1. Nand tɩ y sɩng Biiblã zãmsgo, y vɩɩmã ra yaa wãn to?

 NAND tɩ y sɩng Biiblã zãmsg ne a Zeova Kaset rãmbã, y vɩɩmã ra yaa wãn to? D sʋkã neb wʋsg pa rat n le tẽeg rẽ yell ye. Tõe tɩ y yel-manesmã, la y sẽn da yaa ned ning buudã ra tika dũniyã nebã sẽn da get tɩ yaa sõma wall wẽngã zugu. Sã n yaa woto, dẽnd y ra “pa tẽed manegre, la y ra pa mi Wẽnnaam dũniyã pʋgẽ ye.” (Efɛ. 2:12) La y sẽn sɩng Biiblã zãmsgã tɛka, y toeema y yel-manesmã.

2. Y sẽn wa n sɩng Biiblã zãmsgã, bõe la y bãng-yã?

² Y sẽn wa n zãmsd Biiblã, y bãngame tɩ y tara saasẽ Ba sẽn nong-y hal wʋsgo. Y bãngame me tɩ y sã n dat n ta a Zeova yam, la y paam me n naag a nin-buiidã n tũud-a, y segd n toeema y yel-manesmã, y tagsa wã, la y sẽn vɩ to-to wã. Y ra segd n modgdame n maand Wẽnnaam sẽn datã, la y zãagd y meng ne a sẽn kisã.—Efɛ. 5:3-5.

3. Sẽn zems ne Kolos rãmb 3:9, 10, bõe la a Zeova rat tɩ d maane? Bõe yell la d na n gom sõs-kãngã pʋgẽ?

³ A Zeova sẽn yaa d Naand la d saasẽ Ba wã, a tara sor n na n wilg neb nins sẽn tũud-a wã sẽn yaa wa a zakã nebã b yel-manesem sẽn segd n yɩ to-to. A ratame tɩ nand tɩ d wa reeg lisgu, bɩ d maan d sẽn tõe fãa n “yeeg nin-kʋdgã ne a tʋʋmã.” * (Karm-y Kolos rãmb 3:9, 10.) Sõs-kãngã na n sõnga sẽn dat-b n wa reeg lisgã tɩ b paam sogsg a tãab leoore: 1) “Nin-kʋdgã” yaa bõe? 2) Bõe yĩng t’a Zeova rat tɩ d yeeg-a? 3) Wãn to la d tõe n maan rẽ? Sã n mikame tɩ y zoe n deega lisgu, sõs-kãngã na n sõng- y lame tɩ y ra le wa tall tagsa wall yel-manesem nins y sẽn da tar pĩndã tɩ pa sõma wã ye.

4. Ned sẽn yer “nin-kʋdgã” manesem yaa wãna?

⁴ Ned sã n yer “nin-kʋdgã,” naoor wʋsgo a tagsa wã la a yel-manesmã yaa wẽnse. A tõe n yaa rat-m-ye soaba, ned sũur sẽn yikd tao-tao, zɩ-beoog soaba, wall wuk-m-meng soaba. A tõe n nonga yoobã yɛl gesgo, wall filim-dãmb sẽn pid ne yoob yɛl la nen-kɛglem tʋʋma. Sãmbg kae t’a tara zʋg-sõma, la tõe t’a sũur mi n sãamda ne a sẽn yet bɩ n maand bũmb nins tɩ pa sõma wã. La yaa toog ne-a t’a toeem a tagsa wã la a yel-manesmã.—Gal. 5:19-21; 2 Tɩm. 3:2-5.

5. D tõe n yeega nin-kʋdgã fãa bɩ? Wilg-y y leoorã võore. (Tʋʋma 3:19)

⁵ D pa zems zãng ye. Rẽ kɩtame tɩ ned baa a ye pa tõe n yiis tags-wẽns la tʋls-wẽns zãng fasɩ a sũurẽ wã la a yamẽ wã ye. Wakat ninga, d na n maaname bɩ n yeel bũmbu, n wa maand d bãngẽ. (Zer. 17:9; Zak 3:2) La d sã n yeeg nin-kʋdgã, tags-wẽnsã la tʋʋm-wẽnsã pa le so-d ye. D pa le yaa wa d sẽn da yaa to-to pĩndã ye.—Eza. 55:7; karm-y Tʋʋm 3:19.

