1. Bõe yell n paam a Davɩɩde?

DAAR a ye, a Davɩɩd ra zoetame n na n põsg a yõore, bala a Sayull sẽn da yaa Israyɛll rĩmã ra baood-a lame n na n kʋ. Kom sẽn wa n tar a Davɩɩde, a yalsa Noob tẽngã n kos bur a nu bala. (1 Sãm. 21:2, 4) Rẽ poore, yẽ ne a nebã zoeeme n tɩ solg tãng bokẽ. (1 Sãm. 22:1) Sɩnga wãn t’a Davɩɩd wa be yell a woto pʋgẽ?

2. Bõe n wilgd t’a Sayull ra baooda yell bal n na n kõ a menga? (1 Sãmwɛll 23:16, 17)

² A Sayull ra maanda sũ-kĩir ne a Davɩɩde, bala neb wʋsg ra pẽgd-a lame, a sẽn da tõogd zab wʋsgã yĩnga. A Sayull ra miime me t’a Zeova raaga yẽ sẽn yaa Israyɛll rĩmã n base, a sẽn kɩɩs-a wã yĩnga, la a yãk a Davɩɩd t’a na n wa ledg-a n yɩ rĩma. (Karm-y 1 Sãmwɛll 23:16, 17.) La a Sayull n da ket n dɩt naam, n da tar tãb-biis wʋsgo, la neb ka tɛk sẽn da teend-a. Rẽ n so tɩ yɩ tɩlɛ t’a Davɩɩd zoe, sẽn na yɩl n põsg a yõore. Rẽ yĩnga, a Sayull ra tẽedame t’a tõe n gɩdga Wẽnnaam t’a pa tõog t’a Davɩɩd reeg naamã bɩ? (Eza. 55:11) Biiblã pa wilg rẽ ye. La d tõe n kɩsa sɩd t’a Sayull ra baooda yell bal n na n kõ a menga. Ned pa tol n tõe n zab ne Wẽnnaam n tõog ye!

3. Baa sẽn da pa nana ne a Davɩɩdã, a manesem yɩɩ wãna?

³ A Davɩɩd ra yaa sik-m-meng soaba. Pa yẽ meng n yãk yam n na n lebg Israyɛll rĩm ye. Yaa a Zeova n yãk-a. (1 Sãm. 16:1, 12, 13) A Sayull wa n geta a Davɩɩd wa a bɛ meng-menga. La a Davɩɩd pa ning a Zeova taale, yɛl nins sẽn da paamd-a wã yĩng ye. A leb n pa yẽgme, a sẽn da pa tar dɩɩb  wʋsgo, la a sẽn tɩ solg tãng bokẽ wã yĩng ye. Tõeeme meng tɩ yaa a sẽn wa n be tãngã bokẽ la a gʋls yɩɩll ning zug tõnd sõsgã sẽn tikã, n na n pẽg a Zeova. A yeela yɩɩllã pʋgẽ yaa: ‘Bũmb kõn tol n paoog neb nins sẽn baood a Zeova wã ye.’—Yɩɩn. 34:11

4. Sogs-bʋs leoor la d na n paam sõs-kãngã pʋgẽ?

⁴ Rũndã-rũndã, a Zeova Kaset rãmb wʋsg pa paamd rɩɩb tɩ sekdẽ, wall bũmb a taab sẽn yaa tɩlɛ ne b vɩɩmã ye. * Sɩd yɩɩ woto ne a Zeova Kaset rãmb wʋsgo, koronavirisã bã-longdgã sasa. ‘To-kãsengã’ me sẽn kolgdã, yɛlã na n maneg n kengame. (Mat. 24:21) Rẽ n so tɩ d na n leok sogsg a naase: Bõe yĩng tɩ d tõe n yeel tɩ bũmb pa “tol n paoog” a Davɩɩde? Bõe yĩng tɩ d segd n sek d mens ne d sẽn tarã? Bõe yĩng tɩ d tõe n bas d yam t’a Zeova na n gesa d yelle? Wãn to la d tõe n segl d mens masã menga, yɛl nins sẽn watã yĩnga?

5-6. Wãn to la Yɩɩn-sõamyã 23:1-6 sõngd tõnd tɩ d wʋm a Davɩɩd sẽn yeel tɩ “bũmb kõn tol n paoog” sẽn tũud-b a Zeova wã võore?

