1-2. Bõe yĩng tɩ d segd n bao n bãng Vẽnegr sebrã sẽn yet bũmb ningã?

 TÕE tɩ y zoa zoe n kõo yãmb a albom-foto, n yeel tɩ y lags n gese. Y sẽn tar lagsgã, y yãame tɩ neb wʋsg y sẽn pa mi fot-rãmb n be albommã pʋgẽ. La foto a ye la yãmb wa n yã, n tar gesg n pa satẽ ye. Bõe yĩnga? Bala yãmb me bee fotã zugu. Yãmb sẽn ket n get fotã, y modgdame n na n tẽeg a yõkrã sẽn yɩ wakat ninga, la zĩig ninga. Yãmb baoome me n na n bãng neb nins fãa sẽn be fotã zugã. Fot-kãng tara yõod wʋsg y nifẽ.

² Vẽnegr sebrã wẽnda fot-kãnga. Bõe yĩng tɩ d yet woto? Yaa bʋʋm a yiib yĩnga. Pipi, b gʋlsa Vẽnegr sebrã tõnd yĩnga. Pipi vɛrse wã pʋgẽ bala, b yetame yaa: “Woto yaa a Zeezi Kirist vẽnegr Wẽnnaam sẽn kõ bãmba, tɩ b wilg b yembsã bũmb nins sẽn segd n maan ka la bilfã.” (Vẽn. 1:1) Bũmb ning b sẽn gʋls Vẽnegr sebrã pʋgẽ wã pa nebã fãa yĩng ye. Yaa tõnd yĩnga. Bala, d tũuda a Zeova. D sẽn yaa Wẽnnaam nin-buiidã yĩnga, d sẽn mi tɩ d naagame n pidsd bãngr-goam nins sẽn be seb-kãng pʋgẽ wã pa ling tõnd ye. D sã n wa karemd Vẽnegr sebrã, yaa wa d sẽn get “foto” tõnd me sẽn be be.

3-4. Wa Vẽnegr sebrã sẽn wilgdã, a bãngr-goamã ra na n sɩnga pidsg wakat-bʋgo, la rẽ segd n kɩtame tɩ d ned kam fãa maan bõe?

³ Bʋʋm a yiib-n-soabã yaa wakat ning bãngr-gom-kãensã sẽn na n pidsã yĩnga. Tẽn-tʋmd a Zã wilga b sẽn na n pids wakat ningã. A yeelame: “Vʋʋsem sõngã kɩtame tɩ mam yã bũmb nins sẽn na n maan  Zu-soabã daarã sasa wã.” (Vẽn. 1:10) A Zã gʋlsa gom-kãensã yʋʋmd 96 sasa, rẽ tɩ “Zu-soabã daarã” ket n zãrame. (Mat. 25:14, 19; Luk 19:12) Sã n yaa ne Biiblã, Zu-soabã daarã sɩnga yʋʋmd 1914, a Zeezi sẽn wa n lebg rĩm saasẽ wã. Yʋʋmd-kãng tɛka, Vẽnegr sebrã bãngr-goamã sẽn gomd Wẽnnaam nin-buiidã yellã sɩnga pidsgu. Sɩd me, rũndã-rũndã, d vɩɩ “Zu-soabã daarã sasa.”

⁴ D sẽn vɩ wakat sẽn yaa toor fasɩ wã yĩnga, d segd n tũu saglg ning sẽn be Vẽnegr 1:3 pʋgẽ wã ne d sũy fãa. Be, b yetame: “Sũ-noog soab la ned ning sẽn zẽkd a koɛɛg n karemd bãngr-gom-kãngã goamã. Sũ-noog rãmb me la neb nins sẽn kelgd la b tũud bũmb nins sẽn gʋls a pʋgẽ wã, bala wakat ning b sẽn yãkã kolgame.” Sɩd me, d segd n ‘zẽka d koɛɛg n karemd’ bãngr-gom-kãngã goamã, n ‘kelgdẽ,’ la d ‘tũud bũmb nins sẽn gʋls a pʋgẽ wã.’ Gom-kãensã d sẽn segd n tũ wã kẽer la bʋse?