6. Bõe yĩng t’a Zeova rat tɩ d bas tags-wẽnsã la minim-wẽnsã sẽn yaa nin-kʋdgã rẽndã?

⁶ A Zeova ratame tɩ d bas tags-wẽnsã la minim-wẽnsã, bala a nong-d-la hal wʋsgo, la a rat tɩ d vɩɩmã yɩ noogo. (Eza. 48:17, 18) A miime tɩ neb nins sẽn bas tɩ tʋls-wẽnsã soog-bã wãada b mense, la b wãad b taabã. Sã n wa yaa woto, sãamda a sũuri.

7. Sẽn zems ne Rom dãmb 12:1, 2, bõe la ned kam fãa tõe n yãk yam n maane?

⁷ D zo-rãmb la d zakã neb kẽer tõe n yaand-d lame, b sã n wa neẽ tɩ d modgdame n na n toeem d yel-manesmã. (1 Pɩy. 4:3,4) B tõe n yeel-d lame tɩ d tara sor n na n maan d sẽn date, la tɩ d pa segd n bas tɩ neb a taabã wilg tõnd d sẽn segd n maan ye. La togs sɩdã, neb nins sẽn zãgsd a Zeova noyã tũubã pa so b mens ye. B pʋd n basame tɩ yaa dũni-kãngã sẽn be a Sʋɩtãan nugẽ wã n so-ba. (Karm-y  Rom dãmb 12:1, 2.) Ned fãa segd n yãka a sã n na n kell n yeelga nin-kʋdgã n bas t’a Sʋɩtãan ne a dũniyã so-a, wall a sã n na n basame t’a Zeova sõng-a t’a toeem a yel-manesmã n lebg nin-sõng masã menga.—Eza. 64:7.

8. Bõe n tõe n sõng-d tɩ d bas tags-wẽnsã la minim-wẽnsã?

⁸ A Zeova mime tɩ yɩl n wa tõog n bas tags-wẽnsã la minim-wẽnsã, baooda sẽk la modgre. (Yɩɩn. 103:13, 14) A Zeova tũnugda ne a Gomdã, a vʋʋsem sõngã la a siglgã n kõt tõnd yam la pãnga, la a sõngd tõnd tɩ d tõe n toeem d sẽn yaa ned ning buudã. Sãmbg kae t’a zoe n sõng-y lame. Masã, bɩ d ges bũmb kẽer y sẽn tõe n maane, tɩ sõng-y tɩ y yeeg nin-kʋdgã n wa tõog n deeg lisgu.

9. Bõe la Wẽnnaam Gomdã tõe n sõng-y tɩ y maane?

⁹ Tall-y Biiblã n fees y meng sõma. Wẽnnaam Gomdã yaa wa nen-gɛtga. A tõe n sõng-y lame tɩ y fees y tagsa wã, y no-goamã, la y yel-manesmã. (Zak 1:22-25) Y tõe n paama sagls ned ning sẽn zãmsd yãmb Biiblã nengẽ, la kiris-ned tẽeb sẽn bɩ nengẽ, tɩ sõng-yã. Wala makre, b tõe n talla Biiblã n sõng-y tɩ y bãng y sẽn maand tɩ yaa sõma, la y sẽn maand tɩ pa sõma. B tõe n wilga yãmb y sẽn tõe n maan n paam sagls Biiblã pʋgẽ, tɩ sõng-y tɩ y tõog n bas minim-wẽnsã. A Zeova rat n sõng-y-la wakat fãa. Yẽ n tõe n sõng yãmb n yɩɩda. Bala a mii sẽn be y sũurẽ. (Yel. 14:10; 15:11) Rẽ wã, bɩ y nong n pʋʋsd-a la y zãmsd a Gomdã daar fãa.

