1. Sã n yaa ne Vẽnegr sebrã, bõe la a Sʋɩtãan maand Wẽnnaam nin-buiidã?

 VẼNEGR sebrã wilgdame tɩ Wẽnnaam Rĩungã lugla saasẽ, la tɩ b riga a Sʋɩtãan saasẽ. (Vẽn. 12:1-9) Woto kɩtame tɩ sẽn be-b saasẽ wã paam laafɩ, tɩ sẽn be-b tẽngã zugã paam yelle. Bõe yĩng tɩ yaa woto? Bala a Sʋɩtãan sũurã puuga wʋsgo, t’a zabd ne neb nins sẽn tũud a Zeova ne b sũy fãa tẽngã zugã.—Vẽn. 12:12, 15, 17.

2. Bõe n na n sõng-d tɩ d kell n sak a Zeova?

² Bõe n tõe n sõng-d tɩ d kell n sak a Zeova, baa ne a Sʋɩtãan sẽn zabd ne-dã? (Vẽn. 13:10) D sã n bãng bũmb ning sẽn na n maan ka la bilfã, na n sõng-d lame. Vẽnegr sebrã pʋgẽ, tẽn-tʋmd a Zã wilga bark toor-toor d sẽn na n paam ka la bilfu. Wala makre, Wẽnnaam na n wa sãama a bɛɛbã fãa. Masã, bɩ d ges Vẽnegr sebrã sẽn makd Wẽnnaam bɛɛbã ne bũmb ninsi, la bũmb ning sẽn na n paam-ba.

3. Bãn nins yell Vẽnegr sebrã sẽn gomdã kẽer la bʋse?

³ Vẽnegr sebrã pipi vɛrse wã pʋgẽ bala, b wilgame tɩ bũmb nins d sẽn na n karem sebrã pʋgẽ wã yaa bãna, rat n yeel tɩ makda bũmbu. (Vẽn. 1:1) Sɩd me, b gomda we-rũms toor-toor yelle, tɩ makd Wẽnnaam bɛɛbã. Wala makre, b goma “we-rũng sẽn yit mogrã” pʋgẽ yelle, sẽn tar “yɩɩl piig la zut a yopoe.” (Vẽn. 13:1) Rẽ poore, b goma “we-rũng a to sẽn pukd tẽngã zug” yelle. We-rũn-kãng gomda wa wag-bedre, la a kɩtdẽ tɩ “bugum yit yĩngr n sigd tẽngã zugu.” (Vẽn. 13:11-13) Rẽ poore, b goma we-rũng a to yelle.  Yaa “we-rũng sẽn yaa miuugu,” tɩ pʋg-yoodr zao a zugu. We-rũn-kãensã a tãabã makda bɛɛb sẽn zabd ne Wẽnnaama Zeova la a Rĩungã hal sẽn kaoose. Dẽnd tara yõod tɩ d bao n bãng bɛɛbã sẽn yaa b rãmba.—Vẽn. 17:1, 3.

4-5. Dãniyɛll 7:15-17 wã sõngda tõnd tɩ d bãng bõe we-rũmsã wɛɛngẽ?

⁴ Nand tɩ d bãng bɛɛbã sẽn yaa b rãmba, d segd n deng n bao n bãnga we-rũmsã ne pʋg-yoodrã sẽn makd bũmb ninsi. Yaa Biiblã n tõe n sõng tõnd tɩ d bãng rẽ. Biiblã sɛb a taab zoe n wilga bũmb wʋsg b sẽn gomd Vẽnegr sebrã pʋgẽ võore. Wala makre, no-rɛɛs a Dãniyɛll zãmsa zãmsdo, n yã ‘rũm-bɛd a naas sẽn yi koomẽ wã.’ (Dãn. 7:1-3) A Dãniyɛll togsa rũn-kãensã sẽn makd bũmb ninsi. Rũm-bɛd-kãensã makda “rĩm-dãmb” a naase, rat n yeel tɩ goosneema-rãmba. (Karm-y Dãniyɛll 7:15-17.) A Dãniyɛll sẽn yeel woto vẽenegã sõngda tõnd tɩ d bãng tɩ we-rũms nins Vẽnegr sebrã sẽn gomd b yellã me makda politik pãn-soaadba.