⁵ A Davɩɩd sẽn yeel tɩ “bũmb kõn tol n paoog” sẽn tũud-b a Zeova wã, a ra rat n yeelame tɩ bõe? A Davɩɩd sẽn wa n gʋlsd Yɩɩn-sõamyã 23 soabã, a goma goam a woto buudu. Dẽnd yɩɩn-kãng tõe n sõnga tõnd tɩ d wʋm a sẽn yeel woto wã võore. (Karm-y Yɩɩn-sõamyã 23:1-6.) A Davɩɩd yeela a yɩɩllã sɩngrẽ yaa: ‘A Zeova yaa mam pe-kɩɩma, bũmb kõn paoog maam ye.’ Yɩɩllã fãa pʋgẽ, a goma bũmb kẽer sẽn tar yõod wʋsg yelle. Wala makre, bõn-sõma nins a Zeova sẽn maan n sõng-a, a sẽn sak t’a yɩ a Pe-kɩɩmã yĩnga. A Zeova ra tallda a Davɩɩd n kẽnd “tɩrlem soay zutu,” la a ra teend-a noog wakat la toog wakat me. A Davɩɩd sak n deegame tɩ baa ne sẽn wõnd a Zeova ning-a-la “yam-maas zĩigẽ” wã, a ket n tõe n paama zu-loeese. A Davɩɩd ra tõe n komsa raood wakat ninga, tɩ yaa wa a sẽn kẽnd “tãng long sẽn yaa lik bida pʋga.”  A ra na n talla bɛɛb me. La a Zeova sẽn da yaa a Pe-kɩɩmã yĩnga, a ra pa zoet “bũmb baa a yembr dabeem ye.”

⁶ Dẽnd d yãa vẽeneg tɩ ‘bũmb pa tol n paoog’ a Davɩɩd ye. Wãn to? A paama bũmb nins fãa sẽn na n sõng-a t’a kell n tall zood sõma ne a Zeova wã. Sẽn na yɩl n paam sũ-noogo, ra pa tɩlɛ t’a paam teed wʋsg ye. A Davɩɩd maana sũ-noog ne a Zeova sẽn maan bũmb nins n kõ-a wã. Sẽn da pak-a n yɩɩd yaa a paam t’a Zeova ning-a bark la a kogl-a.

7. Wa Luk 21:20-24 sẽn wilgdã, bõe yell n paam pipi kiris-neb nins sẽn da be Zide wã?

⁷ A Davɩɩd sẽn yeel bũmb ningã sõngda tõnd tɩ d bãng tɩ d pa segd n lʋɩɩs laogã baoob taoor ye. Yaa sɩd tɩ d tõe n maana sũ-noog ne bũmb nins d sẽn tarã, la d pa segd n getẽ tɩ bõn-kãens n tar yõod n yɩɩd d vɩɩmã pʋgẽ ye. Woto yaa bũmb sẽn tar yõod wʋsgo, pipi kiris-neb nins sẽn da be Zide wã sẽn wa n bãnge. (Karm-y Luk 21:20-24.) A Zeezi ra pĩnd n keoog-b lame tɩ wakat n wat tɩ ‘sodaas na n wa gũbg Zerizalɛm’ tẽngã. Wakat kãng sẽn wa n ta wã, b ra segd n ‘sɩnga zoees n teesd tãensẽ wã.’ Yaa b sã n da zoe n yi tẽngã la b na n põse. La bũmb wʋsg la b ra segd n loog n base. Yʋʋm a wãn woto, Gũusg Gasgã ra goma sẽn yɩ to-to wã yelle, n yeel yaa: “B basa b pʋto, b zagse, n pa wʋk b roogã teed meng ye. B sẽn da kɩs sɩd t’a Zeova na n kogl-b lame la a fãag-bã yĩnga, b ra getame tɩ yaa a Zeova tũub n tar yõod n yɩɩd bũmba fãa.”

8. Yam-bʋg la d tõe n dɩk bũmb ning sẽn paam pipi kiris-neb nins sẽn da be Zide wã pʋgẽ?

⁸ Yam-bʋg la d tõe n dɩk bũmb ning sẽn paam pipi kiris-neb nins sẽn da be Zide wã pʋgẽ? Gũusg Gasg ning yell d sẽn zoe n gomã paasame yaa: “Ka la bilfu, d na n paama makr sẽn na n wilg arzɛkã yõod ne tõnd sẽn ta zĩig ninga. Yaa bõn-kãensã n tar yõod ne tõnd n tɩ yɩɩd bɩ, bɩ sẽn pak tõnd n yɩɩd yaa d wa paam fãagre, d sẽn maand sɩd ne Wẽnnaamã yĩnga? Dũniyã saab sã n wa ta, tõe tɩ d na n maoo ne zu-loees ka tɛka, la d bõn bũmb wʋsg menga. D segd n segla d mens n na n maan bũmb nins fãa d sẽn segd n maanã, wa pipi kiris-neb nins sẽn da be Zide wã sẽn maanã.” *

