1. Bõe la ned fãa segd n yãk yam n maan tɩ tar yõod wʋsgo?

 RŨNDÃ-RŨNDÃ, ned fãa segd n yãka a sã n na n teela Wẽnnaam a Zeova sẽn tar sor n yɩ yĩngr la tẽng naabã, wall a sã n na n teela a Zeova bɛ-kãseng a Sʋɩtãana. Woto yaa bũmb sẽn tar yõod wʋsgo. Ned pa tõe n yeel t’a pa teend b baa a yembr ye. D sẽn yãk yam ning rẽ wɛɛngẽ wã wilgda d sã n na n wa paama vɩɩm sẽn kõn sa wã. (Mat. 25:31-33, 46) “To-kãsengã” sasa, d na n paama bãnd sẽn wilgd d sã n na n paama fãagre, bɩ sãoongo.—Vẽn. 7:14; 14:9-11; Eze. 9:4, 6.

2. a) Bõe la Ebre-rãmb 10:35-39 sagend tõnd tɩ d maane? b) Wãn to la Vẽnegr sebrã tõe n sõng-do?

² Karm-y Ebre-rãmb 10:35-39. Y sã n yãka yam n na n teel a Zeova naamã, bɩ y bãng tɩ yaa yam-yãkr sẽn yaa sõma. Masã, y rata ne y sũur fãa n sõng neb a taabã tɩ bãmb me yãk yam a woto. Y tõe n tũnuga ne Vẽnegr sebrã sẽn yet bũmb ningã n sõng-ba. Vẽnegr sebrã wilgda bũmb ning sẽn na n paam neb nins sẽn kɩɩsd a Zeova wã, la bark nins neb nins sẽn teend a naamã ne b sũy fãa wã sẽn na n wa paame. Yɩta sõma tɩ d bʋgs rẽ zug neere. Woto na n sõng-d lame tɩ d maneg n tũ a Zeova ne yẽesem. Sẽn paase, d tõe n talla d sẽn bãng bũmb ningã n sõng neb a taabã, tɩ b wa yãk yam n tũ a Zeova n da tol n bas ye.

3. Bõe la d na n bãng sõs-kãngã pʋgẽ?

³ Ad sogsg kẽer d sẽn na n leok sõs-kãngã pʋgẽ: Bark-bʋs la neb nins sẽn teend Wẽnnaam naamã na n wa paame? Bõe n na n paam neb nins sẽn yãk yam n teend we-rũng ning sẽn yaa miuugã, tɩ b gomd a yell Vẽnegr sebrã pʋgẽ wã?

4. Ãnd dãmb la tẽn-tʋmd a Zã yã tɩ b be ne a Zeezi saasẽ?

⁴ Wẽnnaam a Zeova vẽnega tẽn-tʋmd a Zã t’a yã neb sul a yiib sẽn teend a naamã, la sẽn paam vɩɩm sẽn kõn sa. Pipi sullã neb sõor yaa tus-koabg la tus pis-naas la a naase. (Vẽn. 7:4) B yãka nin-kãensã tẽngã zug tɩ b tɩ naag a Zeezi saasẽ n dɩt naam Wẽnnaam Rĩungã pʋgẽ. B naaga a Zeezi n dɩt naam tẽngã zugu. (Vẽn. 5:9, 10; 14:3, 4) Vẽnegrã pʋgẽ, a Zã yãa bãmb ne a Zeezi sẽn yas saasẽ Siyõ tãngã zugu.—Vẽn. 14:1.

