1. Bilf nand t’a Zeezi ki, bõe la a yeel bi-bɛɛg a ye sẽn da be a sɛɛgẽ? (Luk 23:39-43)

 A ZEEZI ne bi-bees a yiibã b sẽn da ka n yɛgl-a wã ra namsda wʋsgo, n miẽ tɩ b na n kiime. (Luk 23:32, 33) Bi-bees a yiibã ra gomd n paoogda Zeezi, tɩ wilgdẽ tɩ b ra pa a karen-biis ye. (Mat. 27:44; Mark 15:32) La b nin-yend n toeem yam. A yeelame: “Zeezi, yãmb sã n wa be y Rĩungã pʋgẽ bɩ y tẽeg mam yelle.” A Zeezi leok-a lame yaa: “Rũndã, mam pʋlemda foo tɩ f na n zĩnda ne maam Arzãnã pʋgẽ.” (Karm-y Luk 23:39-43.) Bũmb pa wilgd tɩ bi-bɛɛgã sak n tẽe “saasẽ Rĩungã” koe-noogã a Zeezi sẽn da moondã ye. La a Zeezi zɩ n yeel tɩ raoã na n zĩnda Wẽnnaam Rĩungã pʋgẽ saasẽ ye. (Mat. 4:17) A Zeezi ra gomda arzãnã sẽn na n wa zĩnd tẽngã zugã yelle. Bõe yĩng tɩ d tõe n yeel woto?

2. Bõe n wilgd tɩ bi-bɛɛgã sẽn tek yamã tog n da yaa Zʋɩfe?

² Tõe tɩ bi-bɛɛg ning sẽn tek yamã ra yaa Zʋɩfe. A yeela a to wã yaa: “Fo pa zoet Wẽnnaam baa bilf la? Fo paama sɩbgr ning bãmb me sẽn paamã.” (Luk 23:40) Zʋɩf-rãmbã ra pʋʋsda Wẽnnaam yɛnga. La buud a taabã ra pʋʋsda wẽn-naands wʋsgo. (Yik. 20:2, 3; 1 Kor. 8:5, 6) Sã n da mikame tɩ bi-be-kãensã yaa bu-zẽms neba, dẽnd a ra na n soka a to wã yaa: “Fo pa zoet wẽnnaam-dãmbã baa bilf la?” Sẽn paase, Wẽnnaam pa tʋm a Zeezi buud toɛy-toɛyã fãa neb nengẽ ye. Yaa “Israyɛll neb nins sẽn wõnd piis sẽn menemã nengẽ bala.” (Mat. 15:24) Wẽnnaam ra kɩtame tɩ Israyɛll nebã bãng t’a na n wa vʋʋga sẽn ki-bã. Tõe tɩ bi-bɛɛg ning sẽn tek yamã ra mii rẽ. A gomdã wilgdame t’a  sak n deegame t’a Zeova na n wa vʋʋga a Zeezi t’a lebg Rĩungã rĩma. Wõnda raoã ra saagdame tɩ Wẽnnaam na n wa vʋʋga yẽ me.

3. Tõe tɩ bõe n wa bi-bɛɛgã sẽn tek yamã yamẽ, a Zeezi sẽn wa n gom arzãnã yellã? (Sɩngre 2:15)

³ Sã n mikame tɩ bi-bɛɛgã sẽn tek yamã ra yaa Zʋɩfe, rẽnd a ra mii a Ãdem ne a Awa kibarã, la a miẽ me t’a Zeova ra ning-b-la arzãn pʋgẽ. Tõe t’a ra miime me tɩ arzãn ning yell a Zeezi sẽn gomã yaa zĩ-neer sẽn na n wa zĩnd tẽngã zugu.—Karm-y Sɩngr 2:15.

4. A Zeezi sẽn yeel bi-bɛɛgã bũmb ningã segd n kɩtame tɩ d tags bõe yelle?

⁴ A Zeezi sẽn yeel bi-bɛɛgã bũmb ningã segd n kɩtame tɩ d tags vɩɩmã sẽn na n yɩ to-to arzãnã pʋgẽ wã yelle. A Salomo sẽn da rɩt a naamã tɩ laafɩ hakɩɩk beẽ wã tõe n sõng-d lame tɩ d bãng bũmb kẽer arzãnã wɛɛngẽ. Biiblã yetame t’a Zeezi sẽn yaa kãseng n yɩɩd a Salomo wã na n tʋma ne a na-rɩt-n-taasã tɩ tẽngã gill lebg arzãna. (Mat. 12:42) Vẽenega, “piis a taabã” segd bao n bãnga b sẽn tog n maan n wa paam n vɩɩmd arzãnã pʋgẽ wakat sẽn kõn sa.—Zã 10:16.

