1. A Pɩyɛɛr manesem yɩɩ wãna, a Zeezi sẽn maan yel-solemd t’a yõg zĩm wʋsgã?

 A PƖYƐƐR kẽnga zĩm yõgbo, n maan yʋng tõr n pa paam zĩnf ye. A Zeezi yeel-a-la bũmb sẽn ling-a. A yeel-a lame yaa: “Kẽng koomã sẽn zulmẽ wã, n lob y zĩm-gãmba wã n yõg zĩmã.” (Luk 5:4) A Pɩyɛɛr da maanda sãmbs a sã n na n paama zĩnfu, la a sak n maana a Zeezi sẽn yeelã. Gãmba wã b sẽn lobã sɩnga pãrsgo, zĩmã b sẽn paamã sẽn yaa wʋsgã yĩnga. A Pɩyɛɛr ne neb nins sẽn da be ne-a wã sẽn yã tɩ yaa yel-solemdã, “b yɛɛsa wʋsgo.” A Pɩyɛɛr yeelame yaa: “Zu-soaba, loog-y n bas-y maam, mam sẽn yaa yel-wẽn-maandã yĩnga.” (Luk 5:6-9) Wõnda a Pɩyɛɛr da getame tɩ pa zems t’a zĩnd ne a Zeezi ye.

2. Bõe yĩng tɩ d sã n zãms a Pɩyɛɛr kibarã bɩ tõe n naf-do?

² A Pɩyɛɛr da bee bʋʋm, bala a sɩd ra yaa “yel-wẽn-maanda.” Biiblã yetame tɩ wakat n zĩnd t’a Pɩyɛɛr yeel gomd wall n maan bũmb n wa maand a bãngẽ. Yãmb me mi n maana wa a Pɩyɛɛr bɩ? Yãmb tara zʋg-wẽng wall pãn-komsem y sẽn maood ne hal daar zãr n dat n bas bɩ? Sã n yaa rẽ, y sã n zãms a Pɩyɛɛr kibarã na n kenga y raoodo. Bõe yĩng tɩ d yet woto? Bãng-y t’a Zeova ra tõe n kɩtame tɩ b pa gʋls a Pɩyɛɛr kongr toor-toorã Biiblã pʋgẽ ye. La a kɩtame tɩ b gʋlse, sẽn na yɩl tɩ d rɩk yam. (2 Tɩm. 3:16, 17) D sã n bãng bũmb nins a Pɩyɛɛr sẽn mao ne wã, na n sõng-d lame tɩ d bãng t’a Zeova pa baood tɩ d yɩ neb sẽn zems zãng ye. A ratame tɩ d kell n mao baa ne d pãn-komsmã, n da koms raood n bas ye.

3. Bõe yĩng tɩ d pa segd n koms raood n base?

 ³ Bõe yĩng tɩ tar yõod tɩ d ra koms raood n base? D sã n maand bũmb wakat fãa, d minimã paasdame. Ad makre: Ned sẽn wẽed yʋʋm-teoog tõe n dɩka yʋʋm wʋsgo, n yaool n wa bãng wẽeb sõma. Yʋʋm-kãens fãa, a na n mi n wẽeme n tudgi. La a sã n pa koms raood n base, a minimã na n paasdame. Baa a sã n wa bãng wẽebã sõma, a tõe n mi n tudgame. La baa ne rẽ, a pa komsd raood n bas ye. A kelld n wɩnga ne zãmsgo, sẽn na yɩl n paas a minimã. Woto me, baa d sã n wa tagsdẽ tɩ d maoo ne pãn-komsem ning n tõoge, d tõe n le wa lʋɩɩ a pʋgẽ. La d tõe n kell n modgame n da koms raood ye. D fãa mi n yeela gomd wall n maan bũmb n wa maand d bãngẽ. Baasgo d sã n pa koms raood n base, a Zeova na n sõng-d lame tɩ d tõog d pãn-komsmã. (1 Pɩy. 5:10) Bɩ d gom a Pɩyɛɛr sẽn pa koms raood n basã yelle. A Zeezi sẽn zoe a Pɩyɛɛr nimbãaneg baa ne a sẽn kong naoor wʋsgã, tõe n sõng-d lame tɩ d kell n tũ a Zeova ne d sũur fãa.

