ZÃMSGÃ YĨNGA 23
Roagdba, sõng-y y kambã tɩ b wa nong a Zeova
“Fo tog n nonga a Zeova sẽn yaa fo Wẽnnaamã ne f sũurã fãa, ne f sɩɩgã fãa, la ne f yamã fãa.”—MAT. 22:37.
YƖƖLL 134 Kambã yaa Wẽnd kũuni
D SẼN NA N YÃ WÃ *
1-2. Yɛl kẽer sã n wa toeem d vɩɩmã pʋgẽ, bõe yĩng tɩ Biiblã sagls kẽer tõe n maneg n tall yõod ne-do?
YI-KÃADEM daare, raoã ne a pagã kelgda sõsg sẽn tik Biiblã zugu, sẽn gomd kãadmã yelle. Sagls nins b sẽn na n paam sõsgã pʋgẽ wã pa bũmb b sẽn da pa mi ye. La daar-n-kãng tɛka, saglsã na n talla yõod ne-b n tɩ yɩɩda. Bõe yĩnga? Bala b na n tũuda rẽ masã b kãadmã pʋgẽ.
2 Yaa woto me, roagdb sẽn yaa kiris-neb sã n wa paam biiga. Tõe tɩ yaa hal sẽn kaoos la b sɩng n kelgd sõss sẽn gomd kambã wubr yelle. La masã, sõs-kãens pʋsẽ saglsã na n talla yõod wʋsg ne-b n tɩ yɩɩda. B paama biig masã n na n wubi. Sɩd yaa tʋʋmd sẽn pa nana! Yɛl kẽer sã n wa toeem d vɩɩmã pʋgẽ, Biiblã sagls kẽer manegd n talla yõod wʋsg ne-do. Yaa rẽ me n kɩt t’a Zeova Kaset rãmbã karemd Wẽnnaam Gomdã wa b sẽn da yeel Israyɛll rĩm-dãmbã tɩ b maanã, la b bʋgsd a zug “daar fãa” wã.—Tõo. 17:19.
3. Bõe yell la d na n gom sõs-kãngã pʋgẽ?
3 Roagdba, bãng-y tɩ y sẽn yaa kiris-nebã, y tara tʋʋm-kãseng sẽn tar yõod wʋsgo, sẽn yaa y sõng y kambã tɩ b bãng a Zeova. Y pa rat bal n sõng y kambã tɩ b bãng a Zeova ye. Y ratame me n sõng-b tɩ b wa nong-a ne b sũy fãa. Bõe la y tõe n maan n sõng y kambã tɩ b wa nong a Zeova. Sõs-kãngã pʋgẽ, d na n yãa Biiblã sagls a naas sẽn tõe n sõng roagdbã. (2 Tɩm. 3:16) D leb n na n yãa Biiblã saglsã tũub sẽn naf roagdb kẽer to-to.
BIIBLÃ SAGLS A NAAS SẼN TÕE N SÕNG ROAGDBÃ
Y sã n baood a Zeova sõngr wakat fãa la y kõt y kambã mak-sõngo, wãn to la na n naf-ba? (Ges-y sull a 4, 8)
4. Bõe la roagdbã tõe n maan n tõog n sõng b kambã tɩ b wa nong a Zeova ne b sũy fãa? (Zak 1:5)
4 Pipi: Bao-y-yã a Zeova sõngre. Kos-y-yã a Zeova t’a kõ-y yam tɩ y tõog n sõng y kambã tɩ b wa nong-a. (Karm-y Zak 1:5.) Yẽ n tõe n kõ-d sagls tɩ naf-d n tɩ yɩɩda. Bʋʋm wʋsg n kɩt tɩ d yet woto. Ad bãmb b yiibu: Pipi, a Zeova n yaa roagd sẽn tar minim n tɩ yɩɩda. (Yɩɩn. 36:10) Yiibu, a sẽn kõt-d sagls ninsã nafd-d-la wakat fãa.—Eza. 48:17.
5. a) Bõe la a Zeova siglgã maand n sõngd roagdbã? b) Wa b sẽn wilg video wã pʋgẽ wã, saam-biig a Amorim ne a pagã sẽn wub b kambã to-to wã sõnga yãmb tɩ y bãng bõe?