5. Vɩɩmã na n yɩɩ wãn to arzãnã pʋgẽ?

⁵ Yãmb sã n wa tagsd vɩɩmã sẽn na n yɩ to-to arzãnã pʋgẽ wã yelle, bõe n wat y yamẽ? Tõe tɩ yaa zĩig sẽn yaa neer wa Edɛn zẽedã zĩigẽ. (Sɩng. 2:7-9) Tõe tɩ y na n tẽega no-rɛɛs a Mise sẽn gom Wẽnnaam nin-buidã yelle, n yeel tɩ ‘ned kam fãa na n zĩnda a reezẽ tɩɩg ne a kankang tẽngrã.’ (Mis. 4:3, 4) Tõeeme me tɩ y na n tagsa Biiblã vɛrse nins sẽn yet tɩ rɩɩb wʋsg na n zĩndame wã yelle. (Yɩɩn. 72:16; Eza. 65:21, 22) Tõe tɩ y na n mamsa y yamẽ y sẽn be zĩ-neerẽ, tɩ taabl sẽn pid ne rɩɩb buud toor-toor be y taoore. Y tõe n mamsda y sẽn vʋʋsd fɩlɛɛr-dãmbã la tɩɩsã yũ-noogã. Tõe tɩ y nee y zakã rãmba, y zo-rãmb la neb nins sẽn vʋʋgã sẽn be ne taaba, n laadẽ tɩ b sũy noomẽ. Woto pa zãmsd ye. D tõe n basa d yam tɩ na n yɩɩ woto arzãnã pʋgẽ. Arzãnã pʋgẽ, d na n tʋmda tʋʋm sẽn na n kõt-d sũ-noogo.

6. Bõe la d na n maan arzãnã pʋgẽ? (Ges-y fotã.)

⁶ A Zeova naana tõnd n dat tɩ d paam sũ-noog d tʋʋmã fãa pʋgẽ. (Koɛ. 2:24) Kiristã naamã sẽn na n kaoos yʋʋm tusrã sasa, d na n tara tʋʋm wʋsgo. Sẽn na n põs-b to-kãsengã la neb milyõ-rãmbã sẽn na n vʋʋgã na n data futu, rɩɩbo, la gãag zĩiga. Yaa vẽeneg tɩ d segd n tʋma wʋsgo, sẽn na yɩl tɩ b paam bõn-kãensã fãa. Wa a Ãdem ne a Awa sẽn da segd n ko Edɛn zẽedã zĩigẽ wã, tõnd me na n paam n tʋmame n maneg tẽngã tɩ lebg arzãna. Tags-y n ges-y d sũur sẽn na n yɩ noog to-to, d sẽn na n paam  n sõng neb milyõ-rãmbã sẽn na n vʋʋgã tɩ b bãng a Zeova la a raabã, la d sõng wẽn-sakdb nins sẽn da maan kaalem nand t’a Zeezi wa tẽngã zugã, tɩ bãmb me bãng bũmb wʋsgã.

7. D tõe n basa d yam ne bõe, la bõe yĩnga?

⁷ D tõe n basa d yam tɩ d sã n wa be arzãnã pʋgẽ, d na n vɩɩ ne laafɩ, n paamd bũmb nins fãa d sẽn datã, tɩ bũmba fãa me sigl sõma. Bõe yĩng tɩ d yet woto? Bala a Zeova zoe n sõnga tõnd tɩ d bãng vɩɩmã sẽn na n yɩ to-to, a Bi-riblã sã n wa rɩt naam. Rĩm a Salomo naamã sẽn yɩ to-to wã wilgda rẽ.

8. Wãn to la rĩm a Davɩɩd goam nins sẽn be Yɩɩn-sõamyã 37:10, 11, 29 paam pidsgu? (Ges-y seb-kãngã pʋgẽ “Karemdbã sogsgo.”)