4. Sã n yaa ne Luk 5:5-10, bõe la a Pɩyɛɛr yeel a mengã zugu, la bõe la a Zeezi yeel n keng a raoodo?

⁴ Biiblã pa wilg bũmb ning sẽn kɩt t’a Pɩyɛɛr yeel t’a yaa “yel-wẽn-maandã,” wall yel-wẽn nins sẽn da be a yamẽ wã ye. (Karm-y Luk 5:5-10.) La tõe t’a ra maana yel-wẽn-kãsemse. A Zeezi yãame t’a Pɩyɛɛr da yɛɛsdame, a sẽn da get t’a yaa pãn-komsem soabã yĩnga. La a Zeezi ra miime me t’a Pɩyɛɛr tõe n kell n yɩɩ ned sẽn maand sɩda. Rẽ n so t’a Zeezi yeel a Pɩyɛɛr t’a “ra le maan rabeem ye.” A Zeezi sẽn kɩs a Pɩyɛɛr sɩdã, naf-a-la wʋsgo. Rẽ tɛka, a Pɩyɛɛr ne a ba-biig a Ãndere basa b zĩmã yõgbo, n tũud Mesi wã n moond koɛɛgã. Rẽ kɩtame t’a Zeova ning-b bark wʋsgo.—Mark 1:16-18.

5. A Pɩyɛɛr sẽn tõog a rabeemã n sak n tũ a Zeezi wã, bark-bʋs la a paam-yã?

⁵ A Pɩyɛɛr sẽn tũ Kiristã, a bãnga bũmb wʋsgo. A yãa a Zeezi sẽn sãoog bãase, n dig zĩn-dãmb la a vʋʋg kũum menga. b (Mat. 8:14-17; Mark 5:37, 41, 42) Sẽn paase, a Pɩyɛɛr paama vẽnegre, n yã ziir ning a Zeezi sẽn na n paam Wẽnnaam Rĩungã pʋgẽ wã. A Pɩyɛɛr pa tol n yĩm rẽ ye. (Mark 9:1-8; 2 Pɩy. 1:16-18) Vẽenega, a Pɩyɛɛr sã n da pa tũ a Zeezi, a ra pa na n  yã bõn-kãens ye. A sũur tog n yɩɩ noogo, a sẽn pa bas t’a tags-kɛgã kɩt t’a kong bark-kãensa wã.

6. Yɩɩ nana t’a Pɩyɛɛr tõog a pãn-komsmã bɩ? Wilg-y y leoorã võore.

⁶ Baa ne a Pɩyɛɛr sẽn yã la a wʋm bõn-kãensa wã, a ra ket n tara pãn-komsem toor-toore. Bɩ d gom bãmb b wãn yelle. A Zeezi sẽn wa n wilg a sẽn na n nams to-to la a ki tɩ pids Biiblã sẽn da pĩnd n togsã, a Pɩyɛɛr gom-a lame. (Mark 8:31-33) A Pɩyɛɛr ne tẽn-tʋmdb a taabã wẽe no-koɛɛm naoor wʋsgo, n na n bãng sẽn yaa-a kãseng n yɩɩd bãmb sʋka. (Mark 9:33, 34) A Zeezi yõkrã yʋngo, a Pɩyɛɛr yɩɩ tao-tao n kɛ rao a ye tʋbr n fiuugi. (Zã 18:10) Yʋn-kãnga, rabeem yõka a Pɩyɛɛr t’a kɩɩs hal naoor a tãab t’a pa mi a Zeezi sẽn yaa a zoa wã ye. (Mark 14:66-72) Rẽ kɩtame t’a Pɩyɛɛr yãb ne sũ-sãang wʋsgo.—Mat. 26:75.

7. A Zeezi vʋʋgrã poore, bõe la a Pɩyɛɛr paam-yã?

⁷ A Zeezi pa raag a tẽn-tʋmdã sẽn koms raoodã n bas ye. A vʋʋgrã poore, a kõo a Pɩyɛɛr weer t’a maneg n wilg t’a nong-a lame. A Zeezi kosa a Pɩyɛɛr t’a ges a piisã yell ne sik-m-menga. (Zã 21:15-17) A Pɩyɛɛr saka ne yamleoogo. Rẽ n so t’a zĩnd Zerizalɛm Pãntekotã daare, n naag neb nins sẽn yɩ pipi n paam vʋʋsem sõng zaeebã.

