1. Bõe yĩng tɩ yaa tɩlɛ tɩ d paam yam ning sẽn yit Wẽnnaam negẽ wã? (Yel-bũnã 4:7, MN)

 YÃMB zoe n yãka yam n na n maan bũmb sẽn tar yõod wʋsg bɩ? Sã n yaa rẽ, sãmbg kae tɩ y pʋʋsa a Zeova n kos yam, y sẽn mi tɩ rẽ yaa tɩlɛ ne-yã yĩnga. (Zak 1:5) Rĩm a Salomo yeelame: “Yam n yaa bũmb ning sẽn tar yõod n yɩɩdã.” (Karm-y Yel-bũnã 4:7, MN.) Yaa vẽeneg t’a Salomo ra pa gomd yam buud fãa ninsaal sẽn tar yell ye. A ra gomda yam ning sẽn yit Wẽnnaam a Zeova nengẽ wã yelle. (Yel. 2:6) La rẽ yĩnga, yam ning sẽn yit a Zeova nengẽ wã tõe n sõnga tõnd tɩ d tõog n mao ne d zu-loeesã rũndã-rũndã bɩ? N-ye, tõeeme. D na n yãa rẽ sõs-kãngã pʋgẽ.

2. Bõe la d tõe n maan n paam yam wʋsgo?

² Neb a yiib n zĩnd pĩnd wẽndẽ wã n da tar yam-kãsẽnga, hal tɩ b ra pẽgd-b rẽ yĩnga. Bũmb a ye me d sẽn tõe n maan n paam yam wʋsgo, yaa d sẽn na n tũud sagls nins b sẽn kõ wã. Pipi, d gom a Salomo yelle. Biiblã yeelame tɩ ‘Wẽnnaam kõo a Salomo yam ne bãng-kãsenga.’ (1 Rĩm. 5:9) Yiibu, d na n goma a Zeezi yelle. A yamã ra ka to ye. (Mat. 12:42) Biiblã pĩnd n goma a Zeezi yell n yeel yaa: “Sẽn-Ka-Saab Sɩɩgã na n siga yẽnda zugu: yaa yam ne bãngr sɩɩga.”—Eza. 11:2.

3. Bõe yell la d na n gom sõs-kãngã pʋgẽ?

³ Wẽnnaam kõo a Salomo ne a Zeezi fãa yam wʋsgo. Rẽ kɩtame tɩ b tõog n kõ sagls wʋsg yɛl kẽer wɛɛngẽ, tɩ tõe n naf nebã fãa. Sõs-kãngã pʋgẽ, d na n goma bãmb b tãab  yelle: D segd n talla tagsa sẽn zems ligdã wɛɛngẽ, tʋʋmã wɛɛngẽ, la d mengã zugu.

4. Bõe wɛɛngẽ la a Salomo ne a Zeezi ra pa wõnd taaba?

⁴ A Salomo yɩɩ rakã-kẽenga, n da vɩ naar pʋgẽ. (1 Rĩm. 10:7, 14, 15) A Zeezi yẽ ra pa tar teed wʋsg ye. A pʋd n da pa tar a toorẽ zak ye. (Mat. 8:20) Baa ne rẽ, b yiibã fãa talla tagsg sẽn zems arzɛkã wɛɛngẽ. Bala yam ning b fãa sẽn da tarã yaa Wẽnnaam a Zeova n kõ-ba.

5. Bõe n wilgd t’a Salomo ra tara tagsg sẽn zems ligdã wɛɛngẽ?

⁵ A Salomo sak n deegame tɩ ligd tõe n kogla neda. (Koɛ. 7:12) D sã n tar ligdi, d tõe n paama bũmb nins sẽn yaa tɩlɛ ne d vɩɩmã, la bũmb a taab d sẽn date. Baa ne a Salomo sẽn da yaa rakã-kẽengã, a bãngame tɩ bũmb kẽer n be tɩ b yõodã yɩɩd ligd hal zĩig sẽn zãre. Wala makre, a yeelame: “Yʋ-noog n são arzegs wʋsgo” (Yel. 22:1) A Salomo yãame me tɩ neb nins sẽn nong ligdã sũur wae n pa noom ne bũmb nins b sẽn tarã ye. (Koɛ. 5:9, 11) A keoog-d lame me tɩ d da teeg ligdã, bala baa d ligdã sẽn zem to-to, tõe n tiig n saa zĩig pʋgẽ.—Yel. 23:4, 5.