10. Yam-bʋg la y rɩk a Eli kibarã pʋgẽ?

¹⁰ Kɩs-y sɩd t’a Zeova noyã sõmblem ka to ye. A Zeova sẽn dat tɩ d maan bũmb ninsã fãa nafd-d lame. Neb nins sẽn tũud a Zeova noyã sũur nooma ne b mense, b vɩɩmã tara võore, b tara sũ-noog hakɩɩk me. (Yɩɩn. 19:8-12) La sẽn pa tũud-b a Zeova noyã paamda zu-loees nins yĩngã tʋʋmã sẽn wat ne wã. Rao a ye yʋʋr sẽn boond t’a Eli yeela bũmb Wẽnnaam noyã kɩɩsg wɛɛngẽ. A roagdbã wub-a-la a Zeova tũudmã pʋgẽ. B ra nonga a Zeova wʋsgo. La a Eli sẽn wa n lebg bi-bɩɩgã, a talla tũud-n-ta-wẽnse. A wa n yũuda dorge, n yooda, la a zuuda. A yeelame t’a wa n neeme t’a sũ-yikrã la a nen-kɛglem tʋʋmã paamda pãnga. A yeelame: “Sɩd-sɩdã, yaa bũmb nins fãa b sẽn wilg maam tɩ kiris-ned pa segd n maanã la m da maanda.” La a ra pa yĩm bũmb nins b sẽn zãms-a hal a yãadmẽ wã ye. A le wa n sɩnga Biiblã zãmsgo. A modga wʋsg n bas a minim-wẽnsã, n tõog n deeg lisg yʋʋmd 2000. A Eli sẽn le wa n sakd n tũud a Zeova noyã, wãn to la naf-a? Ad a sẽn yeele: “Masã m tara sũur pʋgẽ bãane, la sũur-kaset sẽn pa ningd-m taale.” * Kiba-kãngã wilgda vẽeneg tɩ neb nins sẽn zãgsd a Zeova noyã tũubã paamda zu-loees wʋsgo. La baa ne rẽ, a Zeova ratame n sõng-b tɩ b toeeme.

11. Bõe la a Zeova kis-yã?

¹¹ Kisg-y-yã a Zeova sẽn kisi. (Yɩɩn. 97:10) Biiblã wilgdame t’a Zeova kisa “tɩtaam-gesgo, ne zelemd sẽn gomd zĩrẽ goamã, la nus sẽn daagd bʋʋm soab zɩɩm.” (Yel. 6:16, 17) A leb n “kisa nin- kʋʋdbã ne zãmb dãmbã.” (Yɩɩn. 5:7) A pa nong yel-manesem-kãensã la tʋʋm-wẽn-kãensã baa bilfu. A sãama nin-wẽnsã a Nowe wakatẽ wã, b nen-kɛglem tʋʋmã sẽn da yaa wʋsgã yĩnga. (Sɩng. 6:13) Sẽn paase, a Zeova tũnuga ne a Malaki n wilg t’a kisa neb nins sẽn maand zãmb n kaood b kãadmã, tɩ b pagã bɩ b sɩdã yaool n pa maan baa fʋɩ wã. B sẽn tũud Wẽnnaamã pa tat a yam ye. A na n wa sãam-b-la b tʋʋm-wẽnsã yĩnga.—Mal. 2:13-16; Ebre. 13:4.

12. B sẽn yeel tɩ d ‘kisg sẽn yaa wẽngã’ võor yaa bõe?

¹² A Zeova ratame tɩ d ‘kisg sẽn yaa wẽnga.’ (Rom. 12:9) Gom-bil ning sẽn yaa ‘kisgã’ bilgda f sẽn na n kis bũmb ne f sũur fãa n pa tol n dat n yã bõn-kãng ye. D rɩk makr wa b sẽn na n yeel yãmb tɩ y rɩ rɩɩb sẽn põoge. Y manesem na n yɩɩ wãna? Y sã n pʋd n tags a yelle, tõe n kɩtame tɩ y sũurã yaandẽ. Woto me, d pʋd n pa segd n bas tɩ bũmb nins a Zeova sẽn yeel tɩ yaa wẽngã wa d yamẽ meng ye.