5. Bõe la Vẽnegr sebrã yeta, tɩ wilgdẽ tɩ d segd n modgame tɩ d sẽn tũud a Zeova to-to wã ta a yam?

⁵ Vẽnegr sebrã pipi sakã pʋgẽ bala, b wilgame t’a Zeezi mii bũmb nins fãa sẽn maand tigimsã pʋsẽ wã sõma. (Vẽn. 1:12-16, 20; 2:1) A Zeezi sẽn taas Aazimineer tigims a yopoe wã koees ninsã wilgda rẽ vẽenega. A wilga kiris-neb nins sẽn da be wakat-kãnga bũmb takɩ b sẽn tõe n maane, tɩ sõng-b tɩ b sẽn da tũud a Zeova to-to wã ta a yam. Rũndã-rũndã, tõnd me segd n tũu bũmb ning a Zeezi sẽn yeel-bã. Woto wilgda tõnd bõe? A Zeezi Kirist sẽn yaa d taoor soabã mii d sã n tara zood sõma ne a Zeova. A nee bũmb fãa, n get d yell la a kogend tõndo. A mii d sẽn segd n maan bũmb ning n ket n tat a Zeova yam. Bõe la a yeel pipi kiris-nebã, tɩ tõnd me segd n tũ rẽ rũndã-rũndã?

6. a) Wa Vẽnegr 2:3, 4 sẽn wilgdã, a Zeezi taasa Efɛɛz tigingã neb koɛɛg n yeel-b tɩ bõe? b) Bõe la rẽ wilgd tõndo?

⁶ Karm-y Vẽnegr 2:3, 4. D pa segd n bas tɩ d sẽn da nong a Zeova to-to sɩngrẽ wã boog ye. A Zeezi sẽn taas Efɛɛz tigingã koɛɛg ningã wilgdame tɩ b tõoga toogo, la b kell n tũ a Zeova n pa base, baa ne b sẽn paam namsg buud toor-toorã. Baa ne rẽ, b ra basa nonglem ning b sẽn da tar sɩngrẽ wã. B ra segd n modgame tɩ b nonglmã le paam pãnga, sã n pa rẽ b sẽn da tũud a Zeova to-to wã ra pa na n ta a yam ye. Woto me, rũndã-rũndã, d pa segd n tõog toog bal ye. D tog n maana sẽn yɩɩd rẽ. D segd n tõoga toog ne yam-sõngo. D Wẽnnaamã pa get bũmb ning d sẽn maandã bal ye. A geta bũmb ning yĩng sẽn kɩt tɩ d maand rẽ wã me. D sẽn tõogd toog ne yam ningã tara yõod wʋsg ne d Wennaamã, bala a ratame tɩ d sẽn tũud-a to-to wã yɩ d sẽn nong-a ne d sũur fãa wã yĩnga.—Yel. 16:2; Mark 12:29, 30.

7. a) Wa Vẽnegr 3:1-3 sẽn wilgdã, a Zeezi wilgame tɩ Sard tigingã neb zu-loɛɛg ra yaa bõe? b) Bõe la d segd n maane?

⁷ Karm-y Vẽnegr 3:1-3. D segd n ket n gũusdame. Sard tigingã neb me ra tara b zu-loɛɛga. Baa ne b sẽn da tũud a Zeova sõma pĩndã, b wa n basame n pa le tũud-a ne b sũy fãa ye. Rẽ n so t’a  Zeezi yeel-b tɩ b “neke.” Yam-bʋg la d tõe n dɩk sagl-kãngã pʋgẽ? Yaa vẽeneg t’a Zeova pa na n yĩm d tʋʋmdã ye. (Ebre. 6:10) D pa segd n tags tɩ d sẽn maan bũmb ning a Zeova tʋʋmdã pʋgẽ pĩndã sekame ye. Tõe tɩ d pa le tar pãng n tõe n tʋm tʋʋmdã sõma wa pĩndã ye. La d segd n ket n wɩngda ne “Zu-soabã tʋʋmdã,” la d ket n gũusdẽ hal n tãag saabã.—1 Kor. 15:58; Mat. 24:13; Mark 13:33.

8. A Zeezi sẽn togs Laodise tigingã neb bũmb ning tɩ be Vẽnegr 3:15-17 pʋgẽ wã wilgda tõnd bõe?

⁸ Karm-y Vẽnegr 3:15-17. D segd n tũu a Zeova ne yẽesem, la ne d sũur fãa. Koɛɛg ning a Zeezi sẽn taas Laodise tigingã nebã wilgdame tɩ bãmb me ra tara b zu-loɛɛga. B ra yaa “zal-zale,” b sẽn da tũud a Zeova to-to wã wɛɛngẽ. B sẽn da pa tar yẽesmã yĩnga, a Zeezi yeelame tɩ b ra yaa wa ned sẽn yaa “nimbãan-neda, la noang soaba.” B ra segd n tũu a Zeova ne yẽesem wʋsgo. (Vẽn. 3:19) Woto wilgda tõnd bõe? D yẽesmã sã n boogame, d segd n maneg n tagsa bũmb nins a Zeova ne a siglgã sẽn maand n kõt tõndã yelle, la d nand rẽ. (Vẽn. 3:18) D pa segd b bas tɩ naar vɩɩmã baoob tiis-du, tɩ d pa le lʋɩɩsd a Zeova tũubã taoor ye.

