1. Bõe la a Potifaar pagã ra rat t’a Zozɛf maane, la a Zozɛf manesem yɩɩ wãna?

 DAAR a ye, pag a ye n yeel a Zakoob bi-ribl a Zozɛf yaa: “Wa gãand ne maam.” Pa yɩ nana ne a Zozɛf ye. Pʋg-kãng ra yaa a Zozɛf zu-soab a Potifaar paga. La a Zozɛf pa sak n gãand ne-a ye. Rũndã-rũndã, ned sã n wʋm kiba-kãnga, a tõe n soka a meng yaa: ‘Bõe yĩng t’a Zozɛf pa sake?’ A Potifaar pʋd n da ka yambẽ ye. Sẽn paase, a Zozɛf ra yaa yamba, n be zakã pʋga. Dẽnd a sã n da zãgse, pagã ra tõe n namsa a vɩɩmã. La a Zozɛf kell n zãgsame n pa yo ne-a, baa ne pagã sẽn da pẽdgd-a wã. Bõe yĩnga? A Zozɛf yeelame: “Mam na n yɩɩ a wãn n maan yel-be-kẽen-kãngã n beeg Wẽnnaam?”—Sɩng. 39:7-12.

2. A Zozɛf maana wãn n bãng tɩ yoob yaa yel-wẽnd Wẽnnaam nifẽ?

² A Zozɛf maana wãn n bãng t’a sã n yo ne pagã, yaa ‘yel-be-kẽeng’ Wẽnnaam nifẽ? Yaa yʋʋm kobs-yi poore, la Wẽnnaam yaool n kɩt tɩ b gʋls a Moyiis tõogã pʋgẽ vẽeneg yaa: “Ra yo ye.” (Yik. 20:14) Baa ne rẽ, a Zozɛf ra zoe n mii a Zeova sõma. A ra mii vẽeneg t’a Zeova kisa yoobo. Wala makre, a ra miime tɩ Wẽnnaam lugla kãadmã, n dat tɩ rao kẽ kãadem ne pag a ye bala, tɩ pag me kẽ kãadem ne rao a ye bala. Tõeeme me t’a wʋma naoor a yiibã fãa a Zeova sẽn kẽes a toog n kogl a yaab-poak a Saara wã, rĩm a ye sẽn wa n dat n deeg-a ne pãng n maan a pagã. Sẽn paase, Wẽnnaam ra kogla a Izaak pag a Rebeka me woto. (Sɩng. 2:24; 12:14-20; 20:2-7; 26:6-11) A Zozɛf sẽn tags rẽ fãa zugã, a bãnga sẽn yaa tɩrg la sẽn yaa wẽng Wẽnnaam nifẽ n bake. A sẽn da nong a Zeova sẽn yaa a Wẽnnaamã yĩnga, a ra nonga noy nins a sẽn gãneg tɩrlmã wɛɛngẽ wã me, n da yãk yam n tũud rẽ ne a sũur fãa.

3. Bõe la d na n yã sõs-kãngã pʋgẽ?

 ³ Sãmbg kae tɩ y nonga tɩrlem. D sẽn pa zems zãngã yĩnga, d sã n pa gũusi, d tõe n wa saka dũniyã neb sẽn tagsd to-to tɩrlmã wɛɛngẽ wã nana-nana. (Eza. 5:20; Rom. 12:2) Rẽ wã, d na n yãa tɩrlmã sẽn dat n yɛɛlga, la d sã n nong tɩrlem, rẽ sẽn nafd tõnd to-to. Rẽ poore, d na n yãa bũmb a tãab d sẽn tõe n maane, tɩ sõng-d tɩ d maneg n nong a Zeova noyã.

4. Neb nins sẽn yet tɩ b yaa tɩrsã nong n tara manesem bʋgo?

⁴ Neb nins sẽn yet tɩ b yaa tɩrsã nong n yaa wuk-m-mens rãmba, neb sẽn wɩt b taaba, la neb sẽn tagsd tɩ b sãoo b taabã. Wẽnnaam pa nong ned sẽn tar manesem a woto ye. A Zeezi sẽn wa n be tẽngã zugã, a ninga tũudmã taoor dãmb taale, b sẽn da tagsd tɩ b yaa tɩrs ninsaalbã taoorã yĩnga. (Koɛ. 7:16; Luk 16:15) Ned sẽn maand bũmb nins a Zeova sẽn get tɩ yaa tɩrs pa tol n tagsd t’a sãoo a taabã ye.

