1-3. Zu-loe-bʋs n mi n kɩt tɩ neb nins sẽn tũud a Zeova wã raagd nintãm?

YÃMB sẽn daag nintãm yɩɩ rabʋre? Yaa sɩd tɩ d mi n daagda sũ-noog nintãm. La naoor wʋsgo, d sã n wa yãbda, yaa d sũur sẽn sãam wʋsg yĩnga. Wala makre, ned d sẽn nong sã n maan kaalem, d yãbdame. Saam-bi-poak a ye yʋʋr sẽn boond t’a Lorilɛy n be Etazĩni yeelame: “Wakat ninga, m bi-puglã kaalmã sãamda m sũur hal wʋsgo, tɩ wõnd bũmb kae n tõe n bels maam ye. Sã n wa yaa woto, m pa tagsd meng tɩ m sũ-sãangã tõe n boogame ye.” *

² Bũmb a taab me n mi n kɩt tɩ d raagd nintãm. Saam-bi-poak a ye yʋʋr sẽn boond t’a Hiromi, n yaa so-pakd n be Zapõ yeelame: “Wakat ninga, m sũur sãamda wʋsgo. Bala neb nins m sẽn taasd koɛɛgã pa sakd n kelgd Biiblã sẽn yetã ye. M mi n pʋʋsa a Zeova ne nintãm, n kõt-a t’a sõng-m tɩ m paam ned sẽn baood n bãng sɩdã.”

³ Mi n yaa woto me ne yãmb bɩ? Yaa woto ne tõnd sʋkã neb wʋsgo. (1 Pɩy. 5:9) D ratame n tũ a Zeova ne sũ-noogo. La tõe tɩ d tũud-a-la ne nintãm, ned d sẽn nong sẽn maan kaalem bɩ d sẽn koms raood yĩnga, wall zu-loees a taab n kɩt tɩ yaa toog tɩ d tũ a Zeova ne d sũur fãa. (Yɩɩn. 6:7; 100:2) Sã n wa yaa woto, bõe la d tõe n maane?

4. Bõe yell la d na n gom sõs-kãngã pʋgẽ?

⁴ A Zeezi sẽn maan to-to wã tõe n sõnga tõndo. A sẽn wa n be tẽngã zugã, a “raaga nintãm” yɛl kẽer yĩnga. (Zã 11:35; Luk 19:41; 22:44; Ebre. 5:7) Bɩ d gom sasa nins a sẽn daag nintãmã yelle. D na n yãa rẽ sẽn tõe n sõng tõnd to-to. D na n yãa bũmb takɩ me d sẽn tõe n maane, n tõog n mao ne yɛl nins sẽn mi n kɩtd tɩ d raagd nintãmã.

5. B sẽn yeel bũmb ning Zã 11:32-36 sõngda tõnd tɩ d bãng bõe a Zeezi zugu?

⁵ Yʋʋmd 32 soabã, a Zeezi zo-nongr a Lazaar lʋɩɩ bãaga, n wa baas n maan kaalem. (Zã 11:3, 14) A ra tara tãop a yiibu, a Maari ne a Marte. A Zeezi ra nonga b zakã nebã wʋsgo. Pʋg-kãensã sũy ra sãama wʋsgo, b yao a Lazaar sẽn maan kaalmã yĩnga. A Lazaar kaalmã poore, a Zeezi toga sor n kẽng Betani, a Maari ne a Mart sẽn da beẽ wã. A Mart sẽn wʋm t’a Zeezi watame wã, a wudgame n yi n na n tɩ seg-a. Mams-y n ges-y a Mart sũ-sãangã sẽn da yaa to-to, a sẽn wa n yet a Zeezi yaa: “Zu-soaba, yãmb sã n da zĩndẽ ka, mam tãoã ra kõn kiẽ ye.” (Zã 11:21) Rẽ poor bilfu, a Zeezi sẽn wa n yã a Maari ne neb a taab sẽn yãbdã, yẽ me raaga nintãm.—Karm-y Zã 11:32-36.

