Sã n wa yaa woto, tigingã neb segd n gesame tɩ raoã pĩnd kãadmã kaoome, sẽn mik t’a lebg n kẽe kãadem ne pag a to wã. La b pa segd n ges kãadem-paallã wa kãadem sẽn yaa yoob ye. Sẽn na yɩl n wʋm bũmb ning sẽn kɩt tɩ d yet woto wã võore, bɩ d ges bũmb ning a Zeezi sẽn yeel kãadmã kaoobo, la lebs n kẽ kãadmã wɛɛngẽ wã.

Matiye 19:9 wã pʋgẽ, a Zeezi wilga bũmb ning bal sẽn kõt ned sor t’a tõe n kao a kãadem. A yeelame: “Ned sã n bas a pag tɩ pa a sẽn yo yĩng n tɩ rɩk pag a to, a yoodame.” A Zeezi gomdã pʋgẽ, d bãngame tɩ 1) yaa yoob bal n kõt ned sor t’a tõe n kao a kãadem tɩ zems ne Biiblã noyã, la 2) rao sã n kao a kãadem tɩ pa zems ne Biiblã noy n lebs n kẽ kãadem, yaa yoobo. *

Rẽ yĩnga, a Zeezi ra rat n yeelame tɩ rao sã n yo, n kao a kãadem, Biiblã kõt-a-la sor t’a tõe n lebs n kẽ kãadem bɩ? D na n leoka sok-kãngã. Rao sẽn kẽ kãadem sã n yo, a pagã sẽn pa yo wã n get a sã n na n kõ-a-la sugr bɩ a pa na n kõ-a sugri. Pagã sã n pa kõ-a sugr tɩ b kao kãadmã tɩ zems ne laloa wã, b ned fãa tara sor n na n lebg n kẽ kãadem ne ned a to.

Pagã tõe n yãka yam n na n kõ a sɩdã sugri, a sẽn pa rat tɩ b kao kãadmã yĩnga. La a sɩdã sẽn yo wã sã n pa sak pagã sugrã tɩ b baas n kao b kãadmã? Sẽn mik tɩ pagã ra rat n kõo a sɩdã sugr tɩ b kell n zĩnd ne taabã, Biiblã pa kõt raoã sẽn kao kãadmã sor t’a tõe n lebs n kẽ kãadem ne pag a to ye. A sã n baas n kẽ kãadem ne pag a to, baa ne Biiblã sẽn pa kõt-a sorã, a le yoome yɛsa, tɩ tigingã kãsem-dãmb segd n le lugl bʋ-kaoor sull a to n bʋ-a.—1 Kor. 5:1, 2; 6:9, 10.

Rao sã n kao a kãadem tɩ pa zems ne Biiblã noyã n lebg n kẽ kãadem, wãn to la tigingã neb segd n ges a pĩnd kãadmã la a kãadem-paallã? Sã n yaa ne Biiblã, a pĩnd kãadmã kaoome bɩ? Pagã ket n tõe n yãka yam n na n kõ a sɩdã sẽn yo wã sugri, wall n pa kõ-a sugr bɩ? Tigingã neb segd n gesame tɩ raoã sẽn lebg n kẽ kãadmã yaa kãadem sẽn yaa yoob bɩ?

Pĩndã, tigingã neb ra getame tɩ kãadem a woto yaa yoobo, sẽn mik tɩ pagã ket n vɩɩme, n pa lebs n kẽ kãadem, la a pa yo wã. Sẽn paase, a Zeezi sẽn wa n gomd kãadmã kaoob la lebs n kẽ kãadmã yellã, a pa gom sẽn pa yo-a wã yell ye. A wilgame tɩ rao sã n kao a kãadem tɩ pa zems ne Biiblã sẽn yetã n lebs n kẽ kãadem, yaa yoobo. Sẽn mik t’a kaoo a kãadmã n lebs n kẽ kãadem ne ned a to wã, yaa yoob wa a Zeezi sẽn yeelã. Woto yĩnga, d tõe n yeelame t’a pĩnd kãadmã kaoome.

 Rao sã n kao a kãadem n lebs n kẽ kãadem ne ned a to, pa le be tɩ pagã tõe n kõ-a-la sugr wall a pa tõe n kõ-a sugr ye. Woto wã, yãk yam n kõ raoã sugr wall n pa kõ-a sugrã pa le yaa zɩɩb sẽn zao pagã zug ye. Sẽn paase, tigingã neb pa segd n ges tɩ kãadem-paallã yaa yoobo, pagã sẽn ket n vɩ, n pa lebs n kẽ kãadem la a pa yo me wã yĩng ye. *

Makr ning d sẽn dɩkã pʋgẽ, raoã yoome, tɩ baas ne kãadmã kaoobo. La sã n mikame tɩ raoã pa yo, la a yaool n kaoo a kãadmã n lebs n kẽ kãadem ne ned a to? La sã n yaa kãadmã kaoob poor la raoã yo-yã, n lebs n kẽ kãadem ne ned a to, baa ne a pagã sẽn da rat n kõ-a sugrã? Yel-kãensã fãa pʋgẽ, sẽn mik tɩ raoã kaoo a kãadmã n lebs n kẽ kãadem ne ned a to wã, yaa wa a sẽn yo. Dẽnd d tõe n yeelame t’a pĩnd kãadmã kaoome. D pa segd n ges kãadem-paallã wa kãadem sẽn yaa yoob ye. Wa b sẽn wilg yʋʋmd 1980 wao-fugdg kiuug rasem 15 Gũusg Gasgã seb-neng 31 pʋgẽ wã, “masã a lebs n kẽe kãadem, tɩ kɩt t’a pa tõe n kao kãadem-kãng n lebg n tɩ zĩnd ne a pĩnd pagã ye. A sẽn kao a kãadmã, n yo, la a lebs n kẽ kãadmã yĩnga, a pĩnd kãadmã kaoome.”

D sẽn lebg n bilg Matiye 19:9 wã võor woto wã, pa rat n yeel tɩ kiris-nebã segd n getame tɩ kãadmã pa le yaa sõng Wẽnnaam nifẽ, la tɩ yoobã me pa maneg n yaa wẽng ye. Rao sã n kao a kãadem tɩ pa zems ne Biiblã noyã, n lebs n kẽ kãadem ne pag a to, tɩ Biiblã yaool n pa kõt-a sore, a yoome, tɩ b segd n lugl bʋ-kaoor sull n bʋ-a. (A sẽn kẽ kãadem ne pag ningã me sã n yaa kiris-neda, b segd n lugla bʋ-kaoor sull n bʋ yẽ me, bala yẽ me yoome.) Baa ne d sẽn pa segd n ges kãadem a woto wa kãadem sẽn yaa yoobã, sã n pa kaoosa yʋʋm wʋsg hal tɩ yellã wa maag zãnga, raoã pa tol n tõe n paam tʋʋmd tigingã pʋgẽ ye. Nand tɩ kãsem-dãmbã kõ raoã tʋʋmd tigingã pʋgẽ, b na n bao n bãnga a pʋg-kʋdrã yɛl sẽn yaa to-to, la b kom-bõonegã me yɛl sẽn yaa to-to, sã n mikame tɩ b ra tara kamba.—Mal. 2:14-16.

Sẽn mik tɩ kao kãadem bɩ n lebs n kẽ kãadem tɩ pa zems ne Biiblã noyã wata ne zu-loees wʋsgã, kiris-nebã segd n dɩka a Zeova togs-n-taare, n get kãadmã wa bũmb sẽn yaa sõngo.—Koɛ. 5:3, 4; Ebre. 13:4.