5. Wa Biiblã sẽn wilgdã, tɩrlem dat n yeelame tɩ bõe? Kõ-y makre.

⁵ Tɩrlmã yaa zʋg-sõngo. Ned sẽn nong tɩrlem maanda sẽn yaa tɩrg Wẽnnaam a Zeova nifẽ. Biiblã pʋgẽ, b sã n wa gomd “tɩrlem” yelle, b gomda a Zeova noyã sẽn yaa sõma wʋsgã tũub yelle. Walla makre, a Zeova ra wilgame tɩ te-koosdbã segd n talla zɩslem makdg “sẽn zemse.” (Tõo. 25:15) Ebre gom-bil ning b sẽn lebg tɩ pʋ-peelem, bɩ ‘sẽn zemsã’ võor tõe n yɩɩ “tɩrlem” me. Dẽnd kiris-ned sã n dat n yɩ tɩrg Wẽnnaam nifẽ, a segd n maana pʋ-peelem a koosmã la a tʋʋmã fãa pʋgẽ. Ned sẽn nong tɩrlem sã n yã tɩ b maand ned kɛgre, a sũur pa noom ye. Ned sẽn nong tɩrlem sã n dat n “ta a [Zeova] yam zãnga,” nand t’a yãk yam n maan bũmbu, a na n bao n bãnga a Zeova tagsgo.—Kol. 1:10.

6. Bõe yĩng tɩ d segd n kɩs sɩd ne noy nins a Zeova sẽn lugl sẽn yaa sõma la sẽn yaa wẽngã wɛɛngẽ wã? (Ezayi 55:8, 9)

⁶ Biiblã wilgdame t’a Zeova la soab ning sẽn so-a tɩrlmã. Yaa rẽ n so tɩ b boond-a tɩ “tɩrlem soabã.” (Zer. 50:7) A Zeova sẽn yaa Naandã yĩnga, yaa yẽ a ye bal n tar sor n tõe n lugl noyã, sẽn yaa sõma la sẽn yaa wẽngã wɛɛngẽ. D sẽn yaa yel-wẽn-maandb n le pa zems zãngã yĩnga, yaa toog tɩ d bãng sẽn yaa sõma la sẽn yaa wẽngã d toor n bake. La a Zeova yẽ tõeeme, a sẽn zems zãngã yĩnga. (Yel. 14:12; karm-y Ezayi 55:8, 9.) Wẽnnaam sẽn naan tõnd a mengã wõnegã yĩnga, kɩtame tɩ d tõe n maan bũmb nins yẽ sẽn get tɩ yaa tɩrgã. (Sɩng. 1:27) La d sɩd tʋll n maana rẽ. D sẽn nong d saasẽ Ba wã kɩtame tɩ d maand d sẽn tõe fãa n na n dɩk a togs-n-taare.—Efɛ. 5:1.

7. Bõe yĩng tɩ yaa tɩlɛ tɩ d tũud noy kẽere? Rɩk-y makre.

⁷ D sã n tũud noy nins a Zeova sẽn gãneg sẽn yaa sõma la sẽn yaa wẽngã wɛɛngẽ wã, nafd-d lame. Bõe yĩng tɩ d tõe n yeel woto? D rɩk makre. Nebã fãa sã n da met roto, n pa tũud noy nins b sẽn gãneg rotã meebã wɛɛngẽ wã, ra na n yɩɩ wãn to? Ra na n yɩɩ zũnd-zãnd tɛkẽ. Logtor fãa me sã n da maand a yam nebã tɩbsgã wɛɛngẽ, bãad dãmb kẽer ra na n kiime. Dẽnd noy kẽer b sẽn lugl yaa tõnd koglg yĩnga. Woto me, noy nins Wẽnnaam sẽn lugl sõma la wẽngã wɛɛngẽ wã kogenda tõndo.

