ZÃMSGÃ YĨNGA 48
Modg-y tɩ y yamã ket n vẽenẽ, sã n wa yaa toog tɩ y kɩs a Zeova sɩda
“Modg tɩ f yamã ket n vẽen bũmb fãa pʋgẽ.”—2 TƖM. 4:5.
YƖƖLL 123 D sak a Zeova sẽn sigl yɛlã to-to wã
D SẼN NA N YÃ WÃ a
1. Modg tɩ f yamã ket n vẽenã rat n yeelame tɩ bõe? (2 Tɩmote 4:5)
TÕE n yɩɩ toog tɩ d kell n kɩs a Zeova ne a siglgã sɩda, d sã n wa maood ne zu-loeese. Bõe la d tõe n maan tɩ sõng-do? D segd n modgame tɩ d yamã ket n vẽenẽ, n kell n yals kãn-kãe tẽebã pʋgẽ. (Karm-y 2 Tɩmote 4:5.) D sã n kell n pa sɩɩ, n tags neere, la d modg n get yɛlã wa a Zeova sẽn get-b to-to wã, d na n tõogame tɩ d yamã ket n vẽenẽ. Woto na n sõng-d lame tɩ d ra wa tall tags-kɛg ye.
2. Bõe yell la d na n gom sõs-kãngã pʋgẽ?
2 Sõsg ning sẽn loogã pʋgẽ, d yãa yɛl a tãab d sẽn tõe n seg a Sʋɩtãan dũniyã pʋgẽ. Sõs-kãngã pʋgẽ, d na n yãa bũmb kẽer sẽn tõe n maan tigingã pʋgẽ, tɩ yɩ toog tɩ d kell n kɩs a Zeova sɩda. Wala makre, 1) d tẽed-n-taag sã n wa maan bũmb tɩ sãam d sũuri, 2) b sã n wa kibl-du, la 3) siglgã sã n wa toeem bũmb kẽer tɩ yaa toog tɩ d sake. D sã n wa yaa woto, bõe la d tõe n maan tɩ d yamã ket n vẽenẽ, la d kell n kɩs a Zeova ne a siglgã sɩda?
D TẼED-N-TÃAG SÃ N MAAN BŨMB TƖ SÃAM D SŨURI
3. D tẽed-n-taag sã n wa maan bũmb tɩ sãam d sũuri, d manesem segd n yɩɩ wãna?
3 Tigingã kãsem-soab wall d tẽed-n-taag zoe n maana bũmb tɩ sãam y sũur bɩ? Tõe t’a pa maan ne pʋ-toog ye. (Rom. 3:23; Zak 3:2) Baa ne rẽ, a sẽn maan bũmb ningã sãama y sũuri. Tõe tɩ y ra tagsda a sẽn maanã zug wakat fãa, n pa gõe meng ye. Tõe tɩ y soka y meng yaa: ‘Saam-biig sã n tõe n maana woto, rẽ yĩnga yaa a Zeova siglgã pʋgẽ la mam sẽn be wã sɩda?’ Yaool n yaa tagsa a woto la a Sʋɩtãan rat tɩ d talle. (2 Kor. 2:11) Tags-kɛg a woto tõe n kɩtame tɩ d zãag d meng ne a Zeova la a siglgã. D tẽed-n-taag sã n wa maan bũmb tɩ sãam d sũuri, bõe la d tõe n maan tɩ d yamã kẽt n vẽenẽ, n da wa tall tags-kɛga?