9. Wãn to la saglg ning tẽn-tʋmd a Poll sẽn kõ kiris-neb nins sẽn da yaa ebre-rãmbã kengd y raoodo?

⁹ Pipi kiris-neb nins sẽn da be Zide wã ra segd n loog n basa b sẽn tarã fãa la bala, n tɩ sɩng bũmb fãa tẽng a to. Tags-y n ges-y rẽ sẽn yɩ toog ne-b to-to. B ra segd n talla tẽebo, la b kɩs sɩd t’a Zeova na n gesame tɩ b paam bũmb nins sẽn yaa tɩlɛ ne-bã. La bũmb n da be n da tõe n sõng-ba. Yʋʋm a nu nand tɩ Rom sodaasã wa gũbg Zerizalɛm, tẽn-tʋmd a Poll kõo kiris-neb nins sẽn da yaa ebre-rãmbã saglg sẽn tar yõod wʋsgo. A yeel-b lame yaa: “Bɩ y yel-manesmã wilg tɩ y pa neb sẽn nong ligdi, la y kɩtdẽ tɩ bũmb nins y sẽn tarã sekd-yã. Bala, Wẽnnaam yeelame yaa: ‘Mam pa na n loog n bas foom a bada, la m pa na n tol n daag-f n bas ye.’ Woto wã, d tõe n paama raood wʋsg n yeele: ‘A Zeova yaa mam sõangda. Mam pa na n zoe rabeem ye. Ninsaal tõe n maana maam bõe?’” (Ebre. 13:5, 6) Neb nins sẽn tũ a Poll saglgã nand tɩ Rom sodaasã wa sãam tẽngã nafame. Bala b tõogame tɩ bũmb nins b sẽn da tarã sek-ba, zĩig ning b sẽn da yik n tɩ vɩ masã wã. B ra basa b yam t’a Zeova na n gesame tɩ b paam bũmb nins sẽn yaa tɩlɛ ne-bã. A Poll saglgã wilgdame tɩ tõnd me tõe n basa d yam t’a Zeova na n gesa d yelle.

10. Sagl-bʋg la a Poll kõ tõndo?

¹⁰ A Poll sagla a Tɩmote me wa a sẽn da sagl Zerizalɛm kiris-nebã to-to wã, tɩ tõnd me segd n tũ a saglgã. A yeelame: “Woto wã, d sã n tar rɩɩb la futu, d na n maana sũ-noog ne bõn-kãense.” (1 Tɩm. 6:8) Woto rat n yeelame tɩ d pa tõe n dɩt rɩ-noodo, n tar zag-neere, bɩ n mi n yãk wakat n da fu-paal bɩ? A Poll ra pa rat n yeel woto ye. A ra rat n yeelame tɩ sẽn yaa bũmb ning fãa la d tara, d segd n kɩtame tɩ bõn-kãng sek-do. (Fili. 4:12) Sagl-kãngã sõnga a Poll mengã. Bũmb ning d sẽn tar tɩ tar yõod n yɩɩdã yaa d zoodã ne Wẽnnaamã, la pa d paoongã ye.—Hab. 3:17, 18.

11. A Moyiiz sẽn taas Israyɛll nebã goam ninsã sõngda tõnd tɩ d bãng bõe?

¹¹ Bũmb nins d sẽn get tɩ yaa tɩlɛ ne-dã tõeeme n pa tɩlɛ a Zeova nifẽ ye. D ges a Moyiiz sẽn yeel Israyɛll nebã bũmb ninga, b sẽn wa n maan yʋʋm 40 we-rasempʋɩɩgẽ wã poore. A yeel-b lame yaa: ‘Sẽn-Ka-Saab sẽn yaa yãmb Wẽnnaamã ninga bũmb ning fãa yãmb sẽn maandã barka. B yãnda y kẽnã fãa we-raoogã pʋgẽ ka. Yʋʋm pis-naas la woto, Sẽn-Ka-Saab sẽn yaa yãmb Wẽnnaamã sẽn be ne yãmba, la bũmb ka paoog yãmb ye.’ (Tõo. 2:7) Yʋʋm pis-naasã fãa pʋgẽ, a Zeova rɩlga Israyɛll nebã ne mannã. Fut nins b sẽn yeelg n yi hal Ezɩptã pa tol n ki ye. (Tõo. 8:3, 4) Baa ne Israyɛll neb kẽer sẽn da get tɩ woto bal pa sekã, a Moyiiz tẽeg-b lame tɩ bũmb pa  paoog-b ye. A Zeova ratame tɩ d kɩt t’a sẽn kõt tõnd bũmb ninsã sek-do. A ratame tɩ d pʋʋsd barka, bũmb nins fãa a sẽn kõt tõndã yĩnga, la d get rẽ wa kũun sẽn yit yẽ nengẽ.