⁵ Bɩ d gom Vẽnegr sebrã sẽn gomd bãn ninsã kẽer yelle. D na n yãa Biiblã sẽn sõngd tõnd to-to tɩ d bãng bãn-kãensã sẽn makd bũmb ninsi. Bɩ d reng n gom we-rũms toor-toorã yelle. Pipi, d na n bao n bãnga we-rũng fãa sẽn makd bũmb ninga. Rẽ poore, d na n yãa bũmb ning sẽn paam we-rũn-kãensã. Sẽn na n baase, d na n yãa rẽ sẽn baood tɩ d maan bũmb ninga.

6. We-rũng ning sẽn tar zut a yopoe tɩ b gomd a yell Vẽnegr 13:1-4 pʋgẽ wã makda bõe?

⁶ We-rũng ning sẽn tar zut a yopoe wã makda bõe? (Karm-y Vẽnegr 13:1-4.) D yãame tɩ we-rũn-kãng wõnda ãbga, t’a naoã yaa wa urse, t’a noorã yaa wa gɩgemde, la a tar yɩɩl piiga. We-rũms a naasã yell b sẽn gomd Dãniyɛll sak a 7 wã pʋgẽ wã me wõnda woto. Vẽnegr sebrã sẽn gomd we-rũng ning yellã yaa we-rũn-yɛng la sẽn tar woto fãa wã, la pa we-rũms a naas ye. We-rũn-kãngã pa makd goosneema-yɛnga, rat n yeel tɩ dũni gill pãn-soaad a yembr ye. A Zã yeelame tɩ b kõ-a-la tõog me, t’a “soog buud fãa neb la neb sẽn gomd buud-goam toɛy-toɛy la sẽn yit tẽns toɛy-toɛy pʋsẽ.” Dẽnd a tog n yɩɩda goosneema-yɛnga. (Vẽn. 13:7) We-rũn-kãngã makda dũni gill pãn-soaadb nins fãa sẽn pʋgl taab hal n tãag masã wã. *—Koɛ. 8:9.

7. Zut a yopoe wã zug fãa makda bõe?

⁷ Zut a yopoe wã zug fãa makda bõe? Bũmb yell la b gom Vẽnegr sak 17 wã pʋgẽ, tɩ tõe n sõng-d tɩ d bãng rẽ. Beenẽ, b gomda Vẽnegr sak 13 pʋgẽ we-rũngã bõn-naandg yelle. Vẽnegr 17:10 yetame: “Rĩm-dãmb a yopoe n be: Bãmb b nu n lʋɩ, t’a ye bẽe, t’a to wã nan pa wa ye. La a sã n wa wa, a segd n paa wakat bilfu.” A Sʋɩtãan politik pãn-soaadbã fãa sʋka, a yopoe bal n da yaa wa zutu, bala b talla pãng wʋsgo. Yɩɩ dũni gill pãn-soaadb a Zeova Kaset rãmb wʋsg sẽn da be b soolmẽ wã, wall sẽn nams a Zeova nin-buiidã. Tẽn-tʋmd a Zã wakatẽ wã, rẽ tɩ pãn-soaadb a nu n zoe n dɩ naam. Yaa Ezipt, Asiiri, Babilon, Meed la Pɛrs, la Gɛrs. Wẽnnaam sẽn wa n vẽneg a Zã wã, rẽ tɩ Rom sẽn yaa dũni gill pãn-soaad a yoob-n-soabã n da rɩt naam. Dũni gill  pãn-soaad a yopoe-n-soabã ra na n yɩɩ pãn-soaad bɩ zug bʋgo?

8. We-rũngã zug a yopoe-n-soabã makda bõe?

⁸ Wa d sẽn na n yã wã, bãngr-goam nins sẽn be Dãniyɛll sebrã pʋgẽ wã sõngda tõnd tɩ d bãng we-rũngã zug a yopoe-n-soabã sẽn makd bũmb ninga. Yaa pãn-soaad bʋg n dɩt naam rũndã-rũndã sẽn yaa dũniyã saab sasa, rat n yeel tɩ “Zu-soabã daarã” sasa? (Vẽn. 1:10) Yaa Gãrãnd Bertayn ne Etazĩni sẽn naag taab n yaa dũni gill pãn-soaadã. Dẽnd d tõe n yeelame tɩ yaa pãn-soaad-kãng n makd we-rũng ning Vẽnegr 13:1-4 sẽn gomd a yellã zug a yopoe-n-soabã.