5. Bark-bʋg la neb tus-koabg la tus pis-naas la a naasã sʋk neb nins sẽn ket tẽngã zugã na n wa paame?

⁵ Tẽn-tʋmd a Zã wakatã n tãag masã, neb tusa la b yãk tɩ b na n zĩnd neb tus-koabg la tus pis-naas la a naasã sʋka. (Luk 12:32; Rom 8:17) La b togsa a Zã tɩ yaoolem wakatã, b sʋkã neb bilf bal n na n ket tẽngã zugu. Nand tɩ to-kãsengã sɩnge, b sʋkã neb nins “sẽn ketã” na n paama yaoolem “bãnd” sẽn wilgd tɩ b taa a Zeova yam. (Vẽn. 7:2, 3; 12:17) To-kãsengã sã n wa sɩnge, sẽn ket-b tẽngã zugã na n tɩ naaga neb tus-koabg la tus pis-naas la a naasã sʋk neb nins sẽn zoe n be saasẽ wã. Beenẽ, b na n naaga a Zeezi n dɩ naam Wẽnnaam Rĩungã pʋgẽ.—Mat. 24:31; Vẽn. 5:9, 10.

6-7. a) Ãnd dãmb me la a Zã yã-yã, la bõe la b togs nin-kãensã zugu? b) Bõe yĩng tɩ Vẽnegr sak a 7 wã sẽn yet bũmb ningã segd n tall yõod ne sẽn paam-b zaeeb n ket tẽngã zugã, la kʋʋn-kãsengã neba?

⁶ A Zã sẽn yã sẽn na n tɩ vɩɩmd-b saasẽ wã poore, a yãa ‘kʋʋn-kãsenga.’ D pa mi b sõorã takɩ wa neb tus-koabg la tus pis-naas la a naasã sõorã ye. (Vẽn. 7:9, 10) Bõe la b togs nin-kãensã zugu? B yeela a Zã yaa: “Nin-kãensã yaa neb nins sẽn põs to-kãsengã sasa wã, la b pegsa b kasaabsã Pe-bilã zɩɩmã pʋgẽ n kɩt tɩ b lebg peelse.” (Vẽn. 7:14) Kʋʋn-kãsengã neb na n põsa to-kãsengã sasa n vɩɩmd tẽngã zugu, la b paam bark ka tɛka.—Yɩɩn. 37:9-11, 27-29; Yel. 2:21, 22; Vẽn. 7:16, 17.

⁷ B yãk-d lame tɩ d na n tɩ vɩɩmd saasẽ wall yaa tẽngã zug la d na n vɩɩmde, d getame tɩ d naaga neb nins yell b sẽn gom Vẽnegr sak a 7 wã pʋgẽ wã bɩ? D segd n getame tɩ d naagame. Na n yɩɩ wakat sul a yiibã fãa neb sẽn na n paam sũ-noog meng-menga. D sũur na n yɩɩ noog wʋsgo, d sẽn yãk yam n teel a Zeova naamã. Bõe me la Vẽnegr sebrã yet to-kãsengã wɛɛngẽ?—Mat. 24:21.

8. Bõe n na n maan tɩ yɩ to-kãsengã sɩngre, la neb wʋsg manesem na n yɩɩ wãna?

⁸ Wa d sẽn yã sõsg ning sẽn loogã pʋgẽ wã, ka la bilfu, dũniyã politik siglsã na n wa zaba ne Babilon-kãsengã, sẽn yaa ziri tũudmã fãa sẽn naag taaba. (Vẽn. 17:16, 17) Rẽ n na n yɩ to-kãsengã sɩngre. Woto na n kɩtame tɩ neb wʋsg wa sɩng a Zeova tũub bɩ? Ayo. Vẽnegr sak a 6 pʋd n wilgdame tɩ wakat-kãnga, neb nins sẽn pa tũud a Zeova wã na n baoo koglg dũni-kãngã politikã la leebgã sigls nengẽ. Biiblã pʋgẽ, b maka sigls-kãens ne tãmse. Sẽn mik tɩ nin-kãensã pa na n sak n teel Rĩungã, Wẽnnaam a Zeova na n ges-b-la wa kɩɩsdba.—Luk 11:23; Vẽn. 6:15-17.

9. To-kãsengã sasa, bõe la a Zeova nin-buiidã na n maan tɩ wilg tɩ b manesmã yaa toor ne neb a taabã, la bõe n na n maane?

