1. Bõe la a Zeova nin-buiidã maand tɩ sek pẽgre?

 HAL sẽn kaoose, Biiblã pĩnd n togsame tɩ Wẽnnaam nin-buiidã na n “kõo b mens ne yamleoogo,” n sakdẽ t’a Zeezi wilgd-b sor tɩ b tʋmd a Zeova tʋʋmdã. (Yɩɩn. 110:3) Bãngr-gom-kãngã paamda pidsg rũndã-rũndã. Yʋʋmd fãa, a Zeova Kaset rãmbã rɩkda lɛɛr milyõ-rãmb n moond koe-noogã ne yẽesem. B moonda koɛɛgã ne yamleoogo, rẽ me b pa yaood-b ye. Sẽn paase, b sõngda b tẽed-n-taas nins sẽn dat sõngrã, la b kengd b raood la b tẽebo. Kãsem-dãmbã ne kãsem-sõngdbã me rɩkda lɛɛr-dãmb wʋsg n segend sõss b sẽn na n wɛgse, la b kẽnd me n kaagd b tẽed-n-taasã n kengd b raoodo. Bõe yĩng la a Zeova nin-buiidã sẽn tʋmd tʋʋm-kãensã fãa wã? Yaa b sẽn nong a Zeova la b nong b taabã me wã yĩnga.—Mat. 22:37-39.

2. Wa Rom dãmb 15:1-3 sẽn wilgdã, mak-sõng-bʋg la a Zeezi kõ-do?

² A Zeezi sẽn da lʋɩɩsd a taabã raab taoorã yaa mak-sõngo. D maanda d sẽn tõe fãa n na n dɩk a naoore. (Karm-y Rom dãmb 15:1-3.) Neb nins sẽn dɩkd a togs-n-taarã na n paama nafa wʋsgo. Bala a Zeezi yeelame tɩ “kũun wata ne sũ-noog n yɩɩd reegre.”—Tʋʋ. 20:35.

3. Bõe la d na n yã sõs-kãngã pʋgẽ?

³ Sõs-kãngã pʋgẽ, d na n yãa bũmb kẽer a Zeezi sẽn maan n sõng nebã, la d sẽn tõe n dɩk a togs-n-taar to-to. D leb n na n yãa bũmb sẽn tõe n sõng-d tɩ d tʋll n sõng neb a taabã.

4. Bõe la a Zeezi maan-yã, tɩ wilgdẽ t’a ra lʋɩɩsda a taabã raab taoore?

⁴ A Zeezi sõnga neba, baa ne a sẽn da yɛ wã. Tẽeg-y a Zeezi manesem sẽn yɩ to-to, neb kʋʋng sẽn da wa a nengẽ tãng a ye sɛɛgẽ wã. Zĩigã tog n da pẽe Kapɛrnawum. A Zeezi ra pʋʋsa yʋngã tõre. Dẽnd a tog n da yɛɛ wʋsgo. La a sẽn yã kʋʋngã, b sʋkã naong rãmbã la bãad-rãmbã nimbãaneg yõk-a lame. A pa sãoog b bãasã bal ye. A sõsa ne-b sõma n kẽng b raoodo, hal t’a sõsgã buud zɩ n zĩnd ye. B boonda sõs-kãng t’a Zeezi tãng zug zãmsgã.—Luk 6:12-20.

5. Baa zak soab sã n wa yɛ, wãn to la a tõe n dɩk a Zeezi togs-n-taar n wilg t’a nonga a zakã rãmba?

⁵ Zak-soben-dãmbã sẽn dɩkd a Zeezi togs-n-taar to-to. Mams-y n ges-y zak soab sẽn na n tʋm wʋsg n sig zaabre, n wa ta yir ne yaamse. A yam la a bas n pa maan b raar-n-kãng zak pʋgẽ Biibl zãmsgã ye. La a pʋʋsa a Zeova n kos pãnga, n na n tõog n lʋɩ taoor tɩ b maane. A Zeova leoka a pʋʋsgã, t’a tõog n ges tɩ b maan b zãmsgã n pa viig ye. Baraarã, b kambã bãnga bũmb sẽn tar yõod wʋsgo. B bãngame tɩ yaa a Zeova tũudmã yɛl la b roagdbã lʋɩɩsd taoore.