8. Bõe la a Pɩyɛɛr maan Ãntiyos tɩ pa zemse?

⁸ Baa ne a Pɩyɛɛr sẽn paam vʋʋsem sõng zaeebã, a ra segd n kell n maoo ne a pãn-komsmã. Yʋʋmd 36, a Korney sẽn yaa ned sẽn da pa kẽ bãongã sẽn na n paam vʋʋsem sõngã zaeebã, a Pɩyɛɛr zĩnda be. Rẽ kõo kaset vẽeneg tɩ “Wẽnnaam pa bakd neda,” la tɩ bu-zẽmsã neb tõe n naaga kiris-nebã. (Tʋʋ. 10:34, 44, 45) Rẽ poore, a Pɩyɛɛr basa a yam n naagd bu-zẽmsã neb n dɩtẽ. Sã n da yaa pĩndã, a ra pa na n tol n maan a buud ye. (Gal. 2:12) La Zʋɩf-rãmb kẽer sẽn lebg kiris-neb ra tagsdame tɩ Zʋɩf-rãmbã pa segd n naag bu-zẽmsã neb n dɩ ye. Neb nins sẽn tagsd woto wã kẽer sẽn wa n wa Ãntiyose, a Pɩyɛɛr basame n pa le naagd saam-biis nins sẽn yaa bu-zẽmsã n dɩtẽ ye. Tõe t’a ra yɛɛsda a na wa n sãam kiris-neb nins sẽn yaa Zʋɩf-rãmbã sũuri. Tẽn-tʋmd a Poll yãa a Pɩyɛɛr sẽn maan bũmb ningã, n gom-a nebã fãa taoore. (Gal. 2:13, 14) Baa a Pɩyɛɛr sẽn le kongã, a pa koms raood n bas ye. Bõe n sõng-a?

9. Bõe la b yeel Zã 6:68, 69 pʋgẽ, tɩ wilgdẽ t’a Pɩyɛɛr yaa sɩd soaba?

⁹ A Pɩyɛɛr ra maanda sɩda. A pa bas tɩ baa fʋɩ kɩt t’a bas a Zeezi tũub ye. Wala makre, daar a yembre, a Zeezi yeela gomd t’a karen-biisã pa wʋm a võor ye. (Karm-y Zã 6:68, 69.) A Zeezi karen-biis wʋsg basa a tũubu, n pa gũ t’a wa wilg-b a gomdã võore, wall b sok-a a võor ye. La a Pɩyɛɛr pa maan woto ye. A sak n deegame tɩ yaa a Zeezi bal n tar “vɩɩm sẽn ka sɛt goama.”

10. Bõe la a Zeezi maan n wilg t’a kɩsa a Pɩyɛɛr sɩda? (Ges-y fotã me.)

¹⁰ A Zeezi me pa raag a Pɩyɛɛr n bas ye. A Zeezi yõkrã yʋngo, a ra miime t’a Pɩyɛɛr ne tẽn-tʋmdb a taabã na n zoe n bas-a lame. Baa ne rẽ, a Zeezi yeela a Pɩyɛɛr t’a kɩsa sɩd t’a na n teka yam n lebg n wa, la t’a na n kell n maana sɩda. (Luk 22:31, 32) A Zeezi bãngame tɩ “sũurã ratame, la yĩngã ka pãng ye.”  (Mark 14:38) Rẽ n so tɩ baa ne a Pɩyɛɛr sẽn kɩɩs t’a pa mi a Zeezi wã, a Zeezi pa raag-a n bas ye. A Zeezi vʋʋgrã poore, a vẽnega a meng ne a Pɩyɛɛre. Yaa vẽeneg tɩ wakat kãng t’a Pɩyɛɛr da yaa a yembre. (Mark 16:7; Luk 24:34; 1 Kor. 15:5) A Pɩyɛɛr sũurã sẽn da sãam wʋsgã, mams-y n ges-y rẽ sẽn keng a raood to-to!

