1. Bõe yĩng tɩ d segd n gũus ne d tagsa wã?

 D SẼN deeg lisgã nan yaa rasem a wãn tɩ yaa yʋʋm wʋsg me, d fãa ratame n yɩ ned ning buud a Zeova sẽn nongã. Sẽn na yɩl n yɩ ned a woto buudu, d segd n gũusda ne d tagsa wã. Bõe yĩnga? Bala naoor wʋsgo, yaa d sẽn tagsd bũmb nins yellã la d maanda. Sã n yaa sẽn noom tõndã bal yell la d tagsd wakat fãa, d na n gomdame la d maand sẽn pa sõma. (Efɛ. 4:17-19) La d sã n tagsd sẽn yaa sõma yell wakat fãa, d no-goamã la d tʋʋmã na n nooma a Zeova.—Gal. 5:16.

2. Bõe yell la d na n gom sõs-kãngã pʋgẽ?

² Wa d sẽn yã sõsg ning sẽn loogã pʋgẽ wã, d pa tõe n pa mi n tall tagsg sẽn pa sõma ye. La d tõe n yãka yam n pa maan wa d sẽn tagsdã ye. Nand tɩ d reeg lisgu, d segd n basa goam la tʋʋm-tʋmdɩ nins fãa a Zeova sẽn kisã. Rẽ yaa pipi bũmb sẽn tar yõod wʋsg d sẽn segd n maane, n tõog n yeeg nin-kʋdgã. La d sã n dat n ta a Zeova yam zãnga, d segdame me n tũ b sẽn kõ-d noor tɩ d “yeelg nin-paalgã.” (Kol. 3:10) Ad sogsg d sẽn na n leok sõs-kãngã pʋgẽ: “Nin-paalgã” yaa bõe? Wãn to la d tõe n yeelg nin-paalgã, la d ra yeeg-a?

3. “Nin-paalgã” yaa bõe, la ned sẽn yer nin-paalgã manesem yaa wãna? (Galat rãmbã 5:22, 23)

³ Ned sẽn “yeelg nin-paalgã” rɩkda a Zeova togs-n-taare. A bɩɩsda vʋʋsem sõngã biisã, la a basdẽ tɩ vʋʋsem sõngã sõngd-a t’a manegd a tagsa wã, a yel-manesmã la a tʋʋm-tʋmdɩ wã. (Karm-y Galat rãmb 5:22, 23.) Wala  makre, a nonga a Zeova la a nin-buiidã. (Mat. 22:36-39) Ned a woto buud kelld n talla a sũ-noogã, baa a sã n maooda ne zu-loe-kɛgemse. (Zak 1:2-4) A yaa ned sẽn baood laafɩ. (Mat. 5:9) A maanda sũ-mare, la a tar bʋgsem ne neb a taabã. (Kol. 3:13) A nonga sẽn yaa sõma, la a maand rẽ. (Luk 6:35) A wilgda ne a tʋʋmã t’a tẽeda a saasẽ Ba wã ne a sũur fãa. (Zak 2:18) Ned sã n bao a noore, a tallda sũ-bʋgsem, la a yõkd a meng a sã n wa be makr taoore.—1 Kor. 9:25, 27; Tɩt 3:2.

4. Sẽn na yɩl n yeelg nin-paalgã, bõe yĩng tɩ d segd n bɩɩs zʋg-sõma nins fãa sẽn be Galat rãmb 5:22, 23 la Biiblã zĩis a taabã?

⁴ Sẽn na yɩl n yeelg nin-paalgã, d segd n bɩɩsa zʋg-sõma nins fãa sẽn be Galat rãmb 5:22, 23, la Biiblã zĩis a taabã. * Zʋg-sõma-kãens pa wa fut d sẽn ningd n toeemdẽ ye. Zʋg-sõma-kãensã wʋsg tũuda taaba. Wala makre, f sã n sɩd nong f to, f na n talla sũ-mar la bʋgsem ne-a. Sẽn paase, d sã n dat n wilg tɩ d sɩd yaa nin-sõngo, d segd n talla sũ-bʋgsem la yõk-m-menga.