6. Togs-y kibar sẽn wilgd a Zeezi sẽn sak n sõng neb baa sẽn da pa nana ne-a wã.

⁶ A Zeezi ra sakd n dɩkda a sẽkã n sõngd nebã. Mams-y n ges-y a Zeezi sũur sẽn sãam to-to, a sẽn wa n wʋm tɩ b fiuuga a zoa a Zãmbatiis zugã. Ad Biiblã sẽn yeele: “A Zeezi sẽn wʋm dẽ, b yii be n kẽ koom-koglg n kẽng zĩig neb sẽn pa beẽ sẽn na yɩl n yɩ b yembre.” (Mat. 14:10-13) D wʋmda a Zeezi sẽn da rat n yɩ a yembrã võore. Neb wʋsg sã n wa be sũ-sãams pʋgẽ, b nong n dat n yɩɩ b yembre. La yɩɩ toog ne a Zeezi t’a paam n yɩ a yembre. Bala neb kʋʋng n deng-a zĩig ning a sẽn da rabdã. La a manesem yɩɩ wãna? A tagsa a sẽn tõe n maan n sõng-bã yelle, b nimbãaneg me yõk-a lame. A bãngame tɩ b ra rata sõngr la belsgo. La tao-tao bala, a maana bũmb n na n sõng-ba. A “sɩngame n zãmsd-b bũmb wʋsgo,” la pa bũmb a wãn bal ye.—Mark 6:31-34; Luk 9:10, 11.

7-8. Tigingã ned sã n wa rat sõngre, bõe la kãsem-dãmbã maand tɩ wilgdẽ tɩ b rɩkda a Zeezi togs-n-taare?

 ⁷ Kãsem-dãmbã sẽn dɩkd a Zeezi togs-n-taar to-to. D sũur nooma wʋsg ne tʋʋm nins kãsem-dãmbã sẽn tʋmd tõnd yĩngã. B tʋʋmã wʋsg la tigingã neb pa ne. Wala makre, d tẽed-n-taag sã n wa rat tɩbsg tao-tao, sull ning sẽn get logtor-yir tɩbsg zu-loees yellã (CLH) wat n sõng-a-la tao-tao. Naoor wʋsgo, mi n yaa yʋn-sʋk la ned rat b sõngre, sẽn na yɩl n paam tɩbsgo. Kãsem-dãmb-kãensã ne b zagsã rãmb lʋɩɩsda b tẽed-n-taas nins sẽn namsdã raab taoore, b sẽn kʋmd b nimbãanegã yĩnga.

⁸ Kãsem-dãmbã leb n kẽesda b toog n sõngd n met Rĩung roto, la siglgã rot a taaba, la b sõngd b tẽed-n-taasã sabab-wẽns sasa. Sẽn paase, d mengã tigingã pʋgẽ, kãsem-dãmbã rɩkda lɛɛr-dãmb wʋsg n zãmsd tigingã neba, n kengd b raoodo, la b teend-ba. D segd n pẽgda saam-bi-kãensã ne b zagsã rãmb ne d sũy fãa. Bɩ a Zeova ning-b barka, b yam-sõngã yĩnga. La wa tigingã neb a taabã, kãsem-dãmbã me segd n maanda gũusgu. B pa segd n kẽes b sẽkã fãa a Zeova tʋʋmdã pʋgẽ, hal n wa pa le tar sẽk n get b zakã rãmb yell sõma ye.

9. Wa Filip rãmb 2:4, 5 sẽn wilgdã, yam-bʋg la kiris-ned fãa segd n talle?

⁹ Karm-y Filip rãmb 2:4, 5. Pa kãsem-dãmbã bal n segd n dɩk a Zeezi togs-n-taar n sõngd b taabã ye. Tõnd fãa segd n maanda woto. Biiblã yeelame t’a  Zeezi sakame “n lebg wa yamba.” (Fili. 2:7) Tags-y n ges-y rẽ sẽn dat n yɛɛlga. Yamb bɩ tʋm-tʋmd-sõng maanda a sẽn tõe fãa n na n noog a zu-soabã sũuri. D sẽn yaa a Zeova yembs la d sõngd d tẽed-n-taasã me wã yĩnga, sãmbg kae tɩ d ratame n kell n yɩ wa tʋʋm-teoog a Zeova sẽn tõe n tall n sõng d tẽed-n-taasã. D ges sagls a wãn sẽn na n sõng-y tɩ y tõog n maan rẽ.