12. Bõe n wilgd t’a Davɩɩd ra teega a Zeova la pa a mengã?

¹² A Davɩɩd ra miime t’a Zeova maanda sɩd ne neb nins sẽn nong yẽ wã, la t’a geta b yell neere. A Davɩɩd sẽn wa n gʋlsd Yɩɩn-sõamyã 34 soabã t’a vɩɩmã ra bee yell pʋgẽ. A talla tẽebo, hal n da kɩs sɩd t’a ‘Zeova malɛkã gũuda’ yẽ. (Yɩɩn. 34:8) Tõeeme t’a Davɩɩd maka a Zeova malɛkã ne sodaag sẽn yas n gũud zĩig n pa tol n yẽrgdẽ, sẽn na yɩl tɩ bɛɛb ra ling-a ye. A Davɩɩd mengã ra yaa zabr gãndaoogo, t’a Zeova me ra yãk-a t’a na n wa lebg rĩmã. Baa ne rẽ, a pa teeg a sẽn da mi loaabg lobgr sõma wã, bɩ a sẽn da tõe n wõog sʋʋg n zab ne a bɛɛbã n tõogã ye. (1 Sãm. 16:13; 24:13) A Davɩɩd teega Wẽnnaam a Zeova, n kɩs sɩd t’a Zeova malɛkã fãagda neb nins sẽn zoet a Zeova wã. Rũndã-rũndã, d pa gũud t’a Zeova maan yel-solemd n kogl tõnd ye. La d kɩsa sɩd tɩ sẽn teeg-b a Zeova wã na n wa paama vɩɩm sẽn kõn sa, baa b sã n maan kaalem masã menga.

13. Goog sẽn yit Magoogã sã n wa na n zab ne Wẽnnaam nin-buiidã, bõe n na n kɩt tɩ wõnd b na n tõog-d lame? Bõe yĩng tɩ d pa segd n zoe rabeem? (Ges-y sebrã pipi neng fotã.)

¹³ Ka la bilfu, yɛlã na n kɩtame tɩ lebg toog tɩ d bas d yam t’a Zeova na n kogl-d lame. Goog sẽn yit Magoogã sẽn makd tẽns wʋsg sẽn lagem taabã sã n wa na n zab ne Wẽnnaam nin-buiidã, na n yɩɩ wa d vɩɩmã bee yell pʋgẽ. Wakat kãnga, d segd n basa d yam t’a Zeova tõe n fãag-d lame, la t’a na n sɩd maana woto. B nifẽ, tõnd na n wõnda piis sẽn pa tar pe-kɩɩm sẽn na n kogl-b ye. (Eze. 38:10-12) La d pa na n bob zab-teed ye. D pʋd n pa mi zabr ye. Tẽn-tẽnsã neb na n tagsame tɩ b na n zaba ne-d n tõog-d nana-nana. La b pa mi t’a Zeova malɛgsã na n zaba ne-b n fãag tõnd ye. Yaa d sẽn tar tẽebã yĩng n kɩt tɩ d mi rẽ. Tẽn-tẽnsã neb pa na n yã malɛgsã ye. Bala b pa tar tẽeb ne Wẽnnaam ye. Saasẽ tãb-biisã sã n wa yik n na n zab ne-b n fãag tõndo, na n yɩɩ lingr meng-meng ne-ba.—Vẽn. 19:11, 14, 15.