9. We-rũng ning sẽn tar yɩɩl a yiib sẽn wõnd pe-bil yɩɩlã makda bõe?

⁹ Vẽnegr sak 13 leb n wilgdame tɩ zug a yopoe-n-soabã sẽn yaa Gãrãnd Bertayn ne Etazĩni sẽn naag taab n yaa dũni gill pãn-soaadã wõnda we-rũng sẽn tar “yɩɩl a yiib sẽn wõnd pe-bil yɩɩla, la a sɩngame n gomd wa wag-bedre.” We-rũn-kãngã “maanda yel-solem-kãsemse, hal n kɩtdẽ tɩ bugum yit yĩngr n sigd tẽngã zug ninsaalbã nifẽ.” (Vẽn. 13:11-15) Vẽnegr sak 16 ne 19 wã pʋgẽ, b boola we-rũn-kãngã tɩ “zirẽ-be-no-rɛɛsã.” (Vẽn. 16:13; 19:20) A Dãniyɛll me togsa gomd sẽn wõnd woto, n wilg tɩ Gãrãnd Bertayn ne Etazĩni sẽn naag taab n yaa dũni gill pãn-soaadã na n “waa ne sãoong-kãsenga.” (Dãn. 8:19, 23, 24) Sɩd yɩɩ woto bal kɛpɩ, dũni gill zabr a yiib-n-soabã sasa. Gãrãnd Bertayn ne Amerik bãngdb n naag taab n maan bõn-pusdi a yiib b sẽn boond tɩ bõmb atomik-rãmba. B loba bõn-pusdi-kãens tɩ wa ne sãoong-kãseng tɩ kɩ tɩ zabrã sa. Gãrãnd Bertayn ne Etazĩni sẽn naag taab n yaa dũni gill pãn-soaadã sẽn maan bõn-pusdi-kãensã a yiibã kɩtame tɩ d tõe n yeel tɩ b kɩtame tɩ “bugum yi yĩngr n sig tẽngã zugu.”

10. “We-rũngã bõn-naandgã” makda bõe? (Vẽnegr 13:14, 15; 17:3, 8, 11)

¹⁰ B le goma we-rũng a to yelle. We-rũn-kãng ne we-rũng ning sẽn tar zut a yopoe wã wõnda taaba, sã n pa a sẽn yaa miuugã bala. B bool-a lame tɩ “we-rũngã bon-naandgã,” la b yeel t’a yaa “rĩm a nii-n-soaba.” * (Karm-y Vẽnegr 13:14, 15; 17:3, 8, 11.) B goma rĩm-kãng yell n yeel t’a ra beeme, n wa pa le beẽ, n le wa puki. Woto kell n zemsa ne ONU wã, sẽn yaa siglg sẽn teend dũniyã gill zug politik siglsã. Sɩngrẽ wã, b ra boonda siglg-kãng tɩ Sosiete dɛ nasɩyõ. Rẽ poore, a wa n menema dũni gill zabr a yiib-n-soabã sasa. A le wa n pukame tɩ b boond-a rũndã-rũndã tɩ ONU.

11. Bõe la goosneema-rãmbã maanda, la bõe yĩng tɩ d pa segd n zoe rabeem?

¹¹ We-rũmsã sẽn makd goosneema-rãmbã yelgda goam sẽn kɩt tɩ nebã kis a Zeova la a nin-buiidã. Woto yaa wa b sẽn tigimd rĩm-dãmb sẽn be dũniyã gill zug Armagedõ zabrã yĩnga, rat n yeel tɩ “Wẽnnaam Sẽn-tõe-a-fãa wã ra-kãsengã zabrã.” (Vẽn. 16:13, 14, 16) La d pa segd n zoe rabeem ye. D Wẽnnaam a Zeova sẽn ka to wã na n yika tao-tao n sõng neb nins sẽn teend a naamã.—Eze. 38:21-23.

12. Bõe n na n wa paam we-rũmsã fãa?

¹² Bõe n paam we-rũmsã fãa? Vẽnegr 19:20 yetame: “La b yõka we-rũngã, la  b yõk zirẽ-be-no-rɛɛsã n naag-a. Yaa zirẽ-be-no-rɛɛs ning sẽn da maand bõn-bãn we-rũngã taoor n belg neb nins sẽn deeg we-rũngã bãndã, la neb nins sẽn waoogd a bõn-naandgã. B loba b yiibã fãa vɩɩs mogrã sẽn dɩt bugum ne kidbrã pʋgẽ.” Goosneema-rãmbã sẽn makd Wẽnnaam bɛɛbã sẽn wat n ket n dɩt naam sasa, Wẽnnaam na n sãam-b-la wakat fãa yĩnga.