⁸ Wẽnnaam vẽnega rĩm a Davɩɩd t’a bilg vɩɩmã sẽn na n yɩ to-to, rĩm ning sẽn tar yam la sẽn maand sɩd ne a Zeova wã sã n wa sɩng naam rɩɩbo. (Karm-y Yɩɩn-sõamyã 37:10, 11, 29.) D sã n wa gomd arzãnã sẽn watã yell ne nebã, d nong n karemda Yɩɩn-sõamyã 37:11. Woto zemsame, bala a Zeezi sẽn wa n sõsd ne nebã tãngã zugã, a leb n togsa vɛrse-kãng goamã, n wilg tɩ na n wa pidsa beoog sẽn wate. (Mat. 5:5) A Davɩɩd sẽn yeel bũmb ningã me ra wilgda vɩɩmã sẽn na n yɩ to-to rĩm a Salomo naamã sasa. Sɩd me, a Salomo sẽn wa n yaa rĩm Israyɛll soolmẽ wã, Wẽnnaam nin-buiidã ra vɩɩ ne laafɩ, tɩ bũmb pa paoog-ba, tɩ b tẽngã ra tar “bĩisim ne sɩɩdo.” Wẽnnaam yeel-b lame yaa: “Yãmb sã n sak mam noyã . . . , Mam na n kɩtame tɩ vɩ-bãan zĩnd y tẽngã pʋga, la yãmb na n gãandame n gũs tɩ ned ka kẽes yãmb dabeem ye.” (Maan. 20:24; 26:3, 6) Pʋlen-kãensã paama pidsg a Salomo naamã sasa. (1 Kib. 22:9; 29:26-28) A Zeova ra pʋlmame me tɩ sẽn da pʋʋsd-b wẽn-fãadã ‘pa na n le zĩnd ye.’ (Yɩɩn. 37:10) Dẽnd Yɩɩn-sõamyã 37:10, 11, 29 wã pidsa pĩnd wẽndẽ wã, n na n le pids ka la bilfu.

9. Bõe la Seba rĩm-poakã yeel a Salomo naamã wɛɛngẽ?

⁹ A Salomo sẽn wa n dɩt naamã, Seba  rĩm-poakã wʋmame tɩ Israyɛll nebã vɩɩ laafɩ la bãan pʋgẽ, tɩ bũmb pa paoog-b ye. A yii zĩ-zãrgẽ n wa Zerizalɛm n na n maan kaseto. (1 Rĩm. 10:1) A sẽn wa n yã a Salomo soolmã sẽn yaa to-to wã, a yeelame yaa: “Mam sẽn dag n wʋmdã ka ta mam sẽn yã wã pʋɩ-sʋk meng ye. . . . Neb nins sẽn be ne yãmbã, ne neb nins sẽn tʋmd ne yãmb daar fãa wã yaa zu-nood-rãmba. Bala, bãmb bee ne yãmb n wʋmd yãmb yam goamã wakat faa!” (1 Rĩm. 10:6-8) Vɩɩmã sẽn da yaa to-to a Salomo naamã sasa wã ra wilgda vɩɩmã sẽn na n yɩ to-to dũniyã gill zugu, a Zeezi sẽn yaa Wẽnnaam Bi-riblã sã n wa sɩng naam rɩɩb tẽngã zugu.

10. Zĩ-bʋs wɛɛngẽ la a Zeezi yɩɩd a Salomo?

¹⁰ A Zeezi yɩɩda a Salomo bũmb fãa pʋgẽ. A Salomo ra yaa ned sẽn pa zems zãnga. Wakat n zĩnd t’a maan sẽn pa zemse, tɩ rẽ wa ne zu-loees Wẽnnaam nin-buiidã zugu. La a Zeezi yaa rĩm sẽn zems zãnga, a pa tol n tudgdẽ ye. (Luk 1:32; Ebre. 4:14, 15) A kell n maana sɩd ne Wẽnnaam, baa ne a Sʋɩtaan sẽn nams-a ne nams-toaagã. Kiristã wilgame t’a pa na n tol n maan yel-wẽnde, bɩ n maan bũmb sẽn na n nams a nin-buiidã ye. D sẽn paam t’a yaa d rĩmã yaa bark meng-menga.

11. Ãnd dãmb n na n sõng a Zeezi a naamã sasa?

¹¹ A Zeezi na n paama na-rɩt-n-taas 144 000 sẽn na n naag-a tɩ b ges ãdem-biisã yelle, la b kɩt tɩ tẽngã gill yɩ wa Wẽnnaam sẽn da rat tɩ yɩ to-to wã. (Vẽn. 14:1-3) Nin-kãensã sẽn wa n be tẽngã zugã, b paama zu-loees la namsg wʋsgo, tɩ rẽ kɩt tɩ b sã n wa naag a Zeezi n dɩt naamã, bɩ b tõe n kʋm ãdem-biisã. Bõe la a Zeezi na-rɩt-n-taasã na n maane?

