1. Bõe la d tõe n maan n paam sũ-noog wʋsgo?

 A ZEOVA ratame tɩ d paam sũ-noogo. Bala sũ-noogã naaga vʋʋsem sõngã biis sʋka. (Gal. 5:22) Sẽn mik tɩ kũun wata ne sũ-noog n yɩɩd reegrã, d sã n kẽes d meng sõma koɛɛgã mooneg pʋgẽ la d maand bũmb toor-toor n sõngd d tẽed-n-taasã, d paamda sũ-noogo.—Tʋʋ. 20:35.

2-3. a) Wa Galat-rãmb 6:4 sẽn wilgdã, bõe ne bõe la d tõe n maan n kell n tall sũ-noog a Zeova tʋʋmdã pʋgẽ? b) Bõe yell la d na n gom sõs-kãngã pʋgẽ?

² Galat-rãmb 6:4 pʋgẽ, tẽn-tʋmd a Poll wilga bũmb a yiib sẽn tõe n sõng-d tɩ d kell n tall sũ-noogo. (Karm-y.) Pipi, yaa d sẽn na n maand d sẽn tõe fãa a Zeova tʋʋmdã pʋgẽ. Sã n mikame tɩ d sɩd maanda woto, d segd n talla sũ-noogo. (Mat. 22:36-38) Yiibu, d pa segd n dɩkd d meng n makd ne neb a taabã ye. Baa d laafɩ wã, d minimã la d bãngrã sẽn yaa to-to wã sã n kɩt tɩ d pa tõe n maan bũmb wʋsgo, d segd n pʋʋsa a Zeova barka, bũmb nins d sẽn ket n tõe n maanã yĩnga. Bũmb nins fãa d sẽn tarã pʋd n yaa yẽ n kõ-do. Koɛɛgã mooneg wɛɛngẽ, neb a taab sã n tara minim bũmb kẽer wɛɛngẽ n yɩɩd tõndo, d segd n maana sũ-noogo, b sẽn tar b minimã n pẽgd a Zeova n pa baood b mens nafre, bɩ n pa baood n wilg tɩ b sãoo b taabã yĩnga. D pʋd n segd n dɩka b togs-n-taare, la d ra wags ne-b ye.

³ Sõs-kãngã pʋgẽ, d na n yãa bũmb kẽer d sẽn tõe n maan tɩ sõng-do, d sã n wa koms raoodo, d sẽn pa le tõe n maan bũmb wʋsg a Zeova tʋʋmdã pʋgẽ wã yĩnga. D leb n na n yãa d sẽn tõe n maan to-to tɩ d minimã naf d taabã sõma, la yam ning d sẽn tõe n dɩk neb a taabã mak-sõngã pʋgẽ.

4. Bõe n tõe n wa kɩt tɩ neb kẽer koms raoodo? Togs-y kibare.

⁴ Tõnd sʋkã neb kẽer pa le tõe n tʋm tʋʋm nins fãa b sẽn dat a Zeova tũudmã pʋgẽ, b yʋʋmã sẽn vẽsg wall b laafɩ wã sẽn pa le waoog yĩnga, tɩ rẽ komsd b raoodo. Yɩɩ woto ne a Karoll. Pĩndã, a ra moonda koɛɛgã zĩig koe-moondb raab sẽn yaa kãsenga. Wakat-kãnga, a ra zãmsda neb 35 Biiblã. A pʋd n sõnga kẽer tɩ b wa rɩk b meng n kõ a Zeova n deeg lisgu. A Karoll koe-moonegã ra womda biis sõma. La a wa n lʋɩɩ bãaga, n da segd n zĩnd yir n pa le yit wakat fãa ye. A yeelame: “Mam miime tɩ m laafɩ wã sẽn pa waoogã yĩnga, m pa tõe n maan wa neb a taabã ye. Kɩtame tɩ m ningd m meng taale. Raabã yẽ beeme, la m laafɩ wã sẽn pa waoogã kɩtame tɩ yaa toogo, tɩ rẽ komsd m raoodo.” A Karoll rat n maana a sẽn tõe fãa a Zeova tʋʋmdã pʋgẽ, la woto sɩd seka pẽgre! D tõe n kɩsa sɩd tɩ d Wẽnnaamã sẽn yaa nimbãan-zoɛtã sũur nooma ne-a, a sẽn maand a sẽn tõe fãa wã yĩnga.

5. a) D sã n wa koms raood d sẽn pa le tõe n maan wa pĩndã yĩnga, bõe la d segd n tẽege? b) Wa fotã sẽn wilgdã, bõe n wilgd tɩ saam-biigã ket n maanda a sẽn tõe fãa a Zeova tʋʋmdã pʋgẽ?