10. Sogs-bʋs la d tõe n sok d mense?

¹⁰ Fees-y y menga. Y tõe n soka y meng yaa: ‘Mam yaa ned sẽn tʋll n dɩk a sẽkã la a pãngã n sõng a taabã bɩ? B sã n wa kos-m tɩ m tɩ kaag saam-biig sẽn kʋʋle, wall m tɩ rɩk saam-bi-poak sẽn kʋʋl n kẽng tigsga, m manesem na n yɩɩ wãna? B sã n wa rat neb sẽn na n sõng n pɩɩs tigis-kãseng zĩig bɩ n maneg Rĩung roogo, m yɩta tao-tao n tɩ sõng bɩ?’ D sẽn dɩk d mens n kõ a Zeova wã yĩnga, d sã n sakd n dɩkd d sẽkã la d paoongã n sõngd d taabã, a sũur noomame. Rẽ wɛɛngẽ, bũmb sã n bee d sẽn segd n maneg tɩ yɩ sõma n paase, bõe la d segd n maane?

11. Wãn to la pʋʋsgã tõe n sõng-d tɩ d tʋll n sõng d taabã?

¹¹ Pelg-y y pʋg n pʋʋs a Zeova. Wala makre, tõe tɩ y nee bũmb y sẽn segd n maneg tɩ yɩ sõma n paase, tɩ raab yaool n kae ye. Sã n wa yaa woto, bɩ y pelg y pʋg n pʋʋs a Zeova. Togs-y-yã-a sẽn be y sũurẽ, la y kos-a t’a kõ-y “raab la tõog sẽn na yɩl tɩ y maan sẽn noom bãmbã.”—Fili. 2:13.

12. Wãn to la bi-bɩɩg sẽn deeg lisg tõe n naf tigingã?

¹² Y sã n yaa bi-bɩɩg sẽn deeg lisgu, bɩ y kos a Zeova t’a sõng-y tɩ y tʋll n sõng y tigingã nebã sõma n paase. Tẽns kẽer pʋsẽ, kãsem-dãmbã sõor yɩɩda kãsem-sõngdbã. Kãsem-sõngdb-kãens sʋka, wʋsg yʋʋm vẽsgame. A Zeova nin-buiidã sõor sẽn tar paasgã yĩnga, d rata kom-bɩɩs wʋsg sẽn na n sõng ne b yell gesgo. Sẽn yaa tʋʋmd ning fãa la b rat tɩ y tʋme, y sã n sak n maan rẽ, y na n paama sũ-noogo. Bõe yĩng tɩ d yet woto? Bala y na n paam n taa a Zeova yam, y na n paama yʋ-noogo, la sũ-noog ning nebã sõngrã sẽn wat ne wã.

13-14. Bõe la d tõe n maan n sõng d tẽed-n-taasã? (Ges-y sebrã pipi neng fotã.)

¹³ Gũusd-y n get-y y sẽn tõe n maan n sõng y taabã. Tẽn-tʋmd a Poll sagla kiris-neb nins sẽn da be Zide wã yaa: “Bɩ y ra yĩm tɩ maan sẽn yaa neere, la y ra yĩm tɩ pʋɩ y sẽn tarã ne neb a taab ye. Bala Wẽnnaam sũur nooma ne maan-kãensã buudu.” (Ebre. 13:16) A saglgã sɩd zemsame. A sẽn taas Zide kiris-nebã lɛt-kãngã wã poore, pa yã n kaoos la b bas b zagse, b tʋʋma, la b zakã neb sẽn pa tũud a Zeova, n “sɩng zoees n teesd tãensẽ wã.” (Mat. 24:16) Wakat-kãnga, sãmbg kae tɩ ra lebga tɩlɛ tɩ b sõng taaba. Sẽn deng rẽ, b sã n da zoe n sɩnga a Poll saglgã tũub n sɩd pʋɩt b sẽn tar bũmb ninsã ne taaba, na n yɩɩ nana ne-b zĩig ning b sẽn da yik n tɩ be wã.