9. Koɛɛg ning a Zeezi sẽn taas Pɛrgam la Tiyatiir tigingã nebã wilgdame tɩ d segd n zãaga d meng ne bõe?

⁹ D segd n zãaga d mens ne sɩdã-kɩɩsdbã sẽn yet bũmb ninsã. A Zeezi ninga Pɛrgam tigingã neb kẽer taale, b sẽn da wat ne welsg b tẽed-n-taasã sʋkã yĩnga. (Vẽn. 2:14-16) A pẽga Tiyatiir tigingã neb nins sẽn da zãagd b mens ne a “Sʋɩtãan yel-solgdsã,” la a sagl-b tɩ b ‘gãd sɩdã kãn-kãe.’ (Vẽn. 2:24-26) Kiris-neb nins sẽn da sɩng zãmsg nins sẽn yaa ziri wã tũubã ra segd n teka yam n kos sugri. La tõnd yẽ rũndã-rũndã? D segd n zãaga d mens ne zãmsg nins fãa sẽn kɩɩsd Biiblã sẽn yetã. Sɩdã-kɩɩsdbã tõe n “wõnda wẽn-sakdba,” la b yaool n “pa vɩ wa wẽn-sakdb ye.” (2 Tɩm. 3:5) D sã n zãmsda Biiblã sõma, yɩta nana tɩ d tõog n bãng ziri zãmsgã, la d zãag d meng ne rẽ.—2 Tɩm. 3:14-17; Ziid 3, 4.

10. A Zeezi sẽn yeel Pɛrgam la Tiyatiir tigingã neb bũmb ningã wilgda tõnd bõe me?

¹⁰ D segd n kisga yoob buud fãa. Pɛrgam  la Tiyatiir tigingã neb ra tara zu-loɛɛg a to. A Zeezi ninga tigim-kãensã neb kẽer taale, b sẽn da pa zãagd b mens ne yoobã yɛlã yĩnga. (Vẽn. 2:14, 20) Woto wilgda tõnd bõe? Baa d sã n tũuda a Zeova n kaoos yʋʋm wʋsgo, la d tʋmd tʋʋm wʋsg tigingã pʋgẽ, d sã n wa lʋɩ yoob yɛl pʋgẽ, a Zeova pa na n bas taal ye. (1 Sãm. 15:22; 1 Pɩy. 2:16) A ratame tɩ d tũ bũmb nins a sẽn yet yoobã wɛɛngẽ wã, baa ne dũniyã nebã manesmã sẽn lebgd wẽng n paasdẽ wã.—Efɛ. 6:11-13.

11. Bõe la d bãng-yã? (Ges-y zĩ-gũbrã: “ Y sẽn segd n maan rũndã-rũndã.”)

¹¹ D na n kʋms n yeelame tɩ bõe? D segd n modgame tɩ d sẽn tũud a Zeova to-to wã tat a yam. D sã n wa maan bũmb tɩ kɩt tɩ d sẽn tũud a Zeova to-to wã pa le tat a yam, d segd n demsa yɛlã zĩig pʋgẽ. (Vẽn. 2:5, 16; 3:3, 16) Bũmb a to me la a Zeezi wilg koees nins a sẽn taas tigimsã pʋsẽ. Yaa bõe?

12. A Zeezi sẽn yeel Ismirn la Filadɛlfi tigimsã neb bũmb ningã wilgda tõnd bõe rũndã-rũndã? (Vẽnegre 2:10)

¹² Masã, d ges koɛɛg ning a Zeezi sẽn taas Ismirn la Filadɛlfi tigimsã nebã. A yeela kiris-neb nins sẽn da be beenẽ wã tɩ b ra yɛɛse, b sẽn na n paam namsgã yĩnga, la t’a Zeova na n keo-b lame, b sã n kell n wilg tɩ b yaa sɩd dãmba. (Karm-y Vẽnegr 2:10; 3:10) Woto wilgda tõnd bõe rũndã-rũndã? D segd n ninga d yamẽ tɩ b tõe n wa namsa tõnd me d tũudmã yĩnga, la d sak me n tõog toog namsg sasa. (Mat. 24:9, 13; 2 Kor. 12:10) Bõe yĩng tɩ d segd n ning rẽ d yamẽ?