11. Bõe la a Zeezi maan t’a Pɩyɛɛr bas a yam t’a Zeova na n gesa a yelle?

¹¹ A Zeezi yeela a Pɩyɛɛr t’a bas a yam t’a Zeova na n kell n teel-a lame. A Zeezi vʋʋgrã poore, a le maana yel-solemd t’a Pɩyɛɛr ne tẽn-tʋmdb a taabã yõg zĩm. (Zã 21:4-6) Sãmbg sẽn kae, yel-solem-kãng kɩtame t’a Pɩyɛɛr bas a yam t’a Zeova tõe n sõng-a lame t’a paam bũmb nins sẽn yaa tɩlɛ ne-a wã. Tõe tɩ rẽ kɩtame t’a Pɩyɛɛr tẽeg a Zeezi sẽn da yeel t’a Zeova na n gesa neb nins sẽn “rengd n baood Wẽnnaam Rĩungã” yellã. (Mat. 6:33) Rẽ kɩtame t’a Pɩyɛɛr lʋɩɩs koe-moonegã taoor n yɩɩd zĩmã yõgbo. Yʋʋmd 33 Pãntekotã daare, a goma ne raood n sõng neb tusa tɩ b sak koe-noogã. (Tʋʋ. 2:14, 37-41) A le wa n sõnga Samari neb la bu-zẽms neb tɩ b lebg kiris-neba. (Tʋʋ. 8:14-17; 10:44-48) Yaa vẽeneg t’a Zeova tũnuga ne a Pɩyɛɛr n sõng neb buud toor-toor tɩ b lebg kiris-neba.

12. D sã n wa maood ne pãn-komsem, wãn to la a Pɩyɛɛr kibarã tõe n sõng-do?

¹² A Zeova tõe n sõng-d lame tɩ d ra koms raood n bas ye. Tõe n yɩɩ toog tɩ d tõog n mao ne pãn-komsem, sẽn yɩɩd fãa, pãn-komsem d sẽn tar hal daar zãra. Wakat ninga, d pãn-komsmã tõe n wõnda a yaa toog n yɩɩd a Pɩyɛɛr dẽndã. La a Zeova tõe n kõ-d-la pãng tɩ d ra koms raood n bas ye. (Yɩɩn. 94:17-19) Wala makre, saam-biig a ye n da kẽed ne rap hal n kaoos yʋʋma, nand t’a bãng sɩdã. A toeema fasɩ n tũud Biiblã sẽn yet bũmb ningã. Baa ne rẽ, wakat ninga a maooda ne tʋls-wẽnse. Bõe n sõng-a t’a pa koms raood n base? Ad a sẽn yeele: “A Zeova kõt-d-la pãnga.” A paasame yaa: “Ne a Zeova vʋʋsem sõngã maasem, m bãngame tɩ m tõe n kell n tũu sɩdã sore. A Zeova tũnuga ne maam n maan bũmb toor-toore. La baa ne m pãn-komsmã, a kõt-m-la pãng wakat fãa.”

13. Wãn to la d tõe n dɩk a Pɩyɛɛr togs-n-taare, wa b sẽn wilg Tʋʋm 4:13, 29, 31 pʋgẽ wã? (Ges-y fotã me.)

 ¹³ Naoor wʋsg la a Pɩyɛɛr bas tɩ ninsaal zoeesã tõog-a, wa d sẽn yã wã. La a sẽn pʋʋs Wẽnnaam n kos raoodã, a tõog n basa a rabeemã. (Karm-y Tʋʋm 4:13, 29, 31.) Tõnd me tõe n tõoga d rabeemã. D gom bi-bɩɩg a ye sẽn da be Alemayn, Nazi-rãmbã wakatẽ yelle. A yʋʋr la a Horst. B sẽn da pẽdgd-a lekollẽ wã kɩtame t’a ra mi n sak n yeel tɩ “Heil Hitler!” La a Horst roagdbã pa zab-a ye. B naag-a lame n pʋʋs a Zeova n kos-a t’a kõ-a raoodo. A Horst sẽn teeg a Zeova la a paam a roagdbã sõngrã kɩtame t’a paam pãng n kell n yals kãn-kãe. A wa n yeelame yaa: “A Zeova zɩ n daag maam n bas ye.” c