5. Tall “Kiristã yamã buud” rat n yeelame tɩ bõe? Bõe yĩng tɩ d segd n bao n bãng a Zeezi vɩɩmã sẽn yɩ to-to wã? (1 Korẽnt rãmbã 2:16)

⁵ Karm-y 1 Korẽnt rãmb 2:16. Sẽn na yɩl n yeelg nin-paalgã, d segd n talla “Kiristã yamã buudu.” Rat n yeel tɩ d bao n bãng a Zeezi sẽn tagsd to-to, la d rɩk a togs-n-taare. A Zeezi bɩɩsda Wẽnnaam vʋʋsem sõngã biis tɩ zemsd zãnga. Wa nin-gɛtga, a rɩkda a Zeova togs-n-taar kɛpɩ, n tar a zʋg-sõma wã buudu. (Ebre. 1:3) D sã n modgd n tagsd wa a Zeezi, d na n tõog n dɩka a togs-n-taar n tall a yel-manesmã buudu.—Fili. 2:5.

6. D sã n wa modgd n na n yeelg nin-paalgã, bõe la d segd n ning d yamẽ?

⁶ Rẽ yĩnga, d tõe n sɩd rɩka a Zeezi togs-n-taar bɩ? Nina tõe n tagsame yaa: ‘A Zeezi zemsa zãnga. M pa tol n tõe n yɩ wa yẽ ye.’ Y sã n tagsda woto, ad bũmb a tãab y sẽn segd n tẽege: Pipi, a Zeova naan-y lame n wõneg yẽ ne a Zeezi. Dẽnd y tõe n yãka yam n dɩk b togs-n-taare, la y na n tõog n yɩɩ wa bãmba, baa yaa bilfu. (Sɩng. 1:26) Yiibu,  Wẽnnaam vʋʋsem sõngã n yaa pãng ning sẽn ka to ãndũniyã fãa pʋgẽ. Ne pãn-kãng maasem, y na n tõog n maana bũmb kẽer y sẽn da pa tol n tõe n maan ne y meng pãnga. Tãabo, a Zeova pa kot-y tɩ y bɩɩs vʋʋsem sõngã biis tɩ zems zãng masã meng ye. D Ba a Zeova sẽn nong-dã pʋd n na n kõo sẽn saagd-b n na n wa vɩɩmd tẽngã zugã yʋʋm 1 000, tɩ b wa lebg neb sẽn zems zãnga. (Vẽn. 20:1-3) La nananda, a Zeova ratame tɩ d modg wa d sẽn tõe tɛka, la d teeg-a sẽn na yɩl t’a sõng-do.

7. Bõe yell la d na n gom masã?

⁷ Bõe takɩ la d tõe n maan n dɩk a Zeezi togs-n-taare? Bɩ d gom Wẽnnaam vʋʋsem sõngã biis a naas yell koɛɛg-koɛɛga. D na n yãa a Zeezi sẽn bɩɩs zʋg-sõma-kãens to-to, la d sẽn tõe n dɩk a togs-n-taar to-to. Sẽn paase, d na n yãa sogsg d sẽn tõe n sok d mense, tɩ sõng-d tɩ d maneg n yeelg nin-paalgã sõma.

8. Wãn to la a Zeezi wilg t’a nonga Wẽnnaam la ninsaalbã?

⁸ A Zeezi sẽn da nong a Ba a Zeova ne a sũur fãa wã yĩnga, a monga a meng bũmb wʋsg a Ba wã yĩnga, la tõnd me yĩnga. (Zã 14:31; 15:13) A vɩɩmã sẽn da yaa to-to tẽngã zugã wilgdame t’a nonga ninsaalbã hal wʋsgo. Daar fãa, a ra wilgdame t’a nonga nebã, la t’a zoeta b nimbãanega, baa sãnda sẽn da namsd-a wã. Bũmb sẽn tar yõod wʋsg a sẽn maan n wilg t’a nonga nebã, yaa a sẽn sõng-b tɩ b bãng Wẽnnaam Rĩungã. (Luk 4:43, 44) A Zeezi leb n wilgame t’a nonga Wẽnnaam la ninsaalbã ne a sũur fãa, a sẽn sak n nams la a ki kũ-toaag yel-wẽn-maandb nusẽ wã. A sẽn maan woto wã kɩtame tɩ d fãa tõe n wa paam vɩɩm sẽn kõn sa wã.