13. Bõe yĩng tɩ d segd n gũusd ne d tagsa wã?

¹³ Gũus-y ne y tagsa wã. Naoor wʋsgo, yaa d sẽn tagsd bũmb nins yellã la d maanda. Rẽ n so t’a Zeezi yeel tɩ d zãag d meng ne tagsa sẽn tõe n wa kɩt tɩ d maan yel-wẽn-kãsengã. (Mat. 5:21, 22, 28, 29) D rat n taa d saasẽ Ba a Zeova yam, bɩ bõe? Dẽnd tara yõod wʋsg tɩ tags-wẽng sã n wa d yamẽ wã bɩ d yiis-a tao-tao.

14. D no-goamã wilgda bõe d mengã zugu, la sogs-bʋs la d segd n sok d menga?

¹⁴ Gũusd-y ne y no-goamã. A Zeezi yeelame: “Bũmb ning fãa sẽn yit noorẽ wã yita sũurẽ.” (Mat. 15:18) Vẽenega, d no-goamã wilgda d sẽn sɩd yaa ned ninga. Rẽ wã, sok-y y meng yaa: ‘Sã n wa mik tɩ m sã n togs sɩda, m na n paama yelle, m baasd n togsa sɩd bɩ? M sã n kẽe kãadem, m gũusdame n da wa tall rolsem manesem ne rao wall pag a to bɩ? M zãagda m meng fasɩ ne gom-dẽgd bɩ? Ned sã n sãam m sũuri, m leokda a soab ne bʋgsem bɩ?’ Y sã n maag y yĩng n tags sogs-kãensã zugu, na n sõng-y lame. D tõe n dɩka d no-goamã n mak ne fuug butõ-rãmba. Yaa d sã n sogs butõ-rãmbã la d na n tõog n yeeg fuugã nana-nana.  Woto me, d sã n maan d sẽn tõe fãa n zãag d meng ne tʋya, ziri-n-beedo, la gom-dẽgdo, na n yɩɩ nana ne-d tɩ d tõog n yeeg nin-kʋdgã.

15. B sẽn yeel tɩ d ka d nin-kʋdgã “ra-lukã zugã” võor yaa bõe?

¹⁵ Sakd-y n maand-y y sẽn segd n maanã. Tẽn-tʋmd a Poll rɩka makr sẽn tar pãnga, n wilg tɩ tara yõod wʋsg tɩ d toeem d yel-manesmã. A yeelame tɩ d segd n kaa d nin-kʋdgã “ra-lukã zugu.” (Rom. 6:6) Sẽn na yɩl n ta a Zeova yam, a Zeezi sakame tɩ b ka-a ra-lukã zugu. Tõnd me sã n dat n ta a Zeova yam, d segd n sak n basa yel-manesem la tʋʋm-tʋmdɩ nins fãa a Zeova sẽn kisã. Yaa d sã n maan woto la d na n paam sũur-kaset sẽn yaa sõma, la d wa paam vɩɩm sẽn kõn sa. (Zã 17:3; 1 Pɩy. 3:21) Tẽeg-y t’a Zeova pa na n toeem a noyã tɩ zems ne-d ye. Yaa tõnd n segd n toeeme, n tũ yẽ noyã.—Eza. 1:16-18; 55:9.

16. Bõe yĩng tɩ y segd n yãk yam n kell n mao ne tʋls-wẽnsã?

¹⁶ Kell-y n mao-y ne tʋls-wẽnsã. Y segd n kell n maoo ne tʋls-wẽnsã, baa y lisgã poore. Yaa woto la rao a ye yʋʋr sẽn boond t’a Morisɩyo maan-yã. A sẽn wa n yaa bi-bɩɩga, a ra kẽeda ne rap a taaba. La a wa n sɩnga Biiblã zãmsg ne a Zeova Kaset rãmbã. A modgame n toeem bũmb wʋsg a vɩɩmã pʋgẽ. La yʋʋmd 2002, a reega lisgu. Baa ne a Morisɩyo sẽn tũud a Zeova na maan yʋʋm wʋsgã, a yeelame: “Togs sɩdã, wakat ninga m tʋls-wẽnsã le watame, tɩ pa nana ne-m ye.” La a pa basd tɩ rẽ koms a raood ye. Ad a sẽn yeele: “M sẽn mi tɩ m sã n pa bas tɩ tʋls-wẽnsã kɩt tɩ m maan sẽn pa segdã m tata a Zeova yamã, kengda m raoodo.” *