4. B sẽn wa n namsd a Zozɛfã, bõe la a maan tɩ wilgdẽ t’a modgame t’a yamã ket n vẽenẽ, la yam bʋg la d tõe n dɩk a mak-sõngã pʋgẽ? (Sɩngre 50:19-21)
4 Ra tall-y sũ-kẽk ye. A Zozɛf sẽn wa n yaa bi-bɩɩga, a kẽem-dãmbã nams-a lame. B ra kis-a lame, tɩ b sʋkã kẽer meng ra rat n kʋ-a. (Sɩng. 37:4, 18-22) B wa n baas n koos-a lame t’a lebg yamba. Woto kɩtame t’a Zozɛf nams wʋsg n kaoos yʋʋm 13. Tõe t’a ra sokda a meng a Zeova sã n sɩd nong-a lame. Tõe me t’a tagsame t’a Zeova raag-a lame n base, wakat kãnga a sẽn da rat sõngrã. La a Zozɛf pa tall sũ-kẽk ye. A modgame t’a yamã ket n vẽenẽ, n kell n pa sɩɩs. A sẽn wa n paam segb n tõe n dok a sũur ne a kẽem-dãmbã, a pa maan woto ye. A pʋd n wilgame t’a nong-b lame la a kõ-b sugri. (Sɩng. 45:4, 5) A Zozɛf sẽn tall manesem a woto wã yaa a sẽn tags neerã yĩnga. A ra pa tagsd a zu-loeesã yell ball ye. Yaa a Zeova sẽn da ratã n da pak-a n yɩɩda. (Karm-y Sɩngr 50:19-21.) Yam bʋg la d tõe n dɩke? B sã n wa namsd yãmba, bɩ y ra tall sũ-kẽk ne a Zeova, wall y tags t’a raaga yãmb n bas ye. Tagsd-y a sẽn sõngd-y to-to tɩ y maood ne y zu-loeesã yelle. Sẽn paase, yɩ-y sug-kõata, la y tẽeg tɩ “nonglem luta yel-wẽn wʋsgo.”—1 Pɩy. 4:8.
5. Wãn to la a Mikeyaas modg t’a yamã ket n vẽenẽ, a tẽed-n-taas sẽn wa n maan bũmb tɩ sãam a sũurã?
5 D gom saam-biig a ye yelle. A yʋʋr la a Mikeyaas, b n yit Amerikdisiidi. A tẽega kãsem-dãmb kẽer sẽn da maan bũmb tɩ sãam a sũur wʋsgo. Ad a sẽn yeele: “Bũmb da zɩ n nams maam woto ye. M sũur sɩd sãama wʋsgo. M sã n da kẽ yʋngo, m pa gõe ye. M da yãbdame n baood sõngre.” Baa ne rẽ, a Mikeyaas modgame t’a yamã ket n vẽenẽ, la a tõog a sũ-sãamsã. A ra pʋʋsda wakat fãa n kot a Zeova t’a kõ-a a vʋʋsem sõngã, la a kõ-a pãng t’a tõog toogo. Sẽn paase, a baoo sagls tõnd sɛbã pʋgẽ. Yam bʋg la d tõe n dɩk a mak-sõngã pʋgẽ? Y tẽed-n-taag sã n wa maan bũmb tɩ sãam y sũuri, bɩ y kell n pa sɩɩ, la y ra bas tɩ y tags-kɛgã kɩt tɩ y maan bũmb sẽn pa sõma ye. Tõe tɩ y pa mi bũmb ning sẽn kɩt tɩ y tẽed-n-taagã gom wall a maan woto wã ye. Rẽ wã, pʋʋs-y a Zeova n kos-a t’a sõng-y tɩ y ges yɛlã wa a soabã sẽn get-b to-to wã. Woto na n sõng-y lame tɩ y ra tags tɩ y tẽed-n-taagã yãka yam n na n sãam y sũur ye. Y leb n na n tõog n basa taale. (Yel. 19:11) Tẽeg-y t’a Zeova mii yellã sẽn namsd yãmb to-to wã, la t’a na n kõ-y-la pãng tɩ y tõog toogo.—2 Kib. 16:9; Koɛ. 5:7.
B SÃ N WA KIBL-DU
6. B sã n kibl-du, bõe yĩng tɩ d segd n ges rẽ wa bũmb sẽn wilgd t’a Zeova nong-d lame? (Ebre-rãmbã 12:5, 6, 11)
6 B sã n wa kibl-du, tõe n sãama d sũur wʋsgo. La sã n yaa d sũurã sẽn sãamã yell la d tagsd n yɩɩda, d tõe n wa getame tɩ kiblgã pa zemse, la tɩ b maan-d-la pãnga. D sã n maan woto, d pa na n tõog n ges kiblgã wa bũmb sẽn wilgd t’a Zeova nong-d lame ye. Rẽ yaool n yaa bũmb sẽn tar yõod wʋsgo. (Karm-y Ebre-rãmb 12:5, 6, 11.) D sã n ket n tagsd kiblgã sẽn sãam d sũurã yelle, d kõta a Sʋɩtãan weer t’a na n tõog-do. A Sʋɩtãan ratame tɩ d zãgs kiblgã, n wa zãag d meng ne a Zeova la a siglgã. B sã n kibla yãmba, bõe la y tõe n maan tɩ y yamã ket n vẽenẽ?