⁵ Y sã n wa koms raood y sẽn pa le tõe n maan wa pĩndã yĩnga, bɩ y sok y meng yaa: ‘Bõe la a Zeova rat tɩ m maane?’ A Zeova ratame tɩ y maan y sẽn tõe fãa, tɩ zems ne y yɛlã sẽn yaa to-to wã. D rɩk makre: Saam-bi-poak sẽn tar yʋʋm 80 n koms raoodo, a sẽn pa le tõe n moon koɛɛgã wʋsg wa a sẽn wa n tar yʋʋm 40. A tagsdame tɩ baa ne a sẽn maand a sẽn tõe fãa wã, a Zeova sũur pa noom ne rẽ ye. La rẽ yĩnga, yaa sɩd bɩ? Tags-y n ges-y-yã: Saam-bi-poakã sã n da maanda a sẽn tõe fãa a sẽn wa n tar yʋʋm 40, n tar yʋʋm 80 masã n ket n maand a sẽn tõe fãa, dẽnd d tõe n yeelame tɩ hal pĩndã n tãag masã, a maanda a sẽn tõe fãa a Zeova tʋʋmdã pʋgẽ. D sã n wa pa le tõe n tʋm a Zeova tʋʋmdã wʋsg wa pĩndã, d tõe n tagsame t’a Zeova sũur pa le noom ne-d ye. Sã n wa yaa woto, d segd n tẽegame t’a Zeova n mi d sẽn tõe n maan tɛk tɩ ta a yam, la pa tõnd ye. D sã n maand d sẽn tõe fãa, a Zeova na n yeel-d lame yaa: “Yaa sõma!”—Ges-y Matiye 25:20-23.

6. Yam-bʋg la d tõe n dɩk a Mariya kibarã pʋgẽ?

⁶ D sã n tagsd bũmb nins d sẽn tõe n maanã yell n yɩɩd d sẽn pa le tõe n maanã, d na n paama sũ-noogo. D gom saam-bi-poak a ye yʋʋr sẽn boond t’a Mariya yelle. A bẽedame, tɩ rẽ kɩt t’a pa le tõe n moon koɛɛgã wʋsg ye. Sɩngrẽ wã, a sũurã sãama wʋsgo, t’a ra tagsdẽ t’a ka yõod ye. La a tagsa b tigingã saam-bi-poak a ye yelle. Yaa saam-bi-poak sẽn ka laafɩ, n be roogẽ n pa le tõe n yi ye. A Mariya yãka yam n sõng saam-bi-poakã. Ad a Mariya sẽn yeele: “Mam baoome n na n naag-a n moon koɛɛgã ne telefõn la lɛta maasem. M sã n da naag-a n moon fãa, m sũur yaa noogo, m sẽn mi tɩ m tõog n sõng-a lame wã yĩnga.” Tõnd me sã n tagsd d sẽn tõe n maanã yell n yɩɩd d sẽn pa le tõe n maanã, d sũ-noogã na n paasame. La a Zeova tʋʋmdã pʋgẽ, d sã n tara minim tʋʋmd ning wɛɛngẽ wall d tõe n tʋma wʋsg n paase, bõe la d tõe n maane?

7. Bõe la tẽn-tʋmd a Pɩyɛɛr sagl kiris-nebã tɩ b maane?

⁷ Tẽn-tʋmd a Pɩyɛɛr pipi lɛtrã pʋgẽ, a sagla kiris-nebã tɩ b tall kũun wall minim nins fãa b sẽn tarã n keng b tẽed-n-taasã raoodo. A yeelame: “Bɩ yãmb ned kam  fãa tall kũun ning a sẽn paamã n sõng a to, bala yãmb yaa yel-gɛt-sõamyã sẽn paam Wẽnnaam barkã.” (1 Pɩy. 4:10) D sã n tara minim, bɩ d tall rẽ n sõng d taabã, n da yɛɛsd b na n wa maand sũ-kiir ne-do, bɩ b na n wa koms raood ye. D sã n pa maan woto, d pa tõe n yeel tɩ d tʋmda a Zeova tʋʋmdã wa d sẽn tõe fãa ye.