12. Tʋʋm-bʋg la a Zeova na n kõ neb 144 000?

¹² Tʋʋmd ning b sẽn kõ a Zeezi ne a na-rɩt-n-taasã yɩɩda a Salomo rẽndã hal zĩig sẽn zãre. Rĩm a Salomo ra segd n gesa neb milyõ-rãmb yelle, tɩ b fãa ra vɩ tẽng a ye bal pʋgẽ. La Wẽnnaam Rĩungã nanambsã segd n gesa neb milyaar-dãmb sẽn be dũniyã gill zug yelle. A Zeova sẽn kõ neb 144 000 tʋʋmd ningã sɩd yaa zu-zẽkr tʋʋmde!

13. Tʋʋm-bʋg me la a Zeezi na-rɩt-n-taasã na n tʋme, tɩ yaa zu-zẽkr tʋʋmde?

¹³ Wa a Zeezi, neb 144 000 na n yɩɩ rĩm-dãmb la maan-kʋʋdba. (Vẽn. 5:10) Israyɛll nebã sẽn wa n tũud a Moyiiz tõogã, maan-kʋʋdbã ra segd n gesame tɩ nin-buiidã tall laafɩ la keelem, la zood sõma ne a Zeova. Tõogã ra yaa “bõn-somã nins sẽn watã maasem.” Dẽnd d tõe n yeelame t’a Zeezi ne a na-rɩt-n-taasã me na n sõnga Wẽnnaam nin-buiidã tɩ b tall keelem, la b paam zood sõma ne a Zeova. (Ebre. 10:1) D nan pa mi rĩm-dãmb la maan-kʋʋdb-kãensã sẽn na n wa yeel wẽn-sakdb nins sẽn be tẽngã zugã tɩ maan bũmb nins ye. Sẽn yaa soab fãa, d tõe n basa d yam tɩ arzãnã pʋgẽ, a Zeova na n gesame tɩ d paam sor-wilgr ning d sẽn datã.—Vẽn. 21:3, 4.

14. Wãn to la ‘piis a taabã’ ne ‘bãg-bilã’ naag taab n yaa yãgr a yembre?

¹⁴ A Zeezi boola neb nins sẽn na n dɩ naam ne-a wã tɩ “bãg-bila.” (Luk 12:32) A leb n goma neb a taab me yelle, n bool-b tɩ “piis a taaba.” Nin-kãensã fãa naaga taab n yaa wa yãgr a yembre. (Zã 10:16) Masã menga, b naaga taab n tʋmdẽ,  n na n wa kell n naag taab n tʋm arzãnã pʋgẽ tẽngã zugu. Wakat kãnga, ‘bãg-bilã’ na n bee saasẽ, tɩ ‘piis a taabã’ be tẽngã zugu, n saagdẽ n na n vɩɩmd wakat sẽn kõn sa. La bũmb kẽer la ‘piis a taabã’ segd n maan masã menga, n wa paam n vɩɩmd arzãnã pʋgẽ.

15. a) Wãn to la ‘piis a taabã’ naagd Kiristã ba-biisã n tʋmdẽ? b) Bõe la y tõe n maan n dɩk saam-biigã sẽn be farmasiẽ wã togs-n-taare? (Ges-y fotã.)

¹⁵ Bi-bɛɛg ning sẽn tek yamã kiime n pa paam n maan bũmb n wilg t’a sũur nooma ne bũmb ning Kiristã sẽn maan n kõ-a wã ye. La tõnd sẽn naag ‘piis a taabã,’ d tara segb wʋsg masã menga, n na n wilg tɩ d sũur nooma ne a Zeezi. Wala makre, d sã n tar manesem sẽn yaa sõma ne a Zeezi ba-biisã sẽn paam zaeebã, d wilgdame tɩ d nong-a lame. A Zeezi yeelame tɩ yaa rẽ zug la a na n tik n kao a piisã bʋʋdo. (Mat. 25:31-40) D sã n moond koɛɛgã ne yẽesem la d sõngd nebã tɩ b lebgd a Zeezi karen-biisi, d wilgdame tɩ d teenda Kiristã ba-biisã. (Mat. 28:18-20) Rẽ n so tɩ d segd n tʋmd ne bũmb nins siglgã sẽn yiisd Biiblã zãmsg yĩngã sõma. Wala makre, Vɩɩmd-y wakat sẽn kõn sa! sebrã. Y sã n nan pa tar ned n zãmsd-a Biiblã, y tõe n tũnugda ne segb buud fãa y sẽn paamde, n kãabd nebã Biibl zãmsgo?