A Pɩyɛɛr sika a meng n sak saglg la kiblgu, n paam t’a Zeova kõ-a tʋʋm sẽn tar yõod wʋsgo (Ges-y sull a 7)
7. a) Wa fotã sẽn wilgdã, a Pɩyɛɛr sẽn sak kiblgã poore, tʋʋm-bʋg la a Zeova kõ-a? b) Yam bʋg la y rɩk a Pɩyɛɛr mak-sõngã pʋgẽ?
7 Sak-y kiblgu, la y toeem yam. A Zeezi kibla a Pɩyɛɛr tẽn-tʋmdb a taabã taoore, la pa yɩ vugr bal ye. (Mark 8:33; Luk 22:31-34) Sãmbg kae tɩ yãnd yõka a Pɩyɛɛre. La baa ne rẽ, a kell n maana sɩd ne a Zeezi. A saka kiblgã la a rɩk yam a kongrã pʋgẽ. Woto kɩtame t’a Zeova keo a Pɩyɛɛre, a sẽn maan sɩdã yĩnga, la a kõ-a tʋʋm sẽn tar yõod wʋsg tigingã pʋgẽ. (Zã 21:15-17; Tʋʋ. 10:24-33; 1 Pɩy. 1:1) Yam bʋg la d tõe n dɩk a Pɩyɛɛr mak-sõngã pʋgẽ? B sã n wa kibl-du, d pa segd tagsd rẽ sẽn sãam d sũurã yell bal ye. D tog saka kiblgã la d toeem d tʋʋm-tʋmdɩ wã. Woto na n nafa tõnd mengã, la naf neb a taabã. D na n talla yõod wʋsg a Zeova la d tẽed-n-taasã nifẽ.
8-9. B sẽn wa n kibl a Bɛrnado wã, a manesem yɩɩ wãn sɩngrẽ wã, la bõe n sõng-a t’a toeem a tagsgã tɩ zemse?
8 D ges bũmb ning sẽn paam saam-biig a ye sẽn yit Mozãmbik, t’a yʋʋr boond t’a Bɛrnado. B wa n deega a kãsem-sobendã tʋʋmd n bas-a. Sɩngrẽ wã, a Bɛrnado manesem yɩɩ wãna? A yeelame yaa: “Mam ra tara sũ-kẽka, bala m sũur da pa noom ne b sẽn kibl-mã ye.” A Bɛrnado ra maanda yɩɩr ne tigingã nebã sẽn na n get-a to-to wã. A paasame yaa: “Kaoosa kiis a wãn tɩ m yaool n sak tɩ b sẽn kibl-mã zemsame, la m le kɩs a Zeova ne a siglgã sɩda.” Bõe n sõng a Bɛrnado t’a wa tall tagsg sẽn zemse?
9 A Bɛrnado toeema a tagsgã. A yeelame: “M sẽn wa n yaa kãsem-soabã, m talla Ebre-rãmb 12:7 wã n sõng neb a taab tɩ b ges kiblgã wa a Zeova sẽn get-a to-to wã. Masã, m soka m meng yaa: ‘Ãnd n segd n tũ vɛrse-kãngã saglgã?’ Yaa a Zeova nin-buiidã fãa, ma-me sẽn naage.” Rẽ poore, a Bɛrnado toeema bũmb wʋsg a vɩɩmã pʋgẽ, tɩ sõng-a t’a le kɩs a Zeova la a siglgã sɩda. A maneg m wɩnga ne Biiblã kareng daar fãa la a bʋgsd a zugu. Baa ne a sẽn da ket n maand yɩɩr ne a tẽed-n-taasã sẽn na n get-a to-to tigingã pʋgẽ wã, a ra naagd-b lame n moond koɛɛgã la a leokd tigissã sasa. Kaoosg zugẽ, b le wa n yãk-a lame t’a lebg kãsem-soaba. Wala a Bɛrnado, b sã n kibl-y lame, bɩ y mogd n da tagsd yãndã yell tɩ loog noor ye. Sak-y saglgã la y toeem y tʋʋm-tʋmdɩ wã tɩ zemse. c (Yel. 8:33; 22:4) Y sã n maan woto, y tõe n basa y yam t’a Zeova na n ning-y-la barka, y sẽn kell n maan sɩd ne yẽ la a siglgã yĩnga.