13. Bõe la goosneema-rãmbã rat tɩ kiris-nebã maane?

¹³ Rẽ sẽn baood tɩ d maan bũmb ninga: D sẽn yaa kiris-nebã, d segd n maanda sɩd ne Wẽnnaam la d teend a Rĩungã. (Zã 18:36) Sẽn na yɩl n maan rẽ, d pa segd n kẽes d toog dũni-kãngã politikã yɛlẽ ye. Woto maaneg tõe n yɩɩ toog wʋsgo. Bala goosneema-rãmbã ratame tɩ d teel b naamã ne d manesem wall ne d no-goama. Neb nins sẽn sakd n maand b raabã reegda we-rũngã bãnde. (Vẽn. 13:16, 17) A Zeova sũur yaool n pa noom ne neb nins fãa sẽn deegd rũngã bãndã ye. B pʋd n pa na n paam vɩɩm sẽn kõn sa wã ye. (Vẽn. 14:9, 10; 20:4) Rẽ wã, d ned kam fãa segd n zãaga a meng fasɩ ne politikã yɛla, baa goosneema-rãmbã sã n modgd tõnd n dat tɩ d teel b naamã.

14. Wa b sẽn wilg Vẽnegr 17:3-5 pʋgẽ wã, bõe la tẽn-tʋmd a Zã yã tɩ ling-a wʋsgo?

¹⁴ Tẽn-tʋmd a Zã wilgame t’a yãa bũmb a to sẽn ling-a wʋsgo. Yaa bõe la a yã-yã? Yaa pag sẽn zao we-rũn-kãensã a yembre. (Vẽn. 17:1, 2, 6) A yaa “pʋg-yood-kãsenga,” tɩ b boond-a tɩ “Babilon-kãsengã.” A yooda ne tẽngã rĩm-dãmba.—Karm-y Vẽnegr 17:3-5.

15-16. “Babilon-kãsengã” makda bõe, la bõe n kɩt tɩ d mi rẽ?

¹⁵ Babilon-kãsengã makda bõe? D pa tõe n yeel tɩ pagã makda politik siglsã ye. Bala b yeelame t’a yooda ne dũniyã rĩm-dãmba, rat n yeel tɩ politikã taoor dãmba. (Vẽn. 18:9) A sẽn zao we-rũngã wilgdame t’a makdame n na n kɩt tɩ politikã taoor dãmb tũ yẽ raabo. Sẽn paase, d pa tõe n yeel tɩ pagã makda a Sʋɩtãan dũniyã ligdã baoob siglsã ye. B goma sigls-kãensã yell Vẽnegr sebrã zĩig a to, n bool-b tɩ “tẽngã toandbã.”—Vẽn. 18:11, 15, 16.

¹⁶ Biiblã sã n wa gomd pʋg-yoodr yelle, tõe n makda neb nins sẽn yet tɩ b tũuda Wẽnnaam n yaool n waoogd bũmb a taab wa Wẽnnaamã, wall n tar yel-manesem sẽn wilgd tɩ b yaa dũniyã zo-rãmbã. (Eze. 16:2, 35, 36; Zak 4:4) Biiblã wilgdame tɩ neb nins sẽn tũud Wẽnnaam ne b sũy fãa wã yaa wa “pa-kuil sẽn yaa yɩlemde,” wall neb sẽn ‘pa mi pagba.’ (2 Kor. 11:2; Vẽn. 14:4) Ziri tũudmã sɩnga pĩnd wẽndẽ Babilon tẽngẽ wã. Woto wã, Babilon-kãsengã makda ziri tũudmã fãa sẽn naag taaba. —Vẽn. 17:5, 18; ges-y jw.org pʋgẽ sõsg ning gom-zug sẽn yaa: “Qu’est-​ce que Babylone la Grande ?”