5 A Zeova sõngda roagdbã ne a Gomdã la a siglgã maasem, tɩ b paamd bũmb ka tɛk sẽn tik Biiblã zugu, sẽn tõe n sõng-b tɩ b tõog n wub b kambã tɩ b wa nong a Zeova. (Mat. 24:45) Wala makre, roagdbã tõe n paama sagls sõss nins sẽn da yit Réveillez-vous ! wã pʋgẽ t’a gom-zugã yaa “De l’aide pour les familles” wã pʋgẽ. Masã y tõe n paama sõs-kãens d sɩtã pʋgẽ. Sẽn paase, video-rãmb wʋsg n be jw.org pʋgẽ, n tõe n sõng roagdbã tɩ b tũ a Zeova saglsã b kambã wubr wɛɛngẽ. *—Yel. 2:4-6.
6. Bõe la roagd a ye yeel-yã, sagls nins yẽ ne a pagã sẽn paamd ne a Zeova siglgã maasmã wɛɛngẽ?
6 Roagdb wʋsg wilgame tɩ b sũur nooma ne a Zeova sẽn tũnugd ne a siglgã n sõngd-bã. Ad roagd a ye yʋʋr sẽn boond t’a Zo sẽn yeele. “Yɩl n tõog n wub kamb a tãab sɩdã pʋgẽ pa nana ye. Maam ne m pagã pʋʋsda wakat fãa n kot a Zeova sõngre. Naoor wʋsgo, siglgã mi n yiisa sõsg wall video, tɩ kell n zems ne wakat ning d sẽn dat sõngr n tõog n mao ne d zu-loɛɛga. D tũuda a Zeova saglsã wakat fãa.” A Zo ne a pagã yãame tɩ sõssã la video-rãmbã sõngda b kambã tɩ b paamd zood sõma ne a Zeova.
7. Bõe yĩng tɩ roagdbã segd n modg n kõt b kambã mak-sõngo? (Rom dãmbã 2:21)
7 Yiibu: Kõt-y y kambã mak-sõngo. Naoor wʋsgo, kambã gũusd n geta b roagdbã sẽn maand bũmb ninsã, n dɩkd b togs-n-taare. Yaa sɩd tɩ roagd kae n zems zãng ye. (Rom. 3:23) La roagdb nins sẽn tar yamã maanda b sẽn tõe fãa n kõt b kambã mak-sõngo. (Karm-y Rom dãmb 2:21.) Roagd a ye goma kambã yell n yeel yaa: “B yaa wa sɩfõ. Sẽn yaa koom ning fãa pʋgẽ la f sagl-ba, b fõogd-a lame.” A paasame yaa: “F sã n pa maand bũmb ning f sẽn yet-b tɩ b maanã, b togsd-f lame.” Dẽnd y sã n dat tɩ y kambã wa nong a Zeova, segd n yɩɩ vẽeneg tɩ yãmb mengã nonga a Zeova ne y sũur fãa.
8-9. A Ãndere ne a Ema sẽn yeel bũmb ningã sõnga yãmb tɩ y bãng bõe?
8 Bũmb toor-toor la roagdbã tõe n maan n sõng b kambã tɩ b wa nong a Zeova. Saam-biig a ye sẽn tar yʋʋm 17 t’a yʋʋr boond t’a Ãndere yeelame: “Mam roagdbã ra wilgda maam wakat fãa tɩ pʋʋsgã tara yõod wʋsgo. Yʋng fãa, m baaba ra pʋʋsda ne maam, baa m sã n da zoe n pʋʋsa m yembre. Mam roagdbã ra yeta maam ne m yao wã wakat fãa yaa: ‘Yãmb tõe n pʋʋsa a Zeova naoor wʋsgo. Ka yãk sõor ye.’ Woto kɩtame tɩ pʋʋsgã lebg bũmb sẽn tar yõod wʋsg ne maam. Masã mam nong n pʋʋsda a Zeova, la m neẽ t’a yaa m Ba sẽn nong-ma.” Roagdba, tẽegd-y wakat fãa tɩ yaa y sã n nong a Zeova la na n sõng y kambã tɩ bãmb me wa nong-a.