8. Neb nins sẽn maand sẽn yaa tɩrgã na n paama bark bʋse?

 ⁸ A Zeova ningda neb nins sẽn modgd n tũud a noyã barka. A yeelame yaa: “Nin-tɩrsã na n sooga tẽngã, la b na n paa beenẽ wakat sẽn kõn sa.” (Yɩɩn. 37:29) Neba fãa sã n wa tũud a Zeova noyã, tags-y n ges-y laafɩ, sũ-noogo, la zems-n-taar ning sẽn na n zĩnd d sʋkã. A Zeova ratame tɩ d vɩɩmã sɩd yɩ woto. Sãmbg kae tɩ d fãa tara bʋʋm sẽn seke, n na n nong a Zeova noyã sẽn yaa tɩrsã. Rẽ wɛɛngẽ, bõe la d tõe n maan tɩ sõng-do? Bɩ d gom bũmb a tãab d sẽn tõe n maan yelle.

9. Bõe n tõe n sõng-d tɩ d nong sẽn yaa tɩrga?

⁹ Pipi, nong-y soab ning sẽn lugl-a noyã. Sẽn na yɩl n nong sẽn yaa tɩrgã, d segd n bɩɩsa d nonglmã ne a Zeova, soab ning sẽn lugl-a noy sẽn yaa sõma la sẽn yaa wẽngã wɛɛngẽ wã. D sã n nong a Zeova n paasdẽ, d na n data ne d sũur fãa n tũud a noyã sẽn yaa tɩrsã. Wala makre, a Ãdem ne a Awa sã n da nong a Zeova, b ra pa na n tol n kɩɩs a noorã ye.—Sɩng. 3:1-6, 16-19.

10. Bõe la a Abrahaam maan n bãng a Zeova sõma n paase?

¹⁰ Sãmbg kae tɩ d pa rat n maan wa a Ãdem ne a Awa ye. D sã n baood n bãngd a Zeova n paasdẽ, n nong-a a zʋg-sõma wã yĩnga, la d get yɛlã wa a sẽn get-b to-to wã, d pa na n maan wa a Ãdem ne a Awa ye. D sã n sɩd maand woto, d sẽn nong a Zeova to-to wã pãng na n paasdame. D gom a Abrahaam yelle. A ra nonga a Zeova ne a sũur fãa. Baa ne a sẽn da pa wʋmd a Zeova sẽn yãk yam n na n maan bũmb kẽer võor sõma wã, a pa kɩɩs-a ye. A pʋd n baoome n na n bãng a Zeova sõma n paase. Wala makre, a sẽn wa n bãng t’a Zeova yãka yam n na n sãam Sodom ne Gomoorã, sɩngrẽ wã, a ra maanda yɩɩre, n tagsdẽ tɩ “dũniyã fãa bʋ-kaoodã” na n sãama nin-wẽnsã la nin-tɩrsã fãa sẽn be be wã. Sã n yaa ne a Abrahaam, yaa bũmb sẽn pa sakde. Kɩtame t’a sok a Zeova sogsg wʋsg ne waoogre. A Zeova maaga a yĩng n leok a sogsgã fãa. Baasgo, a Abrahaam wa n bãngame t’a Zeova feesda ninsaal fãa sũuri, la t’a pa na n tol n naag nin-tɩrs ne nin-wẽns n sãam ye.—Sɩng. 18:20-32.