16. Bõe la d tõe n maan masã menga, n wa paam n zĩnd arzãnã pʋgẽ?

¹⁶ D pa segd n gũudẽ tɩ arzãnã wa tɩ d yaool n lebg ned ning buud a Zeova sẽn dat tɩ d yɩ wã ye. Masã menga, d segd n modgame n tall no-goam la tʋʋm-tʋmdɩ sẽn yaa sõma, la d yɩ neb sẽn maand gũusg bũmb fãa pʋgẽ. D segd n maana sɩd ne a Zeova, ne d pagã wall d sɩdã, la ne d tẽed-n-taasã. D sã n zoe n wɩngd ne Wẽnnaam noyã tũub dũni-wẽn-kãngã pʋgẽ, d sã n wa be arzãnã pʋgẽ, Wẽnnaam noyã tuub na n yɩɩ nana ne-do. D tõeeme me n modg n paam minim la d bɩɩs zʋg-sõma, tɩ wilgdẽ tɩ d segenda d meng n na n wa vɩɩmd arzãnã pʋgẽ. Ges-y seb-kãngã pʋgẽ sõsg ning gom-zug sẽn yaa: “Yãmb segl n saame n ‘na n soog tẽngã’ bɩ?”

17. Bõe yĩng tɩ d pa segd n ket n ningd d meng taal yel-wẽnd d sẽn da maan pĩndã yĩnga?

 ¹⁷ D segd n modgame me n da ningd d meng taale, yel-wẽnd d sẽn da maan pĩndã yĩng ye. Yaa sɩd t’a Zeezi kũumã kɩtame tɩ d tõe n paam d yel-wẽnã sugri, la d pa segd n tik rẽ n “maand yel-wẽn ne yamleoog” ye. (Ebre. 10:26-31) D sã n sɩd teka yam n kos sugr yel-wẽn-kãseng d sẽn maan yĩnga, la d sak a Zeova sõngre, n toeem d tʋʋm-tʋmdɩ wã, d tõe n basa d yam t’a Zeova sak n kõo-d-la sugri. (Eza. 55:7; Tʋʋ. 3:19) Tẽeg-y a Zeezi sẽn yeel Fariziẽ-rãmbã bũmb ningã: A yeelame: “Mam pa wa n na n bool nin-tɩrs ye. M waame n na n bool yel-wẽn-maandba.” (Mat. 9:13) A Zeezi kũumã sẽn yɩ maoongã sɩd tõe n dola d yel-wẽnã fãa.

18. Bõe yell la y rat n gom ne bi-bɛɛg ning b sẽn da ka n yɛgl a Zeezi wã?

¹⁸ Mams-y y yamẽ tɩ yãmb bee arzãnã pʋgẽ n sõsd ne bi-bɛɛg ning sẽn tek yamã. Sãmbg kae tɩ yãmb y yiibã fãa sũur na n yɩɩ noog wʋsgo, a Zeezi sẽn ki tɩ yɩ maoongã yĩnga. Y tõe n sok-a lame n gese sẽn wa n ket lɛɛr a wãn nand t’a Zeezi maan kaalmã bõe n maane, wall y sok-a n gese a sẽn paam t’a Zeezi leok-a wã a manesem yɩɩ wãna. Tõe tɩ yẽ me na n datame tɩ y togs-a yaoolem wakatã vɩɩmã sẽn da yaa to-to a Sʋɩtaan dũniyã pʋgẽ wã. D sã n wa paam n na n zãms Biiblã ne ned a woto dũni-paalgã pʋgẽ, na n yɩɩ zu-zẽkr tɛkẽ!—Efɛ. 4:22-24.

19. Bõe yĩng tɩ vɩɩmã pa na n yɩ yam-yiisg arzãnã pʋgẽ? (Ges-y sebrã pipi neng fotã.)

¹⁹ Arzãnã pʋgẽ, vɩɩmã pa na n tol n yɩ yam-yiisg ye. D na n paam n bee ne neb sẽn tar manesem sõma, la d tʋmd tʋʋm sẽn tar yamleoogo. La sẽn yɩɩda, daar ne a to fãa d na paam n bãngda d saasẽ Ba wã sõma n paasdẽ, la d rɩt bũmb nins fãa a sẽn maand n kõt-dã nafa. Wakat fãa d na n bãngda bũmb wʋsg a Zeova zugu, la bũmb nins a sẽn naanã zugu. D sẽn na vɩɩmd wakat sẽn kõn sa wã, d sẽn nong d Wẽnnaamã to-to wã pãng na n tara paasgo. D sũur nooma wʋsgo, d sẽn paam t’a Zeova ne a Zeezi pʋlem-d vɩɩm sẽn kõn sa arzãnã pʋgẽ wã!