6. Bõe n wilgd t’a Zeezi ra tara tagsg sẽn zems arzɛkã wɛɛngẽ? (Matiye 6:31-33)

⁶ A Zeezi ra tara tagsg sẽn zems arzɛgsã wɛɛngẽ. A sũurã ra nooma ne rɩɩbã la rãamã a sẽn da paamdã. (Luk 19:2, 6, 7) Daar a ye, a kɩtame tɩ koom lebg divẽ sẽn yaa sõma wʋsgo. Rẽ n yɩ a pipi yel-solemde. (Zã 2:10, 11) Sẽn paase, a kũumã daare, a ra yerã fuug ligd sẽn yaa toog wʋsgo. (Zã 19:23, 24) La a Zeezi ra pa get tɩ arzɛkã n tar yõod n yɩɩd a vɩɩmã pʋgẽ ye. A yeela a karen-biisã yaa: “Ned pa tõe n yɩ zu-soben-dãmb a yiib yamb ye. . . . Yãmb pa tõe n yaa Wẽnnaam yembse, la y yaa arzɛgsã yembs me ye.” (Mat. 6:24) A Zeezi yeelame tɩ d sã n deng n bao Rĩungã, a Zeova na n gesame  tɩ d paam bũmb nins sẽn yaa tɩlɛ ne-dã.—Karm-y Matiye 6:31-33.

7. Saam-biig a ye sẽn tall tagsg sẽn zems ligdã wɛɛngẽ wã, wãn to la rẽ naf-a?

⁷ D tẽed-n-taas wʋsg tũu sagls nins a Zeova sẽn kõ ligdã wɛɛngẽ wã, tɩ naf-b wʋsgo. D gom saam-biig a ye sẽn yaa rakõore, t’a yʋʋr boond t’a Dãniyɛll yelle. A yeelame: “M sẽn wa n yaa bi-bɩɩga, m yãka yam n na n lʋɩɩs a Zeova tũudmã yɛl taoor m vɩɩmã pʋgẽ.” A Dãniyɛll sẽn pa gĩd a vɩɩmã ne bũmb wʋsgã, a tõog n kẽesa a sẽkã ne a minimã siglgã tʋʋm wʋsg pʋgẽ. A paasame: “M tõe n yeela vẽeneg tɩ m pa tol n maand m bãngẽ ne m sẽn yãk yam ningã ye. Sɩd-sɩda, m sã n da getẽ tɩ arzɛkã baoob n tar yõod n yɩɩd m vɩɩmã pʋgẽ, m da tõe n paama ligd wʋsgo. La m da pa na n paam zo-rãmb nins m sẽn tar rũndã-rũndã wã ye. M sã n da lʋɩɩs ligdã baoob taoor m vɩɩmã pʋgẽ, m da pa na n paam sũ-noog ning m sẽn tar rũndã-rũndã wã, m sẽn kẽes m sẽkã zãng a Zeova tʋʋmdã pʋgẽ wã yĩnga. A Zeova kɩtame tɩ m paam sũ-noog wʋsg ligdã sẽn da pa tõe n kɩt tɩ m paame.” Yaa vẽeneg tɩ d sã n lʋɩɩsd a Zeova tũudmã yɛl taoor d vɩɩmã pʋgẽ la pa ligdã, nafd-d-la wʋsgo.