9. Wãn to la d tõe n dɩk a Zeezi togs-n-taar n wilg tɩ d nonga d taabã?

⁹ D rɩka d meng n kõ d saasẽ Ba a Zeova n deeg lisgu, d sẽn nong-a wã yĩnga. Dẽnd wa a Zeezi, d segd n talla manesem sẽn yaa sõma ne d taabã, n wilg tɩ d nonga a Zeova. Tẽn-tʋmd a Zã yeelame tɩ “ned ning sẽn pa nong a saam-biig a sẽn ne wã pa tõe n nong Wẽnnaam a sẽn pa ne wã ye.” (1 Zã 4:20) D tõe n soka d meng yaa: ‘M modgame n nong m taabã wʋsg bɩ? Mam zoeta m taabã nimbãanega, baa b yaa gãs-gãs ne-m bɩ? M dɩkda m sẽkã la m tarmã n sõngd nebã tɩ b bãngd a Zeova, m sẽn nong-bã yĩng bɩ? M tʋllame n maan woto, baa neb wʋsg pa nand m modgrã, wall b sã n namsd-m bɩ? M tõe n modgame n paam sẽk n paas n sõng nebã tɩ b lebg a Zeezi karen-biis bɩ?’—Efɛ. 5:15, 16.

10. Bõe n wilgd t’a Zeezi ra yaa ned sẽn baood laafɩ?

¹⁰ A Zeezi ra yaa ned sẽn baood laafɩ. Ned sã n da maan-a wẽnga, a ra pa lebsd-a wẽng ye. A pʋd n maana sẽn yɩɩd rẽ. A ra yɩta pipi n baood laafɩ, la a sagend neb a taabã tɩ b modg n welg b mo-yõsã. Wala makre, a sagla a karen-biisã tɩ b sã n dat tɩ b sẽn tũud a Zeova wã ta a yam, b segd n modgame tɩ laafɩ zĩnd bãmb ne b taabã sʋka. (Mat. 5:9, 23, 24) Sẽn paase, a tẽn-tʋmdbã sẽn wa n wẽed no-koɛɛm n na n bãng ãnd n yaa kãseng bãmb sʋkã, a sõng-b lame n yɩlme, sẽn na yɩl tɩ b bas no-koɛɛmã.—Luk 9:46-48; 22:24-27.

11. Bõe la d tõe n maan n wilg tɩ d yaa ned sẽn baood laafɩ?

¹¹ Sẽn na yɩl n yɩ ned sẽn baood laafɩ, d pa segd bal n pa baood zab ye. D segdame me n maand d sẽn tõe fãa sẽn  na yɩl tɩ laafɩ kell n zĩnd tõnd ne d taabã sʋka, la d sõngd d tẽed-n-taasã tɩ b welgd b mo-yõsã. (Fili. 4:2,3; Zak 3:17, 18) D tõe n soka d meng yaa: ‘M sakame n na n mong m meng bũmb kẽer sẽn na yɩl tɩ laafɩ le zĩnd maam ne m taabã sʋk bɩ? Saam-biig bɩ saam-pi-poak sã n sãam m sũuri, m wukda ne-a bɩ? Maam ne ned moor sã n yõsge, m gũudame t’a wa kos-m sugr bɩ, bɩ m yɩta pipi n kẽng a nengẽ tɩ d welg yellã, baa m sã n tagsdame tɩ yẽ n ka bʋʋm? Sã n mik tɩ zemsame, m sagenda sẽn tar-b mo-yõs ne taabã tɩ b modg n welg-a bɩ?’

