩ kɩt t’a tʋll n taas nebã koe-kãnga. Rẽ poore, bũmb n maan hal tɩ ling-a. A sẽn wãb sebrã, yɩɩ ‘noog a noorẽ wã wa sɩɩdo.’ (Eze. 3:3) Bõe yĩnga? A Ezekɩyɛll sẽn da paam n na n gom a Zeova yʋʋr yĩngã ra noom-a-la wʋsgo. (Yɩɩn. 19:9-12) A ra getame t’a sẽn paam t’a Zeova yãk-a t’a na n yɩ a no-rɛɛsã yaa zu-zẽkr tɛkẽ.
14. Bõe n sõng a Ezekɩyɛll t’a segl a meng n sa n na n tʋm tʋʋmd ning Wẽnnaam sẽn kõ-a wã?
14 Rẽ poore, a Zeova yeela a Ezekɩyɛll yaa: “Yok f tʋb n kelg goam nins mam sẽn togsd foomã, n dɩk-a n bĩng f sũurẽ.” (Eze. 3:10) A Zeova sẽn yeel woto wã, a ra ratame t’a Ezekɩyɛll bĩng goam nins fãa sẽn be seb-pindgã pʋgẽ wã a yamẽ, n bʋgsd a zugu. A sẽn maan woto wã, a tẽebã pãng paasame. A bãngame me t’a tara koɛɛg sẽn tar yõod wʋsg n na n taas nin-buiidã. (Eze. 3:11) A Ezekɩyɛll sẽn wʋm Wẽnnaam koɛɛgã võor sõma la a tẽ wã, a ra segla a meng n sa n na n tɩ tʋm tʋʋmd ning a Zeova sẽn kõ-a wã, hal n baas-a.—Yɩɩn-sõamyã 19:15.
WẼNNAAM GOAMÃ KENGDA TÕND TẼEBÃ
15. Sẽn na yɩl n ket n moond koɛɛgã, bõe la d segd n ‘bĩng d sũurẽ’ wã?
15 Sẽn na yɩl n ket n moond koɛɛgã, wakat fãa, tõnd me segd n basdame tɩ Wẽnnaam goamã kengd d tẽebã. D segd n bĩngda goam nins fãa a Zeova sẽn togsd tõndã d sũurẽ wã. Rũndã-rũndã, a Zeova gomda ne tõnd ne Biiblã sẽn yaa a Gomdã maasem. Bõe la d tõe n maan n paam tɩ Wẽnnaam Gomdã sõngd tõnd tɩ d tagsa wã la d tʋlsmã zemsd ne a raabã?
16. Wãn to la d tõe n maan tɩ Wẽnnaam Gomdã kẽ-d sõma?
16 D sã n dɩtẽ, d paamda pãnga. Woto me, d sã n zãmsd Wẽnnaam Gomdã la d bʋgsd a zugu, d tẽebã paamda pãnga. Wa a Ezekɩyɛll sẽn maan to-to ne seb-pindgã, yaa woto la a Zeova rat tɩ tõnd me maan ne a Gomdã. A ratame tɩ tõnd me wãb a Gomdã ‘n pids d pʋga,’ rat n yeel tɩ n bao n wʋm a Gomdã võor sõma. Pʋʋsgã, Biiblã kareng la bʋgsgã tõe n sõng-d lame tɩ d maan rẽ. Pipi, d pʋʋsdame n segl d menga, sẽn na yɩl tɩ Wẽnnaam goamã kẽ-d sõma. Rẽ poore, d karemda bũmb Biiblã pʋgẽ, la d maag d yĩng n bʋgs d sẽn karmã zug sõma. Wãn to la rẽ na n sõng-do? D sã n nong n bʋsgdẽ, d na n wʋmda Wẽnnaam Gomdã võor sõma, tɩ paasd d tẽebã pãnga.
17. Bõe yĩng tɩ tar yõod tɩ d bʋgsd bũmb nins d sẽn karemd Biiblã pʋgẽ wã zugu?
17 Bõe yĩng tɩ tar yõod tɩ d karemd Biiblã la d bʋgsd a zugu? D sã n maand woto, d paamda raood n tõe n moon Rĩungã koɛɛgã masã menga, la bʋ-kaoor koe-toaagã d sẽn na n wa moon ka la bilfã. Sẽn paase, d sã n bʋgsd a Zeova zʋg-sõma wã zugu, tõnd ne yẽ zoodã pãng paasdame. La woto na n kɩtame tɩ d paam bũmb sẽn noom-d wʋsgo. Yaa sũur pʋgẽ bãane, la sũ-noog hakɩɩka.—Yɩɩn. 119:103.
WẼNNAAM KÕTA TÕND PÃNG TƖ D KET N MOONDẼ
18. Bõe la d moonegã zĩigẽ neb na n wa sak n deege, la bõe yĩnga?
18 Tõnd pa no-rɛɛsdb wa a Ezekɩyɛll ye. La d yãka yam n na n kell n taas nebã koɛɛg ning a Zeova sẽn kɩt tɩ b gʋls a Gomdã pʋgẽ wã, hal n tãag a sẽn na n wa yeel tɩ sekame. Bʋ-kaoorã wakat sã n wa ta, d moonegã zĩigẽ nebã ka bʋʋm n na n yeel tɩ Wẽnnaam basame n pa keoog-b ye. (Eze. 3:19; 18:23) B na n sak n deegame tɩ koɛɛg ning d sẽn da taasd-bã ra yita Wẽnnaam nengẽ.
19. Bõe n na n sõng-d tɩ d paam raood n moon koɛɛgã hal n tãag a tɛka?
19 Bõe n na n sõng-d tɩ d paam raood n moon koɛɛgã hal n tãag a tɛka. Yaa bũmb a tãab nins sẽn sõng a Ezekɩyɛllã. D ket n moonda koɛɛgã, bala d miime tɩ yaa a Zeova n tʋm tõndo, tɩ yaa a vʋʋsem sõngã n kõt tõnd pãnga, la t’a Gomdã kengda d tẽebã. Ne a Zeova sõngre, d tʋllame n na n moon koɛɛgã, la d tõog toog “hal tɩ saabã ta.”—Mat. 24:13.
YƖƖLL 65 Wɩng-y ne Wẽnnaam tʋʋmã
a Sõs-kãngã pʋgẽ, d na n goma bũmb a tãab yelle, sẽn sõng no-rɛɛs a Ezekɩyɛll t’a tõog n moon koɛɛgã. D na n yãa a Zeova sẽn sõng a no-rɛɛsã to-to. Rẽ na n sõnga tõnd tɩ d kɩs sɩd t’a Zeova na n sõng-d lame tɩ d tõog n moon koɛɛgã.