11. Bõe la a Abrahaam maan tɩ wilgdẽ t’a ra nonga a Zeova, la t’a ra kɩs-a-la sɩda?

¹¹ A Abrahaam sẽn paam n sõs ne a Zeova Sodom ne Gomoor sãoongã wɛɛngẽ wã sõng-a-la wʋsgo. Kɩtame t’a nong a Ba a Zeova la a waoogd-a n yɩɩd pĩndã. Kaoosg zugẽ, a Abrahaam wa n segd n maana bũmb sẽn pa nana, tɩ ra na n wilg a sã n sɩd kɩsa a Zeova sɩda. A Zeova yeel-a lame t’a rɩk a bi-ribl a Izaak a sẽn nong wʋsgã, n maan maoongo. A Abrahaam sẽn da mi a Wẽnnaamã sõma masã wã kɩtame t’a pa le sok-a sogsg rẽ wɛɛngẽ ye. A sakame n na n maan a Zeova sẽn yeel t’a maanã. Tags-y n ges-y a Abrahaam sũur sẽn sãam to-to, a sẽn wa n segendẽ n na n tɩ maan maoongã. Tõe t’a lebg n tagsa bũmb nins a sẽn mi a Zeova zugã yell sõma. A ra miime t’a Zeova pa na n tol n maan bũmb sẽn pa tɩrga, bɩ bũmb sẽn wilgd t’a pa nonglem soab ye. Tẽn-tʋmd a Poll yeelame t’a Abrahaam tagsame t’a Zeova tõe n vʋʋga a bi-nongr a Izaake. (Ebre. 11:17-19) A Zeova ra pʋlmame meng t’a Izaak na n paama yagense. La wakat kãng t’a Izaak ra nan  pa tar biig ye. A Abrahaam ra nonga a Ba a Zeova. Rẽnd a ra kɩsa sɩd t’a Zeova na n maana sẽn yaa tɩrga. Baa ne sẽn da pa nana ne-a wã, a sẽn da tẽed a Zeova wã kɩtame t’a sak n na n maan a sẽn yeelã.—Sɩng. 22:1-12.

12. Wãn to la d tõe n dɩk a Abrahaam togs-n-taare? (Yɩɩn-sõamyã 73:28)

¹² Wãn to la d tõe n dɩk a Abrahaam togs-n-taare? Wa a Abrahaam, tõnd me segd n ket n baood n bãngda a Zeova n paasdẽ. D sã n maand woto, d zoodã ne-a pãng na n paasdame, la d na n nong-a lame n yɩɩd pĩndã. (Karm-y Yɩɩn-sõamyã 73:28.) D na n paama sũur-kaset sẽn yaa sõma, n tõogd n get yɛlã wa a Zeova sẽn get-b to-to wã. (Ebre. 5:14) Woto wã, ned sã n wa rat n pirs tõnd tɩ d maan sẽn yaa wẽnga, d pa na n sak ye. D pa na n tol n dat n maan bũmb sẽn na n sãam d saasẽ Ba wã sũuri, la zood ning d sẽn tar ne-a wã ye. Bõe me la d tõe n maane, n wilg tɩ d nonga sẽn yaa tɩrga?

13. Bõe la d tõe n maan tɩ wilg tɩ d nonga tɩrlem? (Yel-bũnã 15:9)

¹³ Yiibu, modg-y n nong-y sẽn yaa tɩrg daar ne a to fãa. D sã n dat n paam pãnga, d modgd n maanda yĩn-wɩsgr daar fãa. Woto me, yɩl n wa tõog n nong a Zeova noyã sẽn yaa tɩrsã, baoodame tɩ d maand modgr daar fãa. Rẽ maaneg daar fãa wã pa bũmb sẽn yɩɩd d nug ye. A Zeova yaa wʋmda. A pa baood tɩ d maan sẽn yɩɩd d pãng ye. (Yɩɩn. 103:14) A wilgame t’a ‘nonga ned ning sẽn baood-a tɩrlem.’ (Karm-y Yel-bũn 15:9.) D sã n baood n na n wa tʋm tʋʋmd takɩ a Zeova siglgã pʋgẽ, d na n ket n maanda modgre, hal n wa paam tʋʋm-kãnga. Yaa woto me, d sã n baood tɩrlem. La a Zeova na n sõng-d-la bilf-bilfu, tɩ d wa tõog n nong sẽn yaa tɩrga.—Yɩɩn. 84:6, 8.