SIGLGÃ SÃ N WA TOEEM BŨMB TƖ YAA TOOG TƖ D SAKE
10. Bõe la b toeem pĩnd wẽndẽ wã tɩ tõe tɩ yɩɩ toog ne Israyɛll neb kẽer tɩ b kell n maan sɩd ne a Zeova?
10 B sã n wa toeem bũmb kẽer a Zeova siglgã pʋgẽ, tõe n yɩɩ toog tɩ d kell n maan sɩd ne a Zeova. D sã n pa gũusi, tõe n kɩtame meng tɩ d wa bas a Zeova tũubu. Wala makre, d ges bũmb kẽer b sẽn toeem a Moyiiz tõogã tũub sasa, tɩ tõe tɩ yɩɩ toog ne Israyɛll neb wʋsg tɩ b sake. Nand tɩ b lugl tõogã, zak soab fãa ra tara sor n tʋmd maan-kʋʋrã tʋʋmde. B ra meta tẽn-kug n maand maoong n kõt a Zeova, la b zagsã rãmb me yĩnga. (Sɩng. 8:20, 21; 12:7; 26:25; 35:1, 6, 7; Zoob 1:5) La b sẽn lugl tõogã tɛka, zak soab ra pa le tar sor n maan rẽ ye. A Zeova yãka maan-kʋʋdb a Aarõ roogã neb sʋk tɩ b na n maand maoongã. Zak soab sã n da tʋm maan-kʋʋr tʋʋmd n yaool n da pa a Aarõ roogã neda, b ra tõe n kʋ-a lame. d (Maan. 17:3-6, 8, 9) D pa mi sã n yaa toeen-kãng yĩng n kɩt t’a Koore, a Datã, a Abiram, la nanambs 250 wã kɩɩs a Moyiiz ne a Aarõ zu-sobendã ye. (Sõd. 16:1-3) La d miime t’a Koore ne a poorẽ dãmbã pa kell n maan sɩd ne a Zeova ye. A Zeova siglgã sã n wa toeem bũmb tɩ yaa toog tɩ d sake, bõe la d tõe n maan tɩ sõng-do?
B sẽn wa n toeem Kehat buudã neb tʋʋmdã, b sakame n yɩ yɩɩn-yɩɩndba, gũudba, la b get teedã bĩngr dot yelle (Ges-y sull 11)
11. Yam bʋg la d tõe n dɩk Kehat buudã neb mak-sõngã pʋgẽ?
11 Siglgã sã n wa toeem bũmb bɩ d sak n teel rẽ ne d sũur fãa. Israyɛll nebã sẽn wa n be we-rasempʋɩɩgẽ wã, a Zeova yãka Kehat buudã, n kõ-b tʋʋmd sẽn yaa toor zalle. Israyɛll nebã sã n da na n yik n tɩ tilg zĩig a to, Kehat buudã neb kẽer n da rɩkd kãabg koglgã n lʋɩ nin-buiidã fãa taoore. (Sõd. 3:29, 31; 10:33; Zoz. 3:2-4) Ra yaa zu-zẽkr tɛkẽ! La Israyɛll nebã sẽn wa n ta kãagb tẽngẽ wã, yɛlã toeemame. Ra pa le baood tɩ b rɩkd koglgã n toeemd zĩig wakat fãa ye. A Salomo sẽn wa n lebg rĩmã, b yakã Kehat buudã neb kẽer tɩ b yaa yɩɩn-yɩɩndba, tɩ sãnda yaa gũudba, t’a taab ra get teedã bĩngr dot yelle. (1 Kib. 6:16-18; 26:1, 24) B pa yeel zĩig baa a ye tɩ Kehat buudã neb yẽgmame, wall b kosame tɩ b kõ-b tʋʋm sẽn yaa toor zalle, b sẽn da tʋmd tʋʋm-kãensã buud pĩndã yĩng ye. Yam bʋg la d tõe n dɩke? A Zeova siglgã sã n wa toeem bũmbu, baa yaa d tʋʋmd la b toeem-yã, d segd n saka rẽ ne d sũur fãa. Sẽn wa n yaa tʋʋmd ning la b kõ-yã, bɩ y tʋm ne sũ-noogo. Pa y tʋʋmdã n kɩt tɩ y tar yõod a Zeova nifẽ ye. Yãmb sẽn sakd a Zeova wã noom-a lame n yɩɩd tʋʋmd ning fãa y sẽn tʋmd a siglgã pʋgẽ wã.—1 Sãm. 15:22.