14. Bõe la kãsem-dãmbã tõe n maan n sõng sẽn koms-b raoodã?

¹⁴ A Zeova ne a Zeezi yam pa na n wa yi tõnd tɩ b raag-d bas ye. A Pɩyɛɛr sẽn kɩɩs t’a pa mi a Zeezi wã poore, a ra segd n yãka yam sẽn tar yõod wʋsgo. A ra na n kell n yɩɩ Kiristã karen-biig bɩ, bɩ a na n komsa raood n base? A Zeezi kosa a Zeova t’a sõng a Pɩyɛɛr t’a tẽebã ra maag ye. A Zeezi togsa a Pɩyɛɛr t’a pʋʋsa a yĩnga, la a wilg t’a kɩsa sɩd t’a Pɩyɛɛr na n wa tõog n kenga a saam-biisã raoodo. (Luk 22:31, 32) A Pɩyɛɛr sã n da tẽeg a Zeezi goamã, tog n da kengda a raoodo. Tõnd me sã n wa segd n yãk yam bũmb sẽn tar yõod wɛɛngẽ, a Zeova tõe n tũnuga ne kãsem-dãmbã sẽn get d yellã, n keng d raood tɩ d kell n maan sɩd ne-a. (Efɛɛ. 4:8, 11) Saam-biig a ye sẽn yaa kãsem-soab hal sẽn kaoos t’a yʋʋr boondẽ t’a Poll modgdame n kengd a tẽed-n-taasã  raoodo. A yeta neb nins sẽn dat n koms raood n basã, tɩ b tẽeg a Zeova sẽn tak-b to-to sɩngrẽ wã n wa sɩdã pʋgẽ wã. Rẽ poore, a yet-b lame t’a Zeova nonglem-kãsengã yĩnga, a pa na n tol n daag-b n bas ye. A yeelame: “Mam yãa neb wʋsg sẽn da koms raood sẽn kell n modg tũudmã pʋgẽ ne a Zeova sõngre.”

15. Wãn to la a Pɩyɛɛr ne a Horst kibarã wilgd tɩ Matiye 6:33 sẽn yetã yaa sɩda?

¹⁵ A Zeova sẽn sõng a Pɩyɛɛr ne tẽn-tʋmdb a taabã tɩ b paam bũmb nins sẽn yaa tɩlɛ wã, tõnd me sã n lʋɩɩs a tʋʋmdã taoore, a na n gesame tɩ d paam bũmb nins sẽn yaa tɩlɛ ne-dã. (Mat. 6:33) Dũni gill zabr a yiib-n-soabã poore, a Horst sẽn yaa saam-biig ning yell d sẽn zoe n gomã ra rat n lebga so-pakda. La a ra yaa talg wʋsgo, tɩ kɩt t’a ra sokd a meng a sã n na n tõog n gesa a meng yelle, n kell n yɩ so-pakda. Bõe la a maan-yã? A yãka yam n na n mak a Zeova n ges a sã n na n sõng-a lame. Tigims sull yel-gɛtã kaagr sasa, a moona koɛɛgã semennã tõre. Semennã baasgẽ, bũmb n maan tɩ ling-a wʋsgo. Tigims sull yel-gɛtã kõ-a-la ãnvelop ne ligdi, n yaool n pa togs-a sẽn yaa ned ning n kõ ye. Ligdã ra seka a na ges a meng yell kiis wʋsgo, la a moon koɛɛgã. A Horst gesame tɩ kũunã yaa kaset t’a Zeova na n gesa a yelle. Rẽ kɩtame t’a lʋɩɩs Rĩungã yɛl taoor a vɩɩmã tõre.—Mal. 3:10.

16. Bõe yĩng tɩ tar yõod tɩ d bao n bãng a Pɩyɛɛr kibarã, la bũmb nins a sẽn gʋls a lɛta wã pʋsẽ wã?

¹⁶ A Pɩyɛɛr sũur tog n yɩɩ noogo, a Zeezi sẽn pa loog n bas-a wa a sẽn da kosã. Kiristã kell n sõnga a Pɩyɛɛr t’a yɩ tẽn-tʋmd sẽn maand sɩda, la sẽn kõ kiris-nebã mak-sõngo. D tõe n dɩka yam wʋsg a Zeezi sẽn sõng-a to-to wã pʋgẽ. A Pɩyɛɛr goma rẽ yell lɛta a yiibã a sẽn gʋls n tool pipi kiris-nebã tigimsã pʋsẽ. Sõsg ning sẽn pʋgdã pʋgẽ, d na n goma bũmb a wãn lɛt-kãensã sẽn tẽegd tõnd yelle, la d sẽn tõe n tũ rẽ rũndã-rũndã to-to.