14. Bõe la d tõe n maan masã menga, n segl d mens yɛl nins sẽn watã yĩnga?

¹⁴ Bõe la d tõe n maan masã menga, n segl d mens yɛl nins sẽn watã yĩnga? D pa segd n tags tɩ yaa teed nins d sẽn tarã n tar yõod n yɩɩd ye. Bala daar n wat tɩ na n yɩ tɩlɛ tɩ d zoe n bas te-kãensã. Sẽn paase, d segd n kɩtame tɩ d sẽn tar bũmb ninsã sek-do, la d maan sũ-noogo, d sẽn tar zood ne a Zeova wã yĩnga. D sã n bao n bãng Wẽnnaam sõma, d na n maneg n basa d yam t’a tõe n kogl-d lame, Goog sẽn yit Magoogã sã n wa na n zab ne-do.

15. Wãn to la a Zeova sõng a Davɩɩd pĩndã, tɩ kɩt t’a bas a yam t’a na n kell n sõng-a-la a zu-loeesã pʋgẽ?

¹⁵ D ges bũmb a to sẽn sõng a Davɩɩde, tɩ tõe n sõng tõnd me tɩ d segl d mense, yɛl nins sẽn watã yĩnga. A Davɩɩd yeelame: ‘Lemb-y n ges-y n bãng t’a Zeova yaa noogo! Bark bee ned ning sẽn soonded a Zeova nengẽ wã zugu!’ (Yɩɩn. 34:9) Gom-kãensã wilgda bũmb ning sẽn kɩt t’a Davɩɩd ra teeg a Zeova wã. A Davɩɩd ra minim n teegda a Zeova. La a Zeova zɩ n bas n pa sõng-a ye. A sẽn wa n yaa bi- bɩɩga, daar a ye a kẽngame n na n tɩ zab ne a Goliat sẽn da yaa Filisti nin-wobg la zabr gãndaoogã. Nand t’a Davɩɩd zab ne-a, a yeel-a lame yaa: ‘Rũndã, a Zeova na n kɩtame tɩ m tõog-fo.’ (1 Sãm. 17:46) Rẽ poore, a Davɩɩd sẽn wa n be na-yirã n sõngd a Sayullã, a Sayull maka naoor wʋsg n na n kʋ-a. La a Zeova ra “bee ne a Davɩɩde.” (1 Sãm. 18:12) A Davɩɩd sẽn da mi tɩ pĩndã a Zeova sõng-a lame wã yĩnga, a ra kɩsa sɩd t’a na n kell n sõng-a-la a zu-loeesã pʋgẽ.

16. Bõe ne bõe la d tõe n maane, n ‘lemb’ n bãng t’a Zeova yaa noogo?

¹⁶ D sã n maneg n teeg a Zeova masã menga, d na n maneg n kɩsa sɩd t’a tõe n fãag-d-la yɛl nins sẽn watã sasa. Yɩl n kos d tʋʋmd taoor soab sor n paam n kẽng tigis-kãsenga, wall n kos-a t’a boog d tʋʋmã tɩ d paam sẽk n kẽnd tigissã fãa la d moond koɛɛgã, baoodame tɩ d tall tẽeb la d tʋll n teeg a Zeova. La tʋʋmdã taoor soab sã n zãgse, n pʋd n yeel tɩ d bas tʋʋmdã, d maanda wãna? Rẽ yĩnga, d na n talla tẽeb t’a Zeova pa na n daag-d n base, la t’a na n kell n gesame tɩ d paamd sẽn yaa tɩlɛ ne-dã wakat fãa bɩ? (Ebre. 13:5) Neb wʋsg sẽn kẽes b mens zãng Wẽnnaam tʋʋmdã pʋgẽ tara kaset sẽn wilgd a Zeova sẽn sõng-b to-to, b sẽn wa n be raab pʋgẽ. A Zeova yaa sɩd soaba.

17. Vɛrse-bʋg n yaa yʋʋmd 2022 wã vɛrse? Bõe yĩng tɩ vɛrse wã goamã zemse?

¹⁷ A Zeova sẽn be ne-dã yĩngã, d ka bʋʋm n na n maan dabeem yɛl nins sẽn watã yĩng ye. D sã n lʋɩɩsd Wẽnnaam daabã taoor d vɩɩmã pʋgẽ, a pa na n daag-d n bas a bada. Sẽn na yɩl n sõng-d tɩ d bãng tɩ d segd n segla d mens masã meng yɛl nins sẽn watã yĩnga, la d kɩs sɩd t’a Zeova pa na n daag-d n base, siglgã taoor lʋɩtb sullã yãka Yɩɩn-sõamyã 34:11 goamã, tɩ na n yɩ yʋʋmd 2022 vɛrse. B yeta be yaa: ‘Bũmb kõn tol n paoog neb nins sẽn baood a Zeova wã ye.’