8. Bõe n wilgd t’a Salomo ra tara tagsg sẽn zems tʋʋmã wɛɛngẽ? (Koɛɛg soaba 5:17, 18)

⁸ A Salomo goma sũ-noog ning ned sẽn tõe n paam a tʋʋmã pʋgẽ wã yelle, n yeel tɩ yaa “Wẽnnaam kũuni.” (Karm-y Koɛɛg soab 5:17, 18.) A yeelame yaa: “Tʋʋmd buud fãa sẽn tʋm ne wɩsg-m-meng tara yõodo.” (Yel. 14:23) A Salomo ra wʋmda a sẽn yetã võore. A ra yaa ned sẽn da tʋmd wʋsgo. A mee roto, a sela reezẽ tɩɩse, n maan zẽed zĩis la bãgse. A mee tẽms me. (1 Rĩm. 9:19; Koɛ. 2:4-6) Ra yaa tʋʋm toogo, la sãmbg kae tɩ kõ-a-la sũ-noogo. La a Salomo pa teeg tʋʋm-kãensã bala, sẽn na yɩl n paam sũ-noog ye. A tʋma tʋʋm wʋsg me a Zeova yĩnga. Wala makre, a lʋɩɩ taoor n ges tɩ b me wẽnd-doog sẽn yaa neere, a Zeova tũudmã yĩnga. Meebã kaoosa yʋʋm a yopoe. (1 Rĩm. 6:38; 9:1) A Salomo sẽn tʋm tʋʋm-kãensã fãa wã poore, a bãngame tɩ ninsaal sẽn tõe n maan bũmb ning tɩ tar yõod n yɩɩda, yaa a sẽn na n tũud a Zeova. A yeelame: “Kelg koɛɛgã fãa baoosgo. Zoe Wẽnnaam la f sak bãmb tõodã.”—Koɛ. 12:13.

9. Bõe n wilgd t’a Zeezi ra pa get t’a nug-tʋʋmdã n tar yõod n yɩɩd a vɩɩmã pʋgẽ?

⁹ A Zeezi ra tʋmda wʋsgo. A sẽn wa n yaa bi-bɩɩga, a ra tʋmda ra-wãarã tʋʋmde. (Mark 6:3) Sãmbg kae t’a roagdbã sũur da nooma ne-a, a sẽn da tʋmd n sõngd n get b zakã rãmb yellã. A Zeezi sẽn da yaa ra-wãar sẽn zems zãngã yĩnga, tõe tɩ neb wʋsg ra nong n bolgd-a-la tʋʋma. A Zeezi sũur da nooma wʋsg ne a tʋʋmdã. Baa ne a sẽn da nong a tʋʋmdã ne a sũur fãa wã, a ra modgd n baooda sẽk a Zeova tũubã yĩnga. (Zã 7:15) Kaoosg zugẽ, a sẽn wa n kẽes a meng zãng koɛɛgã mooneg pʋgẽ wã, a sagla a kɛlgdbã yaa: “Bɩ y ra tʋm rɩɩb ning sẽn sãamdã yĩng ye. La bɩ y tʋm rɩɩb ning sẽn pa sãamde, n kõt vɩɩm sẽn ka sɛtã yĩnga.” (Zã 6:27) Sẽn paase, a sẽn wa n sõsd ne nebã tãngã zugã, a yeel-b lame yaa: “Bĩng-y yãmb paoongã saasẽ.”—Mat. 6:20.

10. Zu-loe-bʋg la ned tõe n paame, a sẽn yaa ned sẽn tʋmd sõma yĩnga?

¹⁰ D sã n tũud sagls nins a Zeova sẽn  kõt tõndã, na n sõng-d lame tɩ d tall tagsg sẽn zems d nug-tʋʋmdã wɛɛngẽ. D sẽn yaa kiris-nebã, b sagend-d lame tɩ d ‘wɩsg d meng n tʋme, n tʋm tʋʋmd sẽn yaa sõma.’ (Efɛ. 4:28) Tʋʋmã taoor dãmb mi n pẽgd-d-la d sẽn yaa pʋ-peelem dãmb n tʋmd ne d sũy fãa wã, tɩ b sũy noom ne d sẽn tʋmd to-to wã me. Woto tõe n kɩtame tɩ d wa sɩng n tʋmd lɛɛr-dãmb wʋsgo, d sẽn dat tɩ d tʋʋmdã taoor soab pẽg a Zeova Kaset rãmbã yĩnga. D sã n maand woto, d tõeeme n wa pa le tar sẽk n na n zĩnd ne d zakã rãmba, bɩ n tʋmd d tũudmã tʋʋm ye. Woto wã, d segd n toeema yɛl kẽere, n tõog n paam sẽk n maand bũmb nins sẽn tar yõod n yɩɩdã.