9 D gom saam-bi-poak a ye yʋʋr sẽn boond t’a Ema me yelle. A ba wã wa n loog n basa b zakã rãmba, n bas a ma wã ne sam-kẽenga. Ad a Ema sẽn yeele: “Naoor wʋsgo, m ma ra mi n pa tar ligd ye. La a ra nong n gomda a Zeova sẽn get neb nins sẽn tũud-a wã la a sõngd-b to-to wã yelle. M da nee vẽeneg tɩ m ma sẽn vɩ to-to wã wilgdame t’a sɩd kɩsa sɩd ne a sẽn yetã. M ma ra tũuda bũmb ning a sẽn yet maam tɩ m maanã.” Woto wilgda tõnd bõe? Roagdbã tõe n ket n kõta b kambã mak-sõngo, baa sã n wa pa nana ne-ba.—Gal. 6:9.
10. Segb-bʋs la Israyɛll nebã ra tar n tõe n gom a Zeova yell ne b kambã? (Tõodo 6:6, 7)
10 Tãabo: Nong-y n sõsd-y ne y kambã. Pĩnd wẽndẽ wã, a Zeova ra kõo Israyɛll nebã noor tɩ b gomd yẽ yell ne b kambã wakat fãa. (Karm-y Tõod 6:6, 7.) Roagdbã ra paamda segb buud toor-toor daarã pʋgẽ n tõe n sõs ne b kambã, n sõng-b tɩ b nong a Zeova ne b sũy fãa. Wala makre, bi-ribl ra tõe n sõngda a ba wã n bʋtẽ bɩ n kẽebd koodo. A tão wã me tõe n sõngda b ma wã n sẽtẽ, n wʋgda, la b tʋmd zakã tʋʋm a taaba. Roagdbã ne b kambã sã n naagd taab n tʋmdẽ, b tõe n paam n sõsa bũmb toor-toor sẽn tar yõod wʋsg zugu. Wala makre, b tõe n goma a Zeova maan-neerã yelle, la a sẽn sõngd b zakã rãmb to-to wã me yelle.
11. Wakat-bʋg la roagdbã tõe n paam n sõs ne b kambã?
11 Vɩɩmã pa le yaa wa pĩndã ye. Tẽns wʋsg pʋsẽ, roagdbã pa tõe n paam n be ne b kambã daarã tõr ye. B tõe n bee b tʋʋm zĩigẽ, tɩ b kambã be lekollẽ. Rẽ n so tɩ roagdbã segd n modg n baood sẽk n sõsd ne b kambã. (Efɛ. 5:15, 16; Fili. 1:10) Zak pʋgẽ Biibl zãmsgã sasa me yaa segb roagdbã sẽn tõe n paam n sõs ne b kambã. Saam-biig a ye sẽn yaa bi-bɩɩg t’a yʋʋr boond t’a Alɛgsãndr yeelame: “M ba wã ra yãka wakat takɩ zak pʋgẽ Biibl zãmsgã yĩnga. A pa basd tɩ baa fʋɩ gɩdg tõnd tɩ d pa tõog n maan rẽ ye. Zãmsgã poore, d sõsda ne taaba.”
12. Bõe la zak soab segd n maan zak pʋgẽ Biibl zãmsgã sasa?
12 Y sã n yaa zak soaba, bõe la y tõe n maan tɩ y zak pʋgẽ Biibl zãmsgã yɩ y kambã noogo? Y tõe n zãmsa Vɩɩmd-y wakat sẽn kõn sa! seb-paallã ne y kambã. Yaa sebr sẽn tõe n sõng-y tɩ y tõog n sõs ne y kambã sõma. Y ratame tɩ y kambã pelgd b pʋg n sõsd ne-yã, n togsd-y b tagsg la b zu-loeese. Woto yĩnga, ra tũnug-y ne zak pʋgẽ Biibl zãmsgã sasa n kibl y kambã bɩ n zab-b ye. Da yik-y y sũuri, b sã n wa togs b tagsg tɩ pa zems ne Biiblã sẽn yetã ye. Pʋd n maan-y sũ-noog b sẽn pelgd b pʋg ne yãmbã, la y sõng-b tɩ b ket n maand woto. Yaa y sã n mi y kambã tagsg sẽn yaa a soab la y na n tõog n sõng-b n yɩɩda.
