Ayo. A Davɩɩd sẽn yeel bũmb ningã yaa sɩda.

Ges-y-yã a sẽn yeel bũmb ning vɛrse-kãng la vɛrse-rãmb a taab pʋsẽ: “Dẽ, mam na n yɩɩl n pẽga yãmb yʋʋrã wakat fãa, la m na n pidsa m pʋlengã daar fãa.” “Mam Zu-soab a Wẽnnaam, mam na n pʋʋsa yãmb bark ne m sũur fãa! La mam na n waooga yãmb yʋʋrã wakat fãa.” “Mam na n waooga yãmb yʋʋrã wakat fãa.” —Yɩɩn-sõamyã 61:8; 86:12; 145:1, 2.

Gom-kãensã pa wilgd t’a Davɩɩd ra tagsdame t’a pa na n tol n ki ye. A ra miime t’a Zeova yeelame tɩ ninsaal sã n maan yel-wẽnde, a na n kiime. Sẽn paase, a sak n deegame tɩ yẽ yaa yel-wẽn-maanda. (Sɩng. 3:3, 17-19; Yɩɩn. 51:6, 7) A ra miime tɩ neb sẽn da tat Wẽnnaam yam wa a Abrahaam, a Izaak la a Zakoob kiime. A Davɩɩd ra miime tɩ yẽ me na n wa kiime. (Yɩɩn. 37:25; 39:5) La a sẽn yeel bũmb ning Yɩɩn-sõamyã 61:9 pʋgẽ wã wilgdame t’a ra rata ne a sũur fãa n pẽg Wẽnnaam wakat fãa, rat n yeel t’a yõor tɛka.—2 Sãm. 7:12.

Wakat ninga, a Davɩɩd gʋlsame n wilg bũmb sẽn paam yẽ mengã, wa Yɩɩn-sõamyã 18, 51, la 52 sɩngr goamã sẽn wilgdã. Yɩɩn-sõamyã 23 pʋgẽ, a yeelame t’a Zeova yaa wa pe-kɩɩm sẽn wilgd-a sore, n kengd a raood la a kogend-a. A Davɩɩd ra yaa pe-kɩɩm a woto buudu. A ra rat n tũu Wẽnnaam ‘hal n tãag a yõor tɛka.’—Yɩɩn. 23:6.

Tẽeg-y me tɩ yaa a Zeova n vẽneg a Davɩɩd t’a gʋls bũmb ning a sẽn gʋlsã. A sẽn gʋls bũmb ninsã sʋka, bãngr-goam n be be n da na n wa pids kaoosg zugẽ. Wala makre, Yɩɩn-sõamyã 110 soabã pʋgẽ, a Davɩɩd yeelame tɩ wakat n wat t’a Zu-soabã na n “zĩnd [Wẽnnaam] dɩtg” saasẽ tɩ b kõ-a tõ-kãsenga. Yaa sẽn na yɩl t’a maan bõe? T’a tõog Wẽnnaam bɛɛbã la a ‘kao bu-zẽmsã bʋʋd’ tẽngã zugu. Soab ning sẽn na n zĩnd saasẽ n dɩ naamã la a yɩ “maan-kʋʋd wakat fãa” wã yaa Mesi wã sẽn yaa a Davɩɩd yagengã. (Yɩɩn. 110:1-6) A Zeezi wilgame tɩ bãngr-gomd ning sẽn be Yɩɩn-sõamyã 110 pʋgẽ wã gomda yẽ yelle, la t’a na n pidsa beoog sẽn wate.—Mat. 22:41-45.

Dẽnd Wẽnnaam vẽnega a Davɩɩd t’a gʋls bũmb toor-toor sẽn maan a wakatẽ wã, la bũmb sẽn na n maan beoog-daare, a sã n wa vʋʋg n tõe n pẽg a Zeova wakat sẽn kõn sa yĩnga. Rẽ sõngda tõnd tɩ d bãng tɩ Yɩɩn-sõamyã 37:10, 11 la 29 wã tõe n bilgda yɛlã sẽn da yaa to-to Israyɛll soolmẽ wã, la yɛlã sẽn na n yɩ to-to dũniyã zugu, Wẽnnaam sã n wa pids a pʋlemsã.—Ges-y seb-kãngã pʋgẽ sõsg ning gom-zug sẽn yaa: “F na n zĩnda ne maam Arzãnã pʋgẽ,” a sull a 8 wã zĩigẽ.

Rẽnd Yɩɩn-sõamyã 61:9 la vɛrse-rãmb a taab goam sẽn wõnd-a wã wilgdame t’a Davɩɩd ra rat n pẽga a Zeova Israyɛll soolmã pʋgẽ n tãag a kũum. Leb n wilgda bũmb ning a Davɩɩd sẽn na n tõog n maan beoog sẽn wate, a Zeova sã n wa vʋʋg-a.