14. Tɩrlem gãntikã yaa bõe, la bõe yĩng tɩ d segd n bob-a?

¹⁴ A Zeova tẽegda tõnd tɩ bao n maan sẽn yaa tɩrg pa bũmb sẽn yaa toog ye. (1 Zã 5:3) Pʋd n na n kogl-d lame. La d  sɩd data koglg a woto daar fãa. Tẽeg-y zab-teed nins tẽn-tʋmd a Poll sẽn gomã yelle. (Efɛ. 6:14-18) Yaa sodaagã zab-teo-bʋg n kogend a sũurã? Yaa “tɩrlem gãntikã” sẽn makd a Zeova noyã sẽn yaa tɩrsã. Wa gãntik sẽn tõe n kogl sodaag sũurã, a Zeova noyã sẽn yaa tɩrsã me tõe n kogla d sũurã, rat n yeel tɩ d tʋlsmã la d tagsa wã, tɩ d ra wa maan bũmb sẽn kɩɩsd a Zeova ye. Rẽ n so tɩ y segd n modg tɩ tɩrlem gãntikã zĩnd zab-teed nins fãa kiris-ned sẽn segd n bobã sʋka.—Yel. 4:23.

15. Wãn to la y tõe n bob tɩrlem gãntikã?

¹⁵ Wãn to la y tõe n bob tɩrlem gãntikã? Yaa y sẽn na n tẽegd a Zeova noyã yell daar fãa, y sẽn yãkd yam n maand bũmb ninsã pʋgẽ. Y sã n wa na n gom bũmb yelle, bɩ n kelg miziki, wall n ges filim, pa rẽ bɩ n karem sebre, bɩ y reng n sok y meng yaa: ‘M sã n maan woto, bõe n na n kẽ m sũurẽ wã? Mam sẽn maan bũmb ningã na n taa a Zeova yam bɩ? Bɩ teenda bũmb a Zeova sẽn get tɩ pa sõma, wala makre, yoobã yɛla, nen-kɛglem, yão-beedo, la rat-m-yembre?’ (Fili. 4:8) Yãmb sẽn yãkd yam n maand bũmb ninsã sã n zemsda ne a Zeova raabã, dẽnd y pa basd tɩ bũmb sẽn pa sõma kẽed y sũurã ye.

16-17. Wãn to la Ezayi 48:18 wã wilgd tɩ d tõe n tũu a Zeova noyã sẽn yaa tɩrsã wakat fãa?

¹⁶ Y mi n maanda yɩɩr y sã n na n tõog n kell n tũu a Zeova noyã sẽn yaa tɩrsã daar ne a to fãa la yʋʋmd fãa bɩ? D gom bũmb ning a Zeova sẽn yeel Ezayi 48:18 pʋgẽ wã yelle. (Karm-y.) A Zeova pʋlmame tɩ d tɩrlmã na n yɩɩ “wa ko-kãsengã ko-zoetem.” Mams-y n ges-y yãmb sẽn na n yas mogrã noore, n get ko-zoetmã bɩ ko-wiisã sẽn watẽ la lebdẽ, tɩ yaa woto wakat fãa wã. Yãmb sẽn yas n getẽ wã, y na n wa maanda yɩɩr n tagsdẽ tɩ ko-wiisã na n wa yalsame bɩ? Ayo. Y miime tɩ yʋʋm tusa la woto ko-wiisã sẽn watẽ la lebdẽ, la tɩ pa na n tol n yals ye.

¹⁷ Yãmb tɩrlmã tõe n yɩɩ wa mogrã ko-zoetmã bɩ ko-wiisã. Wãn to? Y sã n wa rat n yãk yam n maan bũmbu, bɩ y reng n bao n bãng a Zeova sẽn dat tɩ y maanã. Rẽ poore, bɩ y tũ rẽ. Baa y sẽn yãk yam n na n maan bũmb ningã sã n yaa toogo, y saasẽ Ba wã sẽn nong yãmbã na n kell n kõ-y-la pãnga, la a sõng-y tɩ y ket n maand sẽn yaa tɩrg daar fãa.—Eza. 40:29-31.

18. Bõe yĩng tɩ d pa segd n kaood d taabã bʋʋdo?

¹⁸ Tãabo, bas-y y taabã bʋʋd kaoob ne a Zeova. D sẽn modgd n na n tũ a Zeova noyã sẽn yaa tɩrsã, d pa segd n makd d meng ne d taabã, n tagsdẽ tɩ d são-b lame ye. D pa tar sor n na n kao ned bʋʋdo, n yeel t’a pa tɩrg a Zeova nifẽ ye. D segd n tẽegame t’a Zeova la “dũniyã fãa bʋ-kaoodã.” (Sɩng. 18:25) A pa kõ-d sor tɩ d kao d taabã bʋʋd ye. A Zeezi pʋd n yeelame yaa: “Da le kao-y y taabã bʋʋdo, tɩ Wẽnnaam me kõn kao yãmb bʋʋd ye.”—Mat. 7:1. *