12. Bõe n wilgd t’a Zeezi ra yaa maan-neer soaba?

¹² A Zeezi ra yaa maanda nebã neere. (Mat. 11:28-30) A ra yaa nin-sõng la wʋmda, baa sã n wa pa nana ne-a, tɩ wilgdẽ t’a yaa maan-neer soabã. Wala makre, daar a ye, Fenisi pag n kos-a t’a sãoog a biiga. Sɩngrẽ wã, a Zeezi zãgsa pagã kosgã. La a sẽn wilg t’a tẽebã tara pãngã, a Zeezi maan-a-la neere, n sãoog a biigã. (Mat. 15:22-28) Baa ne a Zeezi sẽn da maand nebã neerã, a ra pa basd n pa sagend-b ye. A ra togsda neb nins a sẽn nongã sɩd n pa zoe b nif ye. Wala makre, a Pɩyɛɛr sẽn wa n dat n gɩdg-a t’a ra maan a Zeova raabã, a kibl-a-la karen-biis a taabã taoore. (Mark 8:32, 33) A sẽn maan woto wã ra pa sẽn na n ning a Pɩyɛɛr yãnd ye. Ra yaa sẽn na n sõng-a t’a rɩk yam, la sõng karen-biis a taabã tɩ b bãng tɩ b pa segd n wukd b mens ye. Yaa vẽeneg tɩ yãnd bilf yõka a Pɩyɛɛre, la a Zeezi sẽn kibl-a wã naf-a lame.

13. Bõe la d tõe n maan n wilg tɩ d yaa maan-neer soaba?

¹³ D sã n sɩd yaa maan-neer soaba, wakat ninga d segd n togsa d taabã sɩd n da zoe b nif ye. Y sã n wa maand woto bɩ y rɩk a Zeezi togs-n-taare, tɩ y sẽn na n yeel bũmb ningã tik Wẽnnaam Gomdã zugu. Kɩs-y sɩd tɩ b rat n maana sẽn yaa tɩrga, la tɩ sẽn nong-b a Zeova la yãmbã na n sak n tũu y saglgã. Sok-y y meng yaa: ‘Ned m sẽn nong sã n wa maan bũmb sẽn yaa wẽnga, m tallda raood n sagl-a n pa zoe a nif bɩ? M sã n wa sagend neda, m gomda ne bʋgsem bɩ, bɩ m zabd-a lame? M sã n wa yãk yam n na n sagl neda, yaa bõe yĩnga? Yaa m sũur sẽn yik ne-a yĩng bɩ, bɩ yaa m sẽn dat a neer yĩnga?’

14. Bõe la a Zeezi maan tɩ wilgdẽ t’a yaa nin-sõngo?

¹⁴ A Zeezi pa mi sẽn yaa sõma wã bal ye. A maanda sẽn yaa sõma me. A Zeezi nonga a Ba wã. Rẽ n so t’a maand sẽn yaa tɩrg wakat fãa, la ne yam-sõngo. Nin-sõng baooda a sẽn tõe n maan n sõng a taabã wakat fãa, la a maand-b neere. D sã n mi sẽn yaa sõma wã, rẽ bal pa sek ye. D segd n maanda rẽ, la ne yam-sõngo. Nina tõe n sokame yaa: ‘Ned tõe n maana sẽn yaa sõma ne yam-wẽng bɩ?’ N-ye, tõeeme. Wala makre, a Zeezi goma neb sẽn kõt naong rãmb kũun yelle, la b maand b sẽn tõe fãa sẽn na yɩl tɩ nebã bãnge, la b pẽg-ba. Baa b sẽn da maand bũmb ningã sẽn yaa sõma wã, a Zeova sũur da pa noom ne-b ye.—Mat. 6:1-4.

15. Wãn to la d tõe n wilg tɩ d sɩd yaa nin-sõngo?

¹⁵ D tõe n yeelame tɩ d sɩd yaa nin-sõngo, d sã n maand sẽn yaa neer ne yam-sõngo. D tõe n soka d meng yaa: ‘Mam mii sẽn yaa sõma wã, la m sɩd modgd n maand rẽ bɩ? M maanda m taabã neer ne yam-sõng bɩ?’