6. Bõe yĩng la a Zeezi sẽn daag nintãm a Lazaar kũumẽ wã?

⁶ Bõe yĩng la a Zeezi sẽn yãb a Lazaar kʋʋmẽ wã? Étude perspicace des Écritures sebrã pʋgẽ, b yeelame yaa: “Yaa a Laazar sẽn maan kaalmã, n paas rẽ sẽn sãam a Lazaar tãopã sũy to-to wã n kɩt t’a Zeezi wẽ siri, la a raag nintãmã.” * Tõe t’a Zeezi tagsa toog ning a Lazaar sẽn yã, a sẽn wa n bẽedẽ wã yelle, la a mams a yamẽ a Lazaar sũur sẽn sãam to-to, a sẽn wa n neẽ t’a bãagã na n tũu ne a yõorã. Bũmb a to me sẽn kɩt t’a Zeezi raag nintãm, yaa a sẽn yã a Maari ne a Mart sũur sẽn da sãam to-to wã, b yaoã sẽn maan kaalmã yĩngã. Y zo-nongr wall y zakã ned sã n maana kaalem, sãmbg kae tɩ y sũur me sãamda a woto. Bɩ d ges bũmb a tãab kiba-kãngã sẽn tõe n sõng-y tɩ y bãnge.

7. A Zeezi sẽn daag nintãm a zo-rãmb yĩngã sõngda tõnd tɩ d bãng bõe a Zeova zugu?

⁷A Zeova mii y sũ-sãamsã sẽn ta zĩig ninga: A Zeezi “wõnda Wẽnnaam kɛpɩ.” (Ebre. 1:3) A Zeezi sẽn daag nintãmã  wilgdame t’a Zeova me sũur sãamdame, d ned sã n maan kaalem. (Zã 14:9) Ned y sẽn nong sã n maana kaalem, y tõe n basa y yam t’a Zeova pa ne y sũ-sãangã bal ye. A kʋmd-y lame. A ratame n bels-yã.—Yɩɩn. 34:19; 147:3.

8. Bõe yĩng tɩ d tõe n bas d yam t’a Zeezi na n wa vʋʋga d neb nins sẽn maan kaalmã?

⁸A Zeezi na n wa vʋʋga y neb nins sẽn maan kaalmã: A Zeezi sẽn daag nintãmã poor bala, a togsa a Mart bũmb sẽn kɩt t’a bas a yam. A yeel-a lame yaa: “Fo tãoã na n vʋʋgame.” A Mart tẽe a Zeezi. (Zã 11:23-27) A Mart sẽn da tũud a Zeova ne a sũur fãa wã yĩnga, sãmbg kae t’a ra miime tɩ pĩndã, Wẽnnaam no-rɛɛs a Eli ne a Elize fãa vʋʋga neb sẽn da ki. (1 Rĩm. 17:17-24; 2 Rĩm. 4:32-37) Sẽn paase, a ra wʋma a Zeezi sẽn da vʋʋg neb sẽn da ki wã kibare. (Luk 7:11-15; 8:41, 42, 49-56) Yãmb me tõe n basa y yam tɩ y na n le wa yãa y neb nins sẽn maan kaalmã. A Zeezi sẽn daag nintãm la a bels a zo-rãmbã sũy sẽn da sãam wʋsgã, yaa kaset t’a rata ne a sũur fãa n vʋʋg neb nins sẽn maan kaalmã.