8. Wa 1 Korẽnt rãmb 4:6, 7 sẽn wilgdã, bõe yĩng tɩ d pa segd n wukd d mense, d minimã yĩnga?

⁸ Yaa sɩd tɩ d segd n talla d minimã n sõng d taabã wa d sẽn tõe, la d segd n gũusame n da wa wukd d mens rẽ yĩng ye. (Karm-y 1 Korẽnt rãmb 4:6, 7.) Wala makre, yɩl n sɩng Biibl zãmsg ne ned tõe n yaa nana ne-yã. Sã n yaa rẽ, bɩ y modg n sɩngd Biibl zãmsg ne nebã. Y sã n maand woto yaa sõma. La y sã n wukd y meng rẽ yĩnga pa sõma ye. Mams-y n ges-y daar a ye y sẽn tõog n moon koɛɛgã sõma, n paam n sɩng Biibl zãmsg ne neda. Y sũur yɩɩ noog wʋsgo, tɩ y rat n togs y koe-moonegã sullã neba. La y sẽn wa n be ne-bã, saam-bi-poak n togs kibare, sẽn wilgd a sẽn moon koɛɛgã n tõog n kõ ned sebre. Saam-bi-poakã kõo ned sebre. La yãmb yẽ tõog n sɩnga Biibl zãmsg ne neda. Woto wã, bõe la y tog n maane? Yaa sɩd tɩ y sã n togs y koe-moonegã sullã neb y kibarã, na n kenga b raoodo. La y tõe n yãka yam n bas n wa togs-b nindaare, sẽn na yɩl tɩ saam-bi-poak ning sẽn tõog n kõ ned sebrã ra wa tagsd tɩ yãmb sãoo yẽ ye. Y sã n sɩd maan woto la sõma. La ket-y n modgd-y n sɩngd Biibl zãmsg ne nebã n da bas ye. Y sẽn tar minimã, tall-y n sõng-y nebã.

9. Bõe la d segd n maan ne d minimã?

⁹ D ra yĩm tɩ minim nins fãa d sẽn tarã yaa Wẽnnaam n kõ-d ye. D segd n talla rẽ n keng d tigingã neb raoodo, la d ra tar n maand wilg-m-meng ye. (Fili. 2:3) D sã n tar d pãngã la d minimã n maand Wẽnnaam daabo, yaa bʋʋm sẽn sek d na maan sũ-noogo. Woto pa wilgd tɩ d maandame tɩ yɩɩgd d taabã, wall d são-b lame ye. Wilgdame tɩ d tara d minimã n sõngdẽ t’a Zeova yʋʋr paamd pẽgre.

10. Bõe yĩng tɩ pa sõma tɩ d rɩkd d meng n makd ne d taabã?

¹⁰ D sã n pa gũusi, d tõe n wa rɩka d minimã n mak ne ned minim sẽn pa ta tõnd ye. Wala makre, saam-biig ning tõe n tara minim n tõe n wɛgs sõsg sõma zãma taoore. A tõe n tagsda a sũurẽ t’a sãoo saam-biig sẽn pa tar minim a woto. La tõe tɩ saam-bi-kãng mii sãamb reegr sõma, n wubd a kambã sõma, la a tar yẽesem koɛɛgã mooneg pʋgẽ me. D sũur nooma  wʋsgo, d sẽn ne saam-biis la saam-bi-pogs wʋsg sẽn tar b minimã n tʋmd a Zeova tʋʋmdã la b sõngd b taabã.

11. Bõe yĩng tɩ d segd n modg n dɩk a Zeezi togs-n-taare?

¹¹ Baa ne d sẽn pa segd n makd d meng ne neb a taabã, d tõe n dɩka yam wẽn-sakdb kẽer mak-sõng pʋgẽ tɩ naf-do. Wala makre, a Zeezi kõo tõnd mak-sõngo. Yaa sɩd tɩ d pa zems zãng wa a Zeezi ye. La a zʋg-sõma wã, n paas a sẽn maan bũmb ninsã tõe n sõnga tõnd tɩ d bãng bũmb wʋsgo. (1 Pɩy. 2:21) D sã n modgd n dɩkd a togs-n-taar wa d sẽn tõe, d na n tõog n tũuda a Zeova sõma, tɩ d koe-moonegã me womd biisi.

12-13. Yam-bʋg la d tõe n dɩk rĩm a Davɩɩd mak-sõngã pʋgẽ?

¹² Wẽnnaam Gomdã pʋgẽ, b gomda pagb la rap wʋsg sẽn da yaa wẽn-sakdb yelle, tɩ d tõe n dɩk b togs-n-taare, baa ne b sẽn da pa zems zãngã. (Ebre. 6:12) Wala makre, rĩm a Davɩɩd. A Zeova bool-a lame tɩ ‘ned sẽn ta mam yam.’ Biibl a to pʋgẽ, b wilgame t’a ra yaa ned Wẽnnaam yam sẽn kẽ. (Tʋʋ. 13:22) Baa ne rẽ, a Davɩɩd ra pa zems zãng ye. Yaa sɩd t’a tʋma tʋʋm sẽn pa sõma. La ne rẽ fãa, a yaa mak-sõngo. Bõe yĩng tɩ d yet woto? Bala b sẽn wa n kibl-a wã, a pa bao padems ye. A sak n deega saglsã b sẽn kõ-a wã, n tek yam n kos sugri. La woto kɩtame t’a Zeova sak n kõ-a sugri.—Yɩɩn. 51:5, 6, 12-14.