16. Bõe la d segd n maand daar fãa, la bõe yĩnga?

¹⁶ D pa segd n tags tɩ d lisgã reegr poore, nin-paalgã yeelgr saame ye. D tõe n dɩka nin-paalgã n mak ne fu-paalle. D segd n modgame t’a ket n yaa sõma wakat fãa. Rẽ wɛɛngẽ, bũmb a ye d sẽn tõe n maan yaa d baood n bɩɩsd vʋʋsem sõngã biis daar ne a to fãa. Bõe yĩnga? Bala a Zeova yaa Wẽnnaam sẽn tʋmde, t’a vʋʋsem sõngã me yaa pãn-kãsenga. (Sɩng. 1:2) Dẽnd d segd n basame tɩ vʋʋsem sõngã bil fãa sõng-do, la a sɩd tõe n sõng-d lame. Wala makre, karen-biig a Zak yeelame tɩ “tẽeb me sã n pa lagem ne tʋʋma, a yaa kɩɩnga.” (Zak 2:26) Yaa woto me ne vʋʋsem sõngã biis a taabã fãa. D sã n bɩɩsd b fãa, wilgdame tɩ Wẽnnaam vʋʋsem sõngã sɩd sõngd-d lame.

17. D sã n wa pa tõog n bɩɩs vʋʋsem sõngã biis fãa, d manesem segd n yɩɩ wãna?

¹⁷ Baa kiris-neb nins sẽn deeg lisg hal sẽn kaoosã mi n pa tõogd n bɩɩsd vʋʋsem sõngã biis fãa ye. La sẽn tar yõod n yɩɩda, yaa d ket n bɩɩsd-ba, n da koms raood n bas ye. D rɩk makre: Y sã n maan tɩ y fuug y sẽn nong wʋsg pãrge, y na n yeeg-a-la zĩig pʋgẽ n lob bɩ? Ayo. Tõe tɩ y na n maaga y yĩng n sẽ zĩig ning sẽn pãrgã, sã n mik tɩ tõeeme. Rẽ poore, y na n gũusame t’a buud ra le paam-y ye. Woto me, y sã n wa pa tõog n tall sũ-bʋgsem, sũ-mar wall nonglem ne neda, bɩ y ra sãam y sũur ye. Y sã n pelg y pʋg n kos a soabã sugri, tõe n sõngame tɩ y zoodã ra sãam ye. Rẽ poore, bɩ y modg n da le maan a buud ye.

18. D tõe n basa d yam ne bõe?

¹⁸ D sẽn paam t’a Zeezi kõ-d mak-sõngã noom-d-la wʋsgo. D sã n tall a Zeezi yamã la a yel-manesmã buudu, na n yɩɩ nana ne-d tɩ d tõog n dɩk a togs-n-taare. D sã n modg n maand wa a Zeezi, nin-paalgã d sẽn yeelgã sõmblem na n paasdame. Sõs-kãngã pʋgẽ, d goma Wẽnnaam vʋʋsem sõngã biis a naas bal yelle. Yɩta sõma tɩ y bao sẽk n lebg n ges vʋʋsem sõngã biis a taabã, la y tags n ges y sã n sɩd bɩɩsda zʋg-sõma-kãens sõma. Y tõe n paama sõss wʋsg sẽn gomd rẽ yelle, Vaeesg sebre, a Zeova Kaset rãmbã yĩnga pʋgẽ. Y sã n kẽ be bɩ y gẽes b sẽn gʋlsẽ tɩ “Kiris-nebã vɩɩm,” rẽ poor bɩ y kẽng b sẽn gʋlsẽ tɩ “Zʋg-sõma nins vʋʋsem sõngã sẽn kõtã.” Y tõe n basa y yam tɩ y sã n maan y sẽn tõe fãa, a Zeova na n sõng-y lame tɩ y kell n yeelg nin-paalgã, n da yeeg-a ye.