9. Wa a Zeezi, wãn to la d tõe n sõng neb nins sũy sẽn sãamã? Togs-y kibare.

⁹Y tõe n sõnga sẽn be-b sũ-sãams pʋgẽ wã: A Zeezi pa naag a Mart ne a Maari n yãb bal ye. A kelg-b lame me, la a bels-ba. Tõnd me tõe n maana woto ne neb nins sũy sẽn sãamã. Saam-biig a ye yʋʋr sẽn boond t’a Dan, n yaa kãsem-soab n be Ostrali yeelame: “Mam pagã kaalmã poore, mam da rata sõngre. Saam-biis wʋsg ne b pagb ra bee ne maam wĩndg la yʋngo, n kelgd-ma. B ra basdame tɩ m bilgd-b m sũ-sãangã sẽn ta zĩig ninga. B ra pa get me tɩ m sẽn daagd nintãmã yaa yãnd bũmb ye. B maana bũmb takɩ me n sõng-ma. Wala makre, b ra pekda m mobillã, b ra kẽnd n daada zẽ-biis la bũmb a taab n wat n kõt-ma, la b segendẽ, sã n wa mik tɩ m pa tar pãng n tõe n maan rẽ fãa ye. Naoor wʋsgo, b ra naagda maam n pʋʋsdẽ. B wilgame tɩ b sɩd yaa zo-rãmb hakɩɩka, la saam-biis d sẽn tõe n teeg ‘yel-pakr wakate.’”—Yel. 17:17.

10. Togs-y b sẽn yeel bũmb ning tɩ be Luk 19:36-40.

¹⁰ A Zeezi waa Zerizalɛm yʋʋmd 33, Nizã kiuugã rasem a 9 wã daare. A sẽn wa n kẽed tẽngã, neb kʋʋng n tigmi, tɩ nebã ra tʋɩt b zugẽ futã sorã zugu, n na n wilg tɩ yaa yẽ la bãmb rĩma. Yaa vẽeneg tɩ ra yaa sũ-noog sasa. (Karm-y Luk 19:36-40.) La bũmb ning sẽn maan rẽ poorã tog n linga a karen-biisã. Biiblã yeelame: “La bãmb sẽn wa n kolg tẽngã n yã-a wã, b yãbame.” Yɩɩ ne nintãm la a Zeezi togs Zerizalɛm nebã yel-beed ning sẽn na n paam-b ka la bilfã.—Luk 19:41-44.

11. Bõe yĩng t’a Zeezi raag nintãm Zerizalɛm nebã yĩnga?

¹¹ A Zeezi sũur sãamame, bala a ra miime tɩ baa ne nebã sẽn da kilsd-a wã, zʋɩf-rãmb wʋsg pa na n sak Rĩungã koe-noogã ye. Woto yĩnga, b na n sãama Zerizalɛm, tɩ zʋɩf-rãmb nins fãa sẽn na n põs sãoongã sasa wã loog yembdo. (Luk 21:20-24) Bʋko, wa a Zeezi sẽn da yeelã, neb wʋsg pa sak n tẽ-a ye. Yãmb babgẽ wã, nebã sakd n kelgda Rĩungã koe-noogã bɩ? Sã n mikame tɩ yaa neb kar-kar bal n sakdẽ tɩ y zãmsd-b Biiblã, bõe la a Zeezi sẽn daag nintãmã tõe n sõng-y tɩ y bãnge? Bɩ d le gom bũmb a tãab yelle.

12. A Zeezi sẽn daag nintãm neb nins a sẽn da taasd koɛɛgã yĩngã sõngda tõnd tɩ d bãng bõe a Zeova zugu?

 ¹²Ninsaalbã yell paka a Zeova: A Zeezi sẽn daag nintãmã tẽegda tõnd tɩ ninsaalbã yell paka a Zeova hal wʋsgo. “B pa rat tɩ ned baa a ye sãam ye. B ratame tɩ nebã fãa tek yam n kos sugri.” (2 Pɩy. 3:9) Rũndã-rũndã, d wilgdame tɩ d nonga d taabã, d sã n ket n modgdẽ sẽn na yɩl n sõng-b tɩ b wʋm Rĩungã koe-noogã.—Mat. 22:39.

13-14. Wãn to la a Zeezi wilg t’a zoeta nebã nimbãanega, la wãn to la d tõe n dɩk a togs-n-taare?