Wãn to la roagdbã tõe n tũnug ne a Zeova sẽn naan bũmb ninsã n sõng b kambã tɩ b bãng a Zeova sẽn yaa Wẽnnaam ning buudã? (Ges-y sull 13)
13. Bõe me la roagdbã tõe n tũnug ne n sõng b kambã tɩ b paam zood sõma ne a Zeova?
13 Roagdba, baood-y segb daar fãa sẽn na yɩl n sõng y kambã tɩ b paam zood sõma ne a Zeova. Pa tɩlɛ tɩ y gũ Biibl zãmsg wakat n yaool n zãms y kambã bũmb a Zeova zug ye. Pag a ye yʋʋr sẽn boond t’a Liza yeelame: “Tõnd tũnugda ne bũmb toor-toor n sõngd d kambã tɩ d bãngd a Zeova. Wala makre, d baagã sã n wa maan bũmb tɩ kɩt tɩ kambã laadẽ, d tũnugda ne rẽ n sõng-b tɩ b bãng t’a Zeova yaa sũ-noog soaba, la t’a kɩtame tɩ tõnd me tõe n paam sũ-noog bũmb toor-toor pʋgẽ.”
Roagdba, yãmb mii y kambã zo-rãmb bɩ? (Ges-y sull 14) *
14. Bõe yĩng tɩ tar yõod tɩ roagdbã sõng b kambã tɩ b paam tũud-n-ta-sõma? (Yel-bũnã 13:20)
14 Naase: Sõng-y y kambã tɩ b paam tũud-n-ta-sõma. Wẽnnaam Gomdã wilgda vẽeneg tɩ d tũud-n-taasã tõe n naf-d lame bɩ n wã-do. (Karm-y Yel-bũn 13:20.) Roagdba, yãmb mii y kambã zo-rãmb bɩ? Yãmb zoe n yã-b lame n paam n sõs ne-b bɩ? Bõe la y tõe n maan n sõng y kambã tɩ b yõg zood ne neb sẽn nong a Zeova? (1 Kor. 15:33) Y tõe n mi n boola neb sẽn tar zood sõma ne a Zeova tɩ b wa naag yãmb n maan bũmb kẽer y zakã pʋgẽ, tɩ sõng y kambã tɩ b paam tũud-n-ta-sõma.—Yɩɩn. 119:63.
15. Bõe la roagdbã tõe n maan n sõng b kambã tɩ b paam tũud-n-ta-sõma?
15 D gom roagd a ye yʋʋr sẽn boond t’a Toni yelle. A wilga yẽ ne a pagã sẽn maan n sõng b kambã tɩ b paam tũud-n-ta-sõma. Ad a sẽn yeele: “Yʋʋm wʋsg la woto maam ne m pagã sẽn nong n boond d tẽed-n-taas sẽn yaa kom-bɩɩs la kãsemb d zakã pʋgẽ. B naagda tõnd n dɩtẽ, la b naagd tõnd n maand d zak pʋgẽ Biibl zãmsgã. Woto, d paamd n bãnga neb nins sẽn nong a Zeova la b tũud-a ne sũ-noogã sõma. D paam n deega tigims sull yel-gɛtba, misioneer-dãmba, la neb a taab d zakã pʋgẽ. D kambã bãnga bũmb wʋsg kibayã b sẽn togs-bã pʋgẽ, b yẽesmã, la tʋʋm nins fãa b sẽn tʋm a Zeova tʋʋmdã pʋgẽ wã. Rẽ fãa sõnga d kambã tɩ b paam zood sõma ne a Zeova.” Roagdba, modg-y n sõng-y y kambã tɩ b paam tũud-n-ta-sõma.