11. Bõe la saam-biig a ye bãng-yã, tall tagsg sẽn zems nug-tʋʋmdã wɛɛngẽ wã?

¹¹ Saam-biig a ye sẽn yaa bi-bɩɩg t’a yʋʋr boond t’a Wiliyam yãame tɩ f sã n tall tagsg sẽn zems f nug-tʋʋmdã wɛɛngẽ, nafda wʋsgo. A goma kãsem-soab a ye a sẽn da tʋmd ne yell n yeel yaa: “Yaa ned sẽn tʋmd sõma, la a tar tagsg sẽn zems a nug-tʋʋmdã wɛɛngẽ. A sẽn tʋmd sõma wã kɩtame t’a tar yʋ-noog a raadensã nifẽ. La zaabr sã n ta, tʋʋmã sigb poor bala, a kuiisame n tɩ paam n be ne a zakã rãmba, la a mi n maand bũmb kẽer a tuudmã yĩnga. Hakɩɩka, a tara sũ-noog wʋsg a vɩɩmã pʋgẽ.” *

12. Bõe la a Salomo maan tɩ wilg t’a ra tara tagsg sẽn zems a mengã zugu? La bõe n wilgd t’a tagsgã wa n toeemame?

¹² A Salomo sẽn wa n tũud a Zeova ne a sũur fãa wã, a ra tara tagsg sẽn zems a mengã zugu. A sẽn wa n yaa bi-bɩɩga, a sak n deegame tɩ pa bũmba fãa la a mi ye. Rẽ n so t’a ra kot a Zeova sõngre. (1 Rĩm. 3:7-9) A sẽn wa n sɩng a naamã rɩɩbã, a bãngame tɩ wuk-m-meng tõe n  waa ne yelle. Ad a sẽn yeele: “Tɩtaam n dengd taoor tɩ sãoong pʋgle, la wuk-m-meng n lʋɩt taoore, tɩ lʋɩɩs pʋgle.” (Yel. 16:18) La bʋko, kaoosg zugẽ, a Salomo pa tõog n tũ a mengã saglgã ye. A naamã sasa, a wa n lebga wuk-m-meng soaba, n sɩng a Zeova noyã kɩɩsgo. Wala makre, tõogã pʋgẽ, noor n da be be n yetẽ tɩ rĩm pa segd n “peeg pagb wʋsg tɩ b wa kɩt t’a bʋdg ye.” (Tõo. 17:17) A Salomo kɩɩsa no-kãnga, n dɩks pagb 700 la pʋg-rɩkds 300. B wʋsgã ra pʋʋsda bõn-naandse. (1 Rĩm. 11:1-3) Tõe t’a Salomo ra yeta a meng bal tɩ woto pa yell ne yẽ ye. La baasgo, a wa n namsame, a sẽn kɩɩs a Zeova wã sẽn wa ne zu-loees ninsã yĩnga.—1 Rĩm. 11:9-13.