¹³A Zeezi tʋma wʋsg koɛɛgã mooneg pʋgẽ: A wilgame t’a nonga nebã, n da tũnugd ne segb buud fãa n zãmsd-b Wẽnnaam Gomdã. (Luk 19:47, 48) Bõe yĩng t’a ra maand woto? A Zeezi ra zoeta b nimbãanega. Wakat ninga, neb wʋsg ra watame n na n kelg a Zeezi goamã, hal tɩ yẽ ne a karen-biisã “ra pa tõe n paam n dɩ rɩɩb meng ye.” (Mark 3:20) Sẽn paase, daar a ye, a sakame n sõs ne ned ne yʋngo. Bala ra yaa wakat kãng n da zems ne nin-kãnga. (Zã 3:1, 2) Neb nins sẽn kelg a Zeezi sɩngrẽ wã wʋsg pa sak n lebg a karen-biis ye. La neb nins fãa sẽn kelg-a wã paamame t’a kõ-b kaset sõma. Rũndã-rũndã, d ratame n sõng neb wʋsg tɩ b paam n wʋm koe-noogã. (Tʋʋ. 10:42) Sẽn na yɩl n tõog n maan woto, d segd n toeema d sẽn moond to-to wã.

¹⁴D sakd n toeemd d koe-moonegã wakate: D sã n pa toeemd d moonegã wakate, d tõeeme n pa paam n taas koe-noogã neb sẽn dat n kelg ye. Saam-bi-poak a ye sẽn yaa so-pakd t’a yʋʋr boond t’a Matilda yeelame: “Maam ne m sɩdã modgdame n toeemd d koe-moonegã wakate. Yibeoog pĩnda, d moonda koosmã zĩisẽ. Wĩntoogã sã n wa zẽk tɩ neb wʋsg kẽnd soayã zutu, d moonda ne perzãntoaare. La sã n wa zems zaabre, d paamda neb wʋsg b zagsẽ wã n taasd koɛɛgã.” D pa segd n moond wakat sẽn zems ne-d bal ye. D segd n sakd n toeemda d moonegã wakate, sẽn na yɩl n paam n taas koɛɛgã neb wʋsgo. D sã n maan woto, d tõe n basa d yam tɩ d noogda a Zeova sũuri.

15. Wa b sẽn togs Luk 22:39-44, yʋng ning b sẽn yõk a Zeezi wã, bõe n maane?

¹⁵ Yʋʋmd 33 Nizã rasem 14 daar yʋngo, a Zeezi kẽnga Gɛtsemane zẽedã zĩigẽ. Beenẽ, a pelga a pʋg n pʋʋs a Zeova. (Karm-y Luk 22:39-44.) Sasa kãng sẽn da yaa toog ne-a wã, a yõka Wẽnnaam sɛɛga, la a “kos sõngr ne kelems la nintãm.” (Ebre. 5:7) Bõe la a pʋʋs n kos yʋn-kãnga b sẽn yõk-a wã? A kosa a Zeova pãng sẽn na yɩl n kell n maan sɩd ne-a, la a maan a raabã. A Zeova wʋma a Bi-riblã sẽn pʋʋs-a ne nintãmã, n tʋm malɛk t’a wa keng a raoodo.

16. Bõe yĩng t’a Zeezi sũur sãam wʋsgo, a sẽn wa n pʋʋsd a Zeova Gɛtsemane zẽedã zĩigẽ wã?

¹⁶ A Zeezi pʋʋsa a Zeova Gɛtsemane zẽedã zĩigẽ la a ra yãbda. Bala a sũur da sãama wʋsgo, nebã sẽn na n ges-a wa wẽn-tʋʋsã yĩnga. A ra miime tɩ tara yõod wʋsg t’a kell n maan sɩd ne a Ba a Zeova, sẽn na yɩl t’a yʋʋrã ra sãam ye. Y sã n maooda ne zu-loees sẽn kɩt tɩ yaa toog tɩ y kell n maan sɩd ne a Zeova, bõe la a Zeezi sẽn daag nintãmã tõe n sõng-y tɩ y bãnge? Bɩ d le gom bũmb a tãab yelle.

17. A Zeova sẽn leok a Zeezi sẽn pelg a pʋg n pʋʋs-a wã sõngda tõnd tɩ d bãng bõe a Zeova zugu?

¹⁷A Zeova kelgda y kosgã: A Zeova kelga a Zeezi sẽn pelg a pʋg n pʋʋs-a wã. Bõe yĩnga? Bala a Zeezi sẽn da rat n yɩɩd yaa a kell n maan sɩd ne a Ba wã, la a waoog a yʋʋrã. D sẽn dat n yɩɩdã sã n yaa d kell n maan sɩd ne a Zeova la d waoog a yʋʋrã, a na n kelga d pʋʋsgã la a sõng-do.—Yɩɩn. 145:18, 19.