RA KOMS-Y RAOOD YE
16. Y biig sã n wa yeel t’a pa rat n tũ a Zeova y maanda wãna?
16 La yaa wãn to yẽ, y sã n maan y sẽn tõe fãa n na n sõng y kambã, tɩ y biig a ye wa yeel-y t’a pa rat n tũ a Zeova? Ra tags-y tɩ yaa yãmb n pa tʋm y tʋʋmdã sõma ye. A Zeova kɩtame tɩ d fãa tõe n yãk d toorẽ yam, y kambã me sẽn naage, rat n yeel tɩ b sã n na n tũ-a lame bɩ b pa na n tũ-a. Y biig sã n basa a Zeova tũubu, bɩ y ra koms raood n tagsdẽ t’a pa na n le wa ye. Tẽeg-y biig sẽn menemã yel-bũndã yelle. (Luk 15:11-19, 22-24) Biigã tɩ tʋma tʋʋm-wẽns wʋsgo. La baasgo, a wa n lebg n waame. Neb kẽer tõe n yetame yaa: “Yaa yel-bũn bala. M biigã pa tõe n lebg n wa a Zeova nengẽ ye.” A yaool n tõeeme! Pʋd n yɩɩ woto ne bi-bɩɩg a ye yʋʋr sẽn boond t’a Eli.
17. Wãn to la a Eli kibarã keng y raoodo?
17 A Eli goma a roagdbã yell n yeel yaa: “B maana b sẽn tõe fãa sẽn na yɩl n sõng-m tɩ m nong a Zeova la a Gomdã. La m sẽn wa n tar yʋʋm 15, mam lebga bɩ-tõtre.” A Eli wa n soosd n maanda yɛl sẽn pa sõma. A roagdbã modgame n na n sõng-a t’a le paam zood sõma ne a Zeova, la a pa kelg ye. A wa n yii a roagdbã zakẽ n tɩ tʋmd tʋʋm-wẽnse. Baa ne rẽ, a ra mi n sõsda Biiblã zug ne a zoa. Ad a Eli sẽn yeele: “Mam sã n da wa sõsd ne m zoa wã n gomd a Zeova yell fãa, m manegd n tagsda a Zeova yelle. Bilf-bilfã, sɩdã m roagdbã sẽn da bʋd mam sũurẽ wã wa n sɩngame n bund n yita.” A Eli wa n le sɩnga a Zeova tũubu. * Mams-y n ges-y a roagdbã sũy sẽn yɩ noog to-to, b sẽn modg n sõng-a hal a yãadmẽ sẽn na yɩl t’a wa nong a Zeova wã.—2 Tɩm. 3:14, 15.
18. Yãmb tagsg yaa wãn ne roagdb nins sẽn modgd n na n sõng b kambã tɩ b wa nong a Zeova wã?
18 Roagdba, a Zeova kõo yãmb tʋʋmd sẽn tar yõod wʋsgo. A ratame tɩ y sõng y kambã tɩ b wa tũ-a. (Yɩɩn. 78:4-6) Pa tʋʋmd sẽn yaa nana ye. La d pẽgd-y-la wʋsgo, y sẽn maand y sẽn tõe fãa n na n sõng y kambã. Y sã n ket n maan y sẽn tõe fãa n na n sõng y kambã tɩ b wa nong a Zeova, la y wub-b a Zeova kiblgã la a saglsã pʋsẽ, y tõe n basa y yam tɩ d saasẽ Ba wã sẽn nong-dã sũur na n yɩɩ noog ne-yã.—Efɛ. 6:4.
YƖƖLL 135 A Zeova saglga: “M biiga, tall yam.”
^ Roagdb nins sẽn yaa kiris-nebã nonga b kambã wʋsgo. B tʋmda wʋsg n na n sõng tɩ b kambã paam sẽn yaa tɩlɛ ne-bã, la b paam sũ-noog me. La sẽn tar yõod n yɩɩda, b maanda b sẽn tõe fãa n na n sõng-b tɩ b wa nong a Zeova ne b sũy fãa. Sõs-kãngã pʋgẽ, d na n yãa Biiblã sagls a naas sẽn tõe n sõng roagdbã tɩ b tõog n maan woto.
^ Ges-y jw.org pʋgẽ video ning gom-zug sẽn yaa: “A Zeova sõnga tõnd tɩ d bãng n wub d kambã.”
^ Ges-y yʋʋmd 2012 tʋʋl-nif kiuug pipi daar Gũusg Gasgã ne farendã, sõsg ning gom-zug sẽn yaa: “La Bible transforme des vies.”
^ FOTÃ BILGRI: Roagd sẽn tãood baskɛt-boll ne a bi-ribl la ne a bi-riblã zoa, sẽn na yɩl n bãng a bi-riblã zoa sõma.