17. Bõe n na n paam Babilon-kãsengã?

¹⁷ Bõe n na n paam Babilon-kãsengã? Vẽnegr 17:16, 17 sõngda tõnd tɩ d bãng rẽ. B yeta be yaa: “Yɩɩl piigã fo sẽn yã wã ne we-rũngã na n wa kisga pʋg-yoodrã, n dees a sẽn tarã fãa n bas-a a zaala. B na n wãba a nemdã la b yõog-a bugum t’a rɩ zãnga. Bala Wẽnnaam ninga b sũyẽ wã tɩ b pids Wẽnnaam daabã.” Sɩd me, a Zeova na n kɩtame tɩ tẽn-tẽnsã tũnug ne we-rũng ning sẽn yaa miuugã, rat n yeel tɩ ONU wã  n zab ne ziri tũudmã n sãam-a fasɩ.—Vẽn. 18:21-24.

18. Bõe la d tõe n maan tɩ wilg tɩ d pa teend Babilon-kãsengã baa bilfu?

¹⁸ Woto baoodame tɩ d maan bõe? D segd n kell n talla ‘wẽn-tũudum ning sẽn yaa yɩlemde, la sẽn pa tar rẽok tõnd Wẽnnaamã nifẽ wã.’ (Zak 1:27) D pa segd n sak Babilon-kãsengã sẽn zãmsd nebã bũmb nins tɩ yaa ziri wã, a kibs-rãmbã, a zĩn-dãmbã yɛla, la yel-manesem nins a nebã sẽn tar tɩ pa sõma wã ye. Sẽn paase, d na n ket n keoogda nebã sẽn na yɩl tɩ b yi Babilon-kãsengã pʋgẽ, n da wa paam taal Wẽnnaam nifẽ ye.

19. Wag-bedr sẽn yaa miuug wa bugmã yaa ãnda?

¹⁹ Vẽnegr sebrã leb n gomda “wag-bedr sẽn yaa miuug wa bugum” yelle. (Vẽn. 12:3) Wag-bed-kãngã zabda ne a Zeezi la ne a malɛgsã. (Vẽn. 12:7-9) A zabda ne Wẽnnaam nin-buiidã, la a kõt we-rũng ning sẽn tar zut a yopoe wã tõogo, rat n yeel tɩ goosneema-rãmbã. (Vẽn. 12:17; 13:4) Wag-bed-kãngã makda ãnda? Yaa yẽ la “wag-kʋdrã b sẽn boond tɩ Munaafɩɩk la Sʋɩtãanã.” (Vẽn. 12:9; 20:2) Yaa yẽ n kõt a Zeova bɛɛb a taabã fãa pãnga.

20. Bõe n na n paam wag-bedrã?

²⁰ Bõe n paam wag-bedrã? Vẽnegr 20:1-3 pʋgẽ, b wilgame tɩ malɛk n lob a Sʋɩtãan bog-zulung pʋgẽ, tɩ yaa wa b sẽn kẽes-a bãens roogo. A Sʋɩtãan sã n wa be bog-zulungã pʋgẽ, a pa na n tõog n “le belg buud toɛy-toɛyã hal tɩ yʋʋm tusrã looge.” Sẽn na n baase, b na n sãama a Sʋɩtãan ne a zĩn-dãmbã wakat fãa yĩnga. B maka rẽ ne b sẽn lob-a “bugum la kidbr mogrã pʋgẽ.” (Vẽn. 20:10) Mams-y n ges-y a Sʋɩtãan ne a zĩn-dãmbã sẽn na n wa ka le beẽ. Wakat-kãng na n yɩɩ sũ-noog wakat meng-menga!

21. Bõe yĩng tɩ d tõe n maan sũ-noogo, bũmb ning d sẽn bãng Vẽnegr sebrã pʋgẽ wã yĩnga?

²¹ D sẽn bãng bãn nins yell Vẽnegr sebrã sẽn gomdã võorã sɩd kenga d raoodo. D pa bãng Wẽnnaam bɛɛbã sẽn yaa b rãmbã bal ye. D bãnga bũmb ning sẽn na n paam-bã me. Sɩd-sɩdã, “sũ-noog soab la ned ning sẽn zẽkd a koɛɛg n karemd bãngr-gom-kãngã goamã.” (Vẽn. 1:3) Wẽnnaam sã n wa sãam a bɛɛbã fãa, bark-bʋs la wẽn-sakdbã na n paame? D na n bãnga rẽ sõsg ning sẽn pʋgdã pʋgẽ.