 ⁹ Sɩd-sɩdã, to-kãsengã sasa, a Zeova nin-buiidã manesem na n yɩɩ toor fasɩ ne neb a taabã. Bãmb bal n na n ket n yaa neb sẽn be tẽngã zug n tũud a Zeova, la sẽn zãgs n pa teend “we-rũngã.” (Vẽn. 13:14-17) B sẽn kell n maand sɩd ne a Zeova wã yĩnga, neb nins sẽn kɩɩsd a Zeova wã sũy na n yika ne-ba. Woto na n kɩtame tɩ tẽn-tẽns lagem taab n na n zab ne a Zeova nin-buiidã dũniyã gill zugu. Biiblã boonda zab-kãng tɩ Gog sẽn yit Magoogã zabre.—Eze. 38:14-16.

10. Wa b sẽn wilg Vẽnegr 19:19-21 wã, a Zeova manesem na n yɩɩ wãna, bɛɛbã sã n wa na n zab ne a nin-buiidã?

¹⁰ A Zeova manesem na n yɩɩ wãna, bɛɛbã sã n wa bao n na n zab ne a nin-buiidã? A yeelame: “Badaare, mam sũurã na n puuga wʋsgo.” (Eze. 38:18, 21-23) Vẽnegr sak 19 wã wilgda bũmb ning sẽn na n maan rẽ poorã. A Zeova na n tʋma a Bi-riblã t’a wa kogl a nin-buiidã, la a zab ne a bɛɛbã n tõoge. “Saasẽ tãb-biisã,” rat n yeel tɩ malɛgsã n paas neb tus-koabg la tus pis-naas la a naasã na n naaga a Zeezi zabrã pʋgẽ. (Vẽn. 17:14; 19:11-15) Zabrã na n baasa wãna? B na n sãama neb la sigls nins fãa sẽn kɩɩsd a Zeova wã fasɩ.—Karm-y Vẽnegr 19:19-21.

11. Bõe yell la b gomd Vẽnegr sebrã pʋgẽ tɩ tar yõod n tɩ yɩɩda?

¹¹ Tags-y n ges-y wẽn-sakdbã manesem sẽn na n yɩ to-to, b sã n wa sãam Wẽnnaam bɛɛbã fãa. Na n yɩɩ sũ-noog wakat meng-menga! Baa ne Babilon-kãsengã sãoong sẽn na n wa ne kɩdeng saasẽ wã, bũmb a to n na n kõ-b sũ-noog n tɩ yɩɩda. (Vẽn. 19:1-3) Yaa bũmb sẽn tar yõod hal wʋsgo, tɩ b gomd rẽ yell Vẽnegr sebrã pʋgẽ. Yaa “Pe-bilã yi-kãadmã.”—Vẽn. 19:6-9.

12. Wa b sẽn wilg Vẽnegr 21:1, 2 pʋgẽ wã, Pe-bilã yi-kãadmã na n yɩɩ wakat bʋgo?

¹² Yi-kãadmã sɩngda wakat bʋgo? Armagedõ zabrã sã n wa sɩnge, rẽ tɩ neb tus-koabg la tus pis-naas la a naasã fãa zoe n bee saasẽ. La Pe-bilã yi-kãadmã pa na n yɩ wakat-kãng ye. (Karm-y Vẽnegr 21:1, 2.) Pe-bilã yi-kãadmã na n yɩɩ Armagedõ zabrã poore, rẽ tɩ b sãama Wẽnnaam bɛɛbã fãa gilli.—Yɩɩn. 45:4, 5, 14-18.

13. Bõe n na n maan Pe-bilã yi-kãadmã sasa?

¹³ Pe-bilã ne sẽn paam-b vʋʋsem sõng zaeebã yi-kãadmã na n yɩɩ wãn to? Wa kãadem sẽn loet rao ne pag ne taabã, Pe-bilã yi-kãadmã me yaa sẽn na n loe a Zeezi Kirist sẽn yaa rĩmã, ne neb tus-koabg la tus pis-naas la a naasã ne taaba, tɩ b yɩ a “pʋg-paala.” Yi-kãadem-kãngã na n kɩtame tɩ d paam goosneema-paall sẽn na n dɩ naam tẽngã zug yʋʋm tusri.—Vẽn. 20:6.