19. Bõe la a Zozɛf maane, tɩ wilgdẽ t’a sakame t’a Zeova la bʋ-kaooda?

¹⁹ D le gom a Zozɛf sẽn da yaa nin-tɩrgã mak-sõngã yelle. A ra pa kaood neb a taabã bʋʋdo, baa neb nins sẽn maan-a wẽngã. A kẽem-dãmbã yõk-a lame n koos t’a lebg yamba, la b tɩ yeel a ba wã t’a kiime. Kaoosg zugẽ, a Zozɛf le wa n  paam n bee ne a zakã rãmba. A ra lebga nin-kãsenga, n da tõe n kao a kẽem-dãmbã bʋʋd ne wẽnem, n dok a sũuri. Baa ne a Zozɛf kẽem-dãmbã sẽn da tek yam n kos sugrã, b ra yɛɛsdame t’a Zozɛf na n doka a sũur ne-ba. La a Zozɛf yeel-b lame yaa: “Ra zoe-y rabeem ye! Mam bee Wẽnnaam zĩigẽ la?” (Sɩng. 37:18-20, 27, 28, 31-35; 50:15-21) A Zozɛf sak n deegame tɩ yaa a Zeova bal n tar sor n na n kao bʋʋdo.

20-21. Bõe n tõe n sõng-d tɩ d da wa getẽ tɩ d yaa tɩrs d mens nifẽ?

²⁰ Wa a Zozɛfe, tõnd me basdame t’a Zeova kaood bʋʋdo. Wala makre, d pa yɩt yãg-yãg n yet tɩ d mii bũmb ning sẽn kɩt tɩ d tẽed-n-taasã maand bũmb kẽerã ye. D pa tõe n karem sẽn be ned sũurẽ ye. Yaa ‘a Zeova bal n feesd ninsaalbã sũyã.’ (Yel. 16:2) A nonga ned buud fãa, baa a soabã sẽn yitẽ, la a buudã sẽn yaa a soaba. A Zeova kota tõnd tɩ d “pak [d] sũyã yalenga.” (2 Kor. 6:13) D segd n nonga d tẽed-n-taasã fãa sẽn be dũniyã gill zugã n yaa wa zag-yɛng nebã, n da kaood b bʋʋd ye.

²¹ Sẽn paase, d pa segd n kaood neb nins sẽn pa a Zeova Kaset rãmbã bʋʋd ye. (1 Tɩm. 2:3, 4) Yãmb zoe n kaoo y zakã ned bʋʋdo, n yeel t’a pa tol n tõe n yɩ a Zeova Kaset soab bɩ? D sã n maan woto, d wukda d meng n tagsdẽ tɩ d sãoo d taabã. A Zeova kõta “nebã fãa sẽn be zĩig zãngã” weere, tɩ b tõe n tek yam n kos sugri. (Tʋʋ. 17:30) Tẽegd-y tɩ neb nins sẽn get tɩ b yaa tɩrs b mens nifẽ wã pa tɩrs a Zeova nifẽ ye.

22. Bõe yĩng tɩ y yãk yam n na n nong a Zeova noyã sẽn yaa tɩrsã?

²² D sã n nong a Zeova noyã sẽn yaa tɩrsã, d paamda sũ-noogo, neb a taabã me na n dat n dɩka d togs-n-taare. Woto na n kɩtame tɩ b maneg n nong tõnd ne a Zeova n paase. Bɩ d da tol n bas tɩ d ‘tɩrlem kom la a ko-yũudã’ sa ye. (Mat. 5:6) Bas-y y yam t’a Zeova nee modgr nins fãa y sẽn maandã, la t’a sũur nooma ne rẽ. Baa ne nin-tɩrs sẽn pa le waoog dũni-kãngã pʋgẽ wã, da koms-y raood ye. Tẽegd-y wakat fãa t’a Zeova “nonga nin-tɩrsã.”—Yɩɩn. 146:8.