¹⁴ Wakat ninga, d tẽed-n-taag tõeeme n pa togs tõnd a sẽn dat tɩ d maan n sõng-a ye. Wala makre, saam-bi-poak tõe n maana kaalem n bas a sɩdã ne sũ-sãamse. Raoã tõe n datame tɩ b sõngd-a ne rɩɩbo, t’a sã n dat n kẽng zĩig bɩ b wa rɩk-a, la b sõngd-a ne zakã  tʋʋma. La a tõeeme n pa yeel tɩ bũmbu, a sẽn pa rat n nams neb a taabã yĩnga. La a sã n paam tɩ d yãk yam n sõng-a nand meng t’a kos-do, a sũur na n yɩɩ noogo. D pa segd n tags tɩ sẽn yaa a soab fãa, a na n paama ned sẽn na n sõng-a, wall t’a sã n dat sõngr fãa, a na n togs-d lame ye. Sok-y y meng yaa: ‘Sã n da yaa maam n maood ne zu-loɛɛg a woto, bõe la m na n dat tɩ b maan n sõng-ma?’

15. Sẽn na yɩl n tõog n sõngd d taabã, d segd n yɩɩ nin-bʋg buudu?

¹⁵ Yɩ-y ned pẽnegr sẽn yaa nana. Yaa vẽeneg tɩ y mii neb y tigingã pʋgẽ, sẽn sakd n sõngd b taabã wakat fãa. B pa rat n maan tɩ d wa tagsdẽ tɩ d namsd-b lame ye. D miime tɩ sẽn wa n yaa yell ning fãa, b na n dat n sõng-d lame, tɩ d rat me n tall b yam-sõngã buudu. Kãsem-soab a ye yʋʋr sẽn boond t’a Alan, n tar yʋʋm 45 wilgame tɩ yẽ rat n yɩɩ ned pẽnegr sẽn yaa nana. A tagsa a Zeezi mak-sõngã yelle, n yeel yaa: “A Zeezi tʋʋmã ra yaa wʋsg hal t’a sẽkã ra pa waoog ye. La baa ne rẽ, neb buud fãa ra wata a nengẽ n kot-a sõngr n pa yɛɛsdẽ ye. B ra miime tɩ b yell pak-a-la hal wʋsgo. M data ne m sũur fãa n dɩk a Zeezi togs-n-taare, n yɩ ned pẽnegr sẽn yaa nana, ned sẽn nong a taabã, tɩ b yell me pak-a.”

16. D sã n tũud saglg ning sẽn be Yɩɩn-sõamyã 119:59, 60, wãn to la na n sõng-d tɩ d tõog n dɩk a Zeezi togs-n-taar sõma?

¹⁶ D sã n wa pa tõog n dɩk a Zeezi togs-n-taar kɛpɩ, d pa segd n koms raood ye. (Zak 3:2) Bala karen-biig minim pa tõe n yɩɩg a karen-saamb ye. Karen-biig sã n dɩkd yam a tudgr pʋgẽ, la a rɩkd a  karen-saambã togs-n-taar wa a sẽn tõe tɛka, a minimã na n paasdame. Woto me, d sã n tũud bũmb nins d sẽn zãmsd Biiblã pʋgẽ wã, la d rɩkd yam d kongrã pʋgẽ, d na n tõog n dɩka a Zeezi togs-n-taar sõma.—Karm-y Yɩɩn-sõamyã 119:59, 60.

17-18. D sã n dɩkd a Zeezi togs-n-taar n sõngd d taabã, wãn to la na n naf-do?

¹⁷ D sã n tʋllame n sõng d taabã, tõe n kɩtame tɩ neb a taab me wa rat n maan wa tõndo. Ad kãsem-soab a ye yʋʋr sẽn boond t’a Tim sẽn yeele: “Kom-bɩɩs wʋsg modgame n wa tõog n lebg kãsem-sõngdba, tɩ kẽer meng nan ket n paoodẽ. Bũmb a ye sẽn sõng-b tɩ b maan woto yaa b sẽn da ne neb a taabã sẽn sakd ne yamleoog n sõngd b taabã. Kom-bɩ-kãensã sõngda tigingã la b teend kãsem-dãmbã sõma.”

¹⁸ Dũni-kãngã neb wʋsg yaa rat-m-ye rãmba. La a Zeova nin-buiidã yẽ pa woto ye. D getame t’a Zeezi sẽn da sõngd nebã yaa mak-sõngo, tɩ d yãk yam n na n dɩk a togs-n-taare. Yaa sɩd tɩ d pa tõe n tũ a Zeezi naoã kɛpɩ-kɛpɩ ye. La d tõe n ‘tũu a naoã neere.’ (1 Pɩy. 2:21) D sã n maand d sẽn tõe fãa n na n dɩk a Zeezi togs-n-taar n sõngd d taabã, d na n paama sũ-noogo. Bala d maanda sẽn noom a Zeova.