13-14. Yell ning sẽn zĩnd saasẽ tɩ b gom rẽ yell Vẽnegr sak 12 pʋgẽ wã waa ne bõe Wẽnnaam nin-buiidã zugu?

¹³ Vẽnegr sebrã wilgdame tɩ Wẽnnaam nin-buiidã na n paama namsg “Zu-soabã daarã sasa,” rat n yeel tɩ rũndã-rũndã. Vẽnegr sak 12 wilgame tɩ Wẽnnaam Rĩungã luglg poor bala, zabr n yik saasẽ. A Misɛll sẽn yaa a Zeezi Kirist sẽn deeg naam n be saasẽ wã ne a poorẽ dãmbã zaba ne a Sʋɩtãan la ne a zĩn-dãmbã. (Vẽn. 12:7, 8) Zabrã sasa, b tõoga Wẽnnaam bɛɛbã, n lob-b tẽngã zugu. B sẽn sig tẽngã zugã, b waa ne namsg ãdem-biisã zugu. (Vẽn. 12:9, 12) La woto waa ne bõe Wẽnnaam nin-buiidã zugu?

¹⁴ Vẽnegr sebrã togsda tõnd a Sʋɩtãan manesem sẽn yaa to-to rẽ tɛka. A sẽn pa le tõe n leb saasẽ wã yĩng kɩtame t’a zabd ne sẽn paam-b vʋʋsem sõng zaeeb n ket tẽngã zugã. Nin-kãensã gomda Wẽnnaam yʋʋr yĩnga, tɩ b tʋʋmd “yaa kõ kaset a  Zeezi zugu.” (Vẽn. 12:17; 2 Kor. 5:20; Efɛ. 6:19, 20) Wãn to la bãngr-gom-kãngã paamd pidsgu?

15. “Kaset rãmb a yiibã” yell b sẽn gom Vẽnegr sak 11 pʋgẽ wã makda ãnd-rãmba, la bõe n paam-ba?

¹⁵ A Sʋɩtãan kɩtame tɩ bɛɛbã nams sẽn paam-b vʋʋsem sõngã zaeebã sẽn da lʋɩt taoor koɛɛgã mooneg pʋgẽ wã. Nin-kãensã makda “kaset rãmb a yiibã” b sẽn kʋ, tɩ b gomd rẽ yell Vẽnegr sebrã pʋgẽ wã. * (Vẽn. 11:3, 7-11) Yʋʋmd 1918 wã, saam-biis nins sẽn da lʋɩt taoorã sʋka, bãmb b nii la b rõd-yã, n kao b bʋʋd n yeel tɩ b tara taale, la tɩ b segd n kẽe bãens roog n kaoos yʋʋm wʋsgo. Neb wʋsg tagsame tɩ nin-kãensã tʋʋmdã yaa sẽn sa.

16. Bõe n maan yʋʋmd 1919 wã tɩ sɩd yɩ lingri? La wakat-kãng tɛka, bõe la a Sʋɩtãan ket n maanda?

¹⁶ Bãngr-gomd ning sẽn be Vẽnegr sak 11 pʋgẽ wã wilgame me tɩ wakat bilf poore, “kaset rãmb a yiibã” sẽn da ki wã na n lebg n vʋʋgame. Sɩd me, vẽk-n-yʋʋmdã, bãngr-gomdã paama pidsgu, tɩ ling neb wʋsgo. Yʋʋmd 1919 wã sɩngrẽ, b yiisa saam-biis nins sẽn paam vʋʋsem sõng zaeebã b sẽn da kẽes bãens roogã, la b rok taal nins fãa sẽn da be b zugã. Tao-tao bala, saam-bi-kãensã le lʋɩɩ taoore, n sɩng Rĩungã koe-moonegã. La woto pa kɩt t’a Sʋɩtãan bas Wẽnnaam nin-buiidã namsg ye. Wakat-kãng tɛka, a Sʋɩtãan waa ne namsg wʋsg sẽn yaa wa “kʋɩlg” koom Wẽnnaam nin-buiidã zugu. (Vẽn. 12:15) Sɩd-sɩdã, woto baoodame tɩ ned kam fãa “tõog toog la a tall tẽebo.”—Vẽn. 13:10.