18. Bõe yĩng tɩ d tõe n yeel t’a Zeezi yaa wa zoa sẽn wʋmd d yɛlã võore?

¹⁸A Zeezi wʋmda y yellã võore: D sã n wa be sũ-sãams pʋgẽ, n paam tɩ d zoa bels-do, noom-d lame. Sẽn yɩɩd fãa, a sã n zoe n maoo ne d yellã buudu. A Zeezi yaa zoa a woto buudu. D sã n wa koms raoodo, n dat sõngre, a wʋmda d yellã võore. A mii d pan-komsmã. La a na n gesame tɩ d paam sõngre, “d sẽn wat n dat sõngr wakate.” (Ebre. 4:15, 16) Wa a Zeezi sẽn sak tɩ malɛk sõng-a Gɛtsemane zẽedã zĩigẽ wã,  tõnd me segd n tʋllame n sak t’a Zeova sõng-do. A Zeova tõe n tũnuga ne sebr a siglgã sẽn yiisi, video, sõsga, pa rẽ bɩ a kɩt tɩ kãsem-soab wall kiris-ned tẽeb sẽn bɩ wa kaag-do, n keng d raoodo.

19. Yɛl kẽer sã n wa kɩt tɩ yaa toog tɩ y kell n maan sɩd ne Wẽnnaam, bõe n tõe n sõng-y tɩ y paam pãnga? Togs-y kibare.

¹⁹A Zeova na n kõo yãmb a laafɩ wã: Bõe la a Zeova na n maan n keng d raoodo? D sã n pʋʋse, d na n paama “Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã.” (Fili. 4:6, 7) A Zeova laafɩ wã na n kɩtame tɩ d yam gãande, la kɩt me tɩ d tall tagsg sẽn yaa sõma. Sɩd yɩɩ woto ne saam-bi-poak a ye yʋʋr sẽn boond t’a Luuz. Ad a sẽn yeele: “M mi n getame tɩ m yaa m yembre, tɩ sãamd m sũuri. Rẽ mi n kɩtame tɩ m tagsdẽ t’a Zeova pa nong-m ye. Sã n wa yaa woto, mam pʋʋsda a Zeova zĩig pʋgẽ n togs-a sẽn be m sũurẽ. Pʋʋsgã sõngda maam tɩ m yam gãande.” Wa saam-bi-poakã kibarã sẽn wilgdã, pʋʋsgã tõe n sõng-d lame tɩ d paam sũur pʋgẽ bãane.

20. A Zeezi sẽn daag nintãmã sõnga tõnd tɩ d bãng bõe?

²⁰ A Zeezi sẽn daag nintãmã sɩd sõnga tõnd tɩ d bãng bũmb wʋsg sẽn keng d raoodo. D yãame tɩ d segd n sõnga d zo-rãmb nins neb sẽn maan kaalmã, la tɩ d segd n kɩsa sɩd t’a Zeova ne a Zeezi na n sõng-d lame, d ned sã n wa maan kaalem. D yãame me tɩ d segd n moona koɛɛgã, la d zãms nebã Biiblã n wilg tɩ d zoeta b nimbãanega, wa Wẽnnaam a Zeova ne a Zeezi Kirist me sẽn zoet nebã nimbãanegã. Sẽn paase, d paamda belsgo, d sẽn mi t’a Zeova ne a Bi-ribl-nongrã mii d toogã sẽn ta zĩig ning la d pãn-komsmã, la tɩ b rat n sõng-d lame tɩ d tõog toogã. Bɩ d ket n tũud bũmb nins d sẽn bãngã, hal n tãag wakat ning a Zeova sẽn na n pids a sẽn pʋlem t’a “na n yẽesa nintãm fãa ninsaalbã ninẽ” wã.—Vẽn. 21:4.