12. B sẽn wa n yeel a Zayina t’a bas tʋʋmd ning a sẽn da tʋmd Betɛllẽ wã, a manesem yɩɩ wãna?
12 D gom saam-bi-poak a ye yelle. A yʋʋr la a Zayina n yit Moyẽnoriyã. A ra tara tʋʋmd siglgã pʋgẽ a sẽn da nong wʋsgo, tɩ b wa yeel t’a bas n tʋm tʋʋmd a to. A ra tʋma Betɛllẽ wã n kaoos yʋʋm 23 tɩ b wa kɩt t’a lebg zall so-pakda. Ad a sẽn yeele: “B sẽn kɩt tɩ m toeem tʋʋmdã ra pa noom-m ye. M da getame tɩ m pa le tar yõod ye. M da sokda m meng yaa: ‘Bõe la m maan tɩ pa sõma?’” Sẽn paase, tigingã neb kẽer goma goam sẽn maneg n sãam a sũuri. B ra yetame yaa: “Fo sã n da tʋmd sõma siglgã pʋgẽ, b ra pa na n bas foo tɩ f loog ye.” Wakat n zĩnd t’a Zayina sũurã ra sãamd wʋsgo, t’a sã n da kẽ gãag bɩ a yãbda. La a yeelame yaa: “M pa tol n maan sãmbs ne a Zeova siglgã, wall n sãmbd a Zeova sã n nong-m lame ye.” Bõe la a Zayina maan tɩ sõng-a t’a yamã ket n vẽenẽ?
13. Bõe n sõng a Zayina t’a tõog n mao ne a sũ-sãamsã?
13 A Zayina tõog n maoo ne a sũ-sãangã. Bõe n sõng-a? A karma siglgã sɛb sẽn da gomd a zu-loɛɛgã yelle. Yʋʋmd 2001 wao-fugdg kiuug pipi daar Gũusg Gasgã gom-zug sẽn yaa: “Vous pouvez vaincre le découragement !” wã sõng-a-la wʋsgo. Sõs-kãng pʋgẽ, b goma a Mark sẽn naag Biiblã gʋlsdbã yelle, n wilg t’a sũur tog n sãamame, b sẽn wa n kɩt t’a toeem tʋʋmdã. A Zayina yeelame yaa: “A Mark kibarã n yɩ mam yellã tɩɩm.” A Zayina ra modgdame n be ne a zo-rãmbã. A pa lak a meng n bas tigingã neba, wall a getẽ tɩ yẽ lebga nimbãan ned ye. A baasame n yeel t’a Zeova vʋʋsem sõngã n wilgd a siglgã sore, la t’a yell paka sẽn lʋɩt-b taoor siglgã pʋgẽ wã. A bãngame me t’a Zeova siglgã maanda a sẽn tõe fãa, sẽn na yɩl t’a Zeova tʋʋmdã ket n kẽngd taoore.