13. D sã n bʋgs a Zeezi sik-m-mengã zugu, sõngda tõnd tɩ d bãng bõe?

¹³ A Zeezi kell n sika a menga, n tall tagsg sẽn zems a mengã zugu. Nand t’a wa tẽngã zugã, a tʋma a Zeova tʋʋm wʋsgo. A Zeezi maasem yĩng la b “naan bũmb a taabã fãa sẽn be saasẽ la sẽn be tẽngã zugu.” (Kol. 1:16) A lisgã sasa, sãmbg kae t’a tẽega bũmb wʋsg a sẽn maane, a sẽn wa n be ne a Ba wã. (Mat. 3:16; Zã 17:5) La woto fãa pa kɩt t’a Zeezi lebg wuk-m-meng soab ye. A pʋd n zɩ n tall manesem sẽn wilgd t’a tagsdame t’a sãoo neb a taabã ye. A yeela a karen-biisã t’a sẽn wa tẽngã zugã, pa sẽn na yɩl tɩ “neb sõng bãmb ye. B waame n na n sõng nebã, la b kõ b vɩɩmã tɩ yao neb wʋsg yĩnga.” (Mat. 20:28) A sika a meng n sak n deeg t’a pa tõe n maan baa fʋɩ a toor ye. (Zã 5:19) Sik-m-meng tek woto! A Zeezi kõo tõnd mak-sõng sẽn ka to.

14. Bõe la a Zeezi yeel tɩ sõngd tõnd tɩ d tall tagsg sẽn zems d mengã zugu?

¹⁴ A Zeezi yeela a karen-biisa tɩ b tall tagsg sẽn zemse b mensã zutu. Daar a ye, a Zeezi yeel-b lame yaa: “Baa yãmb zugã zoobd fãa sõdame.” (Mat. 10:30) Gom-kãngã tõe n kɩtame tɩ d bas d yam, sẽn yɩɩd fãa, d sã n wa tagsdẽ tɩ d ka võore. Wilgdame tɩ d saasẽ Ba wã nand-d lame, la tɩ d tara yõod wʋsg a nifẽ. A Zeova sẽn  sak tɩ d tũud-a la a getẽ tɩ segdame tɩ d wa paam vɩɩm sẽn kõn sa wã a dũni-paalgã pʋgẽ wã, d pa segd n tags tɩ d ka yõod a nifẽ ye.

15. a) Bõe la Gũusg Gasgã yeel-yã, tɩ tõe n sõng-d tɩ d tall tagsg sẽn zems d mengã zugu? b) Wa fotã sẽn be seb-neng 24 sẽn wilgdã, sã n yaa d mengã yell bal n pak-do, bark-bʋs la d na n bõne?

¹⁵ Sẽn zems yʋʋm 15 woto, Gũusg Gasgã ra yeelame tɩ d segd n talla tagsg sẽn zems d mengã zugu. Ad b sẽn yeelã: “Yaa vẽeneg tɩ d pa rat n pẽg d meng tɩ loog n wa lebg tɩtaam soaba, la d pa rat n tags tɩ d ka bark me ye. D segd n talla tagsg sẽn zems d mengã zugu, n bãng d zʋg-sõma wã la d pãn-komsmã. Rẽ wɛɛngẽ, pag a ye sẽn yaa kiris-ned yeela woto: ‘Mam pa nin-wẽnga, la m sõmblem pa yɩɩd neb a taaba me ye. Mam tara zʋg-sõma la pãn-kõmsem wa neba fãa.’” * Yãmb pa ne tɩ d sã n tall tagsg sẽn zems d mengã zugu tõe n naf-d lame sɩda?

16. Bõe yĩng t’a Zeova kõt tõnd sagls sẽn na n sõng-d tɩ d paam yam?

¹⁶ A Zeova kõta tõnd sagls ne a Gomdã maasem, n na n sõng tõnd tɩ d tall yam. A nong-d lame, la a rat tɩ d paam sũ-noogo. (Eza. 48:17, 18) Bũmb d sẽn tõe n yãk yam n maan tɩ yaa sõma n yɩɩda, la kõ-d sũ-noog hakɩɩka, yaa d sẽn na n lʋɩɩs a Zeova raabã taoor d vɩɩmã pʋgẽ. D sã n maand woto, d na n gila zu-loees wʋsg neb nins sẽn lʋɩɩsd ligdã, b nug-tʋʋmdã, wall b mensã raab taoorã sẽn paamde. Bɩ d ned kam fãa modg n yɩ ned sẽn tar yam, n noog Zeova sũuri.—Yel. 23:15.