17. Baa ne a Sʋɩtãan sẽn zabd ne Wẽnnaam nin-buiidã, yɛ la b mi n paam sõngr tɩ yaa lingri?

¹⁷ Vẽnegr sak 12 wilgdame tɩ Wẽnnaam nin-buiidã na n paama sõngr sẽn yit zĩig b sẽn paa tẽede. Na n yɩɩ wa “tẽngã” sẽn yaag a noor n vel namsgã sẽn yaa wa “kʋɩlgã.” (Vẽn. 12:16) Kell n yɩɩ woto bal kɛpɩ. Wakat ninga, sigls nins sẽn be a Sʋɩtãan dũniyã pʋgẽ wã, wala makre, bʋ-kaoorã sigls kẽer sõngda a Zeova nin-buiidã. Naoor wʋsgo, bʋ-kaoodbã kaoo bʋʋd n kõ a Zeova nin-buiidã bʋʋm tɩ b paam lohorem bilfu. Lohorem-kãng  sasa, bõe la b maanda? B kẽesda b mens tʋʋm nins a Zeova sẽn kõ-bã pʋgẽ sõma. (1 Kor. 16:9) Tʋʋm-bʋg n naag tʋʋm-kãensã sʋka?

18. Yaoolem da-kãensã sasa, tʋʋm-bʋg la d tʋmd wʋsg n tɩ yɩɩda?

¹⁸ A Zeezi pĩnd n togsame t’a karen-biisã na n moona ‘Rĩungã koe-noogã’ dũniyã tɛka, tɩ saabã yaool n ta. (Mat. 24:14) B sã n wa moond koɛɛgã, b paamdame tɩ malɛk wall malɛgs wʋsg sõngd-ba. Malɛg-kãens tara “koe-noog sẽn ka sɛt n na n togs neb nins sẽn be tẽngã zugã, neb sẽn yit buud toɛy-toɛy pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ.”—Vẽn. 14:6.

19. Koe-bʋg me la neb nins sẽn nong a Zeova wã na n moone?

¹⁹ Wẽnnaam nin-buiidã pa tog n taasd nebã Rĩungã koe-noogã bal ye. B segdame me n teel tʋʋmd ning malɛgsã sẽn tʋmdã. B goma tʋʋm-kãng yell Vẽnegr sak a 8-10 pʋgẽ. Malɛgsã moonda tood wʋsg sẽn na n sig neb nins sẽn kɩɩsd Wẽnnaam Rĩungã zugu. Dẽnd d tõe n yeelame t’a Zeova Kaset rãmbã moonda koɛɛga, sẽn wõnd “sapɩlem ne bugum,” n wilgd tɩ Wẽnnaam na n wa kaoo a Sʋɩtãan dũniyã sigls toɛy-toɛyã bʋʋdo. (Vẽn. 8:7, 13) Nebã segd n bãngame tɩ dũniyã saab kolgame, n toeem b yel-manesmã n wa tõog n põs a Zeova sũ-puugrã daare. (Sof. 2:2, 3) La pa koɛɛg sẽn noom neb wʋsg ye. Koe-kãng taasg baooda raoodo. To-kãsengã sasa, bʋ-kaoor koɛɛgã d sẽn na n taas nebã na n maneg n nams-b lame n yɩɩda.—Vẽn. 16:21.

20. Bõe yell la d na n gom sõss a yiibã sẽn pʋgdã pʋgẽ?

²⁰ Yaa vẽeneg tɩ d segd n tũu ‘bũmb nins sẽn gʋls bãngr-gomdã pʋgẽ wã,’ bala tõnd me naagame n sõngdẽ tɩ bũmb nins d sẽn karemd Vẽnegr sebrã pʋgẽ wã paamd pidsgu. (Vẽn. 1:3) La wãn to la d tõe n yɩ sɩd dãmba, n tõog toog n ket n moond koe-kãensã ne raoodo? Bũmb a yiib n tõe n sõng-do: Pipi, Vẽnegr sebrã sẽn wilgd bũmb ning sẽn na n paam Wẽnnaam bɛɛbã yĩnga, la yiibu, bark nins d sẽn na n wa paame, d sã n kell n yɩ sakdbã. D na n goma rẽ yell sõss a yiibã sẽn pʋgdã pʋgẽ.