14. Bõe la a Zeova siglgã maan tɩ sãam a Valdo sũuri, la bõe n sõng-a?
14 A Valdo yaa kãsem-soab sẽn tar yʋʋm 73, n be Sloveni. B wa n dɩka b tigingã n fãoog ne tiging a to, la b pag b Rĩung roogo. La woto sãama a Valdo sũur wʋsgo. Ad sẽn yeele: “M da pa mi bũmb ning sẽn kɩt tɩ b yãk yam n pag Rĩung ro-neer a woto ye. M sũurã sãamame, bala d ra lebs n manega Rĩungã roog tɩ nan pa kaoos ye. M sẽn yaa ra-wãadã, m da maana te-neeb n ning Rĩungã roogẽ. B sẽn dɩk tõnd tigingã n fãoog ne tiging to wã kɩtame tɩ bũmb kẽer maaneg ra lebg toog ne tõnd a neb nins yʋʋm sẽn vẽsgã.” Bõe n sõng a Valdo t’a tũ siglgã sẽn yãk yam n maan bũmb ningã? Ad a sẽn yeele: “A Zeova siglgã sã n toeem bũmb tɩ d sak n tũ, d paamda barka. Toeeng-kãensã segenda tõnd toeeng-kãseng sẽn wat yĩnga.” B rɩka y tigingã n fãoog tiging a to, wall b kɩtame tɩ y toeem tʋʋmd y sẽn da tar siglgã pʋgẽ tɩ rẽ sãam y sũur bɩ? Bas-y y yam t’a Zeova wʋmda y yɛlã võore. Y sã n teel toeeng a woto, la y kell n maan sɩd ne a Zeova la a siglgã, yaa vẽeneg t’a na n ning-y-la barka.—Yɩɩn. 18:26.
MODG-Y TƖ Y YAMÃ KET N VẼEN BŨMB FÃA PƲGẼ
15. Bũmb sã n maan siglgã pʋgẽ tɩ sãam y sũuri, bõe la y tõe n maan tɩ sõng-y tɩ y yamã ket n vẽenẽ?
15 Dũni-kãngã saab sẽn ta n sa wã, bũmb wʋsg n tõe n maan tigingã pʋgẽ tɩ sãam d sũuri. Woto fãa tõe n kɩtame tɩ lebg toog tɩ d kell n maan sɩd ne a Zeova. Rẽ wã, d segd modgame tɩ d yamã ket n vẽenẽ. Y tẽed-n-taag sã n wa maan bũmb tɩ sãam y sũuri, bɩ y ra tall sũ-kẽk ye. B sã n wa kibl-yã, bɩ y modg n da tags yãndã yell tɩ loog noor ye. Sak-y saglgã la y toeem y tʋʋm-tʋmdɩ wã tɩ zemse. A Zeova siglgã sã n wa toeem bũmb tɩ sãam y sũuri, bɩ y modg n sak rẽ ne y sũur fãa la y tũ.
16. Bõe la y tõe n maan n kell n kɩs a Zeova ne a siglgã sɩdã?
16 Y tõe n kell n kɩsa a Zeova la a siglgã sɩda, baa sã n wa yaa toogo. Sẽn na yɩl n maan rẽ, y segd n modgame tɩ y yamã ket n vẽenẽ, rat n yeel tɩ n pa sɩɩ, n tags neere, la y get yɛlã wa a Zeova sẽn get-b to-to wã. Yãk-y yam n karemd Biiblã kibay sẽn gomd neb sẽn mao ne zu-loe-kãensã buud yelle, la y bʋgs b mak-sõngã zugu. Pʋʋs-y-yã a Zeova n kos sõngre. Ra zãag-y y meng ne y tẽed-n-taasã ye. Sẽn wa n yaa yell ning fãa, a Sʋɩtãan pa na n tõog n welg yãmb ne a Zeova la a siglgã ye.—Zak 4:7.
YƖƖLL 126 Gũus-y y mense, la y tall raoodo
a Tõe n wa yɩɩ toog tɩ d kɩs a Zeova la siglgã sɩda, sẽn yɩɩd fãa bũmb sã n wa maan tigingã pʋgẽ tɩ sãam d sũuri. Sõs-kãngã pʋgẽ d na n goma zu-loees a tãab yelle, la d ges d sẽn tõe n maan n kell n kɩs a Zeova ne a siglgã sɩda.
b D toeema yʋy kẽere.
c Y tõe n paama sagls a taab yʋʋmd 2009 sa-sik kiuug rasem 15 Gũusg Gasgã seb-neng 30, sõsg ning gom-zug sẽn yaa: “Pouvez-vous de nouveau exercer des responsabilités ?”
d Tõogã ra yetame tɩ zak soab sã n da rat n kʋ rũng tɩ yẽ ne a zakã rãmb wãbe, a ra segd n talla rũngã n kẽng sɛk-roogẽ wã, sã n pa a zakã zãra wʋsg ne sɛk-roogã.—Tõo. 12:21.