17. A Nabiha kibarã pʋgẽ, bõe n kengd yãmb raoodo?

¹⁷ Kos-y-yã a Zeova sõngre, la y teeg a vʋʋsem sõngã n da teeg y meng pãng ye. (Gal. 5:22; Fili. 4:6) Sẽn na yɩl n tõog n yeeg nin-kʋdgã n da le yeelg-a, d segd n modga wʋsgo. Yɩɩ woto ne pag a ye yʋʋr sẽn boond t’a Nabiha. A sẽn wa n tar yʋʋm a yoob bal la a ba wã raag-a n base.  A yeelame tɩ rẽ sãama a sũur hal wʋsgo. A Nabiha sẽn wa n lebg bi-bɩɩga, a lebga ned sũur sẽn yikd tao-tao, la sẽn nong zaba. A wa n koosda dorge, tɩ b yõk-a n tɩ pag bãens raoog yʋʋm a wãn. A Zeova Kaset rãmb sẽn da kẽnd n kaagd sẽn be-b bãensã roogẽ wã wa n sɩnga Biiblã zãmsg ne-a. A Nabiha wa n sɩnga bũmb wʋsg toeeng a vɩɩmã pʋgẽ. Ad a sẽn yeele: “Minim-wẽns kẽer basg yɩɩ nana ne-ma. La dorgã yũubã basg yɩɩ toog wʋsgo.” A maoo ne zu-loe-kãngã n kaoos sẽn yɩɩd yʋʋmde, n yaool n na n wa tõog n base. Bõe n sõng-a t’a tõoge? A yeelame: “Sẽn yɩɩd fãa, yaa m sẽn da wɩngd ne a Zeova pʋʋsgã n sõng-m tɩ m tõog n bas minim-wẽnsã.” Masã, a yeta nebã yaa: “Mam kɩsa sɩd tɩ mam sẽn n tõog n toeem n tat a Zeova yamã, dẽnd ned buud fãa tõeeme!” *

18. Sẽn zems ne 1 Korẽnt rãmb 6:9-11 wã, bõe la neb wʋsg sẽn tũud a Zeova tõog n maane?

¹⁸ Pipi kiris-nebã wakatẽ, rap la pagb kẽer a Zeova sẽn yãk tɩ b na n naag Kiristã n dɩ naam ra tʋma tʋʋm-wẽns pĩndã. Kẽer da yaa yoaadba, rap sẽn kẽed ne rapa wall pagb sẽn kẽed ne pagba, la wagda. La ne a Zeova vʋʋsem sõngã sõngre, b tõog n toeema b yel-manesmã. (Karm-y 1 Korẽnt rãmb 6:9-11.) Rũndã-rũndã me, Biiblã sõnga neb milyõ-rãmb tɩ b toeem yɛl kẽer b vɩɩmã pʋgẽ. * B tõog n basa minim-wẽnse, baa ne sẽn da yaa toog wʋsgã. B sẽn tõog n maan woto wã wilgdame tɩ yãmb me na n tõog n toeema y yel-manesmã la y bas y minim wẽnsã, n wa tõog n deeg lisgu.

19. Bõe la d na n yã sõsg ning sẽn pʋgdã pʋgẽ?

¹⁹ Neb nins sẽn dat n wa reeg lisgã segd n modgame n yeeg nin-kʋdgã yaa sɩda, la b segd n modgame me n yeelg nin-paalgã. Sõsg ning sẽn pʋgdã pʋgẽ, d na n yãa d sẽn tõe n maan rẽ to-to, la neb a taabã sẽn tõe n sõng-d to-to rẽ wɛɛngẽ.