¹³ D tõe n dɩka yam a Davɩɩd mak-sõngã pʋgẽ. D tõe n soka d meng yaa: ‘B sã n wa sagl maam, m manesem yaa wãna? M sakd n deega m kongr bɩ, bɩ m baooda pademse? M dɩkda yellã n dogl neb a taab bɩ? M modgdame n da le yɩlem m kongrã bɩ?’ Y tõe n soka y meng sogsg a woto, y sã n wa karem wẽn-sakdb a taab kibay Biiblã pʋgẽ. Bãmb me ra maooda ne y zu-loɛɛgã buud bɩ? Zʋg-sõma-bʋs la b tall-yã? Y sã n wa karem kibar fãa, bɩ y sok y meng yaa: ‘Bõe la m tõe n maan n dɩk wẽn-sakd-kãng togs-n-taare?’

14. Wãn to la d tẽed-n-taasã mak-sõngã tõe n naf-do?

¹⁴ D leb n tõe dɩka yam d tẽed-n-taas sẽn yaa kom-bɩɩs la yʋʋm sẽn vẽsg nengẽ. Ned bee yãmb tigingã pʋgẽ n maood ne zu-loɛɛg ning bɩ? Tõe t’a rog-taas n pẽdgd-a n dat t’a maan wa bãmba, bɩ yaa a zakã neb n namsd-a a tũudmã yĩnga, wall yaa a laafɩ wã n pa waooge. Yãmb nee zʋg-sõma a soabã sẽn tare, tɩ y rat n dɩk a togs-n-taar bɩ? Y  sã n tags a mak-sõngã zugu, tõe n sõng-y lame tɩ y bãng y sẽn tõe n maane, n tõog n mao ne y mengã zu-loɛɛga. D sũur nooma wʋsgo, d sẽn tar saam-biis la saam-bi-pogs sẽn yaa mak-sõngo, tɩ d tõe n dɩk b togs-n-taarã.—Ebre. 13:7; Zak 1:2, 3.

15. Sagl-bʋg la tẽn-tʋmd a Poll kõ-yã, tɩ tõe n sõng-d tɩ d kell n tall sũ-noog a Zeova tʋʋmdã pʋgẽ?

¹⁵ Sẽn na yɩl tɩ laafɩ la zems-n-taar zĩnd tigingã pʋgẽ, ned kam fãa tog n maanda a sẽn tõe fãa. Yɩɩ woto ne pipi kiris-nebã. B ra tara minim la tʋʋm toor-toore. (1 Kor. 12:4, 7-11) La woto pa wa ne wags-taab la welgr b sʋk ye. A Poll pʋd n sagl-b lame tɩ b ned kam fãa modg n maan a sẽn segd n maanã, sẽn na yɩl tɩ “Kiristã yĩngã paam pãnga.” A Poll yeela Efɛɛz kiris-nebã yaa: “Yĩngã wil fãa sã n tʋmd sõma, sõngdame tɩ yĩngã bɩtẽ, a sẽn paamd pãng nonglem pʋgẽ wã yĩnga.” (Efɛɛ. 4:1-3, 11, 12, 16) Neb nins sẽn sak n tũ a Poll sẽn yeelã sõngame tɩ laafɩ la zems-n-taar zĩnd tigimsã pʋsẽ, wa sẽn yaa to-to d tigimsã pʋsẽ rũndã-rũndã wã.

16. Bõe la d segd n yãk yam n maane? (Ebre-rãmbã 6:10)

¹⁶ Modg-y n da rɩkd y meng n makd ne y taabã ye. Rɩk-y yam a Zeezi mak-sõngã pʋgẽ, la y modg n tall a zʋg-sõma wã buudu. Rɩk-y wẽn-sakdb nins Biiblã sẽn gomd b yellã togs-n-taare. Y leb n tõe n dɩka yam d tẽed-n-taas kẽer mak-sõng pʋgẽ. Ket-y n maand-y y sẽn tõe fãa a Zeova tʋʋmdã pʋgẽ, la y kɩs sɩd t’a yaa “tɩrlem soaba, n pa na n yĩm yãmb tʋʋmdã” ye. (Karm-y Ebre-rãmb 6:10.) Kell-y n tʋm-y a Zeova tʋʋmdã ne sũ-noogo, n miẽ t’a sũur nooma ne-yã, y sẽn maand y sẽn tõe fãa n na n ta a yamã yĩnga.