14-15. Vẽnegr sak 21 wã pʋgẽ, b maka neb tus-koabg la tus pis-naas la a naasã ne bõe? (Ges-y sebrã pipi neng fotã.)

¹⁴ Vẽnegr sak 21 wã pʋgẽ, b maka neb tus-koabg la tus pis-naas la a naasã ne galʋ-tẽng neerem sẽn ka to, tɩ b boond tɩ “Zerizalɛm-paalgã.” (Vẽn. 21:2, 9) Galʋ-tẽn-kãngã tara yẽbgr kug piig la a yiibu, tɩ “Pe-bilã tʋm-tʋmdb piig la a yiibã yʋy piig la a yiibã gʋls b zutu.” Bõe yĩng tɩ rẽ yɩ a Zã noogo? Bala a yãame tɩ b gʋlsa  a yʋʋrã kug-kãensã a yembr zugu. Sɩd yaa zu-zẽkr meng-menga!—Vẽn. 21:10-14; Efɛ. 2:20.

¹⁵ Galʋ-tẽn-kãngã ka tar to ye. A tara so-kãseng sẽn yaa sãnem halaale, rig-noy piig la a yiib sẽn maan ne kĩndi, t’a yẽbgrã la a lalsã nags ne kug-neeb buud fãa, tɩ tẽngã woglmã ne a zãntlmã fãa zem taaba. (Vẽn. 21:15-21) La a Zã yãame tɩ bũmb n paooge. Ad a sẽn yeele: “Mam pa yã wẽnd-doog galʋ-tẽngã pʋgẽ, bala Wẽnnaam a Zeova sẽn yaa Sẽn-tõe-a-fãa wã n yaa a wẽnd-doogo. Pe-bilã me yaa a wẽnd-doogo. Galʋ-tẽngã ra pa baood wĩntoog bɩ kiuug sẽn na n vẽneg-a, bala Wẽnnaam ziirã kõt-a-la vẽenem, tɩ Pe-bilã yaa a fɩtla.” (Vẽn. 21:22, 23) Zerizalɛm-paalgã neb na n paam n yãa a Zeova vẽeneg-vẽenega. (Ebre. 7:27; Vẽn. 22:3, 4) Dẽnd a Zeova ne a Zeezi n yaa galʋ-tẽn-kãng wẽnd-doogo.

16. Bark-bʋs la ãdem-biisã na n paam Wẽnnaam Rĩungã yʋʋm tusr naamã sasa?

¹⁶ Sẽn paam-b vʋʋsem sõng zaeebã sã n tags galʋ-tẽn-kãngã yelle, kõt-b-la sũ-noog wʋsgo. Sẽn saagd-b n na n wa vɩɩmd tẽngã zugã me segd n maana sũ-noog ne galʋ-tẽngã. Wẽnnaam Rĩungã yʋʋm tusr naamã sasa, Zerizalɛm-paalgã na n waa ne bark ka tɛk tẽngã zugu. A Zã yãa bark-kãensã sẽn yit “vɩɩm koom kʋɩlg” pʋgẽ n sigda. “Vɩɩm tɩɩs” n da be kʋɩlgã kɩrems a yiibã fãa n tar vãad sẽn yaa “buud fãa neb bãas tɩɩm.” (Vẽn. 22:1, 2) Sasa-kãnga, ninsaalbã fãa n na n paam n dɩɩ bõn-sõma-kãensã yõodo. Bilf-bilfã, ãdem-biisã fãa na n wa lebga neb sẽn zems zãnga. Bãase, toogo, la yãbr pa na n le zĩnd ye.—Vẽn. 21:3-5.

17. Wa Vẽnegr 20:11-13 sẽn wilgdã, ãnd dãmb n na n paam n dɩ bõn-sõma nins sẽn na n zĩnd yʋʋm tusr naamã sasa wã nafa?

¹⁷ Ãnd dãmb n na n paam n dɩ bõn-sõma-kãensã fãa nafa? Pipi, yaa kʋʋn-kãsengã sẽn na n põs Armagedõ sasa wã, n paas kamb nins sẽn na n dog dũni-paalgã pʋgẽ wã. Vẽnegr sak 20 wã me wilgdame tɩ sẽn ki-bã na n vʋʋgame. (Karm-y Vẽnegr 20:11-13.) “Nin-tɩrsã” sẽn da maan kaalem pĩndã, n paas “sẽn pa-b nin-tɩrsã” rat n yeel tɩ sẽn pa paam-b n bãng a Zeova wã na n vʋʋgame n  vɩɩmd tẽngã zugu. (Tʋʋ. 24:15; Zã 5:28, 29) Woto rat n yeelame tɩ yʋʋm tusr naamã sasa, sẽn ki-bã fãa na n vʋʋgame bɩ? Ayo. Neb nins sẽn da paam n tõe n tũ a Zeova, n yaool n zãgs rẽ fasɩ hal n wa maan kaalmã pa na n vʋʋg ye. B ra paamame n tõe n wa vɩɩmd arzãnã pʋgẽ wakat sẽn kõn sa tẽngã zugu, la b wilgame tɩ b pa rat ye.—Mat. 25:46; 2 Tes. 1:9; Vẽn. 17:8; 20:15.

18. Yʋʋm tusrã saabẽ tɩ ninsaalbã vɩɩm lebga wãn to tẽngã zugu?

¹⁸ Yʋʋm tusr naamã sã n wa sa, rẽ tɩ sẽn be-b tẽngã zugã fãa lebga neb sẽn zems zãnga. Yel-wẽndã d yaab a Ãdem sẽn long-dã pa na n le tall pãng ned baa a yembr zug ye. (Rom. 5:12) D na n paama d mens fasɩ ne zu-loees nins fãa yel-wẽndã sẽn wa ne wã. Woto na n yɩɩ wa sẽn na n vɩɩmd-b tẽngã zugã sẽn “vʋʋge,” bala yʋʋm tusr naamã saabẽ tɩ b lebga neb sẽn zems zãnga.—Vẽn. 20:5.

19. Bõe yĩng tɩ yaoolem makr na n zĩndi?

¹⁹ D miime t’a Zeezi kell n maana sɩd ne a Zeova, baa ne a Sʋɩtãan sẽn mak-a wã. La rẽ yĩnga, wakat-kãnga, nebã fãa sẽn zems zãngã na n maana sɩd ne a Zeova, b sã n wa bas a Sʋɩtãan t’a na n mak-b bɩ? Ned kam fãa na n tõog n leoka sok-kãngã a meng yĩnga, b sã n wa yiis a Sʋɩtãan bog-zulungã pʋgẽ yʋʋm tursã saabẽ. (Vẽn. 20:7) Neb nins sẽn na n kell n yals kãn-kãe yaoolem makrã sasa wã na n paama vɩɩm sẽn kõn sa, n yaa n paam lohorem meng-menga. (Rom. 8:21) B na n sãama neb nins sẽn kɩɩs a Zeova wã, n paas a Sʋɩtãan ne a zĩn-dãmbã wakat fãa yĩnga.—Vẽn. 20:8-10.

20. Bãngr-goam nins sẽn be Vẽnegr sebrã pʋgẽ wã kɩtame tɩ y manesem yaa wãna?

²⁰ D sẽn gom bũmb kẽer sẽn be Vẽnegr sebrã pʋgẽ yellã, y manesem yaa wãna? Y sã n mams y yamẽ, n ne y sẽn naag n pidsd bãngr-gom-kãensã wã, y sũur pa noom sɩda? Woto pa kɩt tɩ y rat n bool nebã tɩ b wa naag tõnd tũudum hakɩɩkã pʋgẽ n tũ d Wẽnnaamã sɩda? (Vẽn. 22:17) D sẽn gom bõn-sõma nins sẽn na n zĩnd ka la bilfã yellã, d sũy noomame hal tɩ d rat n yeel wa tẽn-tʋmd a Zã. A yeelame: “Ãmiina! Zu-soab a Zeezi, wa-y-